Tamau/Tischlbong - Timau/Tamau/Tischlbong, paîs dulà ch'e vîf une comunitât di antighe divignince todescje, al è logât te alte Val de Bût in Cjargne. Al fâs part (come frazion) dal cumun di Paluce. Dai 1200 abitants ch'al à vût chest paîs, vuê and'è restâts circje 400. La colpe di chest negatîf andament demografic e va sore il dut ricercjade te dificil condizion soci-economiche che Tamau, come tancj âtris paîs de mont furlane dal rest, al à paidît tai agns dal daspò vuere e ch'al à puartât tancj di lôr a emigrâ, o tal forest, o ben tai centris di fons val e de planure.

    A Tamau tai rapuarts interpersonâi si dopre il todesc tamauês (tischlbongarich), che secont i glotoligs e je une varietât dialetâl bavarês-carintiane. Oltri al todesc tamauês si dopre naturalmentri l'italian (lenghe uficiâl) e il ladin-furlan (te varietât dialetâl cjargnele dal alt Cjanâl di San Pieri). Par todesc tamauês si publiche il periodic "Asou Geats", editât dal circul culturâl "G. Unfer". I "Tischlbongara Piachlan" (Cuadêrs di Culture Tamauêse), riviste ch'e ven fûr une volte a d'an par cure dal Institût di Culture Tamauêse, a cjàpin dentri invezit contribûts par tischlbongarisch, par todesc, par italian e par furlan. Al esist ancje un sît Internet ( www.taicinvriaul.org ) ch'al publiche notiziis su Tamau e sun chês âtris comunitâts di divignince todescje de mont furlane (Sapade/Plodn, Sauris/Zahre, Val Cjanâl/Kanaltal).

    A dut chest zà fa cualchi mês si è vignût a zontâ il "Wörterbuch der deutschen Mundart von Tischelwang", ossei il glossari dal todesc di Tischlbong (Tischelwang e je la version dal toponim tal todesc standard), curât des dotoressis austriachis Anna Gasser e Ingeborg Geyer. L'opare, dabon monumentâl e penge 603 pagjinis, e je stade editade da l'Edition Praesens.

    Cun chest dizionari lis autoris a àn vulût presentâ il dialèt todesc di Tamau cemût che vuê al ven fevelât e scrit. In plui a àn cjapât dentri la majôr part dal lessic tradizionâl, aromai daûr a lâ al mancul insiemit cui anzians che lu stan doprant. Duncje un'opare ch'e fâs cont su des analisis lenghistichis e su documents rapresentâts dai dizionaris metûts adun tune dade di timp di circje cincuant'agns: da l'ultin daspò vuere al dì di vuê.

    Par rindi plui sempliç l'ûs dal dizionari ai tamauês e a cui ch'al lei la scriture tamauêse "moderne" il leme al è stât presentât te trascrizion standardizade, chê doprade te leteradure tamauêse dai ultins vincj agns, proponìnt cussì l'inmagin ortografiche normalmentri doprade. Daprûf, in parèntese, si à la riproposizion de carateristiche fonetiche in trascrizion fonetiche internazionâl cul fin di rindi adàt il dizionari ancje par âtris priontis di ricercje lenghistiche.

    Oltri a chês zà vudis iniment, di sotlineâ al è ancje che une preseôse font pe compilazion dal Glossari si son palesadis lis ricercjis fatis in colaborazion cun sîs fameis tamauêsis sul lessic inmò vîf te lôr fevelade originarie, cul jutori dal gnûf "Cuistionari pai dialets des isulis lenghistichis di divignince todescje ta l'Italie disore". Sun chest cont de massime impuartance, sore il dut pe realizazion de trascrizion fonetiche, a son risultadis lis vincj oris di registrazion magnetofoniche de serie "Da oltn darzeilnt", ricoltis par cure di Laura van Ganz.

    Di memoreâ al è in fin che il progjet al à podût jessi realizât graciis a l' Österreichische Akademie der Wissenschaften, asistût sot l'aspiet finanziari da fonts divignûts da l'Union Europeane e a la deane dal Institut für Österreichische Dialekt-und Namenlexika dotoresse Isolde Hausner. Inmò un'âtri impuartant jutori al è divignût dal Sprachinselverein , dal Österreichisches Sprachinselmuseum e de dotoresse Maria Hornung, grande amie e studiôse des comunitâts di divignince todescje de mont furlane, sore il dut di chê di Sapade/Plodn.   (von zercläre)

    Elio Bartolini, docent, sagist, scritôr e poete, al è nassût a Coneàn tal 1922, ma di famee furlane. Laureât in letaris, al à vût insegnât a Rome, a Milan e po in Friûl. Al à colaborât a diviersis rivistis e zornâi, tra chescj: "Politecnico", "L'approdo letterario", "Gazzetta del popolo". La sô narative, tes primis oparis di tindince neorealiste, e je lade podaspò inricjînsi di âtris aspiets e umôrs. Al è stât ancje senegjadôr di cines e regissêr dai films "L'altro Dio" e "Ragazze di paese con fabbrica". Al à scomençât a scrivi par furlan tal 1977 e di chê volte al à publicât plusôrs ricoltis. Tal 1999 al à voltât par furlan, in colaborazion cun âtris, i dialigs dal carton animât "Lupo Alberto". Pai siei merts culturâi e leteraris al à vût il "Premi Pifanie" tal 1969, e il premi "Friûl Acuile d'aur" tal 1986.

    Zà fa cualchi mês al cjançonîr di Elio Bartolini si è zontade une gnove ricolte. A mancul di un an da "Il cost di une vite", dulà ch'al veve ricolt, cun cualchi esclusion e cu la zonte di lirichis di scree, oltri a no pôcjis revisions, lis ricoltis jessudis denant trat, il poete al ven a proponinus lis "Cjantadis", dîs composizions, tra rinovadis e gnovis, di un dabon slargjât respîr. Al è chest si po’ dî il so tierç mût di poetâ, dongje e oltri l'ìmpit des "Poesiis protestantis" e lis plui lirichis "Cansonetutis". No gambiin i tems, ma par cierts aspiets ju intonos, plui naratîfs, plui popolârs e corâi. Diviers al risulte naturalmentri ancje l'ordît lenghistic, adeguât a un dî plui discorsîf e inmediât, plui daprûf a l'oralitât.

    "Cjante, tu Olghe, cjante": tirade fûr de "Cjantade da li' bigatis", la citazion e vâl dal sigûr come  dediche a la mari Olghe, filandresse, vôs buine sevi di consolâ che di contestâ te realtât agrarie furlane di grande soference sociâl tra lis dôs vueris, 'e à un palês riclam poetic, sul cont de constatazion maluseriôse dai mudaments sociâi in at, che si tradusin tun refût di un passât dulà che il poete - In chist Friûl/ che a no j sbore p' nuie/ ni di Vô ni di nissun - si cjape il pegn de sô celebrazion tant che at di justizie e di amôr par chel "mont" ch'al à tant dât e paidît, e tant pôc gjoldût.

 

Âtris aspiets, plui privâts e intimistics, ju cjatìn invezit te "Cjantade da l'om masse sôl t'une cjase masse grande". E di chescj aspiets a podaressin jessi nassudis âtris cjantadis, ossei des incujetis riflessions dilunc la gnot dal vieli che, bessôl tal scûr e tal cidin,  s'interoghe su la propie vite e su l'impreteribilitât de muart, su lis sôs gjondosis ciertecis di frut e su la simpri deludude aspirazion di conferme de fede e su lis tentazions di diviersis, malibiôsis teologiis. Cjanzon delicade, coinvolgent, dal finâl visionari, ma ancje problematic.

    Parêli e colegât cu la stesse glagn intimistiche, il "Plait dal plevan te gnot de sagre", la lamentazion dal plevan ch'al vai su la sô soledât intant che la sô int e gjolt il plasê profan e materiâl de sagre dal paîs, daspò vê cjapât part 'es funzions di glesie come par un passe timp, "drindulâts in procession" (e lui s'impense di chês di une volte, "svintuladis dai standardas"). Inmagin vadè di fieste profane, di testemoneance di gambiaments culturâi, di une discjadence apajade in incussient coinvolgiment, e par chestis resons inmò plui blasmevul.

    Lade al mancul la fede, disfantadis lis ideologiis, lâts a mont i siums rivoluzionaris, "Canson dismitude" e marche la vignude dai gnûfs parons vistût di fin e in golarine, plui frêts, plui vuaits e cun mancul scrupui dai parons  di une volte, e il straviament de storie cu  la fin parie da l'utopie. Ancje la "Cjantade la fo e dal mai stât", e je travanade di nostalgiis par chel ch'al varès podût jessi, e nol è stât. Un zovin amôr lât in struc, lis primis dificultâts "in ta la biele guere da la vite", ricuarts di ce ch'al è stât e di chel che nol padarà plui jessi. Come il paesaç furlan di une volte, vuê tiere pustote, rindude a un senari dulà ch'a paronin i cocâi ch'a vegnin sù di un mâr invelegnât a cirî di mangjâ tai cjamps savoltâts e sbarinçâts di capanons. Un sît inreâl dulà che il poet nol po’ che sintîsi un distrani, fûr dal timp e fûr di puest.

    Bartolini cun cheste sô ultime opare al à puartât un'âtri contribût di rilêf a l'incressite de leteradure furlane in marilenghe, une leteradure di respîr cence âtri european. La sô e je une poesie di valôr alt, realiste e ancje cuintricorint che par cierts aspiets nus ricuarde il Pasolini de "stagjon furlane".