Udin - Nassude su prudêl de volontât popolâr, la facoltât di Midisine e Chirurgjie de Universitât di Udin il mês di novembar stât e à celebrât i soi vincj agns di vite. La cunvigne si è davuelte tal salon dal Parlament dal cjistiel memoreant la sufierte e coinvolzent trate che e à puartât ae sô istituzion e po ae sô afermazion come une des miôr tra lis facoltâts di cheste sorte dai ateneus talians, ma ancje cjalant indenant, a un avignî che si cjatarà a frontâ une sfide particolâr: chê de gnove aziende ospedaliere-universitarie.

   E je propite la storie di cheste facoltât, cul so inlidrisament sul teritori e la grande tradizion mediche che e sta ae fonde a fâ sperâ tal miei pal doman, cemût che al à sotliniât l'assessôr regjonâl Ezio Beltrame. “Cumò o smirin ae gnove, significant esperience: l'integrazion tra ospedâl e Universitât, smire di grande prospetive strategjiche e che no podarà che zovâ ae salût e ae cualitât dal servizi sanitari regjonâl”. La Regjon, al à prometût Beltrame, e sostignarà il svilup de facoltât inte preparazion di gnovis figuris di miedis, infermîrs e tecnics ancje a traviers i fonts de Finanziarie regjonâl 2007.

    Pal retôr Furio Honsell lis prospetivis che a son daûr a vierzisi a rivuardin une ricjadude fuarte su la comunitât furlane e il compit che si sta prontant al è chel di savê coniugâ, cuntun fuart sens di responsabilitât, didatiche, assistence e ricercje.

    Di “risultât storic” al à impen fevelât il sindic dal cjâf lûc furlan, Sergjo Cecotti, riferintsi a une facoltât che cui primâts che e je rivade a cuistâ e à viodût premiadis lis batais e la determinazion pe sô istituzion, dant di viodi che il Friûl al è inmò une tiere di int positive e valent.

“E di front aes polemichis di cjampanili cun Triest che ogni tant a saltin fûr - al è juste apont rivât insom il sindic - mi vignarès di invidâ l'assessôr regjonâl a no dismenteâsi di memoreâ che la facoltât di Midisine di Udin e je al prin puest in Italie di cinc agns in ca”.

    Un primât “di tignîsi in bon di front a chei altris”, al à zontât la sô prionte il president  de Provincie Marzi Strassoldo: “Cuant che ai laureâts di chês altris universitâts ur cjaparan la volte i laureâts in chê di Udin, cressude ancje pal fat che al è un organisim zovin che al à fat cont une vore su la ricercje, alore il Friûl al podarà fâ il salt di cualitât”.

    A Udin la integrazion ospedâl-universitât e puartarà a vê risultâts cetant positîfs secont Eugjeni Gaudio, associât de Conference permanent dai presidis des facoltâts di midisine, “par vie che a esistin dutis lis condizions: dimensions a misure di om, cualitât de formazion, clime costrutîf, caratar di serietât e impegn tipic dai furlans”.

    La cunvigne pai vincj agns, denant des conclusions dal preside Massim Politi, e je po daspò lade indenant cu lis testemoneancis dai docents fondadôrs de facoltât, rapresentâts da Francesc Ambesi Impiombato, e dai prins laureâts. Carli Salati, oculist, al à memoreât cemût che si sedi partîts dal nuie, di une realtât dute di inventâ: une rimembrance ancje a non di Zuan Barillari, Robert Marinig, Isabele Pegoraro e Massim Santuz, i dotôrs in midisine di Udin dal mês di novembar 1992. (pa.le.)



 

 Chei agns di batais in Friûl e tal Parlament

Udin - Triest nol voleve molâ e la bataie e je stade plui dure di ce che si varès podût scrupulâ par tradusi in concret lis aspirazions di un popul che cun ferbince al veve volût la “sô” universitât, ancje come riscat al drame dal taramot.

    La trate di fadie e di batais che e à cjapât i furlans pe  istituzion dal ateneu dal Friûl e je stade memoreade dilunc la cunvigne pal inovâl dai vincj agns de istituzion de facoltât di Midisine dai docents fondadôrs, dai politics che plui si son batûts e di chei che a contarin chescj acjadiments, o sei il president dal ordin regjonâl dai gjornaliscj Pieri Villotta.

    Al à scomençâ il nodâr Marino Tremonti a ricostruî l'impegn a flanc dal mai dismenteât professôr Tarcîs Petracco, fondadôr tal 1972 dal Comitât pe universitât dal Friûl “par cjatâ la fate ae indiference dai politics e ae ustinade contrarietât di Triest”, la racolte di 125 mil firmis, il fondamentâl sostegn de Glesie Furlane.

    Il proviodiment al puarte la date dal 1977, di pueste metût dentri, al à ricuardât l'onorevul Arnalt Baracêt, deputât dal 1976 al 1987, “inte seconde leç pe ricostruzion dal taramot, un impegn dulà che ducj i parlamentârs furlans di chê volte, sevi di maiorance che di oposizion, superant ancje lis resistencis de comission belanç che e veve un president che al jere stât convint dai deputâts triestins a votâ cuintri”.

    Ma za prime di chescj acjadiments il Friûl al veve rivendicât la istituzion dal so ateneu e soredut de facoltât di Midisine, cemût che al à contât il gjornalist Villotta: “Chê lote e à segnât un mudament fondamentâl tal mût di jessi dai furlans; numerosis a son stadis lis manifestazions tal 1965 e tal 1966 intun Friûl che denant trat nol jere gran usât a protestâ intes placis. E il 1968, achì di nô al à denant trat significât une rivendicazion pe incressite dal teritori. Po, dal taramot e je vignude la sburtade decisive”.

    E sarà la leç 828 dal ’82 a destinâ ae universitât di Udin la seste e setime facoltât, o sei Siencis economichis e Midisine e chirurgjie, cemût che al à motivât Franc Frilli, retôr dal nestri ateneu dal ’83 al ’92 e Pauli Fusaroli, component dal comitât tecnic coordenadôr de facoltât.