La tradizion dal "Tàlar" di Glemone e la sô divignince

 Glemone - Pe fieste de Pifanie miârs di personis a son riclamadis a Glemone par asisti a une usance cetant antighe: ta chê dade a ricuart dal don fat dai Tre Res a Jesù bambin apene nassût dute la comunitât, rapresentade dal sindic, e ufrìs justeapont in don un talar d'arìnt a la sô Glesie tes mans dal arcipret.

    Ma cetant èse viere cheste tradizion, e cuâl podarajal jessi il so profont significât?

    Cjapant in considerazion la seconde part de domande, al semee pôc crodibil - purpûr ricuardant che par plusôrs etis, valadì dal novesim secul e fintremai al 1420, il Ducât dal Friûl al fo rezût dal Patriarcje di Acuilee, vassàl, par chel che s'inten il podê temporâl, dal Imperi - che l'at al vebi a significâ, cemût che a volevin cierts studiôs, la somission dal podê civîl de Magnifiche Comunitât a chel glesiastic.

    Al semearès invezit plui probabil che l'ufierte dal don a la Glesie locâl, rapresentade dal so majorent, il plevan, nol sedi âtri che la riproposizion dal at dai Tre Res, cussì presìnt te tradizion acuilejês in generâl, e glemonasse in particolâr, testemoneade dal rest propit su la façade dal Dom des statuis dal mestri Zuan Giglio.

    Sul cont invezit dal cuant che scomençà a cjapâ pît cheste tradizion si varà di colegâsi a un'âtre tradizion, ch'e vûl che la messe di Pasche Tafanie e vebi une palês divignince de ete di mieç. Dal sigûr in chei agns no si varà doprâts i talars di Marie Taresie, ma no mancjavin i solts patriarcjins, o venezians, o ben inmò carintians che a podessìn davuelzi une avuâl funzion.

    Par chel che s'inten i riferiments storics bisugne impen fâ riferiment a ce ch'al à vût scrit pre Valantìn Baldissera che, sul scomençâ dal secul vincjesim (1900), al à fat vignî fûr de stamparie un studi sui "Rituâi e su lis custumancis par antîc in ûs te Plêf di

Sante Marie di Glemone", dulà che si fevele dal talar tant che une monede doprade tal rituâl di Pifanie a Glemone dilunc il timp da l'aministrazion austriache. Un tant al sarès sucedût daspò il tratât di Cjampfuarmit (1797), o ben daspò il 1814 a la fin des vueris napoleonichis. Al è pussibil ch'al sedi stât propit cussì, ma al po’ ancje stâj che la monede austriache, parvie dal preseament ch'e gjoldeve tal at ch'e vignive batude pa l'imperadore Marie Taresie (1780), e fos stade doprade ancje tai possediments de Serenissime, denant che la Republiche di San Marc e colàs e il Friûl al passàs sot l'aministrazion di Cjase d'Austrie.

    Dutcâs il Baldissera nol sclarìs nuje de storie di cheste usance, lassant nome intindi ch'e podeve sei plui antighe dal istès talar.

    Zà fa un pôs di agns Marie Marin Vale, davuelgìnt une ricercje alì dal Archivi di Stât di Udin, 'e à cjatât tra lis cjartis dal nodâr Gio Maria Rossi, atîf a Glemone te seconde mitât dal secul diesim-otâf, une testemoneance di doi capelans dal Dom che tal 1790 a sustignivin che siguramentri di uns trent'agns i rapresentants de Magnifiche Comunitât , il dì di Pasche Tafanie, a vignivin incensâts : "doppo che si portarono all'altare al baccio della pace ed a fare offerta al reverendissimo signor arciprete".

    Cheste testemoneance si palêse di grant interès par dôs resons: deant trat parvie che conferme che fintremai dal 1790 ducj i cuatri i provedidôrs de Comunitât a puartavin a Pifanie lis ufiertis (ognidun la sô) al arcipret e che a bussavin la pâs - une biele opare di oresinarie ufierte al diacun -, e po parvie ch'e sclarìs tai detais i motus de cerimonie che in pratiche a son restâts avuâi fintremai ai nestris dîs, cu la difarence che l'ufierte vuê e je puartade a l'altâr nome dal sindic.     

TAI  PRÂTS  DE  CULTURE  FURLANE

L'Onorande Companie dai Cantôrs di Çurçuvìnt

Çurçuvìnt - Tal mês di novembar stât, te Plêf di San Martin a Çurçuvint, al è stât presentât il libri e il CD dediât a "L'Onorande Companie dai Cantôrs de Plêf di S. Martin" realizâts par cure di Chiara Grillo e Celestin Vezzi, e pes produzions Nota cd-book. Si trate di un'opare cetant interessant parvie ch'e nus conte de storie  e dal repertori dai cjants di une des cantoriis di glesie plui viere di dute la Cjargne, senò fintremai dal arc alpin orientâl. Lis sôs originis justeapont a van dal sigûr plui indaûr dal 1761, date presìnt sul "Libri di diviersis terminazions dai Siôrs Cantôrs", dulà che si à iniment une riorganizazion de Cantorie, cundidì ch'e esisteve bielzà denant trat. Te semblee dai 24 di març dal 1761, ch'e vierç il "Libri di diviersis terminazions", a son stabilîts dai ponts cetant impuartants pe vite de confraterne rivant a definî ancje des indicazions sul cont dal statût cui dirìts e i dovês che i Cantôrs s'impegnavin a rispietâ, no dome come oblig morâl, ma ancje par no scugnî pajâ une penâl in bêçs.

    Di cheste opare e je sore il dut interessant la part curade di etnomusicolighe dr.sse Chiara Grillo, ch'e je une tra lis plui preparadis  ricercjadoriis e  studiôsis  di chest particolâr setôr di studis. Des sôs notis o vignìn cussì a savê che il repertori da l'Onorande Companie al è metût adun unicamentri di cjants di glesie su tescj in lenghe latine ch'a son stâts tramandâts a vôs di cantôr in cantôr a traviers i secui. In precisis ocasions i cjants dal repertori si zòntin a la liturigie trasmetìnt dai valôrs tradizionâi cetant impuartants pe comunitât.

    I dodis cantôrs ch'a mètin adun l'Onorande Companie, siben che no àn dibot nissune preparazion musicâl, a son dutcâs i depuesitaris di un  impuartant patrimoni di cjants,  cjapâts su par imitazion e in seguitîf rinovament, une carateristiche cheste presint te culture orâl. Infats, se la tradizion e van dilunc a conservâsi par mert de cantorie, la mancjance di une notazion musicâl dal repertori e compuarte dilunc il timp che si vadi in cuintri a dai piçui mudaments tes esecuzions dai istès cjants. Chescj mudaments a rapresentin dal rest la naturâl evoluzion de tradizion, dal so seguitîf procès di riproposizion.

    Al è ancjetant impuartant sotlineâ che la tradizion orâl si è leade cun chê scrite tal moment che cheste ultime e ven inventade e 'e jentre a fâ la sô presince te storie. Sore il dut par chel che s'inten il repertori sacri (di glesie), la pagjine scrite 'e à zovât su la formazion e il conseguent slargjâsi de culture orâl a traviers i cetant preseôs codiçs liturgjics. Di chê âtre bande al è vêr ancje il contrari : cundidì che i tescj trascrits su la cjarte a palêsin il condizionament de tradizion orâl su la forme scrite de musiche.   

 Chestis dôs formis di slargjâ la culture no son cussì di considerâ come indipendents, ma ben invezit come colegadis tra di lôr. Parvie de lôr stesse nature, lis dôs tratis di trasmission scrite e orâl a puedin jessi identificadis, sevi pûr in maniere aprosimative, cu lis modalitâts cussì clamadis "popolâr" e "alte" de tradizion popolâr.
Il compact disc ch'al compagne il libri si vierç cun nûf tocs ch'a divegnin de liturgje dai defonts, regjstrâts dilunc che si stave davuelgìnt l'ufizi liturgjic. Ai cantôrs si zonte la int presìnt in glesie, cussì di vê une uniche vôs di prejere, chest - seont Chiara Grillo - al da di viodi che il repertori al è inmò vîf e sintût de comunitât. Lis melodiis leadis a chest rituâl a son tra chês restadis plui marcadis te memorie des personis, si po’ scrupulâ parvie de fuarte clime emotive che chest particolâr moment liturgjic al rive a creâ. A vègnin podaspò i cjants de "Messe Vecje" ("Kyrie", "Gloria", "Credo", "Agnus Dei"). I prins cjants a son stâts pregistrâts "dal vîf" te Plêf di San Martin ai 2 di novembar dal 2001. Chei de  "Messe Vecje" impen te glesie di Darte ai 11 di març 2001.

SCRITÔRS  E  LIBRIS  IN  MARILENGHE
Laudìn il Signôr te nestre lenghe

Al va daurman sclarît che la leç n.482/99 no à cjapât in considerazion i problems di caratar liturgjic e eclesiastic: tra il Stât italian e la Glesie catoliche al è in vôre il regim concordatari, ossei ognidun al è indipendent e sovran tal propi ordin. Cundutachel cu la fate buine de leç su lis minorancis, ch'e à icognossût al furlan la dignitât di lenghe e, su la fonde di chest at, la Conference Episcopâl italiane - secont di ce ch'al proviôt il Dirìt canonic -, 'e à podût dâ la sô aprovazion al test dal "Lezionari festîf", ch'al è il libri ch'al cjape dentri la "Peraule di Diu". L'at definitîf di cheste trate al è stât davuelt de Congregazion pal cult divin e la dissipline dai Sacraments de Sede Apostoliche che, cul decret n.127/01, e ricognosseve finalmentri che il furlan al è ancje lenghe de Glesie.

    No si po’ parâtri no memoreâ che bielzà prime dal "Lezionari liturgic" la Conference Episcopâl italiane e veve dât il so consens pe publicazion in marilenghe de Bibie (1997): ma, in materie di cult, a mancjavin i supuescj juridics. No podevin jessilu ni la leç n.546/77 de ricostruzion dal Friûl taramotât, ni la leç regjonâl n.15/96, dulà che il furlan al jere purpûr ricognossût come lenghe: al coventave che il Stât al disès la sô uficialmentri e chest al è sucedût dome cu la leç dal 1999.

    Sun chest cont e mèrtin memoreadis lis peraulis pronunziadis tal novembar dal 1999 dal pape Zuan Pauli II, che, te sale Nervi, indreçansi ai furlans presints, al disè: "Il ferment dal Vanzeli al à prudelât lis tradizionâls virtûts dal vuestri popul furlan, che te fede cristiane al à infuartît la sô identitât, metint adun une specifiche civiltât e culture, ch'e à  te lenghe furlane in tun ciert mût la sô anime". Chestis peraulis a van centadis tun document di caratar ecumenic vignût fûr denant trat, ossei l'Encicliche "Centesimus annus", dulà che il pape al veve scrit: "La culture des nazions e consist tal impegn di jessi fedêi a la propie identitât, ossei a chel patrimoni di valôrs tramandâts e cuistâts ch'a metin adun il tiessût culturâl di un popul".

 

Un lunc, ma doverôs preambul, denant di tratâ di un libri vignût fûr di resìnt ch'al à par titul "Laude il Signôr anime mê", metût adun di Gjeme Nodâl-Chiapolino. Si trate justeapont di un libri di prejeris te nestre lenghe. Libri diviers dai libris di glesie ch'o sìn usâts a vê pes mans, parvie che dentrivie o cjatin testemoneât il mût di preâ sclet de nestre int. Un mût di rapuartâsi cul divin (Diu, Spirtussant, Madone e Sants) dut particolâr, bon di inmaginâ  la divinitât secont aspiets e sintiments dibot umans. Inalore i nestris vielis a vevin cûr di dâ su: "Jo pôi i pîs par tiere,/ no sai s'a rivi a sere,/ rivâ o no rivâ/ trei gracies voi domandâ:/ confession, cumunion, vuelis sant./ Mi racomandi a Diu,/ Pari, Fî e Spirtu Sant./ Amen." Prejere sempliç, ma di grancj significâts, cence bisugne di lâ a imberdeâsi te teologie.

I nestris vielis a crodevin e a jerin sigûrs te lôr fede, si fidavin de persone di Crist, e ancje de sô peraule pandude a traviers dal vanzeli. A crodevin e a jerin libars. Libars di doprâ dut chel che ur faseve dal ben, dut chel che, in cualchi maniere, ur zovave par podêsi svissinâ a Lui; ancje la sempliç, sclete e francje lenghe furlane ch'e je buine di dî  cence cumplicazions, cence retorichis ce che te semplicitât da l'anime o vin ducj intorsi.

Cun Diu nol ocôr contâle masse cumplicade, nol ocôr cirî peraulis che no si dòprin te vite di ogni dì, si po’ dîsi propit cu la nestre lenghe di ogni dì ce ch'o vìn ta l'anime. Cun chê stesse lenghe o podìn aduncje preâ o ben celebrâ l'ultime cene ch'al à celebrade Lui; ancje Lui in chê sere al à doprât la sô marilenghe, chê ch'al doprave su lis placis di Jerusalem opûr ventiatôr pai borcs de Galilée.

    O sìn aduncje cetant agrâts a Gjeme Nodâl pe sô vôre e pe sô fadie tal meti adun chest libri preseôs, parcè ch'o sìn sigûrs che ciertis vieris prejeris te nestre lenghe a saressìn  ladis pierdudis, e chest al sarès stât pardabon un pecjât mortâl. Gjeme e je une poete e une scritore vere, coerent, puntiljôse tal so scrivi, un esempli dulà spielâsi par tancj che invezit a stan doprant il furlan dome par fâsi biei e par comparî, ma cence prodûsi nuje di concret, nuje ch'al zovi pa l'incressite lenghe, nuje ch'al vali la pene di jessi publicât tune antologie degne di chest non. Ma si sa, ogni vassiel al bute il vin ( o la puinte) ch'al à. Graciis inmò Gjeme, par chest grant e preseôs regâl che tu nu âs fat.