Ai 2 di Dicembar stât si à vude a Udin la scree dal An Academic 2009/2010 de “Universitât dal Friûl”, relatôr uficiâl al è stât il za retôr, professôr Marzi Strassolt, che tal so referât al à tocjât i pont di fonde di vite di cheste nestre prestigjose istituzion: “Il contest dai prins agns Novante”, “La sielte de autonomie”, “La sielte de espansion e dal infuarciment”, “La sielte dal inlidrisament inte realtât furlane”, “La sielte de inovazion”. Dutis sieltis chestis che a àn puartât a un svilup e a une incressite dal ateneu dabon di grant rilêf.

    A un ciert pont Strassolt al à vût mût di sotliniât cemût che chê puartade indenant de Universitât di Udin e sedi une: “Inovazion di grande impuartance, che si riflet in maniere favorevul su la posizion che l’ateneu al à a livel nazionâl e rapresentade de gjeneralizazion des proceduris di valutazion. Chê di Udin e je une des primis sedis che e à metût in vore un Nucli di Valutazion, bielzà proviodût dal Statût dal 1993. E je une des pocjis che e à introdusût la valutazion des prestazions didatichis dai docents de bande dai students, obligatorie par ducj i insegnaments. E je la sede che e à introdusût formis di “contabilitât sientifiche” dai prodots de ricercje che a contribuivin ae formazion dai criteris di ripart des risorsis finanziariis tra i Dipartiments. In definitive e va considerade come une Universitât zovine sevi pe date de sô istituzion, sevi pe etât medie dal so personâl docent, ricercjadôr e tecnic-aministratîf, implantade par fâ front a une mission ben definide, cjapade dentri intun ambient social dulà che a cjapin la volte i valôrs dal fâ, dal operâ, dal costruî, come chel furlan, cussì di permeti di realizâ iniziativis inovativis che in altris sedi, insioradis di storie, no saressin stadis imagjinabilis”. In sumis une Universitât pardabon di gale!

    Di gale sì, ma no avonde par rivâ a parâsi des tampiestadis che i rivin aduès di Rome e di Triest. Juste apont il retôr Cristiana Compagno, simpri inte dade de scree dal An Academic, no à podût fâ di mancul di dî: “Chel che o vevin di fâ lu vin fat, cumò no podìn fâsi cjame di altris tais al belanç parcè di Rome no rivin bêçs avonde. Vadì che tal 2010 di venti jù a rivaran 7 milions di euros in mancul rispiet al a pene passât 2009. In chestis condizions al è naturâl che no ’nd è ciertece di rivâ a sigurâ il funzionament de didatiche, de ricercje e il risanament di belanç che si è sierât cuntun atîf di 500 mil euros”.

    Ven a dî che su chei 7 milions di euros che i spietavin la Universitât e faseve cont: a jerin part integrant dal plan di rientri dal deficit valutât in maniere positive dal ministri Gelmini za fa un an. Inmò a chest tai si zontin 12 milions di euros di sot-finanziament par an tant che vuê il vê di vê ingrumât intai rivuarts di Rome al rive a 100 milions di euros. Di achì il riclam dal retôr al ministri Gelmini e al governadôr Renzo Tondo, di premiâ e avantazâ i ateneus virtuôs e l’invît ai parlamentârs a impegnâsi a cjatâ la fate a cheste cetant intrigose situazion, co cence l’ossigjen di chescj bêçs la situazion finanziarie e devente dramatiche ancje parcè che a Udin dut ce che al jere di taiâ al è stât taiât. A partî dai coscj di funzionament par rivâ a chei dal personâl che, graciis al pensionament dai deans, al à vût un câl di circje 2,5 milions di euros.

    Ma alc che nol torne de bande dal retôr Compagno al è in fin saltât fûr. Par esempli lis declarazions che: “In chest moment di dificoltât economiche i acuarpaments cun Triest a son inevitabii, si ben che Udin nol intindi vendi la specificitât, ma confermâ cun fuarce la sô autonomie”. Al è evident che sot sot al va dilunc a sbuligâ il fûc de Fondazion uniche des istituzions universitariis regjonâls, cun Triest a fâ la part dal leon, o miei dal paron. Un progjet chest che i sta cetant a cûr al super-assessôr, super-triestin Alessia Rosolen. Cussì si e scomençât a fâ zirâ ciertis peraulis: colaborazions necessariis, model federâl e federazion tra ateneus, vantaçs dal cjatâ ponts di union. In fats la super-Rosolen intune declarazion al Gazetin dai 19 di Lui 2008 e pandeve cun clarece il so pinsîr: “I tais a varan di vierzi une riflession su la rêt universitarie in regjon par evitâ lis strassariis di risorsis. Par esempli, mi domandi se al sedi convenient destinâ fonts ae biblioteche de facoltât di jurisprudence di Udin, co a cincuante chilometris e je chê plui complete di Triest. Chescj bêçs a podaressin jessi doprâts in altri mût”.

    Dut chest discors su lis colaborazions, federazions al ven inmò plui ben sclarît intune interviste vignude fûr su la Vite Catoliche dai 7 di Novembar stât: “La Zonte regjonâl e à fats bogns i gnûfs criteris di ripart des risorsis a favôr dal sisteme universitari, une riforme - e sotlinie juste apont la Rosolen - che e vûl premiâ lis competencis e lis colaborazions tra i ateneus, promovint la ecelence, la competitivitât, lis relazions internazionâls e la capacitât di zovâ in maniere ative al svilup economic de regjon. La delibare e da fûr un milions di euros di dividi tra la Universitât di Udin, chê di Triest e la SISSA (simpri di Triest). In concret, par podê aurî a chescj fonts chestis trê realtâts a varan di presentâ dai progjets condividûts”. Al è evident che in chestis cundizions lis sgrifis des istituzions (poianis) universitariis triestinis a son prontis a gafâ il biel poleçut rapresentât de Universitât dal Friûl.

    In face a pericui di cheste sorte bisugne impegnâsi ducj par salvâ la autonomie de nestre universitât, parcè che, al è ben che ducj a vebin di memoreâlu, la presince di cheste istituzion in Friûl e prodûs un tornecont economic di circje 160 milions di euros ad an. Ma po no je dome une cuestion di bêçs, e je une cuestion di orgoi e di rispiet par ducj chei che si son batût pe sô istituzion, e prin di ducj Tarcîs Petracco, che ai 18 di Març dal 1971 al veve vût cûr di inviâ la racolte des firmis a favôr de istituzion di une Universitât, autonome, a Udin. Firmis che intai mês tragjics dai taramots dal 1976 a son rivadis a cifare “rivoluzionarie” di 125.000. Il rest e je storie e memorie che no intindin gran lassâ tibiâ! Bon An Gnûf 2010 a ducj Voaltris! (renzo balzan)