Il timp dai Dodis Dîs, tra Nadâl e Pifanie, al cjape dentri i moments plui significants dal an. La nassince dal Bambin Jesù si lee, justeapont , cul tornâ a scomençâ a slungjâsi des zornadis, valadì cul tornâ de "lûs", cussì i elements folclorics di chest particolâr moment dal an a cuistin un significant valôr simbolic.

    Gjavât il Cjanâl d'Incjaroi, dulà che esist l'usance di brusâ "la Femenate", e mancje in Cjargne la tradizion dai pignarûi e dai fogarons che in Furlanie s'impiin par Pifanie, cun chê di prudelâ il soreli a tornâ a cuistâ fuarce. Pidimancul in cualchi paîs, sore il dut tal Cjanâl di Guart, si scomencin a trai lis cidulis.

    In gambi, in Cjargne, cetant plui che in Friûl, e jere slargjade l'usance di puartâ di cjase in cjase il segn de gnove lûs, doprant une Stele lusorôse, cul compagnament di cjants e liendis di glesie. Chescj gîrs di augûrs cu la Stele a cuistavin une volte l'impuartance di une forme scuasit liturgiche, e la stesse ricolte dal vê di vê, metût in vôre par cheste ocasion de Companie de Stele, e cuistave un valôr sacrâl: il dâ il sop a chescj "ambassadôrs de lûs" al jere come prenotâ une anade furtunade e di ricolts bondants.

    La Stele, fate di listêi di len cuvierts cu la cjarte colorade, e jere inluminade dentrivie di une o dôs cjandelis, e 'e girave insomp di une aste rezude di un de companie. Un dai cjants tradizionâi che si dave sù, al diseve: "Siamo i Tre Re de l'Oriente/ ducj i gjaui a si ficja dentri/ tal rìu Denti./ E quei cani che stano di fora/ joi sì, sì che loro i mora/ di tanto fredo!/ Ma nissuno non lo crede/ che abiamo tanta fame/ e nissuno ci porta un pane/ da sglavare./ Anderemo dal sior plavano/ ci darà la buona mano:/ pirùçs, miluçs, palancas/ e mandolato./ 'Su augurìn la buinas fiestas,/ che j mangjais buinas mignestras/ e un an plen di furtuna/ cun buina luna…Amen!"

    Lis feminis di cjase a preparavin une cuete di pan par dâlu ai "sopêrs". Dutcâs chest nol jere il pan di ducj i dîs, nì par grandece e nì par cualitât.  Dispès si tratave di une sorte di torte clamade peta o picòt. Si la preparave doprant il sorturc ricolt tai dîs dai Sants, e chest si leave 'es crodincis che a volevin i defonts protetôrs des fameis dulà che a vevin vivût.

    Daspò dai gjespui di Pifanie al scomençave il cussì clamât gîr das bisâgas. Il predi al lave pes cjasis a benedî, compagnât di un zago ch'al rezeve il cjalderuç da l'aghe sante e l'asperges, e dal muini cu las bisâgas. Ossei dôs borsis colegadis tra di lôr in mût che une e pendès par denant e chê âtre par daûr. In tune si meteve il vê di vê dal plevan, e ta chê âtre chel dal muini. Par solit si tratave di fasûi e cartufulis (patatis).

    Ancje tal Cjanâl di Pedarç (il Cjanâl di Prât di Cjargne) pe Pifanie, almancul par vieri, si marcave su lis puartis des cjasis e dai stâi lis iniziâls dai Magjos (B.M.G.), scuasit segns di sconzûr, fondâts sul misteri dai Tre Res piligrins a la ricercje de "gnove lûs".

(Tirât fûr da "Ladins dal Friûl", n°12 dicembar 2002)

Sui cuei a slûsin
i fûcs dai Pignarûi

Tarcìnt - Di dutis lis fiestis de tradizion dal Friûl, chê dai fûcs di Pasche Tafanie e je sigurementri la miei conservade e la plui sintude a nivel popolâr inmò in dì di vuê. Il fûc al cuiste nons difarents di lûc a lûc (Fogaròn, Fughere, Foghera, Fugarizze, Pan-e-vin, Medili, Boreòn, Mieli, Sèimo), ma a Tarcìnt si à, cul non di "Pignarûl",la tradizion plui innomenade e cence âtri la plui cognossude di ducj i furlans.

    La tradizion dai fûcs grancj di Pifanie si piert tal scûr di etis lontanis, leade a ceremoniis antighis dal timp dal solstizi d'univêr, celebradis di ducj i popui da l'Europe.

    Secont i studiôs di etnografie il significât di cheste usance al è dal sigûr propiziatori: i antîcs, dant fûc al simbul de viere vegetazion, a domandavin ai lôr deus pajans di no jessi bandonâts a la scuretât e 'es criuris dal unviêr. A domandavin che la primevere, e cun jê la vite, a traviers il risurî de nature e podès tornâ a confuartâ l'esistence dai oms.

    Vè parcè che, une volte, ancje a Tarcìnt la preparazion dal Pignarûl e jere une incombence risiervade ai zovins: parcè che lôr a rapresentavin lis fuarcis dal rinovament de vite. Lis energiis gnovis buinis di tornâ a meti in moviment il cors naturâl des stagjons, in aparince raitarât des fuarcis aviersis dal scûr e dal mâl.

    Valadì che i zovins a jerin la fuarce revenànt ch'e sarès buride fûr de cinise dal Pignarûl, cinise che, di fat, e jere podaspò sparniçade pai cjamps come sconzûr. Ce che si veve di brusâ al jere ufiert di dute la comunitât, parvie ch'a jerin comuns ancje i efiets positîfs e i segns par strolegâ che si volevin rigjavâ. Ancje par chestis resons al rituâl a cjapavin part ducj, e no dome i contadins, parcè che par ducj il Pignarûl al profetave cuâl ch'al sarès stât il destin da l'anade ch'e stave scomençant.

    In etis daspò, cul slargjâsi e l'infuatîsi dal cristianesim, al scomençà a cjapâ part a chest acjadiment ancje il predi dal paîs, a significâ il ricognossiment de Glesie di un rituâl, pajan sigurementri 'es sôs originis, ma masse lidrisât tes custumancis locâls par podêlu refudâ e aviersâ. Cussì il predi stès a voltis al impiave il tasson des cjanis di sorturc e di ramis di peç e sbaraçâr, a significâ il prestigi dal rapresentant de Glesie te comunitât.

    Il Pignarûl, inmò vuê, si lu prepare plantant un pâl centrâl sicu chel che si dopre par fâ lis medis, dulà che atôr si intassin i rescj des coltivazions dal an passât e, a voltis, cualchi rame di geneu par fâ sclopetâ il fogaron.

    Une volte impiât il fûc, dulintôr si cjantave e ancje si balave, cun dut che a esistevin des improibizions al rivuart: un Concei dal setim secul, timorôs che si tornàs a dâ masse rilêf ai caratars pajans de usance, al veve improibît i fûcs di Pifanie e i bâi atôr di lôr. Plui indenant, il Concei di Rouen, dal an 878, al tornà a ripeti (e cun majôr severitât) la improibizion cuintri "i fûcs de lune gnove di zenâr", ma al è di crodi che sul cuèl di Cuje, e ta chei dai contôrs, a sedin stâts pôs i agns dulà che no si domandà al fum dal Pignarûl cuâl ch'al sarès stât l'andament de gnove anade. Cundidì che lis radîs dal rituâl a jerin masse lidrisadis te memorie e tes convinzions di ognidun par podê rinunziâ a la tradizion.

    I vielis a scrutinavin, e lu fâsin ore presìnt, il davuelgisi dal fûc, la sô fuarce e la direzion cjapade dal fum: di ducj chescj elements si podeve indivinâ cuâl ch'al sarès stât l'andament di une interie stagjon agricule, ancje se dispès i segns si pandevin incierts, senò contrârs tra di lôr. Dutcâs, se il fum al va a soreli a mont si dîs "cjape il sac e va pal mont", a significâ ch'al è di spietâsi une anade di miserie. Se il fum invezit al va de bande di soreli jevât si dîs "cjape il sac e va a marcjât", ossei che si va incuintri a une anade ch'e promèt ricolts bondants. Ma vuê l'agriculture no rapresente plui un aspiet fondamentâl de cunumie dal Friûl, e inalore il "Pignarûl" al reste nome une manifestazion di folclôr, o miei un ocasion mediatiche di doprâ come promozion dal turisim.

(Tirât fûr da "Ladins dal Friûl", n.1 zenâr 2003)

Carnevâl e Cuaresime
 tes Vals ladinis

Vich de Fassa (Trent) - Tes Vals ladinis lis setemanis denant de Cuaresime a son un timp di gjode e di fiestis. Il carnevâl de Val di Fasse al è cetant vieri e originâl. Bielzà in zenâr i atôrs des companiis di teatri locâls a scomencin i preparatîfs par meti in sene lis lôr comediis tes placis, dispes indelegradis de musiche dade sù di cualchi sunadôr. I intajadôrs naturalmentri si dan dafâ a sculpî lis carateristichis mascaris di len. I personaçs carateristics dal carnevâl fassan a son "el Bufon, el Laché, i Marascons, il Re de Sobèna, el Paiazo, el Pizon". Te stesse maniere di ce ch'al sucêt dilunc âtris carnevâi tradizionâi dal arc alpin, ancje lis mascaris fassanis si dividin tes dôs categoriis dai " biêi" e dai "bruts" (par fassan "dal bel e da burt"). Lis mascaris "da bel" si proponin come ideâl estetic pusitîf e si mètin in oposizion 'es mascaris "da burt" scuris e caricaturâls, che a cuistin compuartaments trasgressîfs e iriverents. Di regule a proponin parodiis dal lavôr contadin e artesanâl.

    Lis "cordeles", ossei lis curdelis coloradis che a pèndin dai cjapiêi di carnevâl, une volte a vignivin furnîts des fantatis dal paîs. Chestis lis distacavin dai lôr grimâi dal custum tradizionâl ladin. Chestis curdelis, decôrs rârs e preseôs, a vignivin consegnadis insiemit cun tun cartelìn dulà ch'al jere scrit il non de dumble che lu veve donât. Rivât insomp il carnevâl lis "cordeles" a vevin di jessi tornadis. Il zovin ch'al rivave a caparâsi il majôr numar di curdelis al jere chel ch'al podeve svantâ la majôr simpatie de bande des fantatis.

    A la cumplicade vistizion des mascaris a cjapavin part lis feminis di cjase, che a jerin chês che a creavin, e a custodivin, i custums. In dì di vuê lis feminis a puedin mascarâsi e jentrâ tai mostrons mascarâts, ma une volte chest al jere improibît.

    I "Marascons" (ossei lis grandis mascaris), che si presentin simpri in numar pari, a àn cuistât chest non parvie che, insiemit al "Lachét" (il siôr) e al "Bufon" (il matescul de fieste) a son personaçs di fonde pal mostron des mascaris. Une volte a jerin i zovins coscrìts che a davuelzevin chestis parts.

    Te alte Val di Fasse la viertidure dal carnevâl e colave ai 16 di zenâr, vee de fieste di S. Antoni abât e si proviodeve a "desleèr carnascèr" (disleâ il carnevâl). Ta chê zornade sdrumis di puems mascarâts a bailavin pai borcs e pes corts dai paîs par saludâ la vignude dal carnevâl, scjassant sampogns e batìnt su sêlis e bandons di lamiere cun grant sunsûr. Par vieri il mostron in mascare al vignive daviert dal "Jandeluvio", une figure di mascare ingorde e cence fons, ch'e veve un cjâf grandon e une panze sproposetade, e che vignive puartade a pressembolâsi pes stradis dai paîs. La ingurdisie metude in rilêf e pandeve une funzion di sconzûr tai rivuarts de miserie.

Il dì di martars gras, une volte si strissinave pes stradis  dal paîs "il carnevâl", un frut mascarât e ricuviert cun tune imbotidure di stranc. Sotsere ducj a làvin insomp un çuc, parsorevie dal paîs, dulà ch'e vignive impiade une fughere di stranc e sterps par "brusâ il carnevâl". Cheste tradizion e je conservade inmò in dì di vuê in cualchi borc de Val di Fasse. Dal rest la toponomastiche di ogni paîs de Val e ricuarde cheste viere custumance. Cundifat ogni paîs fassàn al à il so "Col de carnascèr", a memoreâ il lûc dulà ch'al vignive justeapont brusât il carnevâl.

    In Val Gardene (Gherdëina) a son disparidis cetantis des vieris usancis di carnevâl. Al è pussibil che un tant al sedi divignût parvie des improibizions dai sorestants, massime glesiastics. Achì e reste la curiôse usance di puartâ vie la "panicia" (jote di vuardi) e il sghinc di purcìt fumât a la parone di cjase ch'e sta daprûf propite il dì di joibe grasse.

    I anzians a contin che par vieri ancje in Val Gardene la fin dal carnevâl e vignive festezade brusant un pipinòt di stranc. La fughere dulà ch'al vignive brusât al jere un rituâl sevi di purificazion che propiziatori. Se si disfantavin lis fuarcis aviersis si rinovave l'energie de nature. Unevore frecuentis e popolârs a jerin invezit lis corsis sui slitons tirâts dai cjavâi, e il bal ch'al sierave il timp di carnevâl. Ta cheste dade e jere usance di mudâsi cui custums tradizionâi.

    Il miercus de cinise al vierzeve i cuarante dîs de Cuaresime, un timp cadençât di dizuns e di penitincis, in preparazion des fiestis di Pasche Majôr. Une volte infats il dizun al scomençave il miercus de cinise  e al rivave insomp a Pasche. Plui indenant, parvie dal gambiaments puartâts dal Concei vatican II, il dizun si è ridusût al prin dì di cuaresime e a la zornade dal vinars sant.

    Par tradizion, tal timp de Cuaresime il capelan di Sante Cristine al lave sù ogni vinars di biel di buinore a San Jacun (un lûc logât sorevie di Urtijëi) a funzionâ la messe. Ta chê plêf il predi, zovansi de "Tele Cuaresimâl" dal sec. XVI, al inlustrave ai fedêi i misteris de passion e de redenzion. La glesie di San Jacun, ch'al è il protetôr dai viadants dilunc i trois di mont (par ladin "sacun"), e je la prime glesie secont la tradizion, e daûr dai documents, tirade sù in Val Gardene. Sun chest cont da une bergamene, cumò lade pierdude, si vignive a savê che j jere stade concedude une indulgjence tal an 1246.              

    A Anpëzo (Cortine Dimpeç), a miege Cuaresime, e jere l'usance di "seâ la vecje". Tun lûc stabilît si leave atôr di un pâl un pipinòt di stranc stramudât di viele grimôse, e po si lu seave pal mieç. O ben si cjamave un biel grum di tranc sun tune slite, si davij fûc, e si sburtave la slite ju par une cleve. A voltis cheste usance si davuelzeve ancje il dì di Pasche Tafanie. (test tirât fûr da : "La realtà e l'immaginario nelle valli ladine dolomitiche",  di Marco Forni - Ed. Istitut Cultural  Ladin  "Micurà de Rü")

Tamau/Tischlbong - Pasche Majôr e je la sigurece di un fat pardabon sucedût e tramandât fintremai a nô dai apuestui cun fuarce e cun gjonde. A Pasche si fâs plui ferbint il cjant de Glesie "Diu, mê sperance, al è pardabon risurît".

    Une grande fieste che si compagne al sflurî e al sverdeâ de nature. Pasche di tradizion in Cjargne dulà che ogni borc e ogni vile a àn lis lôr usancis tignudis dacont tant che  testemoneance di une identitât storiche e culturâl ch'e à radîs in sot.

    E plui si va sù, jenfri lis vals e i Cjanâi di cheste tiere, e plui cheste identitât si palêse marcade. Tant par dî a Tamau (par todesc tamauês Tischlbong), dulà che s'incrose il cunfin etnic e lenghistic tra ladin-furlan e todesc, Pasche "Oastarn", si la festegje cul schultar e cu la pinça.

    Simpri sul cont des usetâts tamuêsis di chest timp, ancje ventissù la Cuaresime "Vosta" e scomence il miercus de cinise "Oschn miti". In chê zornade alì, avuâl che in âtris sîts de mont furlane si bruse il carnevâl "Voschin". La figure dal voschin e je rapresentade di un pipinot dât dongje cun vistîts vieris jemplâts di fen e di frandêi. Intant che il simbul de gjoldarie al bruse, tôr a tôr a bàlin e a lis "masckaras min kloukn", valadì lis mascaris cul sampogn.

    Dilunc la Cuaresime nol sucêt nuje di particolâr, cundutachel une volte no si balave e si rispietave i dizuns comandâts.

    Cun domenie ulive "Polm 'Sunti" si jentre te setemane sante, par tamauês "Ruata Boucha". Ancje ta chest timp lis cerimoniis a van a parêli cun chês dai paîs cjargnêi dai contôrs.

    Tant par dî, daspò joibe sante chentissù si po’ inmò viodi i fruts a girâ pai borcs cu lis scraçulis par visâ l'ore des funzions. Purpûr unevore sintude e je ancje la grande prucission dal vinars sant "Ckoar Vrait". Cheste e partìs de Plêf di Sante Gjeltrude e 'e rive fintremai a la viere glesie dal Crist, la cussì clamade "Olta Ckircha".

    Finalmentri il scampanotâ des cjampanis dal Glorie sul tart di sabide sante, a nunziin che Jesù Crist al à vinçude la muart e al è risurît. Un segn di grande gjonde par une Pasche-Oastarn che si è un'âtre volte proponude.

    Cemût che si à vût iniment denant trat, par festegjâ come che Diu comande cheste zornade a Tischlbong l'usance e proviôt che si vebi di mangjâ la pinça e il schultar. La pinça e je une fujace fate cun ûs, ont, farine, levan e ùe passe. Lis feminis tamauêsis a preparin chest dolç il lunis e il martars sant e daspò vêlu cuet tal fôr di cjase lu lassin polsâ.

    Il schultar invezit e je la spale fumade dal purcìt. Un bon toc di schultar al à di vê tre chilos di cjâr e un di vuès. Rigjavât di un purcìt copât denant Nadâl, al va fumât pal almancul vincj dîs doprant ramis di peç e di fau. Il schultar si lu met a cuei sabide sante. Dut tun toc al reste a boli te pignate fintremai che il piron lu forope cence fadie.

    Te buinore dal dì di Pasche la pinça e il schultar a vegnin disponûts tun gei parie cui ûs dûrs colorâts. Chesti pietancis si lis puarte a benedî in glesie, intant messe prime. Finît di funzionâ la int e torne a cjase a fâ la mirinde, par todesc-tamauês "is vruasti".

    Naturalmentri il schultar, tajât a fetis finis, si lu compagne cu la pinça. I doi savôrs, chel dolç de fujace e che picant de cjâr di purcìt fumade, dal dut in contrast, a làssin in bocje un gust particolâr ch'al à cence âtri un leam cu lis usancis dal vieri mangjâ todesc. Une mangjative di cheste sorte si cubie pulît cul vin blanc, cul vermut e cu la bire di spine.

Tirât fûr da "Ladins dal Friûl"  n.4 Avrîl 2003

S. Pieri di Cjargne - Tal Cjanâl di San Pieri in Cjargne, come che pai vîfs al jere (e al è orepresint) un impegn lâ il dì de Sense cu lis crôs a San Pieri, cussì pai vons e jere la crodince che ancje i muarts che in vite a vevin apartignût a chê Plêf, la gnot dai Sants a tornassin tal Plan de Vincule in face la Glesie Mari dal Cjanâl.

    Valadì che intant che tai paîs si preave par lôr il rosari intîr, e lis cjampanis des glesiis a batevin i glons fintremai a miezegnot, di ducj i simitieris lis animis dai defonts a partivin in prucission e a lavin su la mont parsore Zuj.

    A rivuart di cheste curiôse prucission i vecjos a contavin che un om di Liussûl, propite la gnot dai Sants di cui sa cetaincj agnorum indaûr, intant ch'al tornave di un viaç fat te Gàile/Gailtal oltri Mont di Crôs, cuanche a straoris al veve zà passade la vile di Paluce e si cjatave aromai ret il bosc clamât dal Orteglas, al scuintrà chê distranie e lungje prucission. Une rieste di fantasimis blancjis ch'e pareve no vê un fin.

    Denant di cheste turbe a jerin puems e zovins, ch'a cjantavin lêgris e ch'a laudavin il Signôr. Po e vignive une sdrume di int di ogni fate e di ogni etât ch'e gemeve e ch'e preave, implorant Diu che la diliberàs des penis dal purgatori. Dapît e jere invezit une cubie di malindâts ch'a làvin indenant blestemant a maludint. Bruts cefs ch'a tiravin daprûf cjadenis, pioris, cjaris e inmò sepi Diu ce sù pe schene. In sumis animis danadis che in vite a vevin dome raspât e imbrojât al prossim il pôc e il trop, cussì che par penitince ogni an ai Sants a vevin di slambelâ dut il robât fin a San pieri e vê la vergogne di jessi viodûts di ducj.

    Inmò i vecjos a contavin che par chel viandant l'impression pal tant ch'al veve viodût e jere stade grandone, e ch'al veve zurât e tornât a zurâ sul vanzeli di vê pardabon asistût al fat.

    I muarts daspò vê passade une part de gnot sul sagrât de Plêf e jessisi disfrancjâts de lôr incombence, si dàvin adun par tornâ a metisi in viaç tal Plan de Vincule, alì che il dì de Sense lis crôs des Plêfs dal Cjanâl a vegnin a bussâ la crôs viere de Plêf Mari.

Plui indenant, rivâts ch'a jerin un'âtre volte tai lôr paîs di divignince, ducj i defonts a làvin a fâ une visite e dâ un salût a chei di famee ch'a vevin lassâ cajù. Par cheste reson inmò vie pal dì lis feminis si jerin dadis di fâ par preparâ i cjalçons, che in chê gnot tun platel a vignivin pojâts su la taule furnide di mantîl (o su la piere dal fûc par antîc), dongje un bocâl di most.

    Inmò secont la tradizion te gnot dai Sants bisugnave viodi che i cjaldîrs a fossin plens di aghe, che la puarte de cusine e restàs vierte e chês des cjamaris sieradis.

    I muarts no vevin di cjatâ nuje di sierât. A vevin di podê girâ liberamentri pe cjase e, daspò jessisi ristorâts, vê polsât e vê viodût e saludât la lôr int, a tornavin contents dulà che il Signôr ju veve distinâts.       

Test tirât fûr da "Ladins dal Friûl" n.11 - Novembar 2003

    Nadâl tant che fieste di glesie al è cetant mudât, cundutachel al manten inmò in dì di vuê il caratar di une "fieste lungje". Lis tradizions che a lui a son colegadis, justeapont, no rivuardin dome la date dai 25 di dicembar, ma a van dilunc de vee ai 6 di zenâr, comprindint purpûr Cjadalan e Pasche Tafanie.

    Il Friûl al conserve ore presint une biele rieste di usancis par festezâ chest moment cussì significant pe cristianitât: a lôr al è leât un originâl patrimoni di cjants natalizis che a vègnin inmò proponût, testemoneant cussì la presince di acjadiments tradizionâi che a conservin une lôr valence, almancul dulà ch'al sorevîf un leamp comunitari fuart, zontât a la dibisugne di conservâ la propie identitât culturâl.

    Un tant al sucêt sore il dut te mont furlane dulà che, in prionte, il proponi chescj cjants in glesie, tes cjasis, e dilunc i borcs, in tun contest ambientâl zà di par se stès particolâr, al zove a creâ une clime di grande emozion e partecipazion. Une clime di Nadâl scuasit magiche, dal sigûr divierse, plui sclete e vere, rispiet a chê che si asede tes grandis citâts, lusorôsis di vitrinis ch'a insiliin a cunsumâ, e sunsurôsis pal grant davoi dal trafic.

    A Clèules, tal Cjanâl di San Pieri, dilunc la messe di Nadâl a miezegnot, al moment dal Ofertori la int in glesie e da sù une antighe pastorâl par furlan: la Cjançon da la gnot di Nadâl". Plusôrs versions di chest test, cjantât o dite sù, a son in dì di vuê in ûs in âtris lûcs de Cjargne, sevi tes cjasis che in glesie, sevi a l'ocasion de ricolte dai sops. Tal secul diesim-novesim si jere persuadûts che la "Cjançon" e fos une composizion dal innomenât poet furlan Ermis di Colorêt (1622/1692). Dutcâs pal cultôr di tradizions Bindo Chiurlo e jere invezit di divignince popolâr. Daspò di lui Ranieri Marius Cossàr al puartà a la lûs, rigjavade di un antîc codiç dal Sietcent conservât tal museu di Gurize, une plui antighe testemoneance scrite dal cjant, componût di 128 viers. In fin in timps plui resints il filolig professôr Zuan Pauli Gri, a traviers une atente ricercje al è rivât a la conclusion che la cjançon e je opare di un anonim scritôr popolâr, dal Friûl Gurizan. La ete de composizion e sarès simpri il Sietcent e la cente de devozion cuintririformiste.   

    Un'âtre laude natalizie cetant interessant, dulà che s'incrosin la tradizion dal cjant popolâr di tramontane e dal misdì, e je chê dal "Gesù, Gesù, Gesù, ognun chiami Gesù", cognossude ancje come "Gjesù Cjamìn", ch'e ven intonade a Çurçuvint l'ultin dì dal an, tal mostròn dal sop davuelt dai cantôrs de Plêf di San Martin. I cantôrs a van di cjase in cjase dulà che ju spietin lis fameis al complet. Cuant ch'a rivin ducj si àlcin in pîs e a scoltin in rispietôs cidinôr il cjant. Il test, cun cualchi variant e stravuelgiment, al è chel cuatricentesc di une laude dal florentin Feo Belcari, rivade in Cjargne graciis a une traduzion veneziane dal 1740. Finît il cjant, il plui zovin dai cantôrs al cjape sù il sop o ben une piçule sume in bêçs. Po augurant "…bon finiment e bon prinzipi", il grop s'in va impromentint di tornâ l'an cu ven.

    A Cjasâs, tal Cjanâl d'Incjaroi, come ta chês âtris frazions di Paulâr, la vee de Pifanie e ven prontade la "Femenate". Sotsere un grop di fruts furnîts di geis a van in sop, passant di cjase in cjase a visitâ dutis lis fameis dal paîs e a cjapâ sù lis ufiertis. Jentrant tes cjasis si cjante "Buine sere parunzine", mentri jessint s'intone "Nô us dìn la buine sere". Une volte finide la ricolte si da fûc al tasson de "Femenate", e de direzion ch'a cjapin il fum e lis faliscjis si stroleghe su cemût ch'al sarà il gnûf an.

    Unevore slargjade in Cjargne e jere ancje la tradizion de ricolte di ufiertis dai Tre Rês. Tes zornadis denant dai sîs di zenâr, tre personaçs vistûts di Remagjos e compagnâts dal grop dai sopêrs a van di famee in famee puartànt, insomp di un baston, une stele inluminade di plusôrs formis e dimensions. Apene jentrâts in cjase, a dan sù, tune des tantis variants, la lôr cjançon augurâl. In gambi ur vègnin dadis des ufiertis. Un timp in robe purcine e di mangjâ, vuê sore il dut in bêçs. Cheste antighe tradizion e je stade conservade, e tai ultins agns simpri plui valorizade, a Darte, dulà che i Tre Rês a puàrtin cun lôr in don il "pan di cjase", ossei pan benedît in glesie e fat cu la farine di siale.

    Dutcâs la tradizion de stele e dai cjants che la compagnin e je presint ancje te alte Val dal Lumiei. A Sauris di 'Sot/Untrzahre i cantôrs de stele a fàsin il gîr fermansi tai tradizionâi lûcs d'incuintri, par jessi sintûts dal majôr numar di personis par volte: a ogni fermade si dan sù un o plui cjants par zarischen sproche (todesc sauran), par italian o ben par latin. Il midiesim rituâl al ven podaspò riproponût ancje a Sauris di 'Sore/Oubrzahre e te frazion di Lateis/Latais.

da "Ladins dal Friûl" n.12 dicembar 2003

arvis/Trbižu - A Cjampros/Saifnitz/Žabnice la buinore de domenie di Pasche Majôr i vielis dal paîs si jevavin 'es dôs denant dì par lâ in glesie a dâ sù un antîc cjant. A Malborghet/Malborgeth/Naborjetu, lis feminis a làvin 'es cuatri alì de glesie dal Calvari dulà ch'a dàvin sù tre parts di rosari par memoreâ l'acjadiment des piis feminis denant dal sepulcri dal Signôr vueit e, simpri a Malborghet 'es cinc la bande musicâl dal paîs 'e sveave la int cun sunadis ligriôsis. Dut chest al sucedeve une volte in Val Cjanâl/Kanaltal/Kanalska Dolina.

    Ma vuê a Malborghet la bande no sune plui, ma lis tradizions no son ladis pierdudis e di Pontafel a Raibl e di Fusinis a Tarvis e a Goggau, te grande fieste cristiane di Pasche Majôr la int e cjape part 'es ceremoniis ch'a vègnin davueltis tes propis parochiis. Cerimoniis che dutcâs, cemût che si à vût iniment denant trat, a mantegnin un leam cu lis vieris usancis di une volte.

    I Sants Sepulcris prontâts par memoreâ la sene de muart dal Signôr su la crôs, a dan la pussibilitât ai fedêi d'ingenoglâsi a preâ tes glesiis di Ponteibe, San Liopolt, Ugovize, Valbrune e Cjampros. Mentri fra lis prucissions di Vinars sant significant e je siguramentri chê dal Calvari di Malborghet. Par cheste dade, justeapont, a tòrnin tal paîs ancje chei ch'a son lâts a logâ, o ben a lavorâ, fûr dal Cjanâl.

Simpri la setemane sante e je l'ocasion pai fruts di tirâ fûr lis scraciulis, che tes zornadis de passion a siervissìn in mancjance dal sun des cjampanis, a visâ ch'a stan par scomençâ messis e funzions.

    Ancje la benedizion de mangjative di Pasche (la sabide sante daspò di misdì) e je une usance inmò sintude. Schinken (persùt fumât), sunka (un impast di cjâr a messèt cu lis droghis), i ûfs piturâts, il pan dolç, lis lidrîs di kren, lujaniis e lenghe fumade a son par tradizion ce che lis feminis a mètin tal gei fodrât cun tune tovae blancje di lin, ricamade cu l'agnel di Pasche e il Santissìm, par po lâ in glesie pe benedizion.

    Fra la tradizion di glesie e chê popolâr si propon il piçul arbul dal "Praitl". La domenie Ulive e ven tirade fûr cheste curiôse usance. Si trate di un baston (il plui doprât al è il len di noglâr) dulà ch'al ven leât un mac, componût di ramis di geneu ch'al ven furnît cun mêi, nerancis, fics secs, une cualitât di biscots clamâts "brekel" e ancje prodots de tiere.

    Daspò la benedizion in glesie parie cu l'ulîf, i furniments dal "Praitl" a vègnin mangjâts in famee. Une volte cul piçul arbul disfurnît si fasevin tre gîrs atôr de cjase, parvie che esisteve la crodince che cussì e sarès stade travuardade dai fûcs, des malatiis e di âtris conseguencis. Inmò cualchi rame e vignive brusade tal spolert cuant ch'a capitavin grandis stralechis, e ancje scuindude tes sachetis dai nuvìçs denant ch'a làssin in glesie a maridâsi.   

    A Dolegne, tal Friûl di Jevât, la joibe sante il muini al lave pes fameis a cjapâ sù lis ufiertis ch'a coventavin par comprâ il vueli sant. Ogni famee e veve di dâ secont in cetancj ch'a jerin. Il vinars sant a Prepot, e la sabide a Dolegne si faseve la prucission sotsere, inluminade de lûs dai curubui imbombâts di petroli, e picjâts sù pes fereadis, o metûts in grums disponûts dilunc la trate de prucission.

    Sabide sante, di buinore, in glesie in tun mezùt refratari, al vignive impiât un fûc. I fruts a cjapavin sù un pôc di chest fûc e lu metevin in bussulots sbusâts, po a corevin pes corts e pes andronis a puartâ une bore par ogni famee. Pe strade a sgurlavin il bussulot e a mantignivin vivarôs il boreâl zontant bocons di fonghe secje, di chê ch'e cres si la scusse dai morârs. Cheste usance di puartâ par Pasche il fûc sant tes cjasis, e je inmò presint in cualchi paîs de Slavie Furlane.

    A Cjaneule, une volte, il dì di vinars sant si rispietavin il cidinôr, il dizun e il ripôs, vadè che no si lavorave. Un che nol crodeve a chestis cjossis, e ch'al lè istès a svangjâ tal ort, a un ciert pont al tirà fûr de tiere un crocefìs. Chest spieli tal paîs al fasè cetant sunsûr. Al sun dal Glorie, si lavave la muse, massime chê dai fruts, parcè che no ur vignìs il mâl de crafe. Intant de messe di Pasche, in biei geis fodrâts, si puartave a benedî pan, ûfs e fucjacis. A cjase po il pari al dave fûr un pôcje di ogni cjosse benedide a ognidun de famee.

Tirât fûr da "Ladins dal Friûl" n.4 avrîl  2004

San Pieri di Cjargne - Domenie  23 di mai e cole la fieste de Sense, une ricorince religjôse di grant significât. Dutcâs cheste celebrazion e cuiste moments particolârs sore il dut in Cjargne, a San Pieri, su la mont ch'e je logade parsore Zuj e Darte, dulà che ta cheste dade si davuelç l'antighe ceremonie da l'avôt e de "Bussade des Crôs".

Dut al partìs di lontan, di Julium Carnicum (il Zuj dal dì di vuê), fondât dai romans sui rescj di une cente celtiche par resons militârs, valadì tirât sù come "castellum", ossei lûc fuarteçât, viers la mitât dal prin secul d.di Crist. Julium Carnicum, colegât cun Acuilee mediant une valent rêt di stradis, massime cu la "Vie Claudie Julie", al diventà a un ciert pont un centri impuartant di ativitât e di marcjât pes popolazions di mont dai teritoris daprûf, oltri che un lûc di soste obleade pai trafics cu lis regjons di là des monts, ossei cul Noric.

    Tal IV secul Zuj al diventà sede vescovîl e un tant al scrupulâ ch'e esistès une glesie, no dome organizade, ma impegnade te evangelizazion de interie Cjargne. Di cheste fuarte esperience religjôse dal cristianesim de mont furlane, carateristic des comunitâts cristianis dai prins secui, e je nassude la tradizion de "Bussade des Crôs". Ossei il ricognossiment e il rispiet des glesiis des diviersis "vilis" sparniçadis pai Cjanâi, a la Glesie Mari di San Pieri di Zuj. Al merte dal rest memoreât che une tradizion avuâl si la cjate purpûr a Marie di Saal, in Carintie.

    Su la olme dai vons dilunc lis tratis de tradizion duncje, che dutcâs no po’ sei considerade un passaç acritic, ma ch'e domande di realizâsi te gnovitât e te continuitât. Chescj aspiets a son di fonde parcè che il patrimoni di valôrs ch'al à di jessi trasmetût 'es generazions in avignî, al resti vîf, momentôs, vêr e sintût.

Si po’ inalore dî che la tradizion e je vite. Mentri al contrâr il tradizionalisim, cundidì il leam nostalgic cul passât, al è invezit la fin de vite e la muart de tradizion. E se la tradizion e je il risultât di un filosofâ inteligjent e sapient, il tradizionalisim al è, al contrâr, segn impreteribil di pegrece e di impidiment creatîf.

    Al è, chest, un discors dal sigûr no facil, ma ch'al à di puartânus a rifleti, massime nô furlans. Il passât al à valôr dome se nus permèt di capî e di vivi il presint tant che premisse fondamentâl di une continuitât tal avignî. Se la tradizion si ferme cun nô no à perspetivis; se partìs di nô no à passât: sevi tal prin che tal secont câs no si realize ni passaç e ni continuitât, e il doman nol varà storie.

    Secont l'usance la buinore dal dì de Sense si cjatisi ducj sul splaç ret la glesie clamade de Madonute. La cerimonie de "Bussade des Crôs" e cjape dentri tre moments di fonde. Il prin al è chel des Rogazions, ch'al puarte in prucission la int, lis crôs e i predis tal Plan de Vincule. Il secont al è chel clamât de "Polse", cu lis crôs des Plêfs, inflochetadis e furnidis di rosis, che si disponin in cercli in face al prevost di San Pieri ch'al prepare la cerimonie de bussade cun chestis peraulis: "Cristians dal Cjanâl di San Pieri e di ogni âtri sît! Achì atôr de nestre antighe Plêf di San Pieri, o vignìn ogni an preant daûr des nestris crôs, par rinfrescjâ la memorie di tancj secui passâts, cuanche cheste e jere la glesie di dutis lis glesiis dal Cjanâl, cuanche i vons a cjapavin achì l'aghe sante dal Batisim e a tornavin ducj achì a polsâ par simpri daspò muarts. Cjatâsi achì, sot chest cjampanili, al vûl dî ricuardâsi ch'o sìn inmò fradis, ducj unîts te religjon, te storie, tal lavôr e tal sudôr. Al è come cuanche i fîs di chest stès pari di famee, cressûts e diventâts ancje lôr paris di tantis âtris fameis, si cjatìn tune dì di fieste dongje dal lôr prin fogolâr e si cjàlin tai vôi, par no dismenteâsi di sei nassûts di chel stès çoc, di sei obleâts a volêsi ben e a judâsi in dutis lis lôr dibisugnis…".

    Al ven daûr il moment plui spietât, chel de clamade. Si scomence, cemût ch'e proviôt la tradizion, cu la crôs de Plêf di Sante Gjeltrude di Tamau, e si finìs cun chê de Plêf di San Pieri. Par solit si dan la volte plui di cuarante crôs, dal Cjanâl di San Pieri, dal Cjanâl di Guart e, di cualchi an in cà, ancje un pôcjis ch'a rìvin sù de Furlanie.

    Lis celebrazions a rìvin insomp cu la messe grande in Plêf, cjantade e funzionade par furlan. In fin la benedizion e l'augûr dal prevost di Zuj: "…di une buine anade, pe anime e pal cuarp", al mande dute la int a cjase tai siei paîs.

Tirât fûr da "Ladins dal Friûl", n.5 Mai 2004

In Friûl il timp des fiestis ch'a puàrtin a Nadâl, scomençât tai paîs di mont cun San Niculau, al va indenant in âtris sîts cun Sante Luzie ch'e cole ai tredis di dicembar. A Udin e tes vilis de planure furlane, cheste sante e cjape il puest dal sant vût iniment denant trat tal puartâ sops e zugatui ai fruts. Une volte tal capolûc dal Friûl par cheste dade si metevin sù bancùts di dolçs e di zugatui fûr de glesie dal Redentôr, dulà che justeapont e ven venerade la virgjine di Siracuse.

    Oltri che in Furlanie si sa che sante Luzie e ven festezade in cierts paîs dal Cjadovri, tai contôrs di Trevîs e di Verone. Plui a soreli bonât ancje in Valsugane e tal rest dal Trentin, dulà che i fruts a mètin sui balcons i plats e lis scudielis cun dongje la semule pal mus, e a spietin i dons de martare siciliane, che ai plui triscj ur distine une scorie.

    Inmò un'âtre regjon dulà che la martare e je cetant popolâr parvie ch'e puarte dons ai fruts e je la Lombardie. Tai contôrs di Bresse di Milan e di Bergum i fruts a mètin une scarpe sui balcons la sere de vee. Chei dai paîs de Valcamoniche a zontin il fen pal mus,  che furnît di une cjampanute al va daûr a la sante, rapresentade di une fantate vistude di blanc.

    La fieste di sante Luzie e je diventade cetant popolâr par une rieste di fats ch'a àn pôc a ce fâ cu la figure storiche de martare. Luzie e fo veramentri marturizade a Siracuse dilunc lis persecuzions di Dioclezian, ma cemût e parcè no si lu sa. Une liende e pant ch'e jere une zovine ricje e biele di Siracuse, zà distinade a maridâsi cun tun zovin di chê citât. Ma dilunc un piligrinaç al sepulcri de martare Agate, a Catanie, dulà ch'e jere lade par domandâ la gracie de vuarison par sô mari, la sante j comparì in sium e j disè che ancje jê e sarès stade marturizade. Tornade a cjase, Luzie e decidè di rinunziâ 'es gnocis e a dè fûr ducj i siei avês ai povars; e par no cedi 'es suplichis dal morôs si gjavà i vôi. Denunziade e puartade denant dal judus no rinunzià a la sô fede, e cussì e vignì condanade a muart.

    Al di là de lejende, al semee ch'e sedi muarte pardabon ai 13 di dicembar, cemût ch'al ven purpûr ripuartât tal "Martirologi Gerominian". Cheste date, che te prime mitât dal secul diesim-cuart e colave propit tal solstizi d'unviêr par colpe de difarence tra l'an dal soreli e il calendari julian, e fasè in mût che la sante e jentràs te tradizion popolâr (un proverbi al pant che la zornade di Sante Luzie e je la plui curte di dutis lis zornadis da l'an).

    Preade di cui ch'al veve dafâ cui mâi dai vôi, il cult par Sante Luzie si slargjà te ete di mieç par dute l'Italie. In Emilie, in Lombardie, in Venit e in Friûl. E inmò in ciertis regjons da l'Austrie, in Cechie e in Slavuachie, dulà ch'e cuistà ancje funzions solstiziâls - come Jesù Bambin, San Niculau e la Befane - puartant dons ai fruts.

    Une volte, par daj il benvignût, si ufrivij piçui dolçs, no plui grancj di un carantan, che si leavin ai cordons des scarpis poadis su la bancje dal fogolâr o su la basse dal balcon de cusine. E tes zornadis denant de sô fieste grops di fruts a lavin sunant sampogns par nunziâ la sô vignude.

    Fintremai tes riformadis Danimarcje e Svezie il 13 di dicembar al è festezât cu l'elezion di une "virgjine savie" che, compagnade di âtris fantatis cun viestis blancjis e furnide sul cjâf di une corone ch'e ten adun siet cjandelis impiadis, e va pes stradis e pes cjasis a racuei dons. Chescj regâi a vignaràn podaspò puartâts ai fruts des scuelutis e a vielis ch'a son sotetâts tai institûts ch'a asistin i povars.  (edelweiß)  

Tirât fûr da "Ladins dal Friûl", n.12 Dicembar 2004

Vinars Sant te tradizion di Nert

Nert - Par misurâ la Coresime, e aduncje il tirâsi dongje de fieste grande di Pasche Maiôr te tradizion popolâr furlane si dopre une detule ch'e da un non a ognidune des domeniis ch'a fasin part di chest timp particolâr de liturgjie cristiane. Il mût di dî al pant cussì: "Tute, Mute, Galilee, Pan e pes e Lazaree, domenie Ulive e Pasche fluride".  Cemût che si pò capî i nons di chest mût di dî a son stâts tirâts fûr des parts di Vanzeli che in chestis domeniis a vegnin letis tes glesiis. Tant par dî "Pan e pes" al fâs riferiment al meracul de moltiplicazion dai pans e dai pes, ch'al ven ripuartât dal Vanzeli seont Marc.

Tirât fûr da "Ladins dal Friûl", n.3 març 2005

Spietant une volte la Gnot Sante

    Dut chest, aromai, al è dome un ricuart, a restin vivis in part lis tradizions de mangjative, il peç e soredut il presepi a ricuardânus il significât profont e simbolic dal Nadâl, il so messaç di amôr che al è ben cjapât dentri intun antîc sproc augurâl irlandês: “…e, fintremai al nestri prossim incuintri, che al puedi il Signôr tignîti inte palme de Sô man”. (m.s.)

Tirât fûr da "Ladins dal Friûl", n.12 dicembar 2005

La prucission a Jeunn contade di Lois Craffonara
 

Cuntune biele suaze di public, za fa cualchi mês, alì dal Museumladin di San Martin de Tor in Val Badie al è stât presentât il gnûf libri “Jì en Jeunn - die Wallfahrt Der Gadertaler Pfarreien Nach Säben” (Il piligrinaç des Plêfs de Val Badie a Jeunn), dal dr. Lois Craffonara.

    Tante partecipazion di public ae presentazion de gnove opare e jere stade ancje prudelade dal fat che si saveve che Lois Craffonara al veve tirât fûr documentazion gnove par cirî di sclarî, al di là des suposizions fintremai a vuê palesadis cuntune cierte superficialitât, lis veris resons che a àn inviât la tradizion vielone dal piligrinaç dai ladins de Val Badie ae glesie de Sante Crôs di Jeunn ( par todesc Säben e par talian Sabiona).

    Ogni trê agns, viers la mitât di jugn, i predis e i oms de Val Badie a davuelzin cheste tradizionâl prucission tra lis monts. Il viaç al dure trê dîs e si lu fâs rispietant lis antighis usancis: i oms des parochiis de alte Badie si incuintri inte vile di Pescol (a bonât di Pedraces e a traviersin ducj insiemit il pas di Joél par rivâ jù a Longiarù, dulà che i piligrins dal paîs si zontin cun lôr. A traviers il pas di Medalges / Kreuzjoch (2294 m.), la prucission e va dilunc viers Sante Madalene, in Val di Funes, dulà si metarà adun cun chei altris ladins de Badie.

    I oms de basse Badie si cjatin impen a Antermoia, e a van dilunc po ducj insiemit a traviers il Pas des Jerbis (2005 m.) ae volte di Sante Madalene. Lant daûr il standart de glesie de Sante Crôs in Badie, la prucission al complet si invie viers San Pieri di Funes, dulà che e ven ricevude dai predis di chê glesie e de int cui confenons, la musiche e il sun des cjampanis. Daspò une curte funzion inte glesie furnide di fieste, ogni piligrin si cîr il puest dulà che al podarà lâ a durmî. Par solit si va a durmî intes fameis, che a son simpri chês par vie che si tramade chest acet di gjenerazion in gjenerazion.

    La zornade daspò la cjampane e svee i piligrins bielzà ae cuatri di buinore. Bevût il cafè in curt i oms a son un'altre volte in viaç dant sù il rosari, e viers lis nûf a rivin a Jeunn. Daspò vê funzionade la messe inte glesie de Sante Crôs e daspò une curte funzion inte glesie di Klausen, i piligrins a tornin a San Pieri, dulà che si fermin a durmî pe seconde volte. Inte tierce dì i diviers grups, daspò

vê cjapade messe, si inviin viers lis lôr vilis, passant in part ancje par stradis difarentis. Dutis lis comunitâts parochiâls a spietin i propis oms che a tornin dal piligrinaç, e ju ricevin cul sun dal cjampanon e de musiche de bande dal paîs.

    Cemût che al sclarìs tal so saç Craffonara, al esist un fuart atacâmint dai ladins de Val Badie ae lôr prucission, che al è documentât de storiografie e si davuelç inmò cuntune fuarte partecipazion (par solit  un grup di circje mil piligrins) . Par chest la prucission a Jeunn / Säben e je une tradizion che e à podût conservâsi insin al dì di vuê, si ben che lis autoritâts civîi e eclesiastichis la vebin a dilunc slaifade. In sumis la prucission e rapresente il plui impuartant acjadiment religjôs e di cheste comunitât e di cheste val. Se si ves di fâ un avuâl cun chenti, si  podarès dî che e à la impuartance de “Fieste de Sense” e de cerimonie de “Bussade des Crôs” a San Pieri di Zui pai cjargnei.

    Dutun in chel si è svilupât il mît, sintût de popolazion e seondât dai mass media, di une dimostrazion di fede viere dal prin mileni, fondât suntune interpretazion pôc corete, o ben superficiâl, de documentazion a disposizion, ma che sul plan storic e sientific no à nissune tignince.

    Lois Craffonara, di chel studiôs scrupulôs e atent che al è, cun cheste sô opare al à cirût di tornâ a meti i tassei di chest mosaic tal lôr puest just. E lu fâs, di chel espert che al è, zovantsi ancje de linguistiche. Cussì nus displee che, secont l'evoluzion fonetiche vude dal ladin, ducj i tiermins ladins a divegnin dal tart medi-alt todesc “Seven”, mentri l'antîc non ladin Saióna, Sabióna, Savióna al è disparît dal dut de memorie e dal patrimoni linguistic dai ladins, fintremai inte  daprûf Val Gardene, daspò il stralozâmint de sede vescovîl a Bressanon / Brixen. Vadè che il prestit Jéven - Jéunn e v.i. al pò dome divignî di une ete che e va dal 1250 al 1400, che e risulte cussì jessi la plui viere datazion pussibil de prucission. Par chel che al inten invezit lis motivazions, dal sigûr a àn cefâ cui flagjei di ogni fate (invasions di cavaletis, eclìs totâl di soreli, taramot, epidemie di gjandusse) che a àn interessât la Val Badie dilunc il secul diesim-cuart. In conclusion o sin in presince di un libri cetant interessant e ben fat, cemût che darest al è tal stîl e inte serietât tal lavôr dal so autôr.

Tirât fûr da "Ladins dal Friûl", n.10 Otubar 2006