Sâr president Illy, se o rivàs in timp e se propi al coventàs, o vorès segnalai a lui (ma e je presunzion) e a cui che nus lei che si cjatin di front a decisions cetant intrigosis che, se faladis, a metaressin in pericul la specialitât de regjon. A Triest si decît in chestis zornadis se il Friûl al merte di esisti dome pe gastronomie tradizionâl, il persut e l’ex tocai. Par cui che no lu savès, la specialitât dal Friûl Vignesie Julie e diven in prin lûc (lu à dite ancje lui di resint a une television di chenti), oltri che de posizion gjeografiche ai confins cul mont gjermanic e slâf, de presince di lenghis cussì clamadis minoritariis: il furlan, il todesc, il sloven.

    Po ben, se la leç che si sta imbastint e sarà fate buine dal consei regjonâl cu lis limitazions ultimementri metudis dentri in sede di chê zonte che lui al sta rezint, la lenghe furlane e sarà materie di insegnament intes scuelis dome par cui che propite lu vûl. E inmò an par an i gjenitôrs a scugnaran esprimi la volontât sul cont che i lôr fruts a gradissin lâ indenant a sintî fevelâ in lenghe mari (par une ore, une ore di numar ae setemane). Tu puedis dome crodi. Nol è bastât che za fa dîs agns la plui part dai nestris Comuns si sedi declarade pal sì. Nol baste che Italie e Europe a garantissin uficialmentri la difese des lenghis mancul feveladis. La condizion e je che ogni an, cuant che si va a notâsi, si vedi di dî di sì de bande dai sengui. Nol è che l'insegnament dal furlan al sedi predisponût in timp intai Comuns, che si osservi ben, che a àn bielzà palesât di jessi favorevui. In maniere divierse di chel che si fâs cu la religjon, l'insegnament al sarà realizât dome se si varà la richieste: se no, no. Tu puedis dome crodi cun cualis pussibilitâts di organizâ in timp, dentri vie aes struturis scolastichis, insegnants e oraris! Chest in fats al è il come dal articul 13, daspò lis mendis in piês metudis dentri tal stampon prontât dai esperts, nomenâts de stesse aministrazion regjonâl (…), “Lis istituzions scolastichis (…), tal moment de pre-iscrizion dai arlêfs, a domandin ai gjenitôrs se intindin o no zovâsi pai propis fîs fal insegnament de lenghe furlane”.  Al sarès ancje alc altri di dî, ma al è miôr fermâsi culì.

    O ai pôre, sâr president, che lui al sedi stât cjapât di cualchi straneose malatie che lu puarte a crodi che dut ce che al è furlan al imberdee i disens centraliscj dal podê. Cheste e je - che mi scusi - une posizion di retrovuardie, di conservatorisim, di provincialisim, di egoisim: posizion che e semeave condividude dome, aromai, di personis che a resonin a orele, lontan de culture, leadis a schemis sclagns, che a crodin che il talian e sedi la sengule lenghe degne di chest non. Lui, in cûr so la pense in maniere diferente: ma l'interès politic che al cjale a drete e a çampe, a cost di restâ loscs, e je une altre cjosse.

    Propite in chescj dîs no un cualsisei come me  - rispietôs dal furlan come di ogni altre lenghe mari -, ma il professôr Francesco Sabatini, president de Academie de “crusca”, cuatri voltis centenarie (o lein sul maiôr gjornâl economic-finanziari), al à juste apont dite. “Lis nestris lenghis, dal maltês tal mâr de Sicilie al svedês e al finic (…), a son par nô parimentri necessaris par vivi, ven a stâi par lâ dilunc a produsi civiltât. E no puedin jessi plui o mancul metudis in rieste secont une presumude impuartance, par selezionâ chês di fâ stâ parsore e chês impen di inviâ a un a mont che si vorès naturâl”, tal non dal nazionalisim. E inmò: “Ogni lenghe e cjape dentri une interie vision dal mont. Tantis lenghis a son tancj e diviers mûts di savê. La Europe, il plui piçul dai cinc continents, al è un scrign di chescj tesaurs e no vin dabon di riscjâ di pierdint nancje un”. Peraulis pronunziadis a Florence, intant de viertidure de zornade dedicade aes lenghis de Europe e ae lôr promozion. E al veve iniment il furlan “il nestris grant linguist Graziadiu Isaie Ascoli, che al riclamà i plui acuarts ae reson, sclarint che la lenghe no je un vistît che si met e si gjave, ma e je la nestre piel”.

    Che nol resti inte storie come l’industriâl di Triest prestât par mitât ae politiche.  Che nol resti il president de spropositade Tav, che e ridusarà la Basse Furlanie intun comut coredôr, intune servitût di passaç fra dôs unichis stazions, Mestre e Triest. (Al ven di pensâ ae grande arterie par gome e ferade, extra-teritoriâl, che e varès vût di colegâ la Gjermanie cu la Prussie di jevât scjavalcjant il coredôr di Danziche, cemût che i vevin proponût i ocidentâi a Hitler. Chê almancul e jere une idee buine forsit a salvâ la pâs).

    Che nol disi, sâr president, che al decidarà il consei. Che nol sedi masse modest. Che al confermi la sô declarade simpatie par “Il piçul princip” di Saint-Exupéry, e che no lu gambi cun “Il princip e il puar” (Friûl) di Mark Twain. Che al lei ai siei chestis peraulis di PierPauli Pasolini: “Dutis li favelis furlanis, di cà e di là da l’aga, dai monz e dal plan, a spetin la stessa storia, a spetin che i furlans a si enecuarzin veramentri di lour, e a li onorin come c’a son degnis: fevelà furlan a voul disi fevelà latin” (1944). E che al lei chestis altris riis di Gianfranco Contini, cuant che al veve scuviert la prime racolte di poesiis par furlan di Pasolini: “E je la vere nobiltât di une lenghe minôr, come il rumen o il catalan” (1943).

    O savìn benon cetant che al conte il consei e cetant che al conte lui. Che al fasi viodi che al è lui il president di une Regjon che uniche no je, dulà che il Friûl al è maniere in incontestabil la part maiôr. E che nol ciri gran un compromès. Lui al è bielzà avonde comprometût di front ai furlans come me, che purpûr i vevin concedût la fiducie. Se la lenghe furlane e vignarà tratade cemût che al semee, o savìn di cui che e sarà la responsabilitât maiôr. (zuanfranc d’aronco)