Borca di Cjadovri (Bl) - La riviste “Ladin!”, publicade par cure dal Istitût Ladin de la Dolomites di Borca di Cjadovri, e je rivade al travuart dal diesim numar. Fondade tal 2004 di Ernesto Majoni (Coleto), che al è ancje il diretôr responsabil, oltri che diretôr dal za vût iniment Istitût Ladin, la publicazion e va cuistant un numar daûr chel altri simpri maiôr autorevolece. Par esempli di chest numar si è zontât al diretôr, e redatôr, Majoni ancje un comitât di redazion che al colaborarà pe sielte dai tescj e dai argoments. Il gnûf comitât juste apont al è componût, oltri che dal diretôr, di Denise Da Rin Vidal, Sabrina Menegus, Gianpietro Ponti e Cinzia Vecellio Mattia.

    Premetût chest, la riviste si vierç cuntun cetant interessant contribût dal professôr Francesco Sabatini sui “fats linguistics” de Costituzion taliane, riferît soredut ai articui che a rivuardin lis minorancis; e po, Ernesto Majoni, nus conte la storie strussiade de grafie dal ladin di Anpezo, mentri l’ultin contribût de prime part di Alessandro Norsa che al trate, a traviers un studi puntiliôs, des origjinis storichis-identitariis de int ladine.

    Inte seconde sezion “Fregores de cultura” e ven proponude la croniche di Laura Busin sul cont dal incuintri su la ladinitât agordine, inmaneade a Agordo ai prins dal mês di Dicembar stât. E inmò, un ricuart dai setante agns dal proviodiment des “Opzions”, daûr dal compatât Hitler-Mussolini, che in provincie di Belun al à interessât i comuns ladins-tirolês di Anpezo, La Pli de Fodom, e Col (Cuel S. Luzie), mentri pre Lorenzo Dell’Andrea al scrîf su la culture de int di mont, e in particolâr su chê ladine. A sierin, in fin, cheste sezion la presentazion di une iniziative di “Marketing didatic” promovude de Cooperative di Anpezo e un coinvolzint pinsîr di Francesco Pordon ae sapienzie dai vielis.

    Inte tierce sezion dedicade, cemût che e je usance, ae leterature, a cjatin puest contis e poesiis intun pocjis des variantti dialetâls de zone cjadovrine, di Borca a Candide, di Anpezo a Vallada  di Zoldo. Biel che lis recensions a scrutinin dome un pocjis des plusôrs iniziativis editoriâls vignudis fûr in chescj mês des stampariis dal teritori; fra chestis, trê gnovis edizions dal Istitût, po saçs leteraris, ambientai, naturalistics e storics, cun espressions soci-culturâls che a ofrissin cetancj prudêi di ricercje e di studi. Insom, come simpri, si cjate la liste dai colaboradôrs, dulà che si puedin olmâ ancje dai nons gnûf, e chest al fâs dal sigûr ben sperâ pal a vignî de riviste.

    Inte presentazion o vin vût iniment che in viertidure la riviste e propon il contribût dal professôr Francesco Sabatini su “I - fatti linguistici - nella Costituzione italiana”, un argoment dabon interessant. In veretât la impostazion che il Sabatini al da al intervent al è une vore “filo-talian”, e al lasse intindi che lis “veris” minorancis che a son dentri i confins talians a son i francês de Val D’Aoste, e i todesc dal Sud Tirôl. Po al zonte: “A chest doi grops di popolazion aloglote (di altre lenghe) al è stât zontât, tal 1972, un grop di popolazion di un pôcs comuns de Provincie di Bolzan dulà che si fevele une varietât di ladin. Plui indenant, tal 1999, la stesse tutele e je stade slargjade a altris grups di popolazion che a fevelin idiomis ladins intes Provinciis di Trent e di Belun e a chê part de popolazion dal Friûl Vignesie Julie che e dopre idiomis slovens”.

    Al è evident che il Sabatini no la conte juste, o ben no la conte dute. Prin parcè che al dismentee che la leç 482/99 e tutele, oltri ai ladins des Dolomitis,  ancje i ladins de Furlanie, 600 mil di lôr, in pratiche la minorance etniche-linguistiche plui numerose. La seconde cjantonade e rivuarde simpri la minorance slovene de nestre regjon, circje 50 mil lôr. Che no fevelin dai idiomis ma propite la lenghe slovene leterarie, che si insegne in scuelis presints intes provinciis di Gurize e di Triest. Se mai lis varietâts a interessin i slovens che a loghin inte Slavie Furlane, e nô o savìn chenti ce raze di polemichis che a son in at sun chest cont.

    Chest mût di tratâ lis cuestion linguistichis par tancj aspiets al indispon, par vie che nus ven fûr pai vôi la liende dal concet nazionalist “talian” che “Qui è Italia e si parla solo italiano!”. O disìn chest soredut parcè che, par rispiet de veretât, e je rivade la volte di ribati che se la cuestion des minorancis in Italie no je colade in dismentie, e se si è rivâts in fin ae fate buine de leç 482/99 il merit plui grant ur va ai ladins dal Friûl, ai autonomiscj furlans che sun chest cont a àn scomençâ a bati il claut dal 1945 in ca, e a parlamentârs furlans come Fortuna, Baracetti e Silvana Fachin-Schiavi che a Rome a àn batût pîts e mans par rivâ a otignî ce che a bramavin. Inmò, la tutele des minorancis todescje dal Sud Tirôl, francese de Val D’Aoste e slovene dal Friûl V.J. no je divignude gran par gracie Costituzionâl, ma da “oblics” internazionâi.

    In fin, simpri par coretece di informazion, o memorein che la leç 482/99, che a son daûr a fâ murî par mancjance di finanziaments, e che in premesse nus ricuarde che “La lingua ufficiale della Repubblica è l’italiano”, e tutele lis popolazions: albanesis, catalanis, gjermanichis, greghis, slovenis, e cravuatis e di chês che a fevelin il francês, il franc-provençâl, il furlan, il ladin, l’ocitan e il sart. In dut passe doi milions di lôr.  (edelweiß)