Udin - Al sucêt dispès che, pensant a un flum, si fermisi dome a vualmâ il vongolâ gaiart de sô aghe. O cjalin la limpidece e la velocitât des corints, o pinsirin sul cont de sô puartade intes dadis di grant sut vie pal istât, o di plene par colpe des montanis de sierade, o insuazin il paisaç che al à savût modelâ juste il timp par scatâ cualchi fotografie. In sumis, no pensin a un cors di aghe par chel che al è verementri: un alc di vivent vieri di milions di agns, che cul so fluî al permet il seguitâsi di un ecosistem straordenari ric e unît in maniere salde cul ambient e cui oms che lu torcenin. Par rindisi cont di dut chest baste dâ une voglade tra lis pagjinis dal volum “Il Tagliamento”, gnûf progjet editoriâl de Universitât di Udin, nassût de colaborazion cul Circul “Menocchio” di Montreâl e publicât des edizions Cierre di Verone (pp.514, euros 50).

    Di prin intro il libri si presente come une opare destinade a completâ lis competencis di cui che al à bielzà une buine cognossince di materiis complessis come gjeologjie, biologjie o gjermorfologjie. Metude de bande la sudizion iniziâl, dut câs, si rive a capî che il so valôr al va cetant oltri la sclete elencazion dai dâts e des nozions. Pe grande cuantitât di materiâl proponude dai autôrs si podarès cussì definîlu un compendi slargjât, o ben une enciclopedie fotografiche. Il Tiliment, no podin dismenteâlu, si ben che nol po jessi metût a pareli cui maiôr flums europeans par vie de lungjece e de puartade, al reste dut câs un dai cors di aghe plui impuartants in assolût dal pont di viste naturalistic, dal paisaç e ancje storic-sociâl. Ducj aspiet che no son stâts trascurâts inte redazion di cheste opare cundut che o sin in presince di un costant implant sientific sul cont de tratazion dal argoment. I curadôrs, Furio Bianco, Aldino Bondesan, Paolo Paronuzzi e Adriano Zanferrari, a son rivâts a dâ al volum un tai divulgatîf, cjatant vadì un pont di ecuilibri tra il nozionisim e la semplificazion e sapontant cheste sielte editoriâl cuntune slargjade documentazion iconografiche.

    Cheste liende straordenarie e je scomençade za fa mieç miliart agns.  A tant bisugne lâ indaûr par rivâ ae origjin de storie gjeologjiche dal Tiliment. Lant daûr aes tapis dai lents cambiaments che si son dâts la volte, il test al conte la vite di chest flum di frontiere. I oceans, po la formazion des cjadenis des monts, la nassince e la evoluzion dal bacin idrografic che vuê al travierse, dilunc fûr, dut il Friûl. Cheste prime sezion e je juste apont dedicade aes carateristichis e ai elements naturâi che a àn “costruît” il Tiliment.

          Al pericul divignint de instabilitât idrogjeologjiche e fâs di cuintri altâr la grande ricjece di biodiviersitâts che il flum al sa esprimi dilunc dut il so percors: de vegjetazion forestâl a chê alpine, de flore  e de faune lagunâr ae itiofaune des risultivis. Un bacin che si slargje suntune aree di 2 mîl e 600 chilometris e che al rive a possedi “une diviersitât ambientâl che di râr si intive in altris situazions e rindude dibot uniche de posizion gjeografiche dal bacin”, si lei tal test.

    Se il Tiliment, cu la sô seguitive e milenarie opare di traspuart e cumulament des gravis, al à contribuît a discomponi e tornâ a componi la gjeologjie de planure furlane, purpûr o vin vût ancje un rapuart di vicendevul influence cu lis civiltâts umanis che si son dadis la volte su lis spuindis di chest flum.

    Lant daûr dal principi de interdissiplinarietât che e diferenzie dibot dut il volum, inte ultime part la atenzion di ferme su la antropologjie dal flum. Si scrutine cussì il teme dal antîc popolâmint di une aree dulà che il Tiliment si è fat cerniere, linie naturâl di division, element di definizion de identitât coletive. Cemût che il flum al vebi creât, dilunc lis etis, une relazion fuarte cu lis popolazions daprûf, si lu rigjave dilunc ducj i cjapitui di cheste slargjade sezion:  de distribuzion dai podês e dai insediaments de Ete di Mieç ae storie des glesiis che a loghin su lis sôs spuindis, des tratis dai emigrants ai cambiaments de  gjeografie  dulintor produsude des irigazions e des bonifichis realizadis dal om.

    Cemût che al à sotliniât il retôr de Universitât di Udin Furio Honsell inte sô presentazion, “nol esistarès il Friûl cence il Tiliment. Il Friûl nol sarès stât contât di Ippolito Nievo come un “compendi dal univiers”, se nol ves dât vite al Tiliment, e rigjavât vite dal Tiliment. Fevelâ dal Tiliment al è, par chestis resons, contâ il Friûl stes, de gjeologjie ae archeologjie, dai aspiets naturalistics a chei storics, artistics, sociâi e economics”. (von zercläre)