Cemût che si voleve dâ di viodi! Cu lis declarazions dai ultins timps il governadôr Renzo Tondo al disvele il so progjet, cu la poie de maiorance regjonâl metude adun dai “fedêi federaliscj” de Leghe, che di timp in ca al à tal cjâf pal guvier de mont de nestre regjon. Lis declarazions sul plan sanitari e soci-sanitari regjonâi, sui eletrodots e no ultime la cunvigne de zonte regjonâl inte sede dal Cosit di Tumieç, a àn sclarît cuâl che al è il plan che al sometarà a pupil il guvier des zonis de mont, ripuartantlis a une gjestion controlade diretementri de Regjon. Il fin al è une autonomie formâl, ma no reâl des popolazions che a vivin in mont, soredut de mont cjargnele, di simpri storichementri e politichementri puartade ae autodeterminazion des propiis sieltis (viôt il referendum su la provincie de Cjargne), mediant une gjestion e une programazion dal svilup de mont produsût des agjenziis teritoriâls, centris di podê economic, dispès disleadis des reâls dibisugnis de popolazion e dal teritori.

    Sul cont de riforme dai ents locâi de mont proponude de zonte regjonâl, a front di un dibatiment sclagn, inadeguât e soredut scuindût ai plui, i sotscrits citadins, che a rapresentin moviments e fuarcis politichis, a intindin cun chest intervent tornâ a meti al centri de discussion il valôr di une propueste che e dedi autonomie e responsabilitât aes popolazions che a loghin in mont, che la cognossin e che a vivin su la propie piel la sô bielece e la sô durece. In linie gjenerâl il document regjonâl “Razionalizzazione dell’ordinamento locale nel territorio montano”, presentât il mês di Novembar stât ai sindics, si propon une vore insuficient e/o di pueste pôc clâr in diviers passaçs, cussì nus semee plui che evident che cheste propueste no sedi il risultât de pocje competence dai politics che le àn presentade, ma ben invezit une strategjie politiche clare, si ben clupide, tra i diviers dit e no dit dal document.

    Prime di dut, considerant come primari l’aspiet gjestionâl dai servizis publics locâi, si sosten in maniere palês che no si riten plui necessari un ent politic di programazion e coordenament de e pe mont; cu la conseguence che i centris des decisions si spostaran simpri di plui viers Regjon, Provincie e agjenziis teritoriâls controladis in maniere direte di Triest a traviers la disposizion, o la no disposizion, dai finanziaments, in barbe ai principis di autonomie e di decentrament, tant spampanâts a peraulis soredut de potent Leghe Nord. Inmò, se e je vere che lis entitâts publichis o publichis-privadis che a son presints in mont a son masse, parcè scomençâ la  razionalizazion des Comunitâts di Mont, unics organisims che a vebin une cualchi valence politiche? Parcè smirâ a un disvuedament de democrazie partecipade, “… tal primari interès de utence…” (no citadins, ma… ordenaris utents, sic!), dant dut in man a agjenziis e consorzis che a fasaran riferiment simpri e dome ae Regjon?

    Forsit parcè che chescj consorzis e agjenziis, “lavorant tal scuindût”, no riscjaran di vignî considerâts come inutii “caroçons”? Pussibil che no si vebi vualmade la impuartance ancje pratiche di assegnâ une maiôr resposabilizazion des comunitâts locâls intai procès economics e sociâi che lis rivuardin? Si vûl fâ passâ cheste propueste come une azion che e jentre tal agâr di un plui slargjât disen di politiche riformiste. Nô o sin impen convints che  dut chest  al esprimi intai fats une sorte di drame teatrâl dal trasformisim dulà che si cîr di fâ passâ la esigjence di un maiôr control e di une maiôr responsabilitât dai citadins, come forme di partecipazion democratiche, cu la centralizazion, a livel des istituzions regjonâls e provinciâls, di funzions teritoriâls za di competence dal ent di mont, disvuedantlu in cheste maniere di sens e di prospetive.

    Tal particolâr de Cjargne, la riforme in ogjet e vûl disprivâ di rapresentance istituzionâl e politiche locâl une realtât teritoriâl autentiche sot ducj i ponts di viste, gjeografic, economic, sociâl e storic-culturâl, par ridusile a une sclagne espression gjeografiche, par taiâle a fetis tant che e fos e salam. In fats lis unions dai Comuns che a varessin di cjapâ la volte ae Comunitât di Mont, a son istitûts dabon limitâts sevi dal pont viste teritoriâl sevi sot l’aspiet plui gjenerâl. Ancje la imprometude istituzion di une rapresentance, su la fonde dal numar dai abitants, ai diviers Comuns dentri vie de  assemblee dai sindics, argagn politic e programatic de Union dai Comuns, al palese cemût che il tentatîf  al sedi chel di meti in at un stret control politic e aministratîf dal organisim mediant i Comuns plui grancj, cun Tumieç in teste.

    O valutin in prionte che il meti insiemit il personâl dai sengui Comuns intune uniche struture nol puedi che creâ une decjadence dai servizis, slontanant inmò di plui i citadins des realtâts periferichis de gjestion de cjosse publiche, cence meti tal cont i problemis gjestionâi divignintti dai “super-uficis”. Ancje cun riferiment al significant risultât positîf dal referendum su la provincie regjonâl de Cjargne - Alte Furlanie dal 2004, o sin persuadûts che lis comunitâts de Cjargne a cjataressin convenient un implant istituzionâl di aree slargjade a traviers la istituzion di un ent di prin livel furnît di funzions di programazion e gjestion des politichis economichis e sociâls cu la elezion direte dai propis rapresentants, par une gnove stagjon di politiche alte dai sogjets “delegâts” dai citadins de mont ae aministrazion de cjosse publiche cjatant la fate in cheste maniere ai pussibii difiets produsûts des assembleis di sindics, puartâts dispès a prudelâ interès legjitims, ma ancje  no legjitims, in ogni câs simpri circoscrits.      (stefano nonino - Prc / fabio fabio troiero - Sel / franceschin barazzutti - Moviment Mont / marco lepre)