Premesse: il Friûl e je  une nazion a ducj i efiets, cence se e cence ma. Partant e je ore di finîle cu la traine de piçule e de grande patrie. Come che al à vût scrit a so timp Riedo Puppo, la patrie e je come la mari: a ’nd è une sole e fertic. Al è evident che la patrie dai furlans e je il Friûl e inalore vonde alpins, frecis tricolôrs, fraiadis patriotichis e balfueriis tricolôrs che nus vegnin fûr par vôi.

    Nô no sin di chei che a àn la ande di parâle ator, li robis a van di ditis scletis scletis fûr dai dincj e cence nissune pôre. Cjapìn la cuestion de identitât e de culture furlane. Al esist di simpri un nestri mont origjinâl, la cui espression principâl e je la lenghe. Cheste lenghe, rampite come il nestris temperament, fuarte e ruspie e à riscjât di murî cu la vignude dal benstâ e pe mancjance di ogni cualsisei forme di tutele. A l’improvise il nimì al è jentrât in cjase cun ducj i mieçs tipics de colonizazion. E, dutun in chel, al è stât inviât un bombardament psicologjic par fânus capî che la nestre e jere la lenghe puare di une int malderte, la lenghe muarte di un popul daûr a tirâ sù i scarpets e cence avignî. Une lenghe cence dignitât di un popul destinât a disparî. E in cetancj, magari cussì no, si son lassâts convinci e si son talianizâts cuntune imburide tant galopant che a un ciert pont e à tacât a produsi l’efiet contrari. Tal moment plui critic, chel dal taramot dal 1976, i furlans parie cul impegn pe ricostruzion des cjasis a àn vût cûr riscuvierzi i valôrs de lôr identitât, la dignitât des lôr tradizions, la bielece de lôr culture, l’amôr pe propie tiere, che e cjape dentri dut il lôr mont fisic e culturâl e spirituâl. In chê volte o sin stâts bogns di riscatâsi, purpûr cun ducj i dubis e lis contradizions di simpri. O vin riscuvierte la bielece di jessi furlans nô che si tignivin in bon di jessi la vuaite de Italie, disponût ancje a scombati cuintri i nestris amîs vielons, deventâts nimîs pericolôs par colpe de miopie nazionalistiche taliane. O vin, simpri in chê volte, riscuviert la nestre posizion gjeografiche e si sin inacuarts che inte Europe o jerin al centri, cussì come che in Italie o sin confinâts tal cjanton plui lontan e fûr di man.

    Propite di chê autentiche rivoluzion culturâl e je partide la grande bataie par otignî il ricognossiment de nestre divierse identitât etniche e linguistiche. Cui che al à timp e voie che al vadi a cirî intai archivis i numars di chei agns dai sfueis furlans “La Patrie dal Friûl”, “Int Furlane” e “La Vite Catoliche”. Un dibatiment simpri plui fuart, simpri plui convint, simpri plui restîf par rivâ a otignî la metude in vore dal articul 6 de Costituzion (n.d.r. “La Republiche e tutele cun normis di pueste lis minorancis di lenghe”) al puartave finalmentri a un risultât concret inte Sierade dal 1999. Vadì che juste in chei mês il Parlament al faseve buine la leç 482, chê che e tutele lis minorancis linguistichis storichis, e tra chestis naturalmentri ancje chê furlane. A dîle sclete no jere  in fonts une grande leç, ma alc al è alc e nuie nol è nuie. E pesave soredut la premesse dal articul 1: “La lenghe uficiâl de Republiche e je il talian”.

    Cumò dutis chestis bielis sperancis a son daûr a lâ in struc. Il parcè al è daurman displeât: dongje de debolece dal implant de leç al è vignût a zontâsi il ricat dal so simpri plui ridot finanziament. Tal 1999, cuant che e je stade fate buine la leç, il stanziament economic pes dodis minorancis di tutelâ (dibot 3 milions di pesonis, o sei il 5% de popolazion taliane) al jere stât di 20 miliarts di liris (10 milions di euros). Po chest stanziament al è lât simpri plui al mancul. Tal 2008 al jere di a pene 5 milions e 617 mil euros, che par chest 2009 a calin inmò a 2 milions e 274 mil euros. In chest 2009 in Friûl-V.J. a rivaran cussì dome 452.602 euros: 300.672 pe minorance furlane, 135.703 pe minorance slovene e 16.227 pe minorance todescje. Al è evident che o sin in presince di une volontât precise di ridusi la leç 482/99 a un contignidôr vueit, çondar. Cheste e je semplicementri une politiche di eutanasie des minorancis, che cence mieçs economics adeguâts a son destinadis a murî, parcè lis gnovis tecnologjiis di comunicazion a domandin impegns economics significants, e dome doprant chestis tecnologjiis si po sperâ di recuperâ e coinvolzi i zovins in progjets culturâi che a puartin ae tutele e ae valorizazion de nestre lenghe e de nestre identitât. Il rest a son fufignis, fraiadis, piniis e furniments di sagre.

    Ma no je finide achì cheste mareose vicende. Simpri il mês di Mai stât e je rivade sù di Rome la brute gnove che la Cort Costituzionâl e veve “çurpît” un pôcs dai ponts plui significants de leç regjonâl 29/2007, che si proponeve di dâ pratiche atuazion ae leç statâl 482/99, relativementri ae lenghe furlane, cirint juste apont di superâ i problemis vignûts fûr inte aplicazion de normative statâl e di slargjâ lis misuris di promozion dal furlan. La sentence 159/2009 de Cort, clamade in cause da un ricors dal za ministri pai afârs regjonâi Linda Lanzillotta, e à refudât cinc ponts fondamentâi de leç regjonâl vude iniment, volude de zonte di centri-çampe di Riccardo Illy. La Consulte e à dite di no al oblic dai ufizis publics di doprâ il furlan e di meti jù i ats in mari lenghe; no ae ripetizion dai intervents intes istituzions par furlan; no ae pussibilitât di adotâ toponims dome inte lenghe furlane, e inmò no ae ore setemanâl di insegnament de lenghe furlane inte scuele publiche e al mecanisim dal cidinôr-assens. In pratiche il furlan al reste fûr dai ufizis publics e des scuelis dal Friûl. Vadì che o sin in presince di un atac inacetabil intai rivuarts de lenghe e de identitât furlanis de bande dal guvier di Rome.

    La storie no je une idee, une fantasie, une teorie. E je un dât di fat. E la nestre storie, la storie politiche, economiche e culturâl dal Friûl e je mitteleuropeane, dai timps dal Patriarcjât di Aquilee in ca. Furlans la lungje marce par otignî il rispiet dai nestris dirits naturâi e va dilunc! (renzo balzan)

Friûl: un popul, une tiere, une lenghe!