Al è stât, chel a pene passât, un a mont di Istât cjalt e interessant, sul cont des cjossis che a son sucedis in Cjargne. Il prin acjadiment al rivuarde une cunvigne che si è davuelte a Darte: a son stâts memoreâts i cent agns de nassince di Promoteo Candoni, l'emigrant cjargnel che al à fondât, tal 1969, a Tumieç la Seima Italiana (vuê Automotive Lighting). Si trate inmò vuê de plui grande fabriche presint in Cjargne co e da lavôr a uns votcent oparis.

    Promoteo Apollo Candoni al nas a Damâr tal 1911. A vot agns al  reste vuarp par colpe dal sclop di un ordegn, un dai tancj lassâts sparniçâts intant de Vuere Grande. Intai agns Trente la sô famee e je obleade a scjampâ in France, par vie che so pari al jere un anarchic antimilitarist, e aduncje perseguitât dai fassiscj. Il dipiment de viste nol discoragje il zovin Candoni tal deventâ musicist e fintremai tal lâ a schiâ. Al à lis ideis claris, al vûl rivâ a fâ alc di impuartant. A 36 agns, cun nome 140 francs inte sachete al cree, intun piçul garage, la prime unitât produtive di tocs pes machinis, un setôr destinât a grancj svilup tal avignî. Dì dopo dì la ativitât e cres. Al sfide lis bancjis, al fâs debits, al cuiste gnûfs machinaris, al scomence al cjoli sù operaris, in fin al invie la Seima. In vincj agns Candoni al à creât la plui grande fabriche di fanalarie pes machinis de France.

    Tal 1969, graziis soredut al interessament e al impegn dal sindic di Tumieç di chê volte, o sei Tiziano Dalla Marta, tal studi dal nodâr Lepre, e nas la Seima Italiana spa, cuntun capitâl di dîs milions di liris. A vegnin selezionâts 15 operaris che a saran la struture puartant de aziende tumiezine. Ai 7 di Mai dal 1970 e ven poiade la prime piere. Un an daspò e scomence la produzion. Vuê la Seima Italiana ( Automotive Ligting) e je al centri de Europe e e furnìs Fiat, Alfa, Audi, Bmw, Mercedes, Opel, Volvo, Sab, Ferrari, Maserati. Tal 2000 la Seima di Tumieç e veve 720 dipendents, plui 450 tal indot.

 In sumis un esempli incredibil di creativitât e imprenditorialitât cjargnele. E Prometeo Candoni, om di fats, al po sei dabon considerât il Jacopo Linussio dal vincjesim secul, considerât il grant contribût che la sô aziende e à dât tal meti un slaif al dispopolament des valadis cjargnelis. Al è muart tal 1985.

    Il secont acjadiment al rivuarde la cunvigne, che si è davuelte a Udin e a Dimpeç, sul cont de Republiche Libare de Cjargne dal 1944. Une iniziative inmaneade par cure de Universitât dal Friûl e dal Istitût Furlan pe Storie dal Moviment di Liberazion. Si è tratade de miôr rispueste ai tancj che inmò a contestin la Resistence e la relative storiografie, considerantle faziose e retoriche.

    Intai cuindis contribûts che a àn interessât i lavôrs, in fats, l'argoment al à stât frontât a fonts in maniere critiche e problematiche, analizantlu intune prospetive di lungje dade, e tal contest european. La Republiche Libare de Cjargne e je stade une esperience di democrazie direte, che cuistà concretece intes libaris elezions come pont di partence, e si concretizà po daspò intun mût di operâ che si fondave in maniere essenziâl su trê supuescj: a) il plen coinvolziment de int tal moment de determinazion des sieltis; b) la trasparence inte aministrazion de cjosse publiche; c) la ricercje di formis gnovis di autoguvier che a determinassin il distac intai confronts dal ordenament acentradôr dal stât talian.

    In cheste direzion si svilupà la azion di guvier de Zone Libere. La elezion des Zontis comunâls e dai sindics, la costituzion dai C.L.N. locâi prime e po dal Guvier de Zone Libare, a forin la espression di un sisteme gnûf che si realizà inte partecipazion direte e inte volontât de int di autoguviernâsi cun proviodiments bogns di dissiplinâ i diviers setôrs de vite civîl, a jemplâ il vueit di podê divignût de assence dai vieris organisims, a puartâ chel rinovament che ducj a spietavin.

    Un altri element di rilêf metût a fûc inte cunvigne al rivuarde la partecipazion ative des feminis inte Resistence in gjenerâl e in chê cjargnele in particolâr, cu lis conseguents implicazions di riscat e di emancipazion politiche, sociâl e culturâl de condizion feminîl, cun significatîfs riferiments ae sô funzion, dabon significant inte societât locâl. In conclusion di tratà di un salustri di democrazie verementri grant, sclet, di no podêlu dismenteâ.

    Ma magari cussì no i politics di vuê a àn la memorie curte, cussì la Cjargne e riscjie di passâ de esperience di autonomie de Zone Libare al  sapagn de Union dai comuns. La Zonte regjonâl di Renzo Tondo e intint, in fats, disfâ lis Comunitâts di Mont par fâ nassi lis cussì clamadis Unions dai comuns di mont. Une soluzion che si tradusarès inte pierdite de identitât teritoriâl de Cjargne, che di simpri, dai timps dal Patriarcjât di Acuilee in ca e je restade unide dal pont di viste sociâl, storic, aministratîf e culturâl. Chest al è un pericul grandon, sotvalutât di masse di lôr.

    Inmò, i Comuns di valade che Tondo, e il so assessôr Garlatti, a vuelin imponi a son cun cuintrisens. Al va ben unî i servizis, ma i comuns a scugnin restâ. Il municipi e il sindic a son un pont di riferiment pe popolazion. Il citadin di Zui, Sudri e Ravasclêt si sintarès bandonât a scugnî fâ riferiment a Tumieç, o pûr a Darte. Nol è taiant i piçui comuns che i sparagne Se si calin di dîs unitâts i conseîrs regjonâi, cu lis lôr indenitâts si tignaressin in piis ducj i comuns de mont.

    O tornìn a ripetisi, chest al è un passaç une vore delicât. E covente une mobilitazion culturâl di dutis lis fuarcis democratichis de mont, par salvâ la Cjargne, la sô unitât, la sô identitât, par pratindi la sô vere autonomie aministrave. Pierdi cheste bataie e sarès verementri dure. Dure di gloti ancje parcè il trabuchet, se no la ruspie malegracie, nus diven propite di un cjargnel!  (renzo balzan)

La storie no si cancele gran!

No stin a permeti che la Cjargne e vegni dividude!