Udin - 1968 / 2008, a son passâts juste cuarante agns di cuant che, denant trat in Europe, e po in dut il marimont, si invià intes scuelis e intes Universitâts une rieste di manifestazions e di contestazions che a varessin cambiade in maniere radicâl la nestre societât. Naturalmentri i fats plui scjassôs a sucederin intes grandis citâts, cun Parìs, Milan e Rome in teste. Ma la buere dal rinovament e rivà ancje chenti. Ancje a Udin i students dal Stellini, dal Malignani, dal Marinoni e dal Ceconi a faserin assembleis, corteus e ocupazions di scuelis. Ma al fo il nestri dut câs un ’68 diviers, par tancj aspiets, e nus al conte juste apont un testemoni diret, o sei Gianfranco Ellero, cuntun articul che al è vignût fûr sul Gazetin dai 21 di Mai stât. Il test, anzit il preseôs document, voltât par furlan de nestre redazion, lu publichìn culì sot vie. (red.)

 
No crodarês, ma i documents a fevelin clâr: la uniche realtât “rivoluzionarie” dal ’68 furlan al fo il risultât des votazions regjonâls dai 26 e 27 di Mai di chel an, che al marcà pôc mancul di trentenûf mil vôts al Moviment Friûl, che a zovarin a otignî trê segjos in Consei regjonâl. Un sucès, sigûr, di cualitât, a judicâ des risultancis che al produsè, ma no di cuantitât, par vie che si tratà di un risultât mai plui avualât o superât intai cuarante agns di daspò.

    Naturalmentri chei vôts e chei segjos no forin cuistâts su lis alis dai slogan di chei timps: “fantasie al podê”, “vietât vietâ”, e vie dilunc, che a tradusevin intes placis i teoremis di filosofs che dibot nissun nol cognosseve (Marcuse, Adorno, la Scuele di Francfurt …) ma ben invezit su la fonde di un program economic e sociâl inovatîf, dulà che di fevelave di emigrazion e servitûts militârs, di svilup industriâl e di difese des diluvions, di autostrade Udin-Tarvis e di Universitât pal Friûl: un program che nol cjatave acet intai programs dai partîts maiôrs, masse leâts al ideologjisim e al model nazionâl, e che al fo ostegjât cun durece dai gjornâi di chenti, adimplen funzionâi al sisteme dal cussì clamât “arc costituzionâl ” (cui sa di cetant timp che ai letôrs no ur capite di lei peraulis di cheste sorte!)

    Fra i fats gnûfs, se no propite rivoluzionaris, o podaressin vê iniment ancje la famose (in chê volte) “Mozion dai predis de Arcidiocesi di Udin”, firmade di 529 predis che e pareve ricalcade sul program dal Moviment Friûl. E inmò i ciclis di conferencis dal Centri Ricercjis e Studis di Marcello De Stefano, Luciano De Cillia e Pier Vincenzo de Vito.

    Ae lûs di chescj dâts o podaressin ancje concludi che no ’nd è stât un ’68 furlan, parcè che la memorie storiche non nus torne a proferî nissun ricuart di manifestazions che a puedin jessi metudis a pareli, sevi pûr ae lontane, cun chês de Universitât di Berkeley, di Parîs e in altris sîts in Americhe e in Europe, ma che no si crodi che achì si vebi dome vualmât ce che al stave sucedint inalgò. E nol è dabon cence significât il fat che propit su “Friuli d’oggi”, imprest di stampe mensîl dal Moviment Friûl fondât tal mês di Març dal 1966, a sedin vignûts fûr doi articui di Bruno Biasutti titulâts “La crisi della famiglia e la società” (Mai 1967) e “Perché mettiamo la scuola sotto accusa” (Jugn 1967), par no fevelâ in fin de fulugne di int presint ae presentazion di un libri dal stes autôr (che si davuelzè inte aule magne dal Coleç Bertoni in strade Antonini, vuê sede de Universitât di Udin), dulà si fevelà cetant de “Scuola di Barbiana” di don Lorenzo Milani.

    Pocje cjosse, a disaran i nestris letôrs. Sì, pocje cjosse, ma nol è dabon pensabil che intune aree margjinâl e conservative come il Friûl, a puedin sucedi lis flamadis dal milieu, e inalore si podarès concludi che in Friûl no ’nd è stât nissun Sessantevot.

    Darest a ’nd è “cjampanis”, in France e in Gjermanie, che a ridusin a pocje cjosse ancje il Sessantevot francês e todesc! Baste pensâ, a scrivin cierts storics, che chel moviment nol à produsût nissun grant inteletuâl e nancje vêrs leader politics. Cohn Bendit in France, Dutschke in Gjermanie, par no fevelâ dal nestri Capanna, si son in fin adeguâts al sisteme une volte che a son rivâts a determinadis posizions di podê. Altris a ribatin che, se no si à vude nissune “prise de la Bastille” (o sei cjapade de Bastilie), si ve impen “la prise de la parole” (la concuiste de peraule, vâl a dî dal pinsîr gnûf).

    In Europe  no si dinee, naturalmentri, il significât dal “Mai francês”, come scuintri frontâl fra podê e societât, fra une societât che no si ricognòs plui tal podê e un podê no plui bon di interpretâ lis gnovis esigjencis de societât, cundut achel e tire arie di ridimensionament par vie che, si dîs e si scrîf, il ’68 nol è rivât a butâ jù il podê di De Gaulle ni a realizâ la utopie libertarie fantasiade dai siei partecipants.

    Personalmentri o pensi che il 1968 al resti un an memorabil, tal mont, e no dome pal Mai francês, ma par une lungje rieste di coincidencis straordenaris, come la gnove crisi dal comunisim che e puartà ae invasion de Cecoslovachie; lis violencis e lis crudeltâts produsudis de vuere in Vietnam; la grande fan de Afriche e dal cussì clamât Tierç Mont… O soi inmò convint che plusôrs riformis sociâls e politichis a forin inviadis e realizadis no par vie che lis prudelarin i “contestadôrs”, cemût che in chê volte si diseve, ma ben invezit parcè che altris a vevin creât, in cidin, lis condizions necessariis. Se, par esempli, o considerin la division dal lavôr par ses, che e obleave la femine ai lavôrs di cjase, o scugnìn dî che e fo superade parcè che a forin inventâts, produsûts e vendûts a presis convenients i eletrodomestics. Avuâls considerazions a valin pe cussì clamade “liberazion sessuâl” e il “control des nassitis”, compuartaments diretementri colegâts ai progrès de chimiche.

    Dite in altris tiermins: a cui i tocje il mert dal svual uman? Ai mitics Dedalo e Icaro, a Leonardo da Vinci o ai costrutôrs de prime machine che e rivà a svualâ, che si avantazarin di une lungje rieste di concuistis paralelis e in aparence distantis dal svual, come la estrazion dai metai lizêrs e la produzion de energjie che e coventave par rivâ a otignî la propulsion?   (Gianfranco Ellero)