Cul numar che al jessarà ai prins di Avrîl cu ven il nestri sfuei mensîl in lenghe furlane "Ladins dal Friûl" al taiarà il travuart dai tredis agns di presince seguitive. In tredis agns a son jessûts juste apont 156 numars (plui cinc libris come suplement dal gjornâl), dulà che a son stâts publicâts dibot 1300 articui su argoments diferents: leterature, recensions di libris e mostris, storie, tradizions e atualitât, cuntune atenzion particolâr ai dibatiments sul cont de lenghe, de culture e de autonomie de nestre tiere.

    "Ladins dal Friûl" come gjornâl al ven fondât tal 1998. La regjistrazion , cul numar 123, alì de Cancelarie dal Tribunâl di Tumieç e puarte la date dai 9 di Març. Fondadôr e diretôr responsabil al è Renzo Balzan, l'editôr la associazion culturâl "Friûl tal Nord" di Buie. Si trate, cemût che al sclarìs il sot-titul, di un "Periodic-mensîl di informazion e culture sul cont de minorance celtiche dai Ladins de Furlanie". Il prin numar al ven fûr ai prins di Avrîl dal istès 1998.

    Al at de fondazion la redazion dal sfuei e à fat cuatri sieltis di fonde: il gjornâl al sarà simpri scrit dut par furlan; si rinunzie aes contribuzions publichis par jessi libars di ogni pussibil santolance; il gjornâl al ven componût, fotocopiât e spedît in propi par ridusi il plui pussibil i coscj de sô realizazion, ma ancje parcè che si smire, in prospetive, ae sô publicazion on-line su Internet; il gjornâl al varà di operâ in maniere particolâr par mantignî, e infuartî, i rapuarts e i scambis culturâi cun chês altris regjons ladinis des Dolomitis e dai Grisons svuizars. Propit pes resons sclaridis denant trat, in ogni numar dal sfuei si cjatarà une pagjine di informazion sui fats de croniche e de culture di chei altris grops ladins.

    In aplicazion ai principis e aes smiris dal progjet tal mês di Mai dal 2002 e je stade inviade la publicazion di "Ladins dal Friûl" on-line sul web, a traviers il sît www.digilander.libero.it/ladinsdalfriul. Un sît che oltri al gjornâl al proponeve ancje informazions e documentazion su aspiets de leterature, des tradizions e de linguistiche, massime sul cont des comunitâts ladinis.

    Un altri passaç di trasformazion e di infuarciment dal gjornâl si lu à vût tal mês di Avrîl dal 2003, cuant che al editôr "Friûl tal Nord" i à cjapât la volte la associazion "CjargneCulture". Une sielte detade de adesion a un progjet culturâl che si à ritignût valit par dâ une sperance di rinassince e di svilup, sot ducj i aspiets, ae mont furlane, dulà che la redazion e à la sô sede e e opare, o sei a Tierç di Tumieç.

    Cu la jentrade in "CjargneCulture" al è stât daviert un gnûf sît, ven a dî www.ladinsdalfriul.org che al à funzionât fintremai ai prins di Avrîl dal 2008. Di chê volte in ca la gnove direzion dal sît, che si è proponût cuntune vieste rinovade e inricjide graziis soredut a cui che come webmaster lu sta curant e azornât, dantnus une man pardabon grande, e je www.ladinsdalfriul.eu.

    Dal gjornâl di cjarte impen a vegnin vuê stampadis uns tresinte copiis, che a son spedidis aes bibliotechis e aes istituzions culturâls dal Friûl, aes istituzions culturâls des provinciis di Bolzan, Trent e Belun, e a ducj chei che lu domandin.

(La redazion di "Ladins dal Friûl" - Tierç di Tumieç / Març 2011)

Diretôr responsabil Renzo Balzan - Registrazion alì de cancelerie dal Tribunâl di Tumieç
dai 9 di març 1998, al numar 123.

Tutti i diritti riservati