I autonomiscj furlans dal daspò-vuere a reclamavin (naturalmentri) l'autonomie furlane, domandant ch'e fos fate di une aministrazion curient, il mancul pussibil burocratiche. Une aministrazion limitade 'es decisions fondamentâls su lis grandis liniis, lassant dut il rest ai ents locâi, Provinciis e Cumuns. E je nassude invezit, an daspò an, une aministrazion sproposetade, ultra-burocratiche, centralizade al massim in tune citât monocentriche, ecentriche e egocentriche che, cul prudêl di une majorance furlane (!), dut e decît. Cussì, oltri a "Rome dome", o vìn "Triest dome". Conclusion di une lungje lote: la Regjon (furlane) di fat no esist.

    A distance di agns si scuvierç cumò tal Biel paîs il centralisim roman, che si vorès cjatai la fate cu la riforme de Constituzion. Si torne a scuviergi dutun il chel il centralisim triestin, che si vorès mendâlu cu la riforme dal statût. Une riforme che, se à un sens, e scugne meti fin a une regjon a doi cjâfs, fate (tant che podês efetîfs) di un cjâf di acuile e di un cjâf di gjaline. Campe cjaval o, s'o volês, cheste e je la storie di "siôr Intento".

    Tun cumizi di fin 1998 Sergjo Cecotti, a domande di un intervignût, al rispuindeve che la separazion tra Friûl e Triest e je "impreteribil": no vizìne, ma tal ordin des cjossis. O sìn cun lui, e no di îr, in cheste ch'e je no utopie, ma ben invezit une constatazion di fat.

    O restìn simpri in spiete di cheste riforme. Intant i pulitics di profession (tai lôr biljets di visite a podaressin scrivi "pol.", cuanche no àn âtri di mostrâ, come "ras." o "av." o "prof."), i pulitics di profession, menant il cjan pa l'agâr, a burissìn peraulonis, come i "modêi di svilup", lis "disfidis globâls" e "l'armonizazion des diviersitâts" a son lis espressions plui profondis e plui frecuents e plui produsìnts.

    E esist, in realtât, une cussì clamade Convenzion pal statût: ch'e esisti ognidun lu dîs, ce ch'e je nissun lu sa. O savìn dome ce che nus ofrìs, un zornade sì e chê âtre no, il so president Lissandri Tesini, ch'al à vût cûr di declarâ modestamentri: "O vìn fat un lavôr grandon", nunziant dutcâs un'âtre (la rieste e je cussì lungje che si è pierdût aromai il cont) "taule pulitiche".

    Di sigûr si dîs, secont un âtri judizi, che la Convenzion e je un organisim "unevore imberdeât" metût adun no si sa cun precision di cui ( si fevele de presince di une fulugne, circje dusinte, organisims rapresentatîfs; ma i studiôs storics da l'autonomie a son stâts naturalmentri lassâts fûr); organisim ch'al fâs un pas indenant e un indaûr, scugnìnt rivâ a une sintese de sume dai meluçs cun lis cartufulis. Fâ part di un schierament aviers nol vûl dî vê simpri tuart. Cussì un esponent da l'oposizion, come ch'al è Ettore Romoli, al considere la sempiterne ativitât de Convenzion "une pierdite di timp": cualsisei progèt ch'e vès di produsi, nol sarà fat bon dentri cheste legjsladure (la Convenzion francese, elezude tal 1792 cemût che ducj a san, e durà tre agns, compridude l'esecuzion - ur àn tajât il cjâf - dai res : sperìn ben).

    Fintremai cumò, dutcâs, dome robis par ajar. Nissun riclam a radîs storichis e mancul inmò a ideâi: dut passât di mode. Si va sul concret, anzit sul materiâl. In d'algò si pense a infuartî la Regjon: par esempli "partìnt dal recupar da l'identitât sardegnole, il nestri plui grant capitâl": cussì Renato Soru, gnûf guviernadôr justeapont de Regjon Sardegne, che fra l'âtri al à un mistîr.

    Achì di nô si prodûs, invezit, un personaç illian (dal partît di Illy n.d.r.) ch'al diven di di là da l'aghe, e ch'al olse fâ il remenìn sul Friûl storic, dineant (lui che storic nol è) l'esistence, e indelegransi dal fat che Gurize "e je stade dominade da l'Austrie e Pordenon e je stade prime une eclâf austriache par po passâ sot la paronance di Vignesie" (e vuê, o dîs jo, sot il pupîl di Triest. Simpri fra parèntese, ce che si à vût iniment denant trat nol fâs di slaif al nestri sproviodût pulitic par lâ a invadi di tant in tant il rest de braide furlane, cul fin sbarniçâ il so vierb fondât sun cheste sorte di "alte" erudizion).

    O vorès conseâ a chest personaç di lei, se no lu à bielzà fat, lis tantis testemoneancis di amôr pal Friûl divignints des sôs bandis, "dal louc là che 'a se èis nassûz" (ajo di tradusi?). Peraulis di Josef Malattia, di Barcis, vivût a cjaval fra il Vot e il Nûf cent, poete, bibliofil, memoralist.  A son espressions ch'a podaran fâ ancje ridi cualchidun. Cjossis passadis come lis declarazions di fedeltât al Friûl  (o ai iniment sun chest cont dome dôs, zontant tal ricuart i complants Leo Girolami, Josef Pradella e Zuan Vicario, vêrs creatôrs de Provincie di Pordenon, naturalmentri dismenteâts dai plui).

    O dîs dal sindic di chê volte Gustâf Montini, ch'al declarave, il dì da l'instituzion dal Circondari, prìn pas viers la Provincie (9 di setembar 1964): "L'unitât spirituâl dal Friûl, infuartide dai secui, seondade dai fìs rapuarts fra lis zonis che lu metin adun e de stime profonde fra i oms che achì a vivin e a lavorin, al reste cualchi cjosse di indiscutibil e di definitîf, che nô o intindin garantî come un patrimoni dulà  aurî un impuls ideâl pal nestri doman". Cui ch'al è vignût daûr di lui come sindic, Jacun Ros, apene creade la gnove instituzion (26 di fevrâr 1968): "La Provincie di Pordenon e je nassude no come un element par crevâ l'unitât furlane, ch'e je comunance di vicendis storichis insiemit sufiertis, di tradizions, di aspirazions, d'interès, ma, tal cuadri di cheste intate e permanent unitât furlane, come element di ecuilibri teritoriâl, di plui moderne e funzionâl distribuzion dai siervizis, come instrument di prudêl ch'al smire al progrès morâl e matereâl des nestris popolazions". Peraulis da tornâ a lei par cui ch'al vûl lei.  (Zuanfranc D'Aronco)