La idee e je chê di rapresentâ la Cjargne, la sô identitât, la sô storie, a Damâr, il prin paîs che si cjate jessint dal casel de autostrade. Cussì il Cosit (Consorzi pal svilup industriâl di Tumieç) al à vude la biele pensade di sielzi par chest cont il zei, presumût simbul dal timp passât, di logâ intun lûc dal presint e dal avignî (la aree tecnologjiche de plane Damâr). Un zei-monument, alt nuie di mancul che vincjecinc mestris e metût adun cun dovis di metal e di len, di logât al centri de grande taronde che si cjate propite in face ae jentrade-jessude de autostrade. Cost di cheste  operazion “artistiche-culturâl”: 500 mil euros.

    No si sa di precîs di cui che e je partide la pensade pe realizazion di cheste iniziative, ma al è evident che si trate di une propueste di fâ petâ berlis. Prin di dut par vie che, in timps di crisi come chescj, 500 mil euros di spese a son un alc di sproposetât, oltri che un esempli palês di straçarie di bêçs publics. Secont parcè che si àn buinis probabilitâts di lâ a finîle tal Guinness dai primâts, no pe grandece dal zei, ma ben invezit par vie dal monument plui kitsch che si puedi cjatâ atôr pal marimont.

    Cui che al cognòs un pôc la storie e lis tradizions de Cjargne al sa che il zei al è un imprest che a doprâlu al coste fadie. Une strussie che e colave soredut su la schene des feminis cjargnelis, almancul fintremai ae mitât dal secul passât, cuant che il pês dal lavôr de campagne al jere pratichementri dut sù pes lôr  spalis. I oms a jerin stât obleât a emigrâ par vuadagnâsi la bocjade, “libars di scugnî lâ” al varès dite juste apont Lenart Zanier cu la sô poesie di denunzie. Su chescj fats e su cheste condizion e je stade po daspò imbastide no pocje retoriche. Massime chê des feminis cjargnelis che, intant de Vuere Grande, cul zei a puartavis al front mangjative e bombis pai soldâts. Ancje in chest câs eroessis par fuarce, parcè che cun chês cuatri palanchis che a vuadagnavin a podevin dâ di mangjâ ai fruts e ai vielis che a vevin a cjase, co i oms a jerin ducj vie a fâ il soldât, a copâ o a fâsi copâ intes trinceis dal Cjars.

    Ae femine cjargnele, fuarte, gjenerose, lavoradorie, al è stât justementri dedicât un monument a Tumieç, pensât, volût e fat realizâ dal mai dismenteât professôr Lucio Zanier, om di grande culture e di grande passion storiche, impegnât par agns a puartâ indenant la opare di recupar de nestre identitât, za inviade di chel altri grant cjargnel che al è stât Michêl Gortani a traviers la istituzion dal Museu des arts e des tradizions popolârs.

    Ma nol è chest il mani de cuestion. Il mani de cuestion al è che in Cjargne si sedin ridusût a rapresentâ la identitât di un popul a traviers il simbul dal zei. Al è evident che si è in presince di une mancjance assolude di braure de propie identitât, oltri che di fantasie, almancul de bande dai sorestants. Ogni persone che e vebi dome un pocje di culture e capìs che la muse plui sclete e vere di un popul e je rapresentade soredut de propie mari lenghe. Pre Josef Marchet al à displeât pulît cheste cuestion: “Si puedin imparâ, par lâ ator pal mont e par tratâ cun int di ogni fate, trente o cincuante lenghis e doprâlis ancje pulît; ma la nestre e je simpri une sole: chê che o doprin par pensâ dentri di nô, cuant che o sin di bessôi; chê che nus jes fûr di bocje, cence savê, cuant che une passion masse fuarte o un displasê o une grande gjonde nus cjapin la volte e no nus lassin plui resonâ; chê lenghe che e je vignude sù de nestre tiere, impastade cul nestri sanc, tiessude ator dal nestri fogolâr, madressude dal nestri soreli, nudride e spatussade dai nestris viei. Une altre lenghe e po jessi plui svelte o plui fuarte o plui disgropade o plui musicade de nestre, ma no je la nestre e no val par dâ vôs al nestri spirt, par incjarnâ il nestri mût di sintî, di gjoldi e di patî” (c.f.r. - Ce Fastu? - 1951/1952).

    Ce chel al diseve il Marchet lu àn capît pulît i nestris scritôrs e poetis, che inte lenghe mari cjargnele a àn scrit lis cjossis plui bielis, e no feveli di presumûts poetis di mieze vigogne, ma di personaçs tant che Siro Angeli, Leonardo Zanier, Giorgio Ferigo, Gjso Fior, Gjeme Nodale, Gjne Marpillero e Luigi Candoni. Cence dismenteâ chel Gerolamo Biancone che tal secul XVI a Tumieç al poesiave bielzà par furlan, e che al è jentrât in dutis lis antologjiis de leterature furlane.

    Ma dut chest ai nestris sorestants no ur interesse une pipe. Lôr a pensin in grant (al zei di vincjecinc metris juste apont) e a smirin a vierzisi ae Europe e al mont intîr. E inalore se tu ur domandis ce che e je la Leç 482/99 nissun nol sa dati une rispueste. Cussì nissun nol à bacilât a vierzi i sportei linguistics, nissun nol vûl saventi di toponomastiche bilingue (talian-furlan), nissun nancje no si insumie di inviâ il bilinguisim inte publiche aministrazion. O vin provât jo e Remo Brunèt a cirî di fâ vierzi almancul une sportel linguistic comprensoriâl, alì de sede de Comunitât di mont a Tumieç, ma o vin otignût dome impromissions cence nissun costrut. E no stin a fevelâ de aministrazion comunâl di Tumieç, che si svante di sei il cjâf lûc e il pont di riferiment des politichis culturâls de interie Cjargne. Cuant che tu ur fevelis di tutele dal furlan e di valorizazion de culture e de leterature locâl, a tachin a remenâsi come che a vessin intor la urtiarie. Par fortune che i predis (bons. Agnul Zanello e pre Alessio Geretti n.d.r.) a àn tacât a inmaneâ dai acjadiments artistics-culturâi cetant impuartants a Dieç, se no o saressin in face al desert dai Tartars.

    Al è evident che cun chestis premessis no si po pratindi grancj svuai di inzegn creatîf. Cussì la storie dal zei, che e podeve jessi dome une barzalete di contâ intes ostariis e je impen deventade, magari cussì no, un alc di concret,  un progjet cun tant di pois storichis-antropologjichis. Al è dome di sperâ che ai cjargnei ur sedi restât inmò un pôc di orgoi,  che ur torni la voie di vosâ, di protestâ,  di fâsi sintî, in mût di rivâ  a fai gambiâ idee ai maiorents dal Cosit. Se no nus tocjarà di rassegnâsi a gloti ancje cheste ribaldarie. In fonts, come che e je usance di dî, cui che si contente al gjolt. Ma al sarès dut câs un gjoldi cetant mareôs. (renzo balzan)