Jentrade

I Slâfs des Vals dal Nadison come chei de Val de Tor, di Resie e de Val Cjanâl, a son la rame plui ocidentâl dal grant arbul slâf, il ramaç sloven juste apont. La storie nus conte che a son rivâts chenti, parie dai Avârs, sul scomençâ dal secul Setim. Deventâts catolics tal timp che al jere patriarcje di Aquilee San Paulin (802) par opare de Glesie cividalês,  a metin adun  vuê une foranie par cont so di vincj parochiis.

    Pal fat di fevelâ la stesse lenghe mari e par jessi stâts favorîts da une cierte autonomie sevi gleseastiche che civîl sot i patriarcjis di Acuilee e po daspò sot Vignesie, i abitants di chestis Vals a àn podût creâ e conservâ fintremai al dì di vuê ciertis formis tipichis di religjositât popolâr, cemût che no si cjatilis in nissun altri sît de Furlanie.

    Une di chestis e rivuarde la novene di Nadâl. In plusôrs paîs de Benecija in chestis zornadis, ogni an, une volte parom, si met adun un grop di nûf fameis disponudis a dâ sotet a Marie che cun Josef e à di lâ a Betlem pal censiment dal imperadôr Cesar August. Mediant che il viaç al dure nûf dîs, une famee par sere e lozarà i doi sants spôs dai 16 ai 24 di dicembar.

    A tignî sù la cerimonie e je une femine devote dal lûc, jê e cjate lis nûf fameis, l'imagjin de Madone o de Sacre Famee di poiâ parsore il piçul altâr prontât volte par volte, e stabilìs la ore de sacre funzion che e tignarà ancje sù, se la parone di cjase no po fâlu, po e condusarà la prucission dai devots di une cjase a chê altre.

    La "sacre funzion" e cjape dentri la recite dal rosari inte mari lenghe dal lûc. Ae  fin la parone di cjase e domande scuse ae Madone se no le à tratade miôr di cussì.

    E esist a chest rivuart une formule tradizionâl che si impare a memorie. Di sotliniâ purpûr che si indrecisi simpri e nome ae Madone. Po ducj si alcin, e dôs fantatis o dôs frutis, a cjapin sù la imagjin (che e je incurnisade) e la companie cjantant lis litaniis e puartant cjandelis impiadis e lumins, si invie viers une altre famee par fermâsi denant ae puarte di cjase. Alì, sul soiâr, in zenoglon, e spiete chê altre parone di cjase. La femine che e condûs la prucission si svicine e i dîs: "Amie ricêf la mari di Jesus e ricuarditi di onorâle simpri e no dome par cheste sere". Chê e cjape la imagjin, la busse e e dîs "O Virgjine purissime Marie, ti ricêf cun afiet in cjase mê, fintremai ae muart". Lis dôs feminis a doprin ancje achì dôs formulis tradizionâls in mari lenghe slave, che si impare a memorie.

    Daspò la femine-guide e jentre e e poie la imagjin sul piçul altâr bielzà prontât tra une rieste di cjandelis impiadis. Denant al imagjin di Marie al ardarà simpri ancje un lumin a vueli, come in glesie a flanc dal tabernacul.

    Inte cjase dulà che la sacre imagjin e rivarà la sere dai 24 di dicembar il lumin a vueli al ardarà fintremai ae sere dai 2 di fevrâr, fieste de presentazion di Jesus Bambin al templi, e la int e vignarà achì ogni sere a preâ e a cjantâ. I cjants a saran chei de novene, e inmò cjants dal timp di Nadâl dulà che il sogjet al è naturalmentri Jesus  Bambin e cun lui sô mari Marie.

    Il plui doprât, e ancje il plui antîc di chescj cjants, (voltât par furlan) al scomence cussì: "Chest al è un dì di gjonde, / la Virgjine e à parturît / il Fi di Diu, / ma e je restade virgjine, / il nestri Redentôr / il Creatôr dal Cîl, / il Re dai Agnui".

    Si trate di un cjant che al compâr pe prime volte tal "Catechismus in der windischen Sprach", metût adun dal predi Primoz Trubar tal 1550. Po lu cjatìn inte racolte di cjants religjôs dal titul "Ene duhovnepajsme", dal predi A. Klobner . La publicazion e puarte la date dal 1563. E in fin tal "Vocabolari Talian - Sclâf" di Gregori Alasia da Sommaripa dai Sierfs di Marie, jessût di une stamparie di Udin tal 1607.