Udin - Cuant che la Istât furlane e semeave volê molâ inmò cualchi tarlupade di soreli cjalt sul finî di un mês di Avost plui ploiôs dal solit, di venti vie pe Italie e rivave chenti une novitât che e à jemplât di gjonde e di orgoi dut l'ambient culturâl furlan, mai facil di inviulâsi co un pocje di ruspidece celtiche la ten simpri clupide tal so intim: Pierluigi Cappello al veve vinçût il prestigjôs premi nazionâl di poesie "Viareggio", cu la sô ultime racolte di lirichis titulade "Mandate a dire all'imperatore". Un premi mighe di pôc ve, co lu àn vinçût autôrs dal non e de innomine di Pier Paolo Pasolini, Giorgio Caproni, Salvatore Quasimodo, Umberto Saba, Paolo Volponi, Diego Valeri, Tommaso Landolfi, Mario Luzi, Andrea Zanzotto, Umberto Saba, Vasco Pratolini, Valerio Magrelli, Giovanni Ramboni e Ada Merini. In sumis il miôr dal miôr dai poetis talians.

    Pierluigi Cappello al è nassût a Glemone tal 1967, ma la divignince de sô famee e jere di Sclûse tal Cjanâl dal Fier, un mont no sempliç, di fadie, di leiende, simpri presint intai siei viers, cemût che o cjatìn juste apont inte racolte premiade "Mandate a dire all'imperatore". Di alì, di chel paîs cenglât di monts altis e dulà che sot vie, fra la grave blancje, e ven jù la aghe indarintade de Fele, al scomence il viaç di chest dumbli furlan, che al puarte aduès il nulôr de rase dai peçs, e intai vôi il cidinôr inmagant des neveris, la memorie lungje di cui che al à pôc ce contâ.

    Un viaç che a un ciert pont (a sedis agns) al scuintre l'esit dramatic di un incident su la strade, che lu oblee suntune carocele, ma di cheste situazion cetant dificil, massime par zovin, Pierluigi al à savût tirâ fûr lis peraulis, i sintiments, la fuarce par cressi come poete simpri di plui, simpri plui in alt. Il ricognossiment dal Viareggio al rint inmò plui palês e public dut chest, cemût che al è just, ma cui che lu cognòs di un pieç in ca nol veve gran dubis su la sô trate, marcade inmò denant che al scomençàs a scrivi viers, a publicâ racoltis, a deventâ une des vôs in vuê plui scoltadis in cheste nestre societât simpri plui sui paradôrs, che e cîr in cualchi maniere dai parcês, che e cîr di dâ un sens al vivi. E al è dabon straordenari il fat che la poesie, o sei l'art plui svoladie e mancul comerciâl che si puedi imagjinâ, e puedi jessi buine di davuelzi cheste funzion, se e je vere, cree, libare e disinteressade, vadì poesie tal sens plui complet dal tiermin, che e comprint tecniche e ispirazion parie.

    "Un poete - al pant Cappello - si dispon in maniere frontâl come aversari, rispiet al nivelament de olmade su la vite. Cheste so funzion e po ancje dâ la impression che al puedi mostrâsi tant che une sorte di predicjadôr maldert, che nissun nol piert timp a stâ a scoltâ, ma dut chest al è normâl, al è tal ordin des cjossis… personalmentri di chest no mi interessi gran, e o soi istès content".

    Fint achì o vin fat un discors su Cappello autôr par talian, ma lui al è ancje un brâf, anzit un grant poete par furlan, un autentic erêt, e il paragon nol è dabon sfuarçât, di Pier Pauli Pasolini. "Donzel, la gnot plui biele / e je chê ch'e mi tâs / dentri, minude come / un centesim di pâs / te sachete dal cûr / dulà che il cuart di lune / intal cidin dal cîl / al lûs come un ricjin". A son chescj i prins viers di un sonet di Cappello, che nus puarte juste apont ae memorie il "Donzel" pasolinian.

    Daspò vê scomençâ a scrivi par talian, viers il 1992 Pierluigi si met a componi viers ancje par furlan, metint de bande lis sôs poesiis in spiete di une oportunitât par fâlis cognossi. Fat che al cuiste concretece tal 1998 a S. Vît dal Tiliment, dulà che il nestri autôr al à podût presentâ un grop di vincjecinc lirichis al concors nazionâl di poesie risiervât aes lenghis mancul feveladis. Naturalmentri al à vinçût il prin premi, fat di no pocje impuartance par vie che chest ricognossiment i permeteve di fasi cognossi tal mont leterari nazionâl. Tant al è vêr che une buine part des poesiis presentadis al concors a son stadis po publicadis su "Diverse Lingue", la riviste specializade che inte redazion e veve nons di critics e leterâts come A. Giacomini (diretôr), M. Corti. G. Frau. F. Loi, G. Ricci, A. Zanzotto e altris inmò.

    Vadì che lis poesiis in marilenghe di Pierluigi Cappello a pandin un respîr liric e une esperience poetiche no comun tal panorame leterari furlan. Co i baste un prât, un bati di alis, un floc di nêf, un rai di soreli, un desideri o un sium par proponi une poesie profonde e lizere dutun in chel, cence altri il risultât di riflession e di lavôr di lime. Une poesie che e met in mostre ricjece lessicâl cun frecuent ricors al lengaç metaforic. Lirichis che a palesin un lunc sostâ sui classics de leterature, in particolâr chê dal Dusinte che pal autôr e devente riferiment pal so presint. Ve inalore nassi composizions che impen de solitarie meditazion a deventin un dialogâ cidin no cuntune femine vivint e materializade, ma cu "la femine" idealizade che e rapresente il "difûr" dal poete, vâl a dî la sô alteritât, la sô "Domina" in rapuart speculâr cul so "parentri", cu la sô interioritât, o sei il "Donzel" so simbul leterari. Composizions paronadis di un sintiment amorôs totâl, cjantât cuntun conciert di peraulis che insom a pandin la pôre che l'incjant si disfanti: "Tô la mê bocje amôr sul to savôr / la mê vergogne di vivi cumò / ch'o ti tocji ch'o ti sflori e o ti cor / come inte gnot un gjat adôr dai mûrs; / jo o ti cor come un gjat adôr dai mûrs / si ben ch'o sai che intai conts di amôr / doi mancul un mancul di zeri al fâs / e un plui un un al varès di fâ / si ben che e reste cumò che tu vâs /  la mê cerce di te su la tô piel / su la mê il risinâ dei tiei cjavei / e je dentri te tô la mê pôre / di smenteâmi di me."

                                                                                                                                                      (von zercläre)