Cedarcjes di Darte - Di resint e je stade fieste a Cedarcjes di Darte pe scree de gnove sede de Fondazion dedicade a Luîs Candoni, il grant om di teatri juste apont cedarcjin. La presince di un public numerôs e à degnementri insuazât la cerimonie di scree cui intervents dal sindic di Darte, Marlin Peresson e di Julian Candoni, dean de Associazion Culturâl “Luîs Candoni” che è à in afidament la gnove struture, rigjavade intai locâi de ex scuelute dal paîs. Pauli Patui, diretôr artistic de Fondazion, tal so intervent al à memoreât sevi la figure dal scritôr cjargnel, sevi il condurant lavôr di almancul cuindis agns in ca dai promotôrs de iniziative, o sei Luîs Dereatti e Celestin Vezzi, oltri naturalmentri dal mai dismenteât Luci Cimiotti.

    La gnove struture, oltri ae Fondazion Candoni, e loghe la sede des associazions presints a Cedarcjes, la Biblioteche comunâl e une slargjade documentazion metude adun dal ric archivi Luîs Candoni (bielzà in part catalogât dal CSS di Udin) e un ancjetant interessant archivi donat de professore Irme Bortolotto. inmò, oltri a cartolaments e tescj creis dal autôr cjargnel, al cjape adun la racolte des oparis che a àn partecipât aes numerosis edizions dal “Premi Candoni”, par teatri e radio-dramis. In sumis une Cjase vierte ae curiositât de int, aes ricercjis dai studiôs e dai students e a ducj chei che a volaran capî di plui, e miei, la storie di chest om che al cuistà fûr di chenti une slargjade innomine, ma po dismenteât di une Cjargne dabon pôc ricognossint viers i siei fiis plui ilustris. (red.)

    Luîs Candoni, scritôr, poete e autôr di tescj pal teatri, al è nassût a Cedarcjes di Darte ai 2 di Otubar dal 1921 e al è muart a Udin ai 13 di Avost dal 1974. Laureât in economie e cumierç, al à fondât e direzût la riviste teatrâl “Orazero” e la companie Teatrozero. Esponent dal teatri di avanguardie talian di lui prudelât cul Festival des novitâts a Rome fintremai dal 1951. Tra i siei maiôrs sucès, rapresentâts in dute la Europe, ma ancje in Americhe e in Afriche: “Un uomo da nulla” (1953); “Nessuno è solo” (1959), premi RAI-TV 1959; “Eva nascerà domani” (1955), (tradusût par sloven di M. Brecelj); “Desiderio del sabato sera” (1958);; “Epido a Hiroscima”(1961), Premi de Pro civitate Christiana di Assisi 1961; “I fuochi sulle colline” (1966). Al à scrit ancje il radio-drame “Nebbia” (1969) e trê romançs. Par furlan al à scrit: “Desideri de sabida sera”; “Strissinant vie pe gnot - Cain” (1974) e la racolte di viers “Lontan dai vôi” (1970).

    Al è evident che de bio-bibliografie di Candoni e ven fûr la figure di un personaç inteligjent, brilant, anticonformist, che al à cirût di avierzi stradis gnovis pal teatri, frontant dispès temis discomuts, e partant scuintrantsi dispès cun duris oposizions. Il spieli di cheste realtât la cjatìn ben contade di Pauli Patui inte introduzion ae ristampe dal drame in doi timps “I fuochi sulle colline”. Il drame mutivât al vignì comissionât dal comun di Udin al Candoni par celebrâ i cent agns de anession dal Friûl ae Italie. Naturalmentri di chel spirt acût e ribel che al jere no si sumià  a fat di scrivi un test retoric che al celebràs chel acjadiment in maniere enfatiche. Vadì che  “I fuochi sulle colline” a deventarin invezit une vere e propie cuintristorie teatrâl dal Friûl. Il risultât al fo che il spetacul al vignì atacât e criticat in maniere cetant dure.

    La stampe di chenti, cul solit “Messaggero Veneto” in teste, e ve une reazion rabiose, oltri ogni limit dal dirit ae critiche e de decence. Naturalmentri la polemiche no podeve no lâ a finîle in consei comunâl a Udin, ancje parcè che a comissionâ la vore e jere stade propite chê aministrazion. Ancje achì acusis e insults. Candoni di dut chest al restà une vore malapaiât, tant che a un ciert pont al fasè disparî ogni olme dal so lavôr no lassant ator nancje une copie. In veretât, e par fortune, une copie di chest lavôr di salvà. E fo cjatade di Pauli Patui (che si è laureât in letaris cuntune tesi di lauree sul teatri di Candoni), cuant che la fie dal scritôr, Elviana, i afidâ l’archivi e dutis lis cjartis di so pari che e veve. E fra chês cjartis e saltà fûr une cartele cun dentri vie une copie dal drame, che po al è stât tornât a ristampâ propite  par cure de associazion di Darte a lui titulade, tal 2001.

    Cuant che si metè a lei chês cartelis Patui si rindè cont che “I fuochi sulle colline” a jerin a ducj i efiets une vere cuintristorie dal Friûl, su la ande di chê che al veve bielzà scrite chel spirt ferbint e ancjetant ribel che al jere stât Josef Marchet. Une cuintristorie de nestre tiere tradusude in forme teatrâl, scrite cun impit passionâl, di puartâ su la sene cu la legre incussience di cui che al sa e nol sa, che e proviôt e no proviôt i esits de provocazion fin a se stesse e propite par chest destinade a ferî e a sglovâ. Cussì il drame, metût in sene al Zanon di Udin ai 13  e 14 di Otubar dal 1966, si palesà tant che un curtìs plantât tal stomi dal Friûl e dal so cjâf lûc, e al fo segn di division, ma ancje di amicizie e di condivision cun cui che al viodeve finalmentri la Furlanie, la sô storie e la sô int, che e meteve de bande ogni doplece e ogni inutil retoriche nazionalistiche.

    Al scrîf infin ae sô introduzion Pauli Patui: “Chescj a son stâts i segns concrets dal contribût dât di Candoni al mont furlan, ma tal rifleti sore aes acusis di scjars interès intai rivuarts dal Friûl, acusis vivis in chê volte e forsit inmò vuê, non pues fâ di mancul di pensâ a cemût che al sedi ordenari crodi che al basti fevelâ par furlan par sintîsi furlans, che al basti fevelâ di Friûl par dâ di viodi di jessi furlans. Candoni al veve un mût so di rapuartâsi a cheste tiere, al jere un mût filtrat e modificât des esperiencis cul mont teatrâl nazionâl, adatât ai siei metris di judizi, i siei mûts di sintî, chei plui interiôrs e vêrs. Al possedeve, vadì, un fuart leam cun cheste tiere, cu la vite de sô Cjargne e in chest sens il so apuart ae culture furlane al è stât significatîf propite in virtût di cheste evident e necessarie origjinalitât”.

    O sierìn chest ricuart di Candoni proponint une sô cetant biele poesie par furlan, che e à par titul “Friûl: puarta di violis”: Cjalàit sul orizont neri dai grîs:/ a’ si sbrùmin i prâz di Nojarêt/ sot il soreli ch’al ven su cjantant./ Cjalàit sul orizont vert dai grîs: un cjaval di Aquileia/ senza omp e armadura/ senza piel e vôi/ cu la criniera franza di vint/ al galopa sui fûs longobàrz./ Cjalàit sul orizont zâl dai grîs:/ una capa di tôr/ a jeva trombis malvìnis/ sul sanc dai papavars/ par riverî il paron  Savorgnan/ cu la onda di spadis venezianis/ che da Grao si sfranta cuintri Osôf./ Cjalàit sul orizont blanc dai grîs/ e viarzéit cûrs e pojûi/ a saludâ duta la int ch’a jentra/ in un slavàz di asfalz./ E ciantìn: chesta ’a je la buina tiara/ ch’a slusìgna di sìlabis strogòtis/ Friûl: puarta di violis/ par un soreli di nèif.  (von zercläre)