Udin - Nadia Pauluzzo D'Aronco, insegnant, leterade, scritore e poete, nassude a Udin intal 1931 e je muarte ai 9 di lui dal 1995, juste za fa dîs agns.

    A son passâts dîs agns di cuant Nadia Pauluce no je plui cun nô, o vìn sclarît denant trat, epûr cheste autore e va dilunc a riproponisi come un personaç di rilêf de poesie e de narative furlane. Un aspiet chest che in vite no jere rivade a cuistâ biel avuâl, cjapade cemût che e jere dal so impegn professionâl di insegnant e dai siei interès tai rivuarts de culture furlane, soredut par chel che s'inten i studis filologjics su Ermis di Colorêt e su Ciro di Pers. Cundut achel  e jere rivade istès a realizâsi te poesie in lenghe furlane: “Un fîl di vite” (1959) e “Cjant di vene” (1965) a rapresentin la preseose golaine cjapade dentri intal satûl titulât “Cjantâ furlan” (1983). E po, postume, la racolte “Il miò tasè” (1997)

    Un poesie lizere la sô, a trats maluseriose, tocjade de nostalgjie pal timp, de infanzie e de zovinece, rindude par cierts aspiets tragjiche de muart de mari cuant che l'autore no veve nancje trente agns. Di achì a divegnin des costants tes oparis in viers e in prose: lis fantasimis de memorie, la pôre di vivi, il pierdisi intai siums idealizâts. Cussì des curtis composizions lirichis la Pauluce e je passade ai romançs: par furlan “Il bintar” (1974), “Prapavèris” (1977), “Momenz di une vierte” (1989). Par talian la nestre scritore e à publicât il romanç “I giorni della Cantoniera” (1987), dulà che la Cantoniere e rapresente la strade di Udin dulà che jê e à vivût la sô zovinece.

    Nadia Pauluce e je muarte cuant che e veve a pene 64 agns, daspò cuarante agns di insegnament (professore di letaris e preside) intes scuelis mezanis di Mortean, Nimis, Reane e Udin. Di cuant che e je vignude a mancjâ il so om, l'innomenât furlanist Zuanfranc D'Aronco, al à cirût tai archivis de famee rivant a rivisitâ e riordenâ la sô trate di poete e di scritore. Cussì a son vignûts fûr il za vût iniment “Il miò tasè”, cun  poesiis ineditis (uns sessante) par furlan, “Frammenti quotidiani” (1999), racolte di diaris, riflessions, letaris e poesiis: “Gjografie pierdude e altris prosis furlanis ineditis” (2001), sedis prosis par furlan comprendût un articul sui paîs furlans sdrumâts dal taramot dal 1976 e, in fin, “Ombre, elzeviri e racconti” (2002), dulà che si incuintrin personis, cjossis, lûcs e acjadiments dal timp passât.

    Al scrîf di cheste poete Luzian Verone, te sô “Rassegne di Leterature Furlane”: “Come un cjant delicât intal firmament leterari furlan si è jevade la vôs di Nadia Pauluzzo D'Aronco, une autore che cu la sô opare e à insiorât il nestri mont culturâl. La puisie, la prose, i studis leteraris e la ricercje a son stadis lis stradis che plui e à esplorât dedicantjur tante part de sô vite. In particolâr la sô puisie e disvele une intonazion intimistiche, fate di bielece ma ancje di ansie e ingòs pal discognossût che al è scuindût intal doman de nestre vite”.

    Mentri Domeni Zannier suntun dai ultins numars di “Friuli nel Mondo”, al à vût mût di sclarî (il test origjinâl par talian al è stât voltât de nestre redazion n.d.r.) che: “Al esist, confessât e inconfessât, intai critics leteraris dai ultins decenis, il prejudizi che la poesie e l'art a scugnin jessi justificadis da une valence ideologjiche. L'art e scugne jessi indreçade al sociâl e al coletîf, politichementri impegnade intune cierte direzion. Chest al vâl in cjamp talian e in cjamp furlan cu la zonte intal secont di une militance etniche plui o mancul sotliniade e condividude. Dulà ise inalore la libertât dal art e de poesie? L'autonome individualitât de persone? A’nd è autôrs e artiscj militants e no militants, impegnâts e no impegnâts, ma e je la lôr sielte che no pò jessi doprade a metri estetic, artistic, valutatîf. La validitât dal opare e je leade intimementri al opare stesse. A’nd è bisugne di clarece in Friûl e in Europe su chest teme e maiôr rispiet pe persone che done e che e cree par ducj. Il so valôr nol è il so leam.

    Che mi si perdoni cheste parentesi. No vûl jessi un jenfri purementri polemic, ma un invît a judicâ diviersementri la leterature furlane e i siei autôrs e a no stravuelzi l'operât e la lenghe. Esemplâr al è cussì il svicinament di Nadia Pauluzzo D'Aronco a Ermis di Colorêt e a Ciro di Pers e ae leterature furlane intal rispiet de opare e de memorie cui siei studis e saçs filologjichementri e storichementri corets. Masse tecnics e elaboratôrs linguistics si sintin autorizâts a fâlu, corezint la vite e la storie. Nadia e à cjantât e contât a nivel de femine e dal om, e à palesât intai viers e inte prose i eternis problemis de vite, paidint e vulint ben come ducj. Lu à fat cun amirabil cjandôr. Dal so amont, lagrimât e rivât masse adore, a divegnin jù inmò vuê parsore di nô faliscjis di lûs. Al è il salustri dal so cûr”. 

    Dîs agns a son tancj e a son pôs: la vôs poetiche di Nadia Pauluce e va dilunc a fâsi sintî tra di nô plui vive che mai, e juste apont cuntun librut di prossime publicazion, dal titul “Nadia Pauluzzo D'Aronco a dieci anni dalla scomparsa”, e vignarà memoreade la vieste leterarie di cheste grande poete.  (von zercläre)

       Renato Cracina, che al è tradutôr e curadôr di “Gnocis îr in Friûl”, cu la colaborazion des Arts Grafichis Furlanis, al presente la sô gnove fadie inricjint il volum di diviersis imagjinis mai publicadis denant trat, recuperadis alì dal archivi dai Civics Museus di Udin, e otignudis cu la colaborazion di Cristine Donazzolo. Dabon bielis e di grant valence documentative a son chestis imagjinis dedicadis ai nuviçs che, a traviers i vistîts che a àn aduès, a fasin a mût lôr une piçule storie dal custum furlan.

    “Gnocis îr in Friûl - al scrîf l'innomenât poete Domeni Zannier te prefazion - al è un libri che al vorès fâ cognossi il passât di un popul te sô intimitât di afiets e di fogolâr, cul fin di tignî di cont i valôrs umans che no son mai distudâts, ma che a batin cence dâ tal voli. Plui si sgarfe tal passât dal Friûl - al va dilunc Zannier - plui e va jù la vuarzine te tiere tra la Licence e il Timâf,  plui a vegnin fûr lis lidrîs dal nestri jessi, dai nestris mûts di fâ”.

    Une vore biele e je l'imagjin di pagjine cincuante, dulà che si viôt doi nuviç forsit dai prins agns dal secul passât, cetant seriôs e cjapâts dal acjadiment che ju interesse, ma ancje une vore elegants. Al ven di scrupulâ che in chei timps il maridaç al devi jessi stâts un impegn di no pôc cont, sot ducj i aspiets. Plui indenant a saressin vignûts agns e timps inmò plui dûrs, e dome a pensâ di meti sù famee al jere di sgrisulâsi. Une famee, dut câs, che chenti e je simpri stade sedi salde che fondamentâl pont di riferiment par fâ front a ogni sorte di contrarietât. Pensìn, par esempli a l'impuartance che e à vût te conservazion de lenghe e de culture popolâr furlane.

    Maridaçs di îr, usancis  e testemoneancis di une volte: un document, inmò une volte, par no dismenteâ cui che o sin e di dontri che o vignìn.

La schede: P. Cracina, Gnocis îr in Friûl (traduzion par furlan dal test origjinâl par cure di R. Cracina), Ed. Arts Grafichis Furlanis, Felet 2005, pp. 205