Tresesìn - Ai prins dal mês di setembar stât e je rivade chenti la biele gnove che Pier Luigi Cappello al à vinçût il premi leterari nazionâl (italian) "Montale", un dai massims ricognossiments tal cjamp de poesie. Un premi par cierts aspiets "madûr" ch'al rive daûr di âtris numarôs ricognossiments de bande de critiche e di un slargjât public di letôrs. Aromai a la sô vincjesime edizion il premi Montale, ch'al à tant che president onorari Mario Luzi e president efetîf Maria Luisa Spaziani, al è tal cjamp de poesie il plui innomenât in Italie, e Cappello al è il prin furlan a jentrâ te terne dai vincidôrs: e sarà po la zurie popolâr a assegnâ il superpremi a une des tre oparis, e al è di augurâsi che la poesie di Cappello, cu la sô limpie e leibil intesitât, cu la so distilade umanitât e rivi pardabon a cuistâlu.

    "Dittico", al è il titul de ricolte che j à zovât a Cappello il Montale, e a cjape dentri lirichis par furlan (Inniò) e par italian, e a je bielzà stade publicade, cun tune prefazion di Franco Tesio, te golaine "Nuvole" par cure dal editôr Liboà: e chest al va sotlineât, a prove di un ricognossiment che no si è zovât dal prudêl dai potentâts editoriâi che masse dispès a condizionin lis zuriis dai premis leteraris. Cussì chest premi j ven dât a Cappello a coronament di almancul dîs agns di produzion e di promozion poetiche: dal 1994 in ca al à pubblicât lis ricoltis "Nebbie", "La misura dell'erba", "Il me Donzel", "Amors", "Dentro Gerico" e al à curât e dirèt la golaine "La barca di Babele", spieli di une  furtunade stagjon de poesie furlane.

    Di timp in ca si fevele di un "câs Friûl" e no je une esagerazion: la nestre tiere e pò fâ cont vuê sun tune generazion di poets di valôr, come Ida Vallerugo, Amedeu Giacomini, Galliano Zof, Domeni Zannier, Federico Tavan, Umberto Valentinis, Lenart Zanier, Lionello Fioretti, Jacun Vit e Novella Cantarutti tant par vê iniment un pôs. Significant la presince, al sotlinie Cappello, dai poets di là da l'aghe, e no par un câs: si racuei ce ch'al è stât semenât dilunc une lungje stagjon ch'e à viodût tant che protagoniscj i operadôrs di plusôrs centris culturâi dal Friûl Ocidentâl, dal Circul Menocchio a "Pordenonelegge", dai Colonos ai curadôrs de "Barca di Babele". "Jo - al dîs Cappelo - par cierts aspiets o rapresenti une ecezion, fûr di cheste cente. Di sigûr parâtri al è che vuê in Friûl la poesie e je la forme d'art plui di avanguardie. Di timp si jerin inecuarts i critics plui atents, sore il dut i studiôs des leteraduris dialetâls, da Brevini a Loi a Tesio, e lis rivistis plui autorevulis come "Poesia" di Crocetti, che tal 2002 mi à dediât ben vot pagjinis, e "Caffe Michelangiolo", che si è ocupade no dome di me, ma ancje di ce che si môf atôrvie dai Colonos".

Nus plâs a chest pont ripiâ il discors poetic di Cappello de ricolte "Dentro Gerico", vignude fûr tal 2002 e che secont il nestri pensâ 'e à rapresentâ un passaç fondamentâl de sô trate poetiche. Il titul stès di cheste ricolte al à un clâr riferiment biblic di une materie definitive da l'idee de resistence (culturâl) di dulà ch'a nassìn chescj viers, viers che, cemût ch'al dîs il stès autôr, a son stât scrit "sui genôi" tune stagjon di dolôr biografic e storic. Tal dissen de ricolte, infats, si dàn la volte in maniere seguitive lis "ripresis" da esterni e da interni: ma dut al reste pal plui dentrivie di un spazi centât e autoprotetîf.

    Il mont esterni cuanche s'impâr al spavente cui siei rituâi di supermarcjâts e di weekend e al cunfine a l'ospizi de inutilitât ducj chei che no prodûsin e no cunsumin (dute la viere generazion contadine e je rapresentade te figure dal pari in Cjase di ripôs). Cussì l'unic mût di esisti al divente chel di resisti ("Qui resistere significa esistere" si lei tai viers de liriche a cjâf de ricolte), dulà che resistence no je une posizion di fuarce ma di diserzion al sintî. La costance di une architeture liriche cetant studiade, come se la forme e vès di tignî cuant che dut il rest al ven jù in ruvine e nol da plui sigurecis ( ma and'è simpri in Cappello ancje une tentazion al melos);  pe stesse reson il tornâ insistût de ripetizion (identiche, sematiche, gramaticâl o dome foniche: par dutis a son esemplârs i viers di "Uno che parte". Infin e merte sore il dut une citazion la cetant alte declarazion poetiche di "Voce sola", dulà che l'autôr al sotlinie parie une difide al propi instrument di vite, la poesie, e l'impreteribilitât dal font des cjossis: des "cose che contano" cuanche la resistence, il sît fuarteçât dal Io, al cêd: "…Le parole non vedono/ le parole non vedono mai abbastanza/ sono due occhi/ rimasti dentro un muro/ sono il buio di una stanza/ e quello che vedono,/ povere,/ a vederlo mi fa quasi pena/ non conta/ rispetto alle cose che contano/ che sono vere./ A noi timbrati in seme".                                                                                                                                               (von zercläre

     (Poesie tirade fûr da "Dittico" -  ricolte di lirichis ch'e à vinçût il premi "Montale")

La schede : R. Pellegrini, Ancora tra lingua e letteratura - Saggi sparsi sulla storia degli usi scritti del friulano, Ed. Associazione Culturale "CjargneCulture", Tavagnacco 2003, pp. 476 .

        "Flôrs di maserie" al è il titul curiôs de prime ricolte di poesiis ch'e à publicât zà fa cualchi mês la mestre di Dimplan di Darte, Maria Grazia Dereatti. La nestre poete e nàs justeapont a Dimplan di Darte, dulà che orepresìnt e stâ di cjase. Daspò vê cuistât l'abilitazion magjstrâl e lavore prime come impleade alì di une biblioteche di Udin, po e davuelç la profession di mestre tes scuelis elementârs. Ritirade dal insegnament, vuê e colabore cu lis mestris de scuelute des suoris di Dimplan, in maniere dal dut volontarie, tal educazion e tal instruzion dai puem e des puemis. Passionade de culture, de storie, des tradizions dal so paîs e de Cjargne, dal an scuelastic 1999/2000, te scuelute vude iniment denant trat, e insegne la marilenghe. Sôs sengulis oparis, in poesie e in prose, a son stadis publicadis tes antologiis "Disinlu par furlan", te riviste "Sot la Nape" e sui "Cuadêrs di Culture Cjargnele". 

    Di "Flôrs di maserie" o memoreìn  par esempli la liriche ch'e à par titul "Lune": "A svualin pavês/ A svualin pinsîrs/ E tu, lune, impîti/ sun chest biel pais…" parvie ch'e je determinant par podê capî il pinsîr e il mont poetic dulà che si môf la nestre autore. And' è un zûc di peraulis su la cadence dal timp che nus compagne tal nestri vivi di ogni dì che ti fâs vignî un sgrisul.

    E Maria Grazia e je buine dabon di spazis lirics originâi, come te poesie ch'e à par titul "Insumiâsi". In chescj viers, sospindûts tra sium e vee, e je la trascrizion di sensazions "altis": "Jessi un cocâl/ Svualâ e svualâ./ Butâsi/ in frescjes âghes…". And'è un anunzi o un ricuart, and' è une impromission, une sperance ch'e bramarès di concretizâsi tune volontâ ch'e spiete di jessi apajade.

    Il so poetâ in sumis, al è naturâl, come l'aghe di une fontanele di mont, sapontâts da une realtât magiche come ch'al po’ jessi magic il cidin di un passar sun tun ramaç, viers rivâts dibessoi, no clamâts, no sfuarçâts, ch'a son vignûts concretizansi e insedansi tal so "io".

    Viers ch'a àn une musicalitât e un sens ta l'armonie stesse de peraule, come che nus pant te liriche "Primevere": "Jodi un sbrendul di cîl/ tune poce,/ las rôbes pierdudes/ tun vôli di frut,/ un svual di sisile/ tun nît scjaveçât,/ l'è ricjatâ la sperance/ l'è vê la vierte tal cûr/ l'è riscuviergi l'amôr…".

    In sumis une poesie che nus fâs respirâ il turchin dal cîl, il divin, il spirituâl e che ta chel  istès timp nus da il sens de vere anime, dal spirituâl ch'al è insedât dentrivie in ognidun di nô. Une poesie che nus pant minût par minût la trate umane e spirituâl  de nestre poete: "Taseit, sunsûrs di chest mont!/ Taseit par chi scolti la musiche/ dal flum ch'al còr tanche il timp;/ la vous dal vint fra i peçs;/ il bati lizêr dal gno cûr./ Taseit par chi mi sinti/ cence peis di cjàr;/ flame pure, lûs clare./ Taseit, taseit/ sunsûrs di chest mont!".

    Inmaginis lambris come cii serens, dolcis, che si compagnin a une lenghe ancje jê pure e delicade che rive a fânus sintî la bielece des cjossis e la purece dai sintiments. Cheste poesie nus comuniche diviers stâts d'anim e nus fâs preseâ la bielece des cjossis, di elements e aspiets ch'a apartegnin a une Cjargne sclete, incjantade, par cierts aspiets zà pierdude. La poete di Dimplan e cognòs cetant ben la bielece, il malibiament, i aspiets, i personaçs i lûcs ch'a cèntin "il so mont". Lôr a son un dutun cu la sô vite: " Di torments e bonaces/ cjant corâl./ Di cjère e di crets/ sculture ch'a rapìs./ Di uceluts e besteutes/ orchestre di vite gnove./ Di rôses e di odôrs/ fantasie che di gjonde a pàs/ Lander!".

    Dut chel ch'o vìn dìt denant trat nus palêse che Maria Grazia Dereatti e je une di chês poetis ch'e rive a centrâ l'essince des cjossis e a stabilìs fra jê e lis cjossis un rapuart ch'al passe a traviers la peraule umane e spirituâl insiemit. Cussì e je buine di trasmetinus lis sôs esperiencis  e passions, emozions, sensazions. Cheste e je dabon poesie di grande concentrazion liriche e spirituâl e a viôt lis cjossis te lôr essince. 

    Chescj "Flôrs di maserie" a son veramentri flôrs di sperance!