Une lenghe no à dirit di vivi dome par siervî di scjale a cui che al vûl imparant un'altre: e à dirit di vivi ancje par se stesse, parcè che e je la forme che il spirt di un popul al scuen cjapâ par esprimisi. Al è chest il pont indulà che bisugne intindisi. Par un grumon di int la lenghe e je dome un imprest di lavôr, tant che il lincuin pal fari, il soreman pal marangon, la cjace pal muradôr: si la dopre par fâsi capî in cualchi maniere. Ma par altris di lôr, par chei che a  àn dentri vie plui sensibilitât, plui ricjece di spirt, par chei che a son plui delicâts di bocje, la lenghe e je un mieç di creazion, di perfezion, di bielece. Pai prins une lenghe e val chê altre: ur baste savê chês dusinte o tresinte peraulis che a coventin par dî se si à fan o sêt o sium o frêt o cjalt, par justâ un afâr, par contâ une fufigne da ridi o par fâ l'amôr. Cheste int e je cunvinte che ducj i popui a varessin di fevelâ une sole lenghe e cussì no si cjataressin intrigâts ogni volte che si va dîs miis lontans di cjase. Par chei altris invezit la lenghe e à di vê un grum di risorsis: e à di podê pleâsi, dreçâsi, voltâsi e deventâ dure, mole, taronde, sutile; e à di rispuindi pronte a dutis lis ombris dal pinsîr, ancje a chês plui lizerinis; e à di segnâ lis plui piçulis grispis e coloriduris dal sintiment; e à di vê une peraule juste par ogni idee, une musicalitât adatade par ogni temperament, e à di sei rampide, sclete, coloride o smamide, cjantarine o sorde, daûr che il pinsîr al à dibisugne. E alore il discori di une lenghe sole par ducj i popui dal mont al è un discori cence mani, parcè che i oms no son ducj impastanâts cun chel stamp istès, no àn chel spirt istès, no vivin ducj chê stesse vite: anzit ogni popul al à une sô anime, ogni çocje di int un so mont, ogni nazion une sô storie, ogni regjon un so caratar, un so cîl, un so flât, une sô filusumie di dentri e di fûr, un so nivel di culture e di civiltât.

    Cussì, cui che al capìs pardabon ce che e je la lenghe al pò vê une sole lenghe, parcè che une sole - la sô, chê de sô int e dal so paîs - e pò rispuindi in plen al so pinsîr e al so spirt.

Si puedin imparâ, par lâ atôr pal mont e par tratâ cun int di ogni fate, trente o cincuante lenghis e doprâlis ancje pulît e ae svelte; ma la nestre e je simpri une sole: chê  che  o  doprin par pensâ dentri di nô, cuant che o sin di bessôi; chê che nus jes fûr di bocje, cence savê, cuant che une passion masse fuarte o un displasê o une grande gjonde nus cjapin la volte e no nus lassin plui resonâ; chê lenghe che e je vignude sù de nestre tiere, impastanade cul nestri sanc, tiessude ator dal nestri fogolâr, madressude dal nestri soreli, nudride e spatussade dai nestris viei. Un'altre lenghe e pò jessi plui svelte o plui fuarte o plui disgropade o plui musicade de nestre, ma no je la nestre e no val par dâ vôs al nestri spirt, par incjarnâ il nestri mût di sintî, di gjoldi e di patî.   

 Il todesc al è plui salt e franc, parcè che la int che lu fevele e je plui dure e drete e inferade di nô; il francês al è plui mol o fof, parcè che il temperament dai francês al è plui morbit e mulisit dal nestri; il spagnûl al è plui slavrât e slis, parcè che e je plui vierte e pegre l'anime dai Spagnûi; il sclâf nus pâr plui intuarteât, ma ancje la int che lu fevele nus pâr plui gropolose; il talian al è plui vualîf, articulât e svelt, parcè che i Talians a son plui pronts, plui svelts e ancje plui lichignots e bardelons; il furlan al è come che al è parcè ancje noaltris o sin come che o sin: ruspis e misurâts, grîfs e positîfs.

    E alore, cui che al bandone la sô lenghe par amôr di un'altre al mostre di no savê ce che e je la lenghe e di doprâle come che un dalmenâr al dopre il manarin. E se une mari o un mestri a cirin di distudâ la lenghe naturâl di un frut, a tradissin il so spirt e i robin la sô plene forme di espression.

    Fintremai cumò la scuele e à fate simpri cheste biele vore; e il risultât al è che la plui part di noaltris no si sa plui ben il furlan e no si sa avonde il talian: Chei plui studiâts no rivin adore di puartâsi fûr cul furlan parcè che a pensin par talian, ma il lôr talian al è dûr, pesant e imberdeât; chei mancul inscuelâts, par no semeâ clostris, a inturbidissin il furlan e no san spiegâsi par talian, cussì a messedin chel e chel intun zuf che al fâs ridi i claps. Ma par cheste reson il talian nol mûr, che a son in tancj e cun tancj mieçs a tignîlu vîf: al mûr il furlan che, in sostanzie, al è un lengaç dificilot e nissun lu coltive, nissun lu uarde dal bastardâ. E la scuele, daspò dut, e à la colpe plui grande di chest discjadiment.  (josef marchet - test tirât fûr da “Ce Fastu?” - A. XXVII-XXVIII, 1951/1952)

Mai - La sagre de Sense (*): Sante Gnèis cussì bessole fra lis mons/ cui s'impense mai di te, mute e lontane?/ Une sole volte ad an la tô cjampane/ nus riclame duc' lassù cun quatri glons./ Cu la prime lûs dal dì, quan'che la buere/ fine fine si rinfres'cje 'tal bagnùm,/ preidi e muini e qualchi frute, plens di sium/ a partìssin incjocâz di primevere./ 'Tor lis vot a pâr ch'a sèi 'ne prucission/ di furmìis ch'a vadin sù: la canajute/ dal paîs e da campagne a jé là dute/ o sul prât o su pai crez o 'tal gravon./ Plui tardut a son personis d'ogni sorte/ che, par vie da tentazion ch'a je tant grande,/ da zornade ch'a è tant biele, d'ogni bande/ s'invìin sù, cu la merinde in tune sporte./ Ma il demoni al à di meti, ch'a si sa,/ la sô grife malandrete da par dut:/ sot' ne cise a morosà cul so gjalut/ a è la solite polece: ve le là! 
 (pre Bepo Marchet  - dal Lunari Parochiâl di Glemone pal 1945)  (*) Il dì de Sense si faseve fieste a Sante Gnèis in mont

Nô o crodìn che in chestis prosis, in chestis perlis di leterature, Luzio Peres al dedi  une dimostrazion, denant trat di un biel scrivi par furlan, e po di spieli di vite sclete de nestre int, cuant che e jere inmò contadine, cristiane e adimplen insedade tal ambient dulà che e viveve. Vuê, magari cussì no, dut si è complicât, dut si è imberdeât, dut al è faturôs e il furlan, aromai pôc contadin e pôc ancje cristian, al stente ridi, co al à pierdût il fîl di chê filosofie dal vivi che e jere stade la sô fuarce, e ancje la reson de “sô resistence”, tai timps intrigôs de sô lungje storie. Se o podessin meti une spaltade tra chescj doi monts, la metaressin tal 1976, l'an dal taramot, vadè che a son passâts dome trente agns, ancje se a semein trê secui.

    Inalore “scrusignant” tra lis contis di Luzio si indalegrisi il cûr, al semee di jessi sentât su la bancje ret il fogolâr a scoltâ il von di cjase che nus conte lis sôs storiis. Storiis cence malizie, ma istès gjubiâls, sorants e plenis di bogns insegnaments. Luzio Peres nol è Riedo Puppo, ma di Puppo al à un ciert stîl, une cierte ande, une cierte creance. Il gust di contâ dal Friûl e dai furlans. Cussì chestis prosis di Luzio si lein, e si tornin a lei, cun gust par vie che a ricuardin la storie dai nestris paîs, lis vicendis de nestre int, i siei sintiments, la gjonde e ancje il marum di une tiere e un popul che par nô a son i miôr dal mont.

    Cun di plui, chescj elzevîrs nus dan purpûr l'ocasion par rifleti su la nestre realtât di cumò. Sul Friûl di vuê scombatût jenfri lis resons che a jerin, chês che a no son plui e chês che no son inmò. Ce isal il Friûl par un che al vîf in dì di vuê: dome un pês di agns insiemit? Dome un non? Un batiment di cûr? Un salustri pal avignî o ce? Se il Friûl al è gambiât o se al sta mudantsi, isal pal miôr o pal piês? Chest al è il glimuç di domandis che leint il libri di Luzio Peres nus ven tal cjâf.