No je passade cence lassâ il segns la tampiestade patriotiche che è à batût la Cjargne, il Friûl e la Italie interie, inmaneade par celebrâ i cent e cincuante agns de istituzion dal stât unitari. E altrimentri nol podeve jessi co achì a van dilunc a bati, a ogni pît alçât, che o sin no dome talians, ma fintremai "italianissimi". In sumis cussì tant talians che di plui no si po.

    La zornade clou di dut chest davoi e je stade chê di sabide 19 di Març, cuant che a Tumieç, cûr e pont di riferiment de Cjargne tricoloriste al è rivât il president de Cjamare dai deputâts, di Rome, Gianfranco Fini. A organizâ "la fieste" al è stât Renato Garibaldi (un pronevôt dal eroi dai Doi Monts), che al loghe a Çurçuvint e che al è il pont di riferiment di "Cjargne in Moviment", il grup ambientalist di simpri in prime linie cuintri i savoltaments ambientâi, e soredut cuintri la realizazion dal eletrodot Würmlach-Somplât. Ma in chest câs l'ambient nol centrave gran!

    Intune Place dal municipi plene (ma no plene come ai 15 di Zenâr, cun tantis bandieris cu la acuile furlane che a svintulavin) e je stade tirade sù "la bandiere dai trê colôrs", po si à sintût a cjantâ la "Canzone del Piave", "l'Inno della Carnia" e naturalmentri l'imni di Mameli.

    Il discors di Fini nol podeve che jessi patriotic, e partant cetant retoric. La unitât de Italie e je un grant valôr, i furlans a son dai talians esemplârs, il federalisim solidâl al covente. Cun riferiment po al Friûl come tiere di emigrazion, il president de Cjamare al à fevelât de dibisugne di coniugâ solidarietât e imigrazion. "Jessi talians vuê - al à dite - al vûl dî frontâ il probleme di cui che al devente italian. O sin un Paîs che al à cognossût une fuarte emigrazion e cumò o vin a cefâ cu la imigrazion. O scugnin par fuarce tignî cont no dome dal dovê di solidarietât, ma ancje dal fat che simpri di plui in a vignî la nestre e sarà une societât multietniche, divierse rispiet a chê che o vin aes spalis". Peraulis sacrisantis pecjât dome che fintremai chê altre dì pes placis al predicjàs juste il contrari. Par no fevelâ de leç "Bossi-Fini", che e po sei dut mancul che solidâl. Ma si sa che la art de politiche e je chê di savêle contâ. E Fini nol è propite un campion sun chest cont, e si che al à vût un mestri di gale, che si clamave Giorgio Almirante, ma evidentementri il nestri Gianfranco nol è stât un arlêf ae altece, massime di cuant che i è vignude la idee malsane di metisi in cubie cul menadôr di Arcore. Cualchidun al à vût dit che a jerin come il gjat e la bolp de liende di Pinocchio, ma po la cubie, cemût che nus àn contât i gjornâi, e je lade in rotis.

    A chei che a stra-laudin la Italie, ancje se a vessin di  clamâsi   Garibaldi,  si   scugne  pûr  faur  presint cualchi disvantaç che nus è divignût di cheste "sacre union", che par nô e je rivade cualchi an plui indenant, o sei tal 1866. Prin disvantaç: cu la Italie e cul cjapâ pît dal nazionalisim talian, i confins viers tramontane a son deventât simpri plui sierât, e la nestre economie, la economie de Cjargne e dal Friûl e à fat simpri cetant cont sui scambis economics cui paîs dal todesc. No par un câs la stagjon economiche plui floride pe Cjargne, chê des Plêfs e dai palaçs plui biei, e je stade chê dai cramârs e di Linussio. E cuant che ur domandavin ai cramârs cjargnei di dulà che a divignivin, lôr a rispuindevin: "di Schönfeld in Friaul / di Tumieç in Friûl".

    Secont, grant, disvantaç: dôs vueris mondiâls disastrosis, inviadis par "slargjâ la patrie", e che par nô si son tradusudis intun disastri cence avuâi. Muarts, distruzions, miserie, macilis, degrât morâl. Il riscat sun chest cont nol è dal sigûr rivât dai "talianons (sotans dai todescs) de Republiche di Salò", ma dal disdegn, de voie di justizie e di libertât de int, che si è armade e che e je lade sù pes monts a resisti. E achì pardabon la Cjargne e je stade grande, e je stade eroiche. La esperience de "Republiche Libare" e je un alc si straordenari, di dulà che e à aurît ispirazion fintremai la gnove Costituzion, che e ricognòs e e tutele lis minorancis. La int e i partigians che a resistevein in Cjargne si batevin cuintri un concet di nazion, e di nazionalisim, che al mandave la int a muri "tal non de patrie" in Russie, in Grecie, in Albanie in Jugoslavie e ce. Vueris di agression, vueris disgraciadis, vueris che a àn jemplât di veduis e di monuments lis placis di dute la Cjargne e di dut il Friûl. E se o vin vût "le portatrici carniche", o vin ancje vût il spieli dai fusilâts di Çurçuvint.

    A Garibaldi i pandin il concet di patrie che al esprimeve Riedo Puppo (Magari Ancje - La Vite Catoliche / 1983), e che nô o fasìn nestri adimplen: "Ma nô, cemût la pensino? Ce vino di dî su la storie dal patriotisim? O podìn dî nome che e je vere. Anzit, o zontin che i furlans a son, cence forsit, i plui patriots di ducj. Ma no par vie che si fasin copâ in vuere come agnei o parcè che no si ribelin. No. La vuere no centre cul patriotisim. "E alore, la patrie?" si ur domande ai vecjos furlans. "La patrie e je une altre robe; la patrie e je une famee e no comande di copâ. Al sarès come se une famee e comandàs di copâ une altre: che nol sarès amôr di famee, al sarès delit, stragje. Chei che a ordenin di lâ a copâ altre int no san ce che e je la patrie". Cussì a rispuindin i vecjos. "E alore" si ur dîs "Spiegait voaltris ce che e je la patrie!" Jo o ai fate cheste domande a Agnul Padronâl e Agnul mi à rispuindût cussì: "La patrie e je la mê tiere, i miei paîs, la mê int e la storie de mê int, la mê lenghe, il gno popul. No à confins parcè che no po ni slargjâsi ni scurtâsi, juste come une famee".

                                                                                                                                                    (renzo balzan)