Udin - A podaran sielzi tra 43 cors di lauree trienâl, 48 di lauree specialistiche e 29 scuelis di specializazion, plui uns vincj master e plusôrs cors di perfezionament, lis matriculis che a intindin notâsi ae Universitât dal Friûl di Udin. Lis imatricolazions, scomençadis ai 13 di lui stât, si sieraran ai 6 di novembar cu ven. Vadì che e je incressude l'ufierte didatiche dal Ateneu furlan o, par dîle sicu il retôr Furio Honsell, che al sta par inviâ il so sest an di mandât, “si complete e si infuartìs”.

    “L'increment principalmentri al rivuarde lis laureis specialistichis e magjistrâls - al marche il retôr, biel che al partìs il cors che al dure cinc agns di Jurisprudence. Intant Studis europeans al davierç pe prime volte l'Universitât di Udin aes siencis politichis”.

    Aduncje par Udin si rint pussibil la viertidure  gnûfs orizonts. Ma cualis sarano lis pussibilitâts professionâls di chescj cors? “La lauree in Studis europeans e varà di formâ in maniere complete, dant la plui slargjade competitivitât inte direzion des relazions internazionâls. Pensìn par esempli che in curt o lin viers un slargjament de aree Schengen cul inseriment de Slovenie. Rindi compatibii i diviers sistemis juridics e lis proceduris aministrativis e burocratichis no je une operazion che si realize dibot. A coventin esperts in dirit comerciâl e logjistic.

Dutis lis impresis  che intindin smirâ ae internazionalizazion a àn bisugne di personis buinis di comunicâ”. Al è il prin e forsit fondamentâl pas par inviâ Siencis politichis, che Udin al intint realizâ in timps curts.

    Ancje inzegnerie de Inovazion e rapresente une novitât: “Volude su prudêl de associazion dai industriâi, e varà di formâ esperts pal distret de Componentistiche che al vignarà sù a Pordenon”.

    Al sarà cence altri un mutîf fuart di atrazion il gnûf cors che al dure cinc agns di Jurisprudence. “Daspò la pussibilitât dal 3 plui 2 cun Siencis juridichis, il secont passaç de riforme, dant vie libare ae lauree in Jurisprudence, al da soredut rispuestis a cui che al vûl cjapâ la cariere professionâl, o sei deventâ avocat, magjistrât o nodâr. No son tancj in Italie - al rive insom Honsell - i ateneus che a puedin svantâ il cors di cinc agns in Jurisprudence”.

    In fin, Honsell al sotlinie cun orgoi un gnûf curriculum dentri vie de facoltât di Letaris: e je Culture dal turisim, “realizade in colaborazion cul istitût Stringher e che e cjale ae organizazion dai grancj events culturâi”. (mar.no.)

1500 firmis cuintri i eletrodots

Triest - Une petizion sotscrite di 1500 citadins, cun a cjâf Marc Lepre, che e rivuarde i progjets di costruzion di eletrodots in Cjargne e che e domande che a sedin scrutinâts cun atenzion intes sedis competents dutis lis alternativis pussibilis, e je stade consegnade di resint a Triest al president dal Consei regjonâl, Alessandri Tesini, presint il conseîr Alessandri Metz dai Verts.

    Lepre, president de sezion cjargnele di Leghe-ambient, al à displeât lis resons de iniziative sotliniant che chei che a àn firmât a son ancje rapresentants di pro lûc, circui culturâi e associazions. Inte petizion si fâs riferiment ae presentazion de bande de Societât Alpe Adria Energjie dal progjet che al rivuarde la costruzion dal eletrodot Somplât-Würmlach (Carintie), considerât che a son bielzà stadis inviadis lis proceduris di valutazion di impat ambientâl e, in prionte, al fat che intai mês passâts a son stadis presentadis de bande di altris societâts e industriis de regjon richiestis pe realizazion di gnûfs eletrodots a caratar trans frontalîr. Par dutis chestis resons e je stade pandude fuarte preocupazion e al è stât auspicât che la volontât des aministrazions locâls e des popolazions e sedi tignude inte juste considerazion, soredut in rivuart aes conseguencis che a divegnin dai dams ambientâi che cheste realizazions a puartin.

    Il document presentât al smire aduncje a cirî di condizionâ lis sieltis de Regjon sul cont dal Plan energjetic. Plan che al podarès deventâ cetant pesant se e je vere che si intint in ogni câs rivâ ae realizazion dai colegaments transfrontalîrs cul Austrie e la Slovenie. Il fat al è che masse di lôr, tra i sorestants cjargnei, a fasin il dopli zûc e a cirin di confondi lis ideis ae int cun discors che a àn pôc mani.

    Baste sintî ce che al à dite Tesini cuant che Marc Lepre i à consegnât lis 1500 firmis de petizion: “Il Consei regjonâl al è atent e sensibil a chescj aspiets, ancje rivuart ae atualitât e ae specifiche circostance, ven a dî che la Zonte si sint impegnade a cjatâ soluzions adeguadis. Dut câs a’nd è infrastruturis che a rispuindin a interès di caratar gjenerâl, e lis istituzions a àn di fâsi caric di cjatâ il just ecuilibri savint che cui che al paie un presit al à di otignî un adeguât vê di vê”. Traduzion tal lengaç sclet de int: cjargnei tasêt e glotêt ancje cheste, che un piçul contribût par comprâ lis legnis, di brusâ tal spolert par scjaldâsi dilunc la verande, no si lu dinee a dinissun. Naturalmentri lis domandis di contribût pes legnis a va presentadis in cjarte di bol. (red.)