No sarès volût jentrâ tal dibatiment in vore di un pôc di timp in ca sul teme: se al sedi o mancul necessari l’insegnament obleatori de lenghe furlane inte scuele primarie, ma lis cetantis cjossis fintremai cumò scritis, a proposit e soredut a sproposit, di letôrs disinformâts o pôc informâts mi àn prudelât a jentrâ inte discussion par puartâ in cjamp osservazions e critichis o speri no scontadis.

    O sclarìs denant trat che cui che al scrîf al cognòs pulît il probleme in cuestion, par vie che di uns trente agns in ca si sta ocupant di chestis cjossis in maniere sistematiche: o soi stât, in fats, un dai fondadôrs di Radio Onde Furlane, che e puarte indenant dibot di  vincjecinc agns in ca la programazion de sante messe par furlan che e ven funzionade inte capele de Puritât di Udin,  o ai cjapât part e lavorât a jutori cetantis iniziativis relativis ae difusion de lenghe furlane (tra chestis la racolte di firmis pal insegnament dal furlan presentade tal 1983 ae president de Cjamare dai deputâts Nilde Jotti).

    Premetût chest, daspò une lungje stagjon de vite dulà che, cun passion e ferbince, mi soi spindût par rivâ a otignî un risultât che mi semeave, finalmentri e formalmentri, cuistât, vuê o crôt al contrari di jessi tornât indaûr di almancul trente agns. E chest parcè? Parcè che il dibatiment in at sui gjornâi di chenti al da di viodi in maniere impreteribil che cetancj abitants di cheste Regjon a son fûr timp o cetant pôc informâts sul argoment par vie che no san (o forsit no i dan impuartance o ben a àn dismenteât) che di plui di mil agns    in ca e esist une culture furlane testemoneade, oltri che de tradizion orâl, de presince di numerosis gramatichis, di impuartants vocabolaris, di ricjis e significants antologjiis, di numerôs e cualificâts scritôrs in prose e in poesie.

    Cetancj, al vignarès di pensâ, si son inacuarts dome vuê che al esist il probleme de lenghe furlane, forsit  parcè che vuê al è tant di mode fevelantti, o miei strafevelantti. Ancje se, in veretât, fevelantti in maniere tardive e superficiâl al da di viodi che dut câs il probleme al esist, pa la cuâl discuti pro o cuintri l’insegnament obleatori de lenghe furlane al da di viodi che il conservâ e il slargjâ l'ûs de lenghe al rapresente un dât di fat, une cuestion di fonde soredut sul plan soci-culturâl. Vadì che al covente puartâ a compiment la opare dal legjislatôr, par vie che cence tradusi in ats concrets lis disposizions di leç no si po rivâ a une culture milenarie che e je ae fonde de nestre identitât, dal nestri mût di jessi furlans.

    Secont il gno pensâ chê che e semee une sorte di imposizion metude in vore dai oms di culture, dai politics e dai aministradôrs regjonâi, acusâts in maniere spreçant di furlanisim, e rapresente, di fat, la sengule soluzion praticabil par fâ capî a la int dal Friûl che al covente pardabon fat ce che fintremai cumò nol è mai stât sistematichementri realizât, o sei insegnâ a lei e a scrivi par furlan, ma ancje a studiâ la storie e la gjeografie inte lenghe mari, di mût che lis gnovis gjenerazions a pedin savê di dontri che a divegnin e cemût che si è metude adun cheste nestre particolâr culture.

    Al è une vore impuartant, in fats, se ciertis carateristichis, come la scletece, la laboriositât, il cjapâ la volte dal fâ sul dî, risultât de nestre tradizion contadine, a sedin capidis, custodidis gjelosementri dai nestris zovins e di lôr tramandadis aes gjenerazions in avignî. Se dut chest nol ves di sucedi inmò une volte nô furlans o daressin di viodi che o sin un popul sotan, vâl a dî a stâ sot, parcè che no vin vût cûr di fâ valê in maniere ferme e ferbinte la nestre identitât, risulte par altri de multi-secolâr fusion tra i diviers popui che a àn traviersât e dominât il Friûl.

    Se vuê si cjalìn ator no podin no ameti che i furlans a son rivâts, lavorant ducj insiemit, cun  amirabil sfuarç, a risurî in pôcs agns de grande conseguence dal taramot. E se vuê cualchidun al à cûr di contindi che dut chest fervôr di intervents a jutori dal insegnament de lenghe e de culture furlane al diven dome de smire di creâ un “business”, cu la negative conseguence di gjavâ finanziaments a altris oparis ben plui impuartantis, di favorî un malintindiment o piês inmò un imbroi, o sei chel di fâ passâ par lenghe un dialet, po ben chest personaç (o chescj personaçs) al dîs di fat une grande buzare, une cjosse di rocs, par vie che il Parlament talian, su la fonde dal articul 6 de Costituzion, al à ricognossût al furlan la dignitât di lenghe, ancje se minôr, e aduncje il just dirit ae tutele.

   Par rivâ insom o invidi ducj i furlans a no vê pôre di rivendicâ i lôr dirits, a sintîsi pardabon popul. Ju invidi a dî vonde a imposizions che a divegnin di personis che no cognossin i valôrs e lis tradizions de nestre culture. Tal gno cûr il plui grant marum al è chel che la nestre int no vebi ben comprendût la puartade de rivoluzion culturâl che si è inviade cun Radio Onde Furlane, e che si è fate incjantâ des sirenis che a svantin dome i mîts e i rituâi dal consumisim e de omologazion culturâl, tant dispreseâts di Pier Pauli Pasolini. (sergjo venuti)