San Martin de Tor / St. Martin in Thurn (Bz) - Sabide stade, 29 di Març, e je stade screade a San Martin de Tor, in Val Badie, la gnove sede dal Istitût Ladin “Micurà de Rü”. La fieste de scree e je stade inviade vinars 28 cu la cunvigne: “L’Istitût Ladin Micurà de Rü: passât, presint e a vignî”. A son intervignût denant trat Leander Moroder, Hans Goebl, Marco Forni e Giovanni Mischì sul cont dai “30 agns di ativitât dal Istitût”. Po daspò a àn puartât il lôr contribût Fabio Chiocchetti, diretôr dal Istitût Ladin “Majon de Fascegn” di Vich di Fasse, Giovanni Pellegrini, president dal Istitût Ladin “Cesa de Jan” di Cuel Sante Luzie pai Ladins dal Fodom, Federico Vicario de Societât filologjiche furlane, e Clau Soler de Lia Rumantscha pai Ladins svuizars dai Grisons. Considerazions sul a vignî dal Istitût a son stadis impen davueltis da Ilda Pizzinini, Heidi Siller-Runggaldier, Erwin Frenes e Florian Musnner.

    La cunvigne e je stade tornade a inviâ sabide di buinore cuntune taule taronde sul teme: “Ladinie: passât, presint e a vignî”, dulà che a àn puartât il lôr contribût di ideis Romi Crazzolara, Gerhard Vanzi e inmò Leander Moroder. Dopo gustât si à vude la scree de gnove sede, cu la benedizion dal vescul bons. Wilhem Egger, e i discors di salût de bande di Luis Durnwalder, president de Zonte provinciâl di Bolzan, Florian Mussner, assessôr provinciâl pe culture ladine e Luigi Chiocchetti, assessôr regjonâl pes minorancis linguistichis. La gnove sede si cjate tal centri di San Martin, a pocje distance de viere sede. La gnove struture, oltri al Istitût Ladin e cjape dentri dute une rieste di ufizis e di servizis a supuart de ativitât di promozion culturâl dal grop etnic ladin presint inte interie Ladinie dolomitane.

    Cemût che si à vût iniment denant trat, l’Istitût Ladin di San Martin al è atîf di trente agns in ca. Fondât tal 1977, soredut par mert dal dr. Lois Craffonara, che al è stât ancje il so prin diretôr, rezint cheste incarghe fintremai al 1993 cuant che i cjapà la volte il diretôr di cumò Leander Moroder. La istituzion e à cjapât il non di “Micurà de Rü” (alias Nikolaus Bacher), un predi studiât nassût tal 1789 inte vile Rü a San Ciascian, che tal 1833 al scrivè par prin une gramatiche ladine dal titul “Versuch einer deütsch-ladinischen Sprachlehre”. La particolaritât di chest lavôr e diven de sô impostazion e de vision dal autôr, dispoiade di ogni spirt conservatîf, o sei indreçade ae elaborazion di un ladin adat aes esigjencis dai timps. In fats la idee di fonde e jere chê di elaborâ une lenghe di scriture e di leture unificade par ducj i Ladins des Dolomitis. Par rindi juste apont omaç e memoreâ la personalitât di Micurà de Rü, tal an de sô costituzion, za fa trente agns, l’Istitût Culturâl Ladin di San Martin al puarte il so non.

    Tal so statût l’Istitût Ladin “Micurà de Rü” al met in evidence il fin de sô costituzion, o sei “la pupilance e la promozion de lenghe, de culture, de specificitât etniche e de storie ladine”. Par podê otignî chestis smiris al Istitût a son stadis dadis chestis incarghis principâls: “Studis sientifics de lenghe, de storie e culture dal Ladins des Dolomitis, ancje metint in vore formis di colaborazion cun universitâts nazionâls e forestis, cun istitûts parelis e ents culturâi”.

    Ae lenghe ladine dolomitane i covente une elaborazion lessicâl, che e cjapi dentri i setôrs tecnics come par esempli la lenghe aministrative, ma ancje setôrs de cuotidianitât, impegn chest che ore presint al ven puartât indenant dal Istitût. Dutun in chel si è impegnâts inte elaborazion di vocabolaris che a puedin rispuindi aes gnovis esigjencis. Dut il materiâl metût adun al è computerizât e al po jessi consultât. Daspò une lungje fase di elaborazion e di ricercje al è stât dât aes stampis un Atlant linguistic-etnografic dai ladins des Dolomitis (ALD). Chest progjet al è stât elaborât sot la direzion dal prof. dr. Hans Goebl e al propon un cuadri esaustîf sul cont de situazion de aree linguistiche che si slargje dai Grisons ae Furlanie. Si à inmò dade la poie al progjet di planificazion linguistiche “Spell”, sostignût purpûr dal Istitût Culturâl “Majon di Fascegn” e de ”Union Generela di Ladins dla Dolomites”, oltri che dal Istitût Pedagogjic Ladin. Il prof: H. Schmid, di Zurì, cui “Liniaments pe elaborazion di une lenghe di scriture unificade dai Ladins des Dolomitis”, al à metudis jù lis fondis di chest progjet.

    Oltri a chest, l’Istitût al opare pe difese de culture, de art, dai cjants e pal prudêl di ducj i struments che a puedin zovâ al mantigniment dal ladin scrit e fevelât a traviers i media, publicazions, manifestazions culturâls e cors di formazion. In cheste cente a jentrin lis circje 120 publicazions vignudis fûr par cure dal Istitût, che a cjapin dentri plusôrs aspiets e argoments de realtât ladine come la publicistiche pai fruts, la storie, lenghe, leterature, art, musiche e culture popolâr. Ma soredut e ven publicade, cun cadence anuâl, la prestigjose riviste sientifiche “Ladinia”.

    Di memoreâ al è ancje che dilunc i agns e je stade creade un impuartante biblioteche specializade, che e propon une consistent racolte di libri in lenghe ladine o libris scrits in altris lenghis che dut câs a tratin tematichis sul cont de Ladinie. Dongje a chestis tematichis a ’nd è ancje des sezions cun publicazions par ladin-rumanç e par furlan. Al è par esempli curiôs il fat che in cheste biblioteche si cjatin plui libris furlans se no in cualsisei altre biblioteche dal Friûl.

    In fin no podin dismenteâ che l’Istitût di San Martin, e chest soredut par mert dal dr. Lois Craffonara amì sclet dai Ladins de Furlanie, al promôf contats e rapuarts di colaborazion tra i Ladins des Dolomitis e chei de Svuizare e dal Friûl.

    Naturalmentri cu la scree de gnove sede dut chest grant lavôr nol po che miorâ, e par chest o pandin ai amîs dal Istitût Ladin “Micurà de Rü” i augûrs di buine vore e di grandis sodisfazions de bande de redazion di “Ladins dal Friûl”. (edelweiß)