Chest libri di Sergio Gervasutti al jes a pocje distance di un altri libri di interès nostran: “Il Friuli dei colonnelli”, di Luciano Provini. Ducj i doi  a iluminin moments di storie, soredut di storie politiche, e a rapresentin struments preseôs par aprofondiments e meditazions. Ma a son ancje une vore diviers. Chest al è un libri di sintesi, chel altri di analisi; il prin al è une panoramiche che (par tasê dai precedents) al cjape dentri un secul; il secont une cronistorie di cincuante mês a cjaval dal vot di setembar 1943.

    Sigûr: chest “Friulani” di Gervasutti al è indreçât soredut ai no furlans. A cui che nol sa nuie di nô, letis chestis 130 pagjinis, al vignarà a savê che no vivin intal mieç de nêf e che no sin ostrogots. Ma ancje tancj di nô a varan lis ideis un pôc plui claris sul cont di chel che o sin e di chel che no sin, oltri ai slogans fabricâts a ûs e consum dai “sorestants”, come “salt, onest, lavoradôr” o “alpin jo mame”.

    Il Friûl al è stât tiere di plusôrs invasions, e Gervasutti naturalmentri lis ricuarde. Forsit nô no ricuardin avonde (lis cjossis brutis si cîr di dismenteâlis) lis dôs ultimis tremendis invasions dal 1917 e dal 1943, che a àn lassât il segn di feridis che a stentin a vuarî e anzit no son inmò vuaridis dal dut. Il Friûl al è stât une sorte di servitût di passaç par cui che al voleve lâ viers jevât o ben viers bonât,  cence domandâ il permès a cui che sun cheste tiere al viveve, batint lis olmis des spassizadis di Atile. Par rivâ a Trent e a Triest, cui che al paià di plui no forin Trent e Triest, ma Udin, o sei il Friûl. O rimandi aes cifaris che si lein ancje achì, e aes cartulinis cui monuments ai muarts in vuere in ognidun dai nestris paîs, cussì fis di nons tra acuilis e colonis crevadis. O vìn vût il plui alt numar di vuarfins di vuere.

    La feride tra il 1943 e il 1945 e je la plui resinte. a mi mi semee îr ( e je une ilusion volude de etât). Ma ancje cui che al à vivût chês zornadis al varà let e conservât inte memorie almancul doi nons su ducj: “Adriatisches Künstenland” e Porzûs.

    Jo no soi ni un storic, ni un sociolic e ni un politic (al massim o sarès un leterât). Cualchidun mi à invidât achì, o crôt, parcè che o soi un furlan amant dal Friûl che consideri la mê patrie (cence escludi chês altris).  “La furlanetât e je une condizion dal spirt”, o lein achì inte cuviertine. Ce varessio di dî: l'amôr di patrie al è un sintiment (e daûr al ven il resonament), e al amôr no si comande. In particolâr mi stan a cûr lis vicendis - che l'autôr revoche par slambris - che a son sucedudis daspò dal 1945: chês che a rivuardin l'auspicade nassince  di  un  Friûl  regjon,  come  che  al  varès   volût Tizian Tessitori (precursôrs Josef Girardini e Pacific Valussi); regjon che po e je nassude invezit cun doi cjâfs, un di chescj stramât ae origjin. E je nassude cussì daspò une lungje anticjamare, slungjade in maniere seguitive par scuasit vincj agns; ma nol è achì il câs di disputâ. O dîs dome che, se e je nassude cussì, la responsabilitât e je denant trat nestre: parcè che dal nestri o varessin vût di disponi principalmentri nô, cence par chest fâ la vuere a di nissun.

    E achì o podìn ripiâ il discors sui merts e sui dituarts di nô furlans, che (dacuardi cence savêlu cun Francesc Guicciardini) o vìn miei ocupâsi dal nestri “ben particolâr”, lassant a altris lis grandis incombencis. A’nd è un sôl che al pense - a disevin une volte -, e LUI (dutis letaris maiusculis) al baste par ducj. Il nestri ben particolâr, in dì di vuê, al è la cjase e la machine.  O dismenteavi la femine e la famee. Se po a son dôs (o dîs la cjase e la machine) miei. “Il furlan nol è puartât a  riscjâ cui sa cetant in economie”, al scrîf achì il nestri autôr, “al gust de imprese, ae sfide de concorince. A part lis mertevulis ecezions, al à simpri dât di viodi lis carateristichis dal sotan. E cundut achel cuant che al drece la schene al palese lis sôs cualitâts”. Raimont di Strassolt al à definît il furlan “nordic, contadin, cristian, di frontiere”. Che al sedi stât dut chest, no’nd è dubis; che lu sedi inmò, tocje dî forsit. E nol è di ce indalegrâsi, viodûts i modei che a stan inspirant lis gnovis gjenerazions. Il sens civic e il sens sociâl no son cui sa ce vîfs. Forsit e sarès ore che o fasessin un pôc di esam di cussience. Za fa vincj e plui agns un tâl che no vûl nomenâ, parcè che o soi jo, al scriveve un articul, “Fevelin mâl di nô”, invidant juste apont a cjalâsi intal spieli par tirâ fûr i nestris difiets, e di alì tornâ a partî pussibilmentri libars des imagjinis retorichis che a àn fat il lôr timp.

    No crôt di jessi cjapât par un amì che al regale un soflet a un amì (dal rest i soflets no siervin gran). Chest libri al dovarès jessi dât fûr in dutis lis scuelis, anzit al varès di jessi adotât come test, parcè che i furlans e i no furlans a puedin cognossi i furlans. Forsit al zovarès plui di tantis storiis specialistichis e di sterps manuâi. (Zuanfranc D'Aronco)

La Bibie inte lenghe dai Ladins des Dolomitis

San Martin de Tor / St. Martin in Thurn (Bz) - Intal mês di mai stât, par cure dal Istitût Culturâl Ladin “Micurà de Rü”, al è vignût fûr de stamparie Longo di Bulsan un volum cetant impuartant, o sei la “Bibia - Neuf Testamënt”. L'opare, che e je stade voltade intal ladin des Dolomitis, e veve vût denant trat l'aprovazion eclesiâl dal vicjari gjenerâl de diocesi di Bulsan-Persenon (Bozen-Brixen) bons. Josef Matzneller. Inmò, la vore di traduzion e sistemazion dai tescj e je stade davuelte di Cristl Moroder, il lavôr di verifiche par cont de Curie lu à fat Toni Sotriffer, mentri l'adatament e la sorevision ortografiche lu à curât Karim Comploj, dal Istitût “Micurà de Rü”. Al reste di memoreâ infin Paolo Anvidalfarei, che i à stât daûr ae impagjinazion e ae grafiche.

 

La fede e lenghe intes vals ladinis
 

La publicazion de Bibie inte lenghe dai ladins des Dolomitis e fâs fâ un biel pas indenant al probleme di puartâ la lenghe “de int”  inte liturgjie des diviersis cerimoniis di glesie. Ancje parcè che cussì nol è simpri stât, anzit.

    Par esempli, suntune linie ideologjiche in cualchi misure avuâl a chê presint in dì di vuê in part de culture todescje dal Sud Tirôl si jerin metûts, daspò la seconde vuere mondiâl, intai rivuarts de Val Gherdene i sorestants eclesiastics, prudelâts in chest dai consei parochiâi impegnâts, in maniere ferbinte, a sostignî la lenghe e la culture todescje zaromai presints in maniere slargjade in cheste val.

    A proseguiment di une opare di todescjzazion scomençade inte seconde mitât dal XIX secul, l'ûs dal ladin-gherdenês al è stât e al è inmò in dì di vuê bandît a vantaç de lenghe todescje intes glesiis de Val Gherdene, soredut a Urtijëi/St. Ulrich/Ortisei. Al sorevîf l'ûs dal talian pai turiscj di lenghe italiane: il ladin si lu dopre dome cuant che propit no si pò fâ di mancul. Vadè che o sin in presince di un bon esempli di cemût che si puedi, ancje preant, sgjavâ la fuesse al ladin.

    Cundut achel intal mês di setembar dal 1992 il vescul di Persenon/Brixen al à indreçât a ducj i siei plevans une vive racomandazion sul cont dal rispiet dal eventuâl pluralitât linguistiche intes parochiis dulà che a funzionin. Letare che dut câs e veve inviât no pocjis critichis inta chei ambients politics gherdenês che a son plui indreçât a prudêl dal todesc.

    Divierse e je invezit la clime che si asede intai ultins timps in Badie e a Mareo, dulà che tradizionalmentri intai ultins secui la liturgjie intes glesiis e je stade davuelte in lenghe taliane. A conferme di ce che si à vût iniment denant trat si pò memoreâ la publicazion di un libri liturgjic di preieris e cjants, prudelât dal Decanât di Badie: “Ciantun y priun deboriada” (Cjantin e prein insiemit). Il libri si lu cjate su ogni banc di glesie, al è metût adun in cuatri parts: ladine, taliane, todescje e latine. Chest libri al vignive a cjapai la volte e a integrâ un libri di cheste sorte vignût fûr denant trat, “Cianties y oraziuns” che al jere stât doprât par dibot cuindis agns.

    Tra chei che a àn prudelât cheste ecuilibrade e civîl soluzion a son di memoreâ il predi e poete Iaco Ploner e il dr. Tone Gasser che intal 1988 a àn publicât il prin libri sperimentâl di preieris e di cjants di glesie par ladin de val Badie. Dut chest positîf impegn par rivâ a puartâ la lenghe ladine in glesie si è tradusût inte realizazion dal volum “Laldun l' Signur” (Laudin il Signôr), publicât 1984 par cure dal Istitût “Micurà de Rü” dulà che a son cjapâts dentri, inte traduzion dal ladin de val Badie, il vanzeli di  San Marc, i tescj pai sacraments, messis, preieris, devozions, meditazions e cjants di glesie.

    Dut câs al merte memoreât che, intal complès, la realtât aministrative religjose si è adeguade daspò lis vicendis des dôs vueris grandis aes ideis politichis. Cussì dal 1964 i “confins” internis de Glesie a van daûr ai confins politics-aministratîfs, naturalmentri cence tignî in nissun cont lis aspirazions dai fedêi: Gherdene e Badie a son restadis aes dipendencis di Bulsan/Persenon, Fasse e je stade zontade ae diocesi di Trent, mintri che il Fodom e Ampezo a son lâts a finîle inte diocesi di Belun.

    Simpri par chel che al inten la religjositât des ints ladinis, e merte memoreade la tradizionâl “Prucission a Jéunn” (par todesc der Säben e par talian Sabiona), che ogni trê agns, viers la mitât di jugn, i oms de val Badie a davuelzin par lâ ae glesie de S. Crôs di Jéunn (intal 2003 si contarin circje 1030 piligrins), dant sù cjants e preieris par ladin e frontant lis altis clevis des sielis dolomitanis. Il piligrinaç al dure trê dîs e si davuelç secont antighis usancis: i oms des parochiis de val Badie, a pît, a traviers lis altis clevis des sielis dolomitanis, e passant par S. Madalene, St .Peter di Funes e Klausen, a rivin fintremai ae glesie di S. Crôs a Jéunn, dulà che e ven funzionade la messe e dulà che scuasit ducj a fasin la comunion. Dabon la devozion che a àn i piligrins intal frontâ la lungje e sfadiose trate par Jéunn e je uniche. Secont la tradizion cheste prucission vielone e je une sorte di “grande rogazion”, tant al è vêr che i anzians a son inmò vuê persuadûts che il piligrinaç a Jéunn al ven davuelt par domandâ al Signôr di benedî la cjase, la stale e i cjamps, e che intai agns dulà che la prucission e je stade fate i racolts a son simpri stâts bogns. (edelweiß)