Trent - Cul sostegn economic de Provincie Autonome di Trent, e par cure di Lucia Maccani e di Marco Viola, il mês di Març stât al è stât publicât il volum “Comunicare l’identità - L’uso dei media nelle minoranze linguistiche”, che al cjape adun i ats de cunvigne “Misurare la comunicazione dell’identità nei media” che si è davuelte ai 6 di Otubar dal 2006 a Trent, inte dade dal “Forum Nazionâl pes Minorancis Linguistichis - Comunicâ la identitât”. Si trate juste apont dal cuint volum de golaine “Cognossi lis Minorancis Linguistichis”.

    Al scrîf inte jentrade il president de Provincie Autonome di Trent, Laurinç Dallai: “Lis comunitâts di minorance linguistiche a àn, pe lôr stesse nature, une storie e une identitât propie che a difindin cun orgoi e passion. Di conseguence a presentin problematichis e dibisugnis tra di lôr diferentis, ma unidis parie de esigjence di competi cuntune realtât esterne simpri plui globalizant, in tiermins culturâi e sociâi. Un procès azardôs che inevitabilmentri al prodûs pericui di omologazion, se no di disparizion, des “piçulis realtâts” storichis-culturâls locâls. Lis culturis “uficiâls” a disponin di imprescj mediatics potents e simpri plui slargjâts sul teritori, che lis comunitâts linguistichis di minorance impen no puedin vê. Lôr, che ur vadi ben, a disponin di cjanâi dedicâts, che a siervin a fâ cressi il sens di apartignince e a infuartî la identitât, ma che no son dal sigûr in podê di sostignî la fuarte stocade di une comunitât globâl che dut e cjape dentri e dut e vuaie. Al devente partant fondamentâl prontâ une strategjie de comunicazion che, di une bande e incressi lis capacitâts di slargjâ la comunicazion dai media e, di chê altre, e fâsi cressi la capacitât di dialic cul sisteme de comunicazion globâl. Un ecuilibri che al po, no dome infuartî lis minorancis, ma ancje fâ cressi la capacitât di percezion e di ricognossiment de bande des comunitâts plui slargjadis  dulà che lis stessis a son insedadis. Sun chest cont e je significative la esperience des comunitâts di minorance linguistiche che a vivin in Trentin, che a àn vualmât di timp in ca la impuartance di mantignî une alte visibilitât, a traviers l’ûs dai media e strategjiis di comunicazion indreçadis e ridusi lis spaltadis culturâls e a moltiplicâ i spazis di prossimitât. Une situazion par tancj aspiets privilegjiade, rindude pussibil dal speciâl Statût de Provincie Autonome di Trent che, inte comun cente regjonâl, e à metût tra lis propiis smiris fondants la tutele e il svilup dai Cimbris, Ladins e Mochens che a vivin in Trentin”.

    Mentri la curadore Lucia Maccani e à sotliniât che: “Chel che dut câs si è palesât in maniere clare al è che no si po rinunciâ a zuiâ la cjarte de comunicazion sevi al interni che al esterni, savint che bisugne cjatâ un delicât ecuilibri tra il mantignî vive la anime de minorance che cjale a se stesse e dutun in chel a mantignî vitâl il leam, e aduncje il ricognossiment, che al po vignî dal difûr. Dal rest no esist une soluzion uniche e valide par ducj ni sul plan dai contignûts, ni sul plan dai mieç metûts in vore, ma chel che al è sigûr al è che e sierf une incressite di ducj i doi i gjenars di comunicazion in maniere di fâ cjaminâ cun gjambis plui siguris sevi la comunitât linguistiche di minorance sevi il ricognossiment esterni che al diven dal teritori plui slargjat dulà che cheste ultime e je presint. Al covente, in sumis, che e sedi garantide une continue cuarde tindude di dutis dôs lis bandis, dulà fâ cjaminâ il miei de convivence des tantis diviersitâts che a rindin ricje la nestre vite”.

    Il volum “Comunicare l’identità - L’uso dei media nelle minorance linguistiche”, in version bilengâl (talian/inglês) al è penç 300 pagjinis e al cjape dentri i contribûts di: Eleonora e Silvia Negrotti, Marcella Schmidt di Friedberg, Glyn Williams, Domenico Morelli (Prime part / Lis riflessions); Prospero Moran, Maria Gonzales Gorosarri, Bingen Zupiria, Geoge Jones, Onno Falkena, Bojan Brezigar, Davyth Hicks (Seconde part / Lis esperiencis in Europe); Vittorio dell’Aquila, Carlo Corazzola, Teresa Battisti, Stefano Nicolussi Galeno, Silvano Ploner (Tierce part / Lis esperiencis in Trentin Sud Tirôl); Alberto Tafner (Conclusions).

    Propite di Alberto Tafner e je cetant interessante la conclusion: “Cuant che o rezevi i servizis gjornalistics de Rai di Bolzan, e je stade rinovade la convenzion tra Stât e Ent Radiotelevisîf par chel che al inten la minorance ladine. Po ben la dificoltât maiôr no je stade chê di creâ un curt telegjornâl cuotidian che prime no si veve (il TRAIL di cumò), ma ben invezit chê di cjatâ gjornaliscj di lenghe ladine che a vessin la professionalitât domandade par podê davuelzi cheste sorte di impegn. Ma tornìn al teme de comunicazion, ancje parcè che o soi de opinion che si vebi di insisti cetant su chest argoment. O soi persuadût che la comunicazion, in cualsisei maniere si la fasi, e vebi dut câs di davuelzisi simpri di dôs bandis. Chest al permet di puartâ un maiôr numar di informazions dal interni (dai grups di minorance) viers l’esterni e vicevierse, seondant cussì il dialic, il confront e la cognossince. Dut chest tignint cont dai limits ogjetîfs, come chel dai numars ridots e de conseguent minôr cualitât difondude, ma inte cussience che plui informazion e zire plui si po alçâ la cualitât de vite.

    In fin, o vûl vê iniment purpûr lis dificoltâts di comunicazion che mi semee che a esistin tra i Ents e lis Associazions che si ocupin dai temis des minorancis, cul sisteme politic/aministratîf in gjenerâl. A voltis si à la impression che il dialic tra chescj sogjets si davuelzi dome su cuestions finanziariis: di une bande si domandin contribûts su la fonde des normis e des leçs prontadis di pueste e di chê altre a vegnin concedûts (plui o mancul) cence par altri interessâsi masse dai progjets che a varessin di stâ daûr aes richiestis. In definitive, mi pâr scuasit che al esisti un rapuart ae Pilât vie, dulà di une bande si lavisi la cussience cu la concession dai bêçs e di chê altre si fâs ancjetant inventantsi progjets smirâts, ma che a son cence un disen complessîf. Vadì che al mancje un seri dialic tra lis parts, che si contentin di difindi e di conservâ l’esistint, cul riscjio che si vebi di rivâ ae museuficazin no dome dai ogjets e dai lûcs, ma ancje des personis. In chest câs non coventarès plui nissune comunicazion, ma dome un custodi par dâ fûr i biliets di jentrade di cheste o chê altre valade, une volte logade des minorancis”. (edelweiß)