Tumieç - "Le Madonne dei cramârs - Presenze foreste nelle Madonne cargnelle" al è il titul di une mostre che ai 9 di luj stât e je stade davierte alì dal Museu Cjargnel des Arts e des Tradizions Popolârs di Tumieç. La rasegne, organizade in colaborazion tra la fondazion dal museu e l'Associazion cjargnele amîs dai museus e dal art, e curade in principalitât dal prof. Paolo Moro, e cjape la dade dal dât di fat che la presince di modêi di Madonis di divignince di dilà des monts, sparniçâts dilunc dut l'arc alpin dal Friûl, al è un fenomin che si po’ osservâ fintremai dai timps antîcs. Il spostâsi des inmaginis al va a parêli cul spostâsi di un sît a chel âtri dai oms: cussì il gnûf stîl di vite che a scomençâ da l'ete moderne al proviôt simpri majôrs sgambis tai cumierçs e ta l'artesanât fra lis regjons europeanis al prodûs une vision culturâl e sociâl plui slargjade, e cun cheste une circolazion di ideis ch'e va oltri la cente locâl.

    Si trate valadì di un fenomin ben presint ancje in Cjargne, che si svilupe dentrivie des corìnts migratoriis dai cramârs, marcjadants abulants stagjonâi che in ciertis ocasions a mètin su l'ativitât tai lûcs forescj dulà ch'a rìvin, cuanche ta chei paîs a rìvin fintremai a stabilîsi par simpri, purpûr mantignint rapuarts e contats cui lûcs de lôr nassince.

    Cheste sielte di apartignince, cussì come la sielte da l'emigrazion stagjonâl, e compuarte, dal pont di viste de religjositât e de devozion, la cognossince di gnovis inmaginis di Madonis a cui avodâsi tai moments de dibisugne, che si zontin a chês zà tradizionalmentri veneradis, e a voltis ur cjàpin insin la volte. Chestis inmaginis particolârs di Marie, cognossudis tai lûcs dulà che i cramârs a davuelgevin i lôr cumierçs, e amadis e po fatis riprodusi, par jessi podaspò puartadis tai paîs di divignince. L'esperience spirituâl dai sengui devots, fate tai paîs da l'emigrazion, e je cussì riproponude tes comunitâts di divignince. Chest fat al prodûs un efiet di emulazion, ch'al fâs in mût che il cult tai rivuarts de Madone si vadi slargjant simpri di plui.

    Si zontin in cheste maniere, tai lûcs di partence, ai modêi di Madonis de tradizion locâl, âtris particolârs inmaginis, veneradis sore il dut tes regjons dal Imperi dai Asburgs, che si son vignudis configurant secont procès d'interpretazion de piture elaborade, e aduncje no simpri cence chês mendis ch'a puartavin  al straviament dal model originâl. Opûr si ur dave une interpretazion divignint da ciertis lejendis, metìnt in cheste maniere in secon plan lis plui scletis dibisugnis di caratar  religjôs.

    Lis diviersis inmaginis "forestis" di Marie, ore presìnt esistents in Cjargne, ricoltis in cheste rasegne, oltri a contânus lis storiis di tancj cjargnêi cjapâts tes vicendis leadis a l'esperience lavorative di marcjadant ambulant in tiere todescje, a daviergin gnûfs e interessants coredôrs informatîfs su personaçs, storiis e situazions ch'a van a incressi cun tune prionte di tassel la storie de nestre tiere.

   Inalore la smire principâl de mostre e  divente  chê di meti sot i vôi dal visitadôr une storie resonade "par Madonis" dal ambient dulà che si movevin i nestris basavon cramârs, dai lôr compuartaments religjôs, des lôr sperancis rispiet 'es comunitâts di partence e di chês dulà ch'a rivavin. Il dut, naturalmentri, il plui pussibil documentât e insedât tun contest di ricercje sistematiche.

   Lis diviersis inmaginis "forestis" di Marie, ore presìnt esistents in Cjargne, ricoltis in cheste rasegne, oltri a contânus lis storiis di tancj cjargnêi cjapâts tes vicendis leadis a l'esperience lavorative di marcjadant ambulant in tiere todescje, a daviergin gnûfs e interessants coredôrs informatîfs su personaçs, storiis e situazions ch'a van a incressi cun tune prionte di tassel la storie de nestre tiere.

    Inalore la smire principâl de mostre e  divente  chê di meti sot i vôi dal visitadôr une storie resonade "par Madonis" dal ambient dulà che si movevin i nestris basavon cramârs, dai lôr compuartaments religjôs, des lôr sperancis rispiet 'es comunitâts di partence e di chês dulà ch'a rivavin. Il dut, naturalmentri, il plui pussibil documentât e insedât tun contest di ricercje sistematiche.

    Lis inmaginis plui impuartantis ch'a vegnin proponudis te mostre di Tumieç a son chês de Madonne cussì clamade "dal setri", de Madone dal Carmin, de Madone de Cinture, di Marie Gravide, de Madone dal Bon Consei, di Marie Zell, de Madone Nere di Altötting, di Marie Hilf, di Marie Luggau, de Madone di Sàrvàr, di Marie Elend di Embach, de Beade Virgjine di Rovol, de Madone dal Lusàri.

    Par ogni originâl d'inmagin si presentin a nô diviersis riproduzions, ch'a mostrin tra di lôr des lizeris difarencis, ch'a àn dutcâs dai precîs significâts. L'esam di chestis difarencis e dai lôr significâts e je une des smiris de mostre, mentri la reson principâl e reste chê di prudelâ il lâ dilunc dai studis e des riflessions su l'emigrazion in Cjargne ta l'ete moderne.

    Se la perspetive di fâ lûs su l'originâl esperience cjargnele te cente de plui slargjade esperience des regjons alpinis e je stade al centri de cunvigne internazionâl di studis "Cramârs. Emigrazion, mobilitât, mistîrs ambulants de Cjargne in Ete Moderne", che si è davuelte a Tumieç tal mês di novembar dal 1996, e dal preseôs volum ch'al cjape dentri i siei ats, curât di Zorç Ferigo e Alesi Fornasin, a rèstin dutcâs inmò aspiets ch'a mertin di jessi  scrutinâts. Aduncje cheste mostre e vûl che si torni a concentrâ par une dade l'atenzion sun tun particolâr proposit dai nestris emigrants ch'a tornavin chenti: chel  da l'iconografie de Madone te devozion publiche e privade, e, naturalmentri, sui relatîfs inflùs culturâi e artistics divignints des regjons dal imperi asburgic e de Germanie di 'Sot.

    La mostre, ch'al è di sperâ ch'e vegni fate visitâ ai arlêfs des scuelis, e restarà vierte fintremai ai 30 di setembar cu ven. (von zercläre)

 www.donneincarnia.it  -  storie, culture,  informazion,
 leteradure, fats e gnovitâts de Cjargne e des sôs Vals

"Il soreli tal casson - Contes par dodis gnots" al è un libri dal mestri Gianni Moroldo ch'al cjape dentri flabis, contis e liendis de tradizion popolâr orâl dal paîs cjargnel di Damâr. La publicazion, penge 380 pagjinis e ricje di fotografiis e di dissens, e je vignude fûr par cure dal editôr Cjandèt di Reane e cul sostegn economic dal cumun di Damâr.

    Gianni Moroldo, ch'al è bielzà autôr di un libri ricercje su Damâr titulât "Se il prin paîs de Cjargne…Damâr e la sô int. Storia genealogica di una Comunità" te jentrade de sô opare nus displee che il libri vût iniment denant trat al jere il prin di un plui slargjât progèt ch'al veve par teme di fonde un concèt ch'al definìs cussì: "…s'e je vere che la memorie e da un sens a la vite umane e je ancjetant vere che nus ufrìs valôrs e significâts, identitât e diviersitât purpûr dentrivie di une comunitât". Cussì cun chest so gnûf lavôr si propon di tornâ a dâ ai damarês l'orgoj di jessi une comunitât ricje di sens di solidarietâ, di profonde, antighe, cjalde e fuarte unitât ricognossinsi tes propis risorsis, energiis, inteligjence, ta l'ustinade volontât tal frontâ lis dificultâts. In efiets vuê lis condizions di vite a son centant plui vualivis di une volte e il benstâ si è slargjât praticamentri dapardut, inalore la gnove smire e po’ cussì diventâ chê di rindi cussient ognidun e dute la comunitât, chê di antighe tradizion e chê di plui resinte presince, che impegnansi insiemit  a puedi ricognossisi tune vere identitât di apartignince.

    Ma chestis riflessions dutun in chel si viergin ancje a une dimension ch'e va oltri la realtât paesane. Valadì che ogni contribût ch'al inlumine lis tradizions popolârs orâls di une comunitât al à valence cumun a dute la culture furlane. Parcè che la storie di une comunitât no je fate dome des realizazions concretis, chês di ogni dì o generazionâls. And'è  leams tra lis generazions ch'a tegnin adun forsit plui di chei economics. A son i leams des inmaginis, de produzions dal pinsîr, a dal contâ che il pinsîr al prudele, ch'a vegnin trasmetûts di generazion in generazion e ch'a son il levan de culture popolâr.

    Po a vègnin i nons dai anzians ch'a àn contât lis liendis a Moroldo: Marie Gjudite Mainardis (le Fumule), Dorotee Lisabete Monai (le Camarele), Nêl Mainardis (di Macan), Catarine Rainis (di Faidùt), Agnule Monai (di Pîti), Taresie Mainardis (di Bece), Marie Mainardis (dal Prôt), Jacun Monai (di Drece), Gusto Rossi (dal Muini) e Catarine Monai (Drece-Toton). E i titui des stessi storiis: "La bisave di dutes les contes", "Ce lusôr di lune plene!", "Il soreli tal casson" (ch'e da justeapont il titul a la ricolte), "Chê dai zupèts", "A cualchidun ur va simpri drete", "La siorate e il fonc velegnous", "Il danât de Mont Cjanine", "Il doi di fevrâr" e vie indenant. In dut and'è sesante une conte,  cun zontade la traduzion par italian e une biele rieste di notis. A chest o cjatìn inmò zontade une schede su cui ch'al à contadis lis storiis, un glossari furlan-italian e une classificazion  par aguments des istessis flabis.

    Oltri a dut chest no podìn no vê iniment i saçs introdutîfs che Moroldo al à metût dentri par displeâ i diviers aspiets ch'a divegnin e che si clupissin daûr il contâ di une liende e al rive insomp cun chestis peraulis: "…cence bisugne di jessi trasmudadis  tun insegnament palês, lis flabis "a làssin il segn" tal om e tal frut ch'al scolte. E lu fâsin cun rispiet e cun amôr, cence prepotencis e condizionaments, cjapànt che lusigne magiche-divine, ch'e je in ogni frut-om, e educant al just ben, al impegn viers se stès e chei âtris. A la flabe e a chei che la contin ur spiete adimplen ce ch'e sclarìs  cun solenitât la Bibie: …Chei ch'a varàn persuadût, e cu la praule ch'e conte guidât cetancj a la justizie a slusiràn come stelis, par simpri".