Dieç di Tumieç - Ta chest  2004 a còlin juste i mîl e sietcent agns dal martiri di San Florian di Lorch, un sant cetant venerât in plusôrs sîts da l'Europe di mieç, oltri che titolâr de antigne e impuartant Plêf di Dieç, parsore Tumieç.

    Florian, militâr dal esercit roman e guviernadôr dal Noric Ripens, copât te dade des grandis persecuzions inmaneadis da Dioclezian e Massimilian tal 304, al è il prin martar documentât e venerât in Austrie. La Glesie furlane, che si rifâs a la tradizion di Acuilee, par memoreâ l'aniversari dal so martiri cun manifestazions culturâls e spirituâls di alt nivel e di innomine internazionâl, 'e à ricognossût in Dieç la "capitâl" europeane dai acjadiments proviodûts dilunc il 2004 e metût adun il Comitât di San Florian, cu l'incarghe di progjetâ lis manifestazions in contàt e colaborazion cu la Diocesi di Linz, la Badie di St. Florian in Alte Austrie, la Soreintendence pai bens culturâi dal Friûl, l'Oborösterreichische Landesmuseum di Linz e la Deputazion di storie patrie dal Friûl; dut chest in leam e cul patrocini des instituzions locâls (Comunitât di Mont, Provincie e Regjon) e cjapànt dentri ancje l'Union Europeane e la sede arcivescovîl di Cracovie, dulà ch'e je custodide la relicuie dal Sant.

    Il moment fondamentâl des celebrazions e sarà la mostre che si vierç vinars 30 di avrîl alì des Cjase des esposizions, ch'e à par titul " Florian - Puint di art e fede tra i popui d'Europe", ch'e restarà vierte fintremai ai 30 di setembar cu ven. Ta cheste mostre si puedìn amirâ un centenâr di preseôsis oparis d'art divignints da  Viene, Strasburg, Norimberghe, Florence, Lubiane, Praghe e di cetancj âtris sîts. La rasegne, curade da Josef Bergamini e da pre Alessio Geretti, e propon circje cent oparis d'art tra cuadrelis di len pituradis, sculturis simpri di len, tele, aurs, codiçs, firmadis da grancj artiscj sicu Albrecht Altdorfer, Albrecht Dürer, Cesare Vecellio, Michael Parth e Michael Pacher.

    Dutcâs pa l'an di San Florian si è lavorât a diviers âtris cjapitui.   Tal mês di utubar stât un grop di archeoligs al à curât, sot la guide de Soreintendence, une campagne di sgjâfs tai contôrs de Plêf di San Florian, ch'e à dât di viodi impuartants svilups. La Plêf stesse, tesaur di art e di fede, e je stade ogjet di un sistematic ristaur, in mût di presentâsi in dute la sô bielece par chestis manifestazions dal 2004.

    Cuindis  studiôs,   tirâts  adun  a  Tumieç  in    tune cunvigne internazionâl su la figure dal sant di Lorch, su la storie, la religjon e l'iconografie a lui leadis, a àn elaborât e presentât i risultâts des lôr ricercjis. Inmò diviers studiôs a son stâts contatâts par publicâ un test sientificamentri curât su la storie e sul patrimoni artistic de Plêf di San Florian, compagnât da un Cd dulà ch'al è stât ricolt il repertori liturgic-musicâl de stesse, centant origjinâl, fintremai a vuê trasmetût a vôs di cantôr in cantôr dilunc lis etis dai fedêi di Dieç. Ma ancje i fruts a varan la lôr part tal valorizâ chest depuesit di memoriis, ch'a cuistaràn la forme di contis in lenghe furlane inricjidis dai dissens di un innomenât inlustradôr.
  

    A son proviodûts purpûr moments d'incuintri e di gimulaç cun delegazions de Badie di St. Florian, de citât di Linz e de citât di Lorch, in Alte Austrie - la tiere dulà che si davuelgè il martiri di Florian -, come ancje cul gardenâl di Cracovie ch'al fasarà il don di une relicuie a la Plêf cjargnele. Il dut integrât da un program fìs di apuntaments di teatri e di musiche, che dilunc l'istât dal 2004 a fasaràn di riclam sevi pai passionâts d'art che pai turiscj.

    Cemût ch'al à vût mût di sclarî intant de presentazion de mostre il president dal Comitât di San Florian, bons. Agnul Zanello : "…la Plêf di San Florian di Dieç e je un zojel dal secul otâf. O vìn decidût di celebrâ l'an dal diesim-setim secul dal martiri di Florian parcè che la sô figure come esempli e come stîl di fede cristiane, 'e à dât forme e direzion a la civiltât e a tancj popui dal L'Europe di Mieç". In sumis une ocasion di incuintri e di confront che a traviers Dieç e smire a fâ cognossi centant avignî ch'al è tai nestris paîs, parcè che si è periferie dome dulà che si decît di jessilu e di restâ. L'an di San Florian al vûl duncje rapresentâ ancje un simbul pe Mont Furlane, segnant la trate che ogni comunitât 'e à di cjapâ par meti in zûc ce ch'e possêt e jessi protagoniste di une stagjon di rinassince e di interculturalitât.

    Impuartant e je stade ancje la sielte de date dai 30 di avrîl par screâ la grande mostre, parcè San Florian al è un sant che nus coleghe a l'Europe e a chei   Paîs che propit a cjaval tra il 30 di avrîl e il 1 di mai a jentraran a fâ part da l'Union Europeane. In sumis, un mût significant par celebrâ chest acjadiment straordenari par une tiere, la Cjargne, ch'e à bisugne di jessi prudelade no dome sot l'aspiet economic, ma ancje culturâl.             (von zercläre)

    Daspò la prime pusitive esperience dal 2002, al è tornât a vignî fûr tal mês di dicembar stât il secont fassicul dai "Cuadêrs di Culture Cjargnele", simpri par cure dal cors di "Lenghe e Leteradure Furlane" da l'Universitât de Tierce Etât de Cjargne, ma cheste volte in colaborazion e cul fondamentâl jutori finanziari de Comunitât di Mont de Cjargne. Come il prin, ancje chest secont cuadêr al è dividût in tre parts: te prime part a son cjapadis dentri sîs contis de poete e scritore native di Darte, Gjne Marpillero, la traduzion par furlan des stessis contis e une note biografiche su l'autore.

    Te seconde part o cjatìn la prose "La chiargnelle da l'avout a Sant Antoni" ; une conte curte di Zuan Gortani (1830/1912), la traduzion par italian de stesse prose e une note biografiche su l'autôr. La tierce part in fin e cjape dentri poesiis e prosis dai arlêfs ch'a frecuentin il cors.

    Lis contis di Gjne Marpillero a son stadis tiradis fûr de ricolte "Storie di cortile e di corriera", publicade tal 1989 des "Edizioni dello Zibaldone". Cemût ch'e sclarìs te jentrade l'autore "cortile e corriera" a son peraulis di int povare e scuasit dal dut disparidis dal fevelâ cumun. Cumò al è il zardin e  la machine. Il zardin de vilute di famee , l'automobil slusìnt, potent, plen di furniments. Dôs testemoneancis dal benstâ slargjât, cetant di preseâ ma cence storie. Curtii di condominis, sclagns, vueits, dulà che ai fruts ur ven improibît fintremai di zujâ. Pullman superturistics cun int sentade cidine daûr a veris simpri sierâts parvie da l'àrie condizionade e de musiche ch'e sunsure cence padìn a traviers autoparlants logâts sorevie il cjâf.

    Duncje o scugnìn jessi agrâts a Gjne Marpillero che cun chestis sôs contis e je stade buine ti tornâ a memoreânus curtii e corieris dai timps passâts, dulà che la int si cjatave, e viveve, e sgambiave peraulis, pinsîrs, esperiencis. Dulà ch'a nassevin afiets, opûr si pierdevin, dulà i dolôrs e lis gjondis e podevin cjatâ comprension e partecipazion tune Cjargne che aromai no esist plui. L'autore par rivâ a chest risultât 'e à naturalmentri fat ricors ai  ricuarts depuesitâts te sô ment e tai siei vôi dilunc une vite vivude a contat cun cjossis e cun  personis che vuê si ur darès pôc valôr, ma che invezit a son la trame e l'urdidure di une tele necessari a capî ancje i contôrs. Esemplâr sot chest aspiet e je la conte titulade "La coriere", publicade justeapont in chest cuadêr.      

 

    La seconde part dal cuadêr, cemût che si à vût iniment denant trat, e propon une prose di Zuan Gortani. Gortani, avocàt, passionât de storie, de lenghe furlane e des tradizions popolârs al jere nassût a Davosâs di Darte tal 1830. Lis sôs contis, interessantis ancje sot l'aspiet de grafie ch'al doprave, a àn une urdidure popolâr e une ande vualive, juste  adatis par jessi contadis tes filis d'unviêr dongje il fogolâr. Chê publicade in chest secont cuadêr "La chiargnelle da l'avout a Sant Antoni" , e pant lis vicendis di mestri Simon e de sô femine done Sabide, che partîts di Lorençâs di Tumieç a van jù, naturalmentri a pît, a San Antoni di Glemone par disfrancjâsi di un avôt ch'a vevin fat a l'ocasion de diluvion dal 1851. Une prose vivarôse, umoristiche, ma ancje di colôr e di abient parvie che nus conte cemût che si davuelgèvin in chei agns i piligrinaçs ai santuaris.

    Di sotlineâ ancje che Gortani, che si laureà in leç a Padue tal 1853 e al fo sindic di Darte e conseîr provinciâl, s'interessà di art, di archeologie e di storie locâl, tant ch'al lassà un interessant archivi di documents sul cont de realtât cjargnele. Par chel che s'inten la sô produzion leterarie, al colaborà a "Pagine Friulane", dulà ch'al publicà, oltri a diviersis contis, ancje "Lis istoriis dal Palladio". Al colaborà purpûr, insiemit cul cusìn Luîs, a la redazion de "Guida della Carnia", tierç volum de "Guida del Friuli", publicade a Udin tal 1898.

    In fin te tierce part dal cuadêr a son publicadis contis e poesiis di  Renzo Balzan ("Tune sere d'unviêr", "Primevere a Tumieç"), Tiziana Bellina ("Il permès di Teu"), Ada Brovedani ("Dongje il cûr e tal cjâf", "E je rivade la nêf"), Ettore Carbone ("La coriere di Tavoscs"), Ermelinda Danna ("Norio das Norias - da una lienda cjargnela") e  Maria Grazia Dereatti  ("La Marantule", "Invier", "Atoms di pâs").