(Al ven indenant dal numar di avrîl) Il probleme de capitâl. Cheste sudizion si à podût inmò tocjâle cun man cuanche te unanimitât , sul cont dal aboç di gnûf statût, si à volût tornâ a confermâ che il cjâf lûc de regjon al è Triest. Ancje chest al è un dogme cence fondament. Che Triest i tègni a jessi capitâl al è naturâl, pai grancj vantaçs simbolics, politics e economics che chest al compuarte. Che ancje i furlans a vebin acetât chest dogme (fale i leghiscj che a proponin un referendum popolâr pe sielte dal cjâf lûc) al merte cualchi riflession critiche. Al sarà, ancje achì, l'ordenari istint di conservazion e il fastidi pes propuestis inovativis. A saran i pinsîrs pai coscj di trasferiment dai uficis e des aulis. Ma sore il dut al esist, o crodìn, il dogme che la capitâl e scugne coincidi cu la citât plui prestigjôse, grande, ricje. Si lu à sintût a ripeti plui voltis, ancje intant des resintis discussions su la "soversive" propueste Disetti di puartâ il cjâf lûc a Udin. Al è un dogme che al diven di une tradizion plurimilenarie (lis citâts-Stât, lis capitâls dai imperis e dai Stâts centralizâts). Ma e esist ancje une tradizion alternative, moderne, che e diven de concezion liberâl-democratiche e federaliste de politiche, ossei che i cjâf lûcs a son realtâts di servizi, di logâ in posizions neutrâls rispiet aes diviersis components dal teritori; pussibilmentri in posizion centrâl. Cjâfs lûcs a puedin jessi citâts secondariis o tiradis sù di pueste par cheste funzion. Ancje in Europe o vìn vût esemplis di cheste sorte: L'Aia, Bonn. Ma il model al è une vore slargjât tai paîs di culture e struture politiche federâl: Washington, Ottawa, Canberra, Brasilia, Gnove Delhi, Islamabad e vie dilunc. Dentri vie dai Usa, dutis lis capitâls dai Stâts a son di cheste sorte. Parcè, une volte tant, no impuartâ cualchi cjosse di bon? Parcè, se propi si vûl l'unitât de Regjon, no si domandie che almancul la capitâl e sedi logade in mût plui rispietôs de dignitât des sôs components; che a sedi plui a puartade di man di ducj? Rispueste: parvie che il Friûl nol à une cente sorestante in podê di fâ i interès de int, o sei dai furlans. Parvie che Triest e je rivade a sminuçâ il Friûl intun indefinît "pastiel istituzionâl" di clientelis.   

Âtris temis. Cetancj âtris temis a saressin di frontâ a sostegn des tesis che l'unitât de Regjon cun capitâl Triest e je incompatibil cu la sorevivence dal Friûl. Si varès di dibati de funzion che te dissipazion dal Friûl al à il concet di Vignesie Julie che, purpûr rapresentant il 5 % dal teritori regjonâl, e ocupe il 75% dal non; che, no jessint mai stade definide tai siei confins, e pò jessi slargjade cence cognossi slaifs, a dam dal Friûl. Un non che al jere stât inventât a prudêl di rivendicazions nazionalistis e imperialistis, che al à saborât la prime vuere grande e inviât i svindics che, daspò la seconde vuere grande, a àn puartât ae propie disparizion di fat, fale il piçul coredôr di Cjars sloven di Savogne a Doline.

    E sarès po di scrutinâ la funzion davuelte dai media. De sede Rai di Triest, che in mîl manieris e saponte  la  centralitât  di  Triest  zovant  cetant    ae disgregazion dal Friûl, par esempli a traviers l'ûs sistematic di indicazions gjeografichis come "isontino", "pordenonese", "destra Tagliamento". Ma ancje tai gjornâi di chenti, che si son dispartîts il Friûl in centis disseparadis, in mût che i letôrs di ognidune des trê provinciis a savedin pôc o nuie di ce che al sucêt ta chê âtris e aduncje a svilupin cuadris mentâi, interès e identitâts disseparâts.

    Al coventarès purpûr rifletût su cemût che il mont de culture al sedi stât infeudât e condizionât ai interès regjonâi-unitaris, cu la politiche inviziade dai contribûts. La plui part de culture (storiografie, ricercje, leterature locâl, musiche, teatri, spetacul e vie dilunc) in Friûl e vîf di sovenzions che, in maniere direte o indirete, a divegnin de Regjon e di elementârs regulis di buinis manieris, ma ancje di prudenzie, che a consein di no muardi la man che slungje il vues.

    In particolâr al sarès interessant viodi cemût che fintremai il studi e la promozion de lenghe e de culture dal Friûl a puedin siervî ae cause de unitât regjonâl. Inviulâ i inteletuâi furlans e furlaniscj a ocupâsi, cun fonts regjonâi o nazionâi, di lenghe, di leterature, di storie, di tradizions, di folclôr al è ancje un mût par disviâ lis energjis inteletuâls viers centis limitadis, di pôc costrùt, cence medole politiche. In sociologjie critiche, cheste e jere cognossude come "tolerance repressive".

    Conclusion. Cetancj âtris aspiets a varèssin di jessi ogjet di riflession; a scomençâ di chel economic. Al è pussibil dâ di viodi che l'unitât regjonâl e compuarte la jentrade a Triest di un grum di risorsis che pal Friûl no compuartin nissun benefici. Al baste pensâ al cost de machine regjonâl, cui siei doi tierçs o trê cuarts di dipendents triestins. O al cost des numerôsis istituzions sientifichis triestinis, finanziadis dibot fûr par fûr dal Stât talian, cence che si vebi nissun tornecont sul teritori furlan. O a vantaç di cui saressino lâts i scuasit mîl milions di euros dal Expo, se Triest e fos rivade a vêju. O  ce tornecont varano/varessino in Friûl la fulugne di miliarts che a coventin par puartâ a Triest l'alte velocitât. Ma chestis analisis a domandin une vore di plui spazi.

    Cumò o scugnìn rivâ insomp. In struc, la costruzion de Regjon unitarie cun capitâl Triest e à compuartât, par dibisugne logjiche, il fruçonament dal Friûl. La regjon si è infuartide te vite di ogni dì e te cussience de int. Ancje i "furlaniscj culturâi" le àn acetade. Dome un piçul grup di ustinâts autonomiscj al domande che, dentri vie de regjon unitarie, e sedi permetude cualchi minimâl forme di rapresentance dal Friûl. Dibot nissun al rive a imagjinâ  cualchi cjosse di difarent. Scuasit nissun al domande la sengule operazion che e pò sigurâ la sorevivence dal Friûl, ven a stâi la disseparazion di Triest. Se li cjossis a restin cussì, il Friûl al è bielzà consegnât ae dismenteance de storie. Al restarà dome come ogjet di studis di antigae, come pipinot folcloristic, come curiositât turistiche. (raimont di strassolt)