Lis minorancis di altre nazionalitât a son simpri stadis une grande spine pal Stât Talian, parcè che nol à mai savût tratâlis. In Italie al regne un nazionalisim - che lu clamin “amôr di patrie” - dut plen di contradizions: un nazionalisim che al cîr di tignîsi sù - conforme che i torne cont - mo sul principi de raze e de lenghe, mo su chel de gjeografie fisiche, mo su lis esigjencis militârs, e simpri, pôc o trop, su lis sflocjis storichis o sentimentâls.

    Cussì, se si tire in bal i Ladins o i Furlans o i Sardegnûi, al salte fûr dal moment cualchi Salvioni o cualchi Battisti o cualchi altri glotolic di chei moi di suste, a meti la lôr competence - e la lôr reputazion! - al servizi de cause nazionaliste, contindint che i lengaçs di chescj popui a son dialets talians tant che ducj chei altris, cence nissune individualitât, e par conseguence no puedin pratindi nissun ricognossiment e nissun dirit. Robis che a fasin ridi ducj i competents in materie. Ma se si trate de Val di Aoste o dal Sud Tirôl o de Sclavanie, e sarès masse gruesse dî che ancje i lengaçs di chê int a son dialets talians, e alore si cambie sunade e si fevele de situazion gjeografiche, dai confins stabilîts de Nature, dal “spartiacque” e vie indenant, e si tire fûr un viers di Dante o di Checo Petrac, come se la politiche e podès lâ daûr des poesiis.

    Ma sul cont di Tarvis e de Pustarie nancje chestis sflocjis no valin nuie; e alore si tire a man la cuestion strategjiche o cualchi altre naine. No stin po a fevelâ di dutis lis balis che si puedin lei sui libris di scuele o sui gjornâi sul cont de storie  lontane e vicine, o su lis cuistions etnografichis. Al baste dî che fintremai la nestre stampe udinese o triestine e à cûr di vignî a contânus - propit a noaltris furlans - che i sclâfs parsore Cividât o Tarcint o Glemone o Pontebe o Cormons no son sclâfs.

    Ma pazienzie che si ciri di dâle di bevi ai talians de penisule: il biel al è che si pratint di convinci lis minorancis stessis, come se chê biade int e podès crodi che a miezegnot al lûs il soreli, nome parcè che al guvier talian i larès ben che crodessin cussì. E za che no crodin, sot cu lis provocazions e cui dispiets: si mude il non des Regjons e dai paîs, si improibìs di doprâ la lôr lenghe, si butin jù i monuments fats dai lôr viei, par meti tal mieç des lôr placis un personaç roman o talian, si ufint la lôr raze, la lôr lenghe e lis lôr tradizions intes scuelis e sui sfueis, si ur mande intai paîs mestris, impiegâts e militârs dai lûcs plui lontans, dal temperament plui diferent, int cence cjâf e cence creance che e crôt di fâ une bulade a ridiur in ghigne, e di cuistâsi une benemerence patriotiche a cjoliju vie o a faur prepotencis. Politiche balcaniche, politiche di frutaçats e di incussients, in barbe a ducj i tratâts internazionâi e a dutis promessis fatis tal prin, par tignîju bogns.

   E no je nome la politiche di chei dal manarin, cheste: e je la politiche taliane di simpri, ancje di vuê. Baste lei ce che a disin i sfueis sul cont dai tirolês o dai sclâfs o dai valdostans, ce critichis che si fasin cuintri chei che a vevin optât par lâ fûr (e ducj si sa cemût che e je lade chê inicuitât) e che cumò a cirin di tornâ dulà che a son nassûts e cressûts. La veretât e je che scuasit ducj i talians a dan reson a Mussolini par chel che al veve fat, e che se a podessin fâ come che ur dîs il cûr, ju pararessin vie ducj intune volte. Cussì a risolvaressin chest gherdei che, par colpe de lôr insipience e de lôr pocje serietât, no son mai stâts bogns di risolvi.

    Si capìs che, tratadis in cheste maniere, lis minorancis a mastiin amâr, a tasin, ma si invelegnin ogni dì di plui, e il spirt de ribelion al sfurducje sot vie, pront a mostrâsi al prin moment bon. Cheste e je la strade plui drete e plui curte par creâ iredentisims che a son simpri pericolôs.

    Se invezit di stâ a contrastâ lis minorancis par vie de lenghe, de scuele, de toponomastiche o di altris cagneris, i talians a rispietassin cheste int, a metessin in pratiche i tratâts, a creassin par lôr une condizion di vite libare, dignitose che e podès stâ a paragon cun chê dai lôr fradis di là dai confins; in sumis, se a savessin guviernâlis cuntun fregul di sintiment, nol coventarès fâ tantis vitis par tignîlis sot. A son tancj i stâts che a àn sot di lôr minorancis forestis: ma chei che a san tratâlis, lis àn simpri fedelis e no ur ven nissun fastidi di cheste bande. (josef marchet - Patrie dal Friûl / 1949)