La tradizion des cidulis tal arc alpin di soreli jevât

    La tradizion des cidulis, o ben dal trai lis cidulis, no je dome cjargnele come che si sarès puartâts a crodi. Documentade e je invezit la sô presince in dut l'arc alpin di soreli jevât. Tant a dî che par vieri e jere praticade in forme slargjade tra lis comunitâts etnichis furlanis, todescjis e slovenis logadis intes regjons dacîs de Cjargne, de Carintie e dal Cragn.

    Cualchidun, par esempli il studiôs di folclôr e di tradizions popolârs, professôr Josef Vidossi (1878/1970), al jere dal opinion che la origjin di cheste usance e fos todescje e la ereditât di antighis cerimoniis propiziatoriis paianis. Darest i  todescs carintians a vevin pardavêr une tradizion di cheste sorte, clamade “Scheibenschlagen” ( o sei “trai lis rodelis di fûc”). Cundut achel se o scrutinin a fonts la storie des usancis di chestis regjons si inacuarzin che nol è nuie di sigûr e di documentât su la divignince de tradizion des cidulis/scheiben.

    Di storichementri sigûr al è che daspò de ete romane, sul scomençâ dal setim secul, i sclâfs dal misdì (vuê clamâts slovens) a vignirin indenant lant a insediâsi in dute la regjon alpine di là des monts, sin alì che a nassevin i grancj flums: la Gail, la Drau, la Mur e l'Enns. Si sa ancje che tal 625 la Gaital e vignive clamade “Sclavorum regio”. La colonizazion todescje viers soreli jevât e scomençà a slargjâsi (soredut de Bavarie) tra i secui diesim e diesim-secont. Chest procès al le indenant par etis cence poste, cul risultât che tra i secui diesim e vincjesim la plui part dai slovens-carintians e je stade gjermanizade.

    In dì di vuê mancul di un tierç di cheste regjon e manten inmò la filusumie origjinarie. Naturalmentri ducj chescj mudaments etnics si son davuelts in difarents passaçs, e se o vessin di tignî par buine la teorie dal Vidossi nol po jessi strani che i slovens de Carintie a vebin cuistât dai todescs la tradizion des “scheiben”, che inte lôr lenghe mari a deventarin “šibe”.

    La prime documentazion scrite sul cont dal ûs di trai lis cidulis/šibe tra i slovens e je stade lassade dal sloven carintian Urban Jarnik. Jarnik intune sô poesie dal 1812, cussì al pant: “(i zovins)  lis cidulis ardints a gjavin. / Dal fûc, ae buine fortune. / Des amadis in alt lis train”. Inmò tal 1851 il studiôs sloven di etnografie Matija Majar, di cheste tradizion in forme plui slargjade al ripuarte: “La vee de fieste di San Zuan sul sore sere, ducj, vielis e zovins, a van tal puest dulà che e je la usance di fâ un grant fûc (kres). Impiât il fûc, a voltis si cjante, i oms a dan sù scriui di gjonde, lis puemis e lis feminis a fevelin d'ascos, cisicant e ridint; i fantats a train lis šibe, i puems lis racuein di presse e a provin a trailis ancje lôr…Lis šibe a son scais cuadradis di len di faiâr cuntune buse tal mieç. La scalete impirade intun baston si la met sul fûc. Cuant che e je in bore si la gjave e si la fâs sgurlâ in cercli alçant une neule di rossis faliscjis. Denant di mandâ la šibe ardint a svualâ tal cîl neri de gnot, si vose in onôr e ae salût di cui che si la trai. Plui in alt la šibe e svuale, plui al è biel il spetacul. Cussì si train une  šibe  daûr chê altre. La prime šibe si la bute simpri in onôr dal sant protetôr de glesie dal paîs, o ben in onôr di San Zuan Batiste. Su la Mont dal Lussari / Svete Višarie, la prime šibe si la bute in onôr de Deviški Marija (Marie Virgjine). Lis šibe daspò si train ae salût dai zovins; par solit si cubie un fantat cuntune fantate e inalore si dîs: …šibe, šibe, šibe…cheste šibe e larà in onôr e ae salût di Mihael Haribar e di Micika Zupanova!”

    Cemût che si pò capî la stesse descrizion e varès podût valê in chê ete par un cualsisedi paîs cjargnel. Par Zuviel o Dimplan tal Cjanâl di San Pieri. O magari par Mieli e Cjaline tal Cjanâl di Guart.

    Simpri fasint cont che la tradizion des cidulis/šibe/scheiben e sedi di divignince todescje, si podarès inalore scrupulâ che il so passaç al teritori di influence furlane e puedi jessi la zone dulà che par etis a àn convivût insiemit lis etniis todescje, slave e romanze. Sore chest aspiet si à documents che a confermin che dilunc il Cjanâl de Fele lis cidulis a vignivin tiradis a Pontebe, a Racolane, a La Glesie/Leopoldskirchen/Lipalja ves e a Cjampros/Seifnitz/Zabnice.

    Par chel che al inten la Cjargne po stai che la tradizion e sedi rivade passant pes comunitâts todescjis di Sapade/Plodn, di Sauris Zahre e di Tamau/Tischlbong. Cundut achel di chescj trê sîts une testemoneance sigure sul cont de pratiche de “Scheibenschlagen” si le à dome di Tamau. Achì la cidule/ scheiben, par todesc tamauês (tischlbongarisch) e devente “sialba” e secont ce che a contin i vielis la cerimonie propiziatorie de “sialba smaiti”, si davuelzeve ai disevot di març, vee de fieste di San Josef.

    Dongje di chestis teoriis-testemoneancis su la tradizion des cidulis e esist purpûr la teorie de divignince celtiche. Che il popul dai Celtics in ete pre-romane al fos presint intes regjons dal arc apin orientâl, al è un fat ametût de plui part dai storics furlans. Par esempli il professôr Josef Marchet, inte jentrade de sô “Cuintristorie dal Friûl”, al pant che i Celtics (rivâts di soreli jevât) a jerin sui confins orientâi salacor doi mil agns denant di Crist, lant a stanziâsi dilunc lis grandis aghis de Europe di mieç, come la Donau, la Elbe e il Rain. Si sa ancje che a jerin dividûts in plui grops, e che un di chescj, chel dai “Karn”, al vignì a stabilîsi in chês regjons che inmò in dì di vuê a puartin chel non: Cjargne, Carintie e Cragn.

    No si po dî la ete precise di cuant che i Celtics-Cjargnei si stabilirin chenti, al è dome sigûr che i Romans rivâts inte nestre regjon doi secui denant di Crist (Aquilee e fo fondade tal 181 d.d. Crist) ju cjatarin bielzà stabilîts in maniere slargjade su dut il teritori des monts al mâr. Al è interessant sotliniâ sun chest cont che tal teren e tra i mûrs des costruzions romanis di Zui a son stadis cjatadis monedis celtichis di aur e di arint. Monedis che a àn une cierte someance cun chês macedonis de mitât dal secul IV d.d. Crist. Si po aduncje scrupulâ che sot vie la romane Julium Carnicum al devi jessi esistût un vieri insediament celtic. Altris impuartantis testemoneancis de presince celtiche in Cjargne a son vignudis fûr a Misincinis di Paulâr, a Raviei, a Nonte di Soclêf, a Clavais di Davâr e a Dondrassa di For di Sore. I segns de presince celtiche si ju cjate ancje inte toponomastiche (in Cjargne: Formeâs, Cjaçâs, Maiâs, Cjaulon, Cjarsò) e te marilenghe (par esempli in peraulis come: aghe, catôr, talç, gatar, cjavile).

    Par chel che al inten la ereditât celtiche che si è tramandade intes nestris tradizions al è ben denant trat sclarî cualis che a jerin lis crodincis religjosis e lis usancis di chest popul. Il maiôr diu che i Celtics Cjargnei a adoravin al jere Belen: il diu soreli. Par altri il cult intai rivuarts di chest diu al jere slargjât ancje intes regjons di là des monts e considerât une des divinitâts celtichis plui antighis tal ambient dai pastôrs. Par chel che nus interesse diretementri propit a chest diu e je dedicade une epigrafe sculpide parsore di une lastre di piere di ete romane che e je vignude fûr dilunc i sgjâfs di Zui. Val a dî che si à la testemoneance di cemût che a Zui e in Cjargne la devozion ae divinitât di Belen e fos presint e slargjade.

    Dai Celtics chest diu al jere considerât prin di dut la lûs dal sintiment dai oms, dulà che invezit la sô fuarce e la sô potence grandone a jerin metûts a pareli cul fûc, o ben cul soreli, paron de lûs e dal calôr e par tant de esistence di ogni forme di vite presint su la tiere. Naturalmentri a Belen a vignivin dedicadis cerimoniis propiziatoriis, soredut intes ricorencis plui impuartantis. Sun chest cont si sa che lis dôs fiestis maiôrs dal an celtic a jerin chê di Beltine e chê dal Samain. Il Samain si lu celebrave in novembar. Al jere il cja dal an celtic e la fin de stagjon agricule. Fieste dai vuerîrs, des potencis vendicativis e dai spirts aviers. La ricorence di Beltine (fieste dal fûc di Belen) e colave invezit il mês di mai e e segnave il scomençâ de biele stagjon, dal cîl lusorôs, dal inviâsi dai lavôrs agricui e dal timp che si puartave i animâi a monteâ.

    Un dai aspiets che a diferenziavin chestis fiestis a jerin i grancj fûcs rituâi. Juste a rivuart di chestis cerimoniis propiziatoriis che i Celtics a dedicavin al diu soreli Belen, un storic rigorôs come Pier Silveri Leicht (1878/1956) al scrîf: “Des grandis fiestis belenichis che si celebravin in dut il mont celtic intai solstizis dal istât (Beltine) e dal unvier (Samain), e restà inmò in Friûl, fintremai a no masse timp indaûr, une smavide testemoneance tal trai lis rodelis imboreçadis (cidulis) de bande dai zovins cjargnei, e forsit al è inmò un ricuart intai fûcs di San Zuan e di Pasche Tafanie (Pifanie), che si puedin viodi parsore i cuei di dute la Furlanie”.

    Si che duncje la tradizion des cidulis secont cheste teorie e sarès une ereditât antigone des usancis dai Celtics Cjargnei. Usancis che evidentementri a son restadis in piis ancje cuant che chest popul al dismetè lis sôs crodincis paianis e al vignì convertît al cristianisim. Probabilmentri a mudarin i significâts e i simbui, almancul inte “uficialitât”. Sot sot al è invezi di crodi che pe tradizion popolâr i grancj fûcs impiâts intes veis des fiestis a sedin lâts dilunc a mantignî il spirt paian di rituâi magjics-propiziatoris. O miei di sconzûr che al zovave a favorî racolts abondants e il ben stâ dai oms e dai animâi. Teoriis e suposizions che a mertaressin aprofondidis e dibatudis, slargjant e lant a fonts intes ricercjis, sedi archeologjichis par chel che al inten i insediaments di ete pre romane tal teritori de mont cjargnele, sedi entografichis.

    Documentât al è invezit che za fa cuarante, cincuante, agns indaûr la usance dal trai lis cidulis e jere slargjade intai nestris paîs. Di chel che si à podût savê oralmentri dai viei e dai plusôrs scrits publicâts sun chest cont, si lis traeve la sere de vee di Pasche Tafanie a Tualiis, e la sere dai sîs di zenâr a Comelians e a Muine di Davâr. La vee de fieste di San Josef, tal mês di març aduncje, a Prât tal Cjanâl di San Canzian, a For di Voltri e a Tamau/Tischlbong, tal Cjanâl di San Pieri. Intai mês di jugn e lui, la vee de fieste di San Zuan a Pontebe, tal Cjanâl dal Fier, a Pesariis e a Denglâr di Paluce. Intes veis di San Zuan e di San Pieri, a Gnive di Resie e a Çurçuvint. A San Zuan, San Pieri e San Ramacul, a Paulâr tal Cjanâl di Incjaroi e a Mueç tal Cjanâl dal Fier. La vee di San Pieri e di San Ramacul, a Racolane di Scluse. La vee di Sant Jacum, a Desemon di Sore. La vee di Sante Ane, a Cjampiûl di Mueç e a Salârs di Monai. La vee de seconde domenie di avost a Dimplan di Darte. La vee de Madone di setembar, a Riu di Paluce. Tal mês di dicembar, la ultime sere dal an, a Cjaline, a Davâr, a Mieli, a Maranzanis e a Povolâr tal Cjanâl di Guart.

    In dì di vuê la tradizion e je restade in piis, o ben e je stade tornade a meti sù, a Ravasclêt, a Darte e a Çurçuvint. Tal Cjanâl di Guart a Dentramp, a Luvinciis, a Negrons, a Cele e a Comelians. E inmò a Davause tal Cjanâl di San Canzian.