Tant par cambiâ i problemis ambientâi a restin simpri in prin plan inte nestre Regjon. O scomencin cu la vicende dal storic “Troi dal piligrin” de Mont Sante dal Lussari/Luschari/Višarje, dulà che parsore si vorès realizâ une piste schi. In chest câs a vuidâ la proteste al è bons. Dionisi Mateucig, plevan di Cjampros/Seifnitz/Žabnice e retôr dal innomenât santuari de Madone. Il biel al è che su chest progjet al jere stât decretât il vincul de Sorintendence dai bens e des ativitâts culturâls. Ma il sindic e la Zonte dal comun di Tarvis si son sintûts in dovê di fâ ricors cuintri cheste no banâl decision. Cussì bons. Mateucig, cjapade la pene in man, al à denunziât cemût che cun cheste decision il sindic Carlantoni si è metût de bande de speculazion turistiche e cuintri des miârs di fedêi furlans, slovens e todescs, che ogni an a frecuentin il santuari su lis olmis dai basavons e dai vons che dal 1360 in ca a van sù sul Lussari. E inmò cuintri i trê mil valcjanalês che a àn firmât la petizion dal Comitât che al vûl tutelâ e mantignî il Troi dal piligrin. Al merte inmò sotliniât che pe difese dal Troi si son pronunciâts ancje i vescui slovens, in considerazion ancje dal fat che la maiorance dai piligrins che a rivin sul Lussari a divegnin des diocesis di venti là.

    Di Tarvis o stralozin a Monfalcon, dulà che plui di cualchidun al è persuadût che ae fin e vignarà realizade une centrâl nucleâr pe produzion di energjie eletriche. Sun chest cont cualchidun al fâs pretatiche. Chest cualchidun al è naturalmentri il nestri president de Zonte regjonâl Tondo, che si è juste apont riscjât a anunziâ che la Regjon e jere interessade a une partecipazion pal dopleament dal implant nucleâr sloven di Krsko. Pecjât che l’aministradôr delegât di Enel, Fulvio Conti, al vebi ribatût che la Slovenie no à nissune intenzion di coinvolzi il Friûl-Vignesie Julie tal dopleament de centrâl vude iniment denant trat. E viodût che Formigoni e Zaia a àn bielzà dite un no ferbint al nucleâr in Lombardie e in Venit, al è di spietâsi, sun chest cont, un clâr pronunciament di Tondo prime di cjatâsi a scugnî cjapâ at di decisions imponudis di Rome. In rivuart al è ben che i sorestants e sepin che la lote cuintri “il palaç”, che al varà cûr di cedi al diktat di Rome, e sarà dure e cence sconts di nissune sorte.

    Il tierç front di lote pe difese dal ambient al rivuarde la realizazion des cussì clamadis cassis di espansion sul Tiliment, decision contestade di cinc comuns (Spilimberc, Ruvigne, Dignan, San Denêl e Pinçan) e di vincj mil firmis. Francje Pradetto, puartevôs dal Comitât “Insiemit pal Tiliment”, che e à cjapât sù 13 mil firmis cuintri lis cassis (chês altris 6 mil a son stadis racueltis de associazion “Aghe”), e sclarìs: “La Regjon no po cumò pensâ di decidi in cuatri e cuatri vot dome parcè che no son bêçs di spindi. O ricuardi dome la grande cunvigne che za fa doi agns e à puartât a San Denêl esperts internazionâi di inzegnerie idrauliche, che a àn dimostrât che chestis oparis no varessin zovât dibot a nuie e che a ’nd jerin soluzions alternativis plui valents e mancul di dam pal teritori. Il Tiliment, al è stât sotliniât plui e plui volti, al rapresente un ecosisteme unic tal so gjenar inte interie Europe”. Ancje in chest câs lis associazions ambientalistis a restin in vuaite e non intindin molâ.

    Naturalmentri al reste simpri momentôs il probleme de centrâl idroeletriche di Somplât. Edipower, societât proprietarie de centrâl (e à comprât l’implant di Enel, ancje parcè che la Regjon e à crodût ben di lavâsi lis mans), e à presentât un progjet pal dopleament de centrâl che al proviôt la costruzion, dal bacin di Verzegnis a Somplât, di une seconde galarie in pression e la instalazion di dôs turbinis, che a varan di produsi energjie di dì, mentri di gnot a tornin a pompâ la aghe tal bacin superiôr di Verzegnis. Al è evident che dut chest al compuarte une continue variazion dal livel dal lât di Cjavaç e dal bacin di Verzegnis. Dut chest si tradusarà intun dam ambientâl cetant pesant, soredut par une zone che e sta cirint di puartâ indenant dai progjets di valorizazion turistiche dabon interessants. Par chestis resons i Comitâts che si batin cuintri la gnove opare a domandin che une decision di cheste sorte e passi pal tamês dal judizi dai citadins dai comuns interessâts (Verzegnis, Cjavaç e Trasâgas). Vadì a domandin che si inmanein dai referendum, di mût che lis sieltis democratichis a cjapin la volte su lis decisions dal palaç, anzit dai palaçs, ven a stâi dai maiorents dai municipis, che a semein masse moi di suste tal confront cun Edipower, une aziende privade che e cîr dome di fâ i propis interès.

    La ultime vertence che o ricuardin e je chê dai eletrodots, in Cjargne e inte Furlanie disot. Ancje in chest câs il tire e mole al semee infinît, tra cualchi salustri e menacis di montafin. I Comitâts a domandin che lis gnovis liniis a vegnin fatis passâ sot tiere, Terna-Enel e va dilunc a bati su la soluzion des entimis, che i costarès une vore di mancul. Massime in Cjargne la soluzion des entimis si risolvarès intun “disastri” pal ambient. No si po vignî a fevelâ di ambient unic e di teritori a alte vocazion turistiche e po permeti cheste sorte di insolencis ambientâls. Se a dut chest o zontin ancje che al è in at un assalt, sfrenât, a chei pôcs riui che a àn inmò aghe pe realizazion di centralinis, il cercli si siere. A chest pont al devente inevitabil l’impegn par une lote continue cuintri “il palaç”, pal salvâ l’ambient, la nestre storie e la nestre culture. Se no a varan reson i nestris fiis e nevôts a dî che o sin stâts egoist, vuarps e sorts, e che par massepassudance o vin svendude la anime al “diaul-profit”. (renzo balzan)