Cui isal un bilengâl? -  Un sogjet che al dopre dôs lenghis in diviers contescj (in privât, in public, sul lavôr, a scuele e v.i.) e intune buine part di interazions (cu la parintat, cui amîs, cui superiôrs, cui forescj e v.i.) e intune varietât di regjistris e stîi (familiâr, formâl, academic, professionâl, leterari) al è par solit un bilengâl. Si fevele di competence bilengâl par indicâ che si trate di nivei di competence di dôs lenghis. Nivei che dut câs a son dispès diferents. O vuei dî che la cognossince di dôs o plui lenghis no je mai perfete. Des voltis un al capìs e al fevele benon, ma nol sa ni lei e ni scrivi. Altris voltis al cognòs dome la lenghe scrite. Tancj professioniscj e professôrs universitaris a scrivin e a publichin articui e ancje libris par inglês, ma cuant che si trate di comunicâ a vôs, si cjatin pitost imberdeâts.

    Si dîs che un bon bilinguisim al à di jessi ecuilibrât: un al capìs cence fadie la lenghe fevelade dai natîfs e si fâs capî cence fadie e po al sa ancje lei e scrivi une buine varietât di tescj. Il bilinguisim al è aduncje une cuestion di grât di competence che si slargjie e si inricjîs dilunc dut l'arc di une vite.

    Al va metût in plene evidence che la persone bilengâl, intune societât che e sta deventant simpri plui plurilinguiste e multiculturâl e rapresente un bon esempli par inviâ un procès di educazion interculturâl che al varès di penetrâ la societât interie sevi in zornade di vuê sevi pal a vignî. Ta cheste sezion de guide o ponarai des cuestions che une famee si pon cuant che si cjate a decidi se cressi un frut cuntune o cun dôs lenghis.

    Cuai sono i vantaçs di savê dôs o plui lenghis? - Sielzi une o dôs lenghis al varà di sigûr influence su la identitât dal frut, su la sô vite a scuele e inte societât, sul incontrâ matrimoni, su la educazion dai fiis, sul lavôr. Une buine part dai vantaçs e je bielzà saltade fûr inte prime part dal librut. In struc o podìn dî che, rispiet a un che al sa dome une sole lenghe (un monolengâl vadì) il bilengâl al à la pussibilitât di comunicâ cuntun plui grant numar di int e di cognossi diretementri, cence vê bisugne de traduzion, cjantis, rimarolis, mûts di dî, proverbis, contis e storiis e, plui indenant, la leterature, il pinsîr sientific e filosofic, la storie e lis tradizions di un altri popul. Cun dôs lenghis si slargje il patrimoni culturâl, no dome il vocabolari o la gramatiche.

    Un frut che nol sa la lenghe dai nonos (tal nestri câs la lenghe furlane n.d.r.), di chê altre bande, al pues  sintî  une sorte di lontanance dal lôr mont e, dal sigûr, al romp il fîl de continuitât di une gjarnazie a di chê altre. Si cree ancje cussì chel vueit tra lis gjenerazions (the generation gap) cause di tensions e di incomprensions. Dai fruts che a cognossi une sole lenghe (par esempli dome il talian n.d.r.), la peraule e je considerade tant che une etichete tacade sul ogjet. Pai bilengâi che a cognossin almancul doi tiermins par ogni ogjet, il leam tra la peraule e il concet (la idee di une robe) nol è mai strent. La peraule e la idee a son distacadis come che in efiet a àn di sei. Lis peraulis no son di fat incoladis su lis robis e il fat che in efiets il non al mudi di une lenghe a di chê altre, al jude il çurviel a acetâ un principi di fonde de linguistiche, ven a stâi che la peraule e je convenzionâl e arbitrarie. Se par furlan si dîs cjadree, par talian si dîs sedia, par inglês chair, par francês chaise, par todesc Stuhl. Il soreli, par talian al è sole, par inglês al è sun, par todesc Sonne e par sloven sonce. Il principi de variabilitât al devente evident.

    Un che al si môf dentri di un sôl sisteme linguistic al fâs plui fadie a acetâ chest fondamentâl principi: al è mancul flessibil e creatîf, plui stagn insome.

    La marilenghe - Ae lûs des gnovis ricercjis che a son stadis fatis su la famee e su la maniere di doprâ la lenghe o lis lenghis tal ambient di cjase, ancje il tiermin marilenghe al va aduncje scrutinât miôr.

    Une definizion positive di marilenghe e viôt la funzion de mari tant che pilastri che al sosten dute la incressite dal frut: lu nudrìs ancje cul afiet des peraulis, lu sacode, lu protêç, lu confuarte, lu console, lu instrade. E je jê il model di riferiment principâl. Il frut si sintonize sul sun de sô vôs, de sô lenghe, inmò prime di nassi e al ricognòs la vôs de mari jenfri dutis chês altris cuant che, inte scune, al rive a fadie a tignî vierts i voi.

    Al è dome di pôc che i studis a àn metût in lûs la impuartance de funzion dal pari tal svilup dal lengaç infantîl e la influence che al à tal preseâ o mancul che in famee une lenghe e vegni doprade. La decision di bandonâ l'ûs dal furlan cui fiis, par esempli, a puedin cjapâle ducj i doi i gjenitôrs, par vie che a crodin che ur zovi a imparâ miôr il talian e a gjavâse miôr a scuele e inte vite. Une ricercje dal 1981 (Harrison et al.) e mostre che lis situazions di bilinguisim a gambiin e si mudin in monolinguisim se i paris no cognossin o no vuelin doprânt une. I fiis a finissin par cressi cuntune sole lenghe: chê uficiâl, o sei il talian, par nô (un fat chest che, magari cussì no, al sucêt ancje masse dispès culì in Friûl n.d.r.). (silvana schiavi fachin)   

  Friûl: un popul, une tiere, une lenghe!