Cjaneule / Ceniebola - La resinte publicazion di Aldo Cont dal saç “Canebola, scorci di storia - Ceniebola, Košcek zgodovine, 1770 - 1947” e rapresente dabon une minere di preseôs materiâl pe storie e pe culture de frazion dal comun di Faedis, indulà che si fevele un dialet sloven che, parie a chei di Masaruelis / Mažerole, Purçûs / Porcinj e Subît / Subid al po sei considerât l'anel di colegament tra il dialet sloven des vals dal Nadison e chel des Vals de Tor e dal Cuarnap. Inte publicazion, che e riprodûs in copie numerôs documents di archivi, al ven ripuartât ancje il libri storic de parochie di Cjaneule, inviât tal 1921 di pre Josef Simiz di Prossenìc, che al rezè chê capelanie dal 1921 al 1925. Inte part gjenerâl, cu la sô elegant e clare scriture, pre Simiz al dediche ae “fevelade” slovene di Cjaneule dôs pagjinis, che o ripuartin juste cemût che lui lis à metudis jù, fale la nestre traduzion par furlan.

    “Nonostant la vicinance cui Furlans, dut câs, a traviers il domini dai Patriarcjis di Aquilee, chel de Serenissime Republiche di San Marc, la dominazion de Austrie e l'union al Rein di Italie, Cjaneule e à simpri conservât la sô fevelade Slovene. Il fat al è dabon degn di note, par vie che no si verin mai scuelis o ufizis dulà che si fevelàs, insegnàs e scrivès par sloven. I unics documents a son i contrats e i testaments - dut câs di date avonde resinte - che i nodârs, a traviers personis che e cognossevin lis dôs lenghis, a spiegavin in lenghe Sclave o Iliriche ai contraents denant di passâ ae firme dai ats, dulà che si nomenavin i lûcs e lis possessions ancje cul non origjinâl par sloven.

    No si po dineâ che il contat cui Furlans nol vebi influît tal impuartâ tal ûs cetancj nons di divignince latine, cundut achel, e je inmò vuê sorprendent la purece di frasis e peraulis slovenis inte fevelade di Cjaneule. O dîs sorprendent, par vie che plui voltis mi è capitât di sintî dal lavri di contadins e feminis mai ladis vie dal paîs, ciertis frasis e peraulis che o vevin denant trat letis sui libris slovens, ma che mai o varès pensât di sintîlis a ripeti de vive vôs di int che no à mai studiât la propie lenghe.

    La   fevelade   di  Cjaneule  e je  carateristiche  pai  “a”   che e dopre cetant intes desinencis (come tal câs dal furlan di Cividât), dispès a sproposit, ancje intes radrîs: es. taka = tako, kanj = konj, patak = patok, ablica = oblica, e v.i.  Chestis variantis dut câs no son di slaif a chei di Cjaneule tal capî pulît la fevelade des Vals dal Nadison.

    I Capelans di Cjaneule, pal tant che si à memorie, a àn simpri fate dutrine, confessât e predicjât par Sloven, mantignint la antighe tradizion di lei, dutis lis domeniis e fiestis, il Vanzeli par Sloven denant di scomençâ la predicje. Anzit al semee che, se si verin dai predis Furlans in cure, chescj a vebin imparât il sloven: i vielis si impensin inmò che lis Litaniis Lauretanis a forin pe prime volte insegnadis e cjantadis par sloven par opare di Pre Dree Zani di Faedis.

    Il desideri dal ben spirituâl des animis, lis justis normis de Teologjie pastorâl, lis prescrizions dal Dirit Canonic (Con. 1332), a domandin che si vadi dilunc a proferî la divine peraule inte lenghe dal popul, preparant al gree il passon plui zovevul; cence pôris di conseguencis politichis, parcè che la Glesie e insegne simpri e dapardut la obedience aes autoritâts e aes leçs: “Deum time, regem honora”.

    A’nd è, e je vere, ancje dôs o trê fameis che di sloven a cognossin dome chel tant che al baste pai lôr afârs: volessial il cîl che a vignissin almancul a scoltâ la predicje che, une volte al mês, il Plevan al ven sù a fâ par Talian!… Juste sul cont di chestis predicjis, che si ben che a son semplicis e popolârs, o contarai dal judizi che mi à palesât un vieli, sui otante, cjaliâr di mistîr, e che intai siei miôr agns al scugnût lâ jù dispès in Furlanie: “Ja jin povin franko: ne kapin nič kar pridga Plevan, kar pride or na usako trečijo nedejo; an ja k’ san hodu dan po Laške an dou mez Uidan, kar san biu mlat. Na svet Juan se tant še kapi neki, zatu k’je nimar ta štorja, an se že prej vi koka jo gre fniuat”. = Jo i dîs cun scletece che no capìs nuie di ce che al predicje il Plevan, cuant che al ven sù ogni tierce di mês; e dî che o ai ben fat cetancj viaçs a traviers la Furlanie e par Udin cuant che o jeri zovin. A San Zuan si capìs inmò cualchi cjosse, parcè che e je simpri la stesse storie e si sa denant trat cemût che e larà a finîle”. (von zercläre)             

Gnûf “Dizionari ilustrât” de lenghe furlane

Udin - I vocabui, ducj par furlan, a son passe 1200, cun tant di ilustrazions zontadis par sclarî inmò miôr il significât. Publicazions e , soredut, istrument didatics che a puedin zovâ a insegnâ la lenghe furlane, in chescj ultins agns, a son vignûts fûr cetancj. Ducj, dut câs, a zovin al mantigniment e ae cognossince di chê  mari lenghe che, pal plui, e je plui fevelade che scrite e lete. Cundut achel a’nd è ancje un grant impegn par insegnâ o miei trasmeti aes gnovis gjenerazions la lenghe furlane, patrimoni culturâl preseôs di un popul.

    A son cence altri chescj i prudêi che a àn inviulât Sandri Carrozzo a realizâ il gnûf “Dizionari ilustrât” (edizions Kappa Vu, pp.96). Il repertori al cjape in considerazion, denant trat, i tiermins che a àn partignince cu la cjase, cente privilegjade di valôrs e di afiets. La cjase, intindude come fabricât dal difûr, vilute o condomini, e po daspò la plante cu sore ripuartadis lis diviersis stanziis: la cusine, il tinel, il bagn, il coridôr, il stanzin, lis cjamaris, il mezât. Po la mobilie sicu l'armâr, l'armaron, il scrign, la librarie, lis cjadreis, ma purpûr il televisôr, il videoregjistradôr e il telecomant. Si cjate naturalmentri ancje il fogolâr cu la nape, il cjadenaç, il cjavedâl, la bancje. E dongje la gratule e la panarie, che une volte  al jere mobil che al custodive la farine. Daspò la puntiliose descrizion de cjase Carrozzo al passe a elencâ la robe di mangjâ e i timps che a cadencin la zornade, come la gulizion, il gustâ, la mirinde, la cene. Daûr e ven la vistidure pal istât e pal invier, par po passâ a descrizion des diviersis parts dal cuarp uman. Altri argoment al è rapresentât dai mieçs di traspuart e dai segnâi stradâi. Interessant e je in fin  la descrizion des plantis, scomençant des jerbis par po passâ ai arbui. In sumis, cemût che si à vût iniment denant trat, si trate di une publicazion cetant adate par un ûs didatic intes scuelis