Triest - I garzons dai Belandant (par talian: gli apprendisti stregoni) a fasin dome dams, soredut cuant che si metin a trapolâ cu la glotologjie. Al è chest il struc di une des ultimis iniziativis inviadis de maiorance che in consei regjonâl a Triest e sosten la zonte di Renzo Tondo. Juste apont di resint a son stadis presentadis, de bande de Cdl e de Leghe Nord, dôs propuestis di leç par tutelâ i dialets presints inte regjon, o sei: il triestin, l’istro venit, il furlan-gurizan, il bisiac, il venit di Grau, il venit di Udin, il rosean, il po nasen e il nadisonian . I garzons dai Belandants a intindin cussì “dâ la juste dignitât a chestis feveladis che a son cetant lidrisadis intun determinât teritori”. Cost di cheste folcloriche maucade: un milion di euros.

    La rispueste plui puntuâl a cheste stravagant iniziative e je rivade de bande di Dree Valcic, che inte rubriche “La cjacarade” che al ten sù tal Gazetin, al sotlinie cemût che: “… il maljessi inviât de resinte presentazion in Regjon de leç pe difese e la promozion di un pôcs di dialets, al è plui fuart di cualsisei ipotesi di aprovazion. Scuvierzi che i plui mastins opositôrs de tutele dal furlan, dal sloven e dal todesc, lis lenghis di chenti ricognossudis de Costituzion, si son a butinton scuvierts campions de democrazie linguistiche al fâs, a seconde dal spirt de zornade: tirâ sù il nâs, spiçâ lis orelis, rompi la devozion e inviâ il mâl di panze”.

    E no je dabon, come che cualchidun ancje cun justece al rimarche, une cuestion di finanziaments destinâts ae promozion di cheste buzarade, un milion di euros, cuant che propite chescj personaçs a vevin berlâts al scandul sul cont dai fonts destinâts ae lenghe furlane. Co in fal sarès purpûr cui che si metès a fâ paragons rispiet ai parametris di spese calcolâts plui impuartants o strategjics, in chest câs secont ciertis declarazions de çampe alternative. E simpri fûr di troi al è ancje cui che al viôt in dut chest “teatri des marionetis”, dome la brame di cualchi conseîr regjonâl di cuistâsi lis simpatiis dal so feut eletorâl-dialetâl.

    La propueste di leç sui dialets puartade indenant dai garzons dal Belandants e à impen un diretôr dal orchestre ben precîs e doi obietîf di cuistâ in tiermins di imagjin: la unitât dal Friûl di une bande e di chê altre la minorance slovene. Rispiet ae Slovenie al è evident che a ’nd è inmò personaçs de diestre di Triest, cul sot segretari Menia in teste, che la considere come il fum intai vôi. Vadì che il progjet al è chel di mantignî viertis dutis lis contradizions pussibilis par tignî in piis la cuestion dai “esuli” e de talianitât di chês tieris. Pal Friûl la trate e je intrigose, simpri plui intrigose. Plui a ’nd è prudêi viers il ricognossiment di une identitât fuarte e comun, e la lenghe e rapresente la jone fondamentâl, plui si inventin atacs e tananais a chest ricognossiment. Il messaç al è palês, inte sô arogant declinazion: “Di ce bande volêso lâ a parâsi, se no fevelais ducj nancje  la stesse lenghe?”

    Puntuâl e ferbinte e je stade ancje la rispueste che a cheste provocazion al à dade bons. Marino Qualizza, diretôr dal “Dom” (n.17 / Setembar 2008), sfuei cuindisinâl dai catolics slovens de Slavie Furlane. “E je stade inviade la campagne di autun de propueste di leç par tutelâ l’univiers dai dialets presints in Friûl Vignesie Julie. Al è pussibil che plui di cualchidun al sedi restât fûr, parcè che da chel che si lei inte propueste, presentade in regjon ai 15 di Setembar stât, in teorie la liste e varès di jessi lungje tant che l’elenc dal telefon. Dut câs cui che al pense di jessi restât fûr al po cence altri protestâ e domandâ udience. La propueste e je stade presentade dal Pdl, Udc e Partît dai pensionâts.

    Dôs cjossis a van sotliniadis sul scomençâ, par vie che a marchin un dopli procedi, che nol po scjampâ a une severe critiche. In prin lûc si sosten che “la propueste no vûl oponisi ae leç sul furlan”. In realtât tal elenc che al ven fat a ’nd è une sengule citazion sul cont di cheste lenghe - il furlan-gurizan -, parcè che chei altris dialets a son di une altre madrîs. Vadì  che chest sclariment al è dal dut cence mani, ma al semee dibot volê prevignî lis obiezions dal mont furlanist.

    Ce che impen al invie la assolude oposizion e je, in secont lûc, la atenzion che e ven dade ai dialets “rosean, po nasen e nadisonian”, par vie che a vegnin contraponûts ae leç di tutele de lenghe slovene, scuasit che a apartignissin a une altre lidrîs e madrîs culturâl e linguistiche. E fâs specie la mancjade precisazion che si podeve spietâsi come pe leç sul furlan. Achì si bat cun fuarce sul cantin de diviersitât linguistiche. Ma il dut al è mutivât, come code velegnose - in cauda venenum! a disevin i latins - de afermazion che “chestis comunitâts no si sintin slovenis, ma talianis a ducj i efiets e a domandin di timp in ca une leç che ricognossi la lôr specialitât linguistiche”.

    Par dai seont al pinsîr di bons. Qualizza o tirin fûr une citazion dal grant scritôr furlan Riedo Puppo (1920/2002) che a pagjine 20 de racolte di articui “Magari ancje” (La Vite Catoliche / Udin 1983), al scrîf: “… la cualifiche di talians e vâl fin a Cividât. Sul Pulfar no son plui talians: a son “talianissimi”. Lu disin e lu ripetin ogni altre dì i nestris sorestants. Si che duncje, vint presint dut il cuadri, la situazion e je clare: come il vueli di ulive. Jù pal tac sbrudiot; in Friûl, talians; sul Pulfar, talianissimi. Che anzit, su la nestre etichete si podarès scrivi: “talians di raze vergjine” e sun chê dal Pulfar: “talians di raze extra vergjine”. Mancumâl che la Italie no comande plui fint a Zagabrie, se no sepi Diu trop talians che a saressin chei là. O varessin scugnût imbastî une etiche gnove: “talians di raze extra vergjine selezionade”.

    I garzons dal Belandants a fasin dome dams e a tornin a soflâ sul fûc di un nazionalisim ruzin e pericolôs: magari cussì no!
 (renzo balzan)