Intai comizis, inte propagande minude e sui sfueis scuasit ducj i autonomiscj nostrans si sbracin a zurâ e sperzurâ che l'ordenament regjonâl “dentri dal cuadri de unitât taliane” nol à di rompi ni di indebolî la tressadure unitarie dal paîs, ma che al à anzit di rinfuarçâle.

    I unitaris, di ogni colôr, no si lassin trop convinci di chestis promessis, sigûrs che il lengaç dai autonomiscj al è nome un spieli pes odulis, un espedient par fâ proselits, par cuietâ i scrupui patriotics de plui part dai furlans e par vinci la partide a Rome.

    O crodìn che i unitaris sul stamp dal avocat Linusse, a vebin reson. L'unitât taliane, come che e je stade imbastide dal ’61 e mantignude fintremai cumò, e je un fat purementri politic, une etichete esteriôr, une robe sfuarçade, une vernîs, une parvence tignude sù di une sole pegnule, chê dal acentrament burocratic e militarist, e nudride cun inizions e scliçadis di propagande nazionaliste. Gjavait il scambi  dal personâl burocratic, di un cjâf a chel altri de penisule; tirait vie lis prefeturis e lis cuesturis metudis simpri intes mans di forescj; tocjait l'ordenament des scuelis cun dute la messedance di maestris e professôrs e cui libris di test severementri controlâts e dumiesteâts “ad usum Delphini”; rompêt la trame o l'urdît des aministrazions incjadenadis al centri; lassait un fregul di respîr aes lenghis e dialets, aes leteraturis locâls, ae culture storiche, demologjiche, filologjiche, artistiche di ognidune des regjons; intune peraule, butait sot i piis chês diretivis segretis che il guvier talian subite daspò l'unificazion politiche al veve buridis fûr ai siei orghins e che la ditature fassiste e veve metudis integralmentri in pratiche, e o viodarês dulà che e va a finî cheste raze di unitât.

    Nol covente fevelâ di autonomiis politichis, di podestâts legjislativis aes assembleis regjonâls; al baste ancje nome un fregul di decentrament aministratîf, une cualchi esclusion dal personâl forest inte direzion dai afârs regjonâi, par butâ cui piis par aiar chest cjastiel di cjarte. Parcè che nol à ni un fondament etnic (come che lu àn la Gjermanie e la Russie) ni un fondament storic (come che lu à la France), ni un fondament gjeografic, ni un vêr fondament linguistic (la lenghe taliane leterarie e vîf nome intes scuelis, tra i leterâts e i impleâts, par ordin superiôr: il popul al fevele, in Italie, almancul cuatri veris lenghis e une infinitât di dialets cetant difarents): al à nome il fondament retoric e vueit di chel concet di nazion, che al è nassût îrlaltri e che al ven strombonât disperadementri des ocjis dal Campidoglio.

          L'unitât taliane, imbastide daspò de mitât dal ’800, e veve di jessi implantade suntun altri teren plui salt, plui sigûr, plui positîf, come che a son stadis implantadis altris unitâts tal secul passât: suntun teren economic, sociâl, realistic, cuntun fregul di inteligjence e di sens pratic, e no su lis peraulis che a son fatis di flât imberdeât tal gargat o intai dincj o intai lavris. 

    La France, la Spagne, l'Ingletiere a puedin ancje vê un nazionalisim parcè che a son nazions, che a àn mil agns di vite e di cussience nazionâl, nassudis in timps cuant che il re, la patrie, l'esercit, la vuere a vevin un valôr, un significât, une sostanzie che cumò no àn plui, madressudis in secui di lotis coletivis, morestadis da provis di ogni fate, induridis e saldadis dal timp e dai aveniments.

    Ma l'Italie no pò simiotâ chês nazions: no pò copiâ di lôr. E je stade metude adun, - par amôr o par fuarce - in altre clime e in altris moments, in mieç di un'altre realtât storiche, di altris dibisugnis, di altris dificoltâts. Invezit di cjalâ l'esempli di chês nazions e veve di tignî di voli lis unitâts gnovis e il lôr implant: magari il Brasîl o il Messic che, par tant diferentis che a fossin lis lôr condizions, a jerin simpri plui vicinis aes nestris che no chês de France dal etât dai Carulins, o chês dal imperi di Dioclezian.

    E cumò, une des dôs: o che si pastane une unitât di altri gjenar su la base di concezions modernis, mandant a trai il pari Enee, la love, lis legjons cuadradis, la leghe lombarde, il “Princip” di Machiavelli, Balilla, i Cjarvonârs e dutis chês fotis; o che in pôc timp, par vie des autonomiis, o par vie dai partîts e des internazionâls o par vie des bombis atomichis l'Italie e sarà nome une espression storiche, come la Macedonie di Filip o l'Assirie di Nabucodonosor o la Turchie di Soliman.

    E chei che a tegnin dûr a pensâ l'unitât di Mazzini o dal Manzoni, “Soffermati sull'arida sponda…” o dal Fas Litori, a àn reson di vê pôre e di fâ profeziis apocalitichis: il lôr idul al è dut carulât e tarmât e al pò fâ tombule di un moment a l'altri.
(josef marchet - Patrie dal Friûl / 1947)

    Disevot agns plui tart, Pier Pauli Pasolini (1922/1975), che, come che ben si sa, sô mari e jere furlane e che al scrivè par furlan lis sôs primis e ultimis lirichis, al metè dentri tal so “Quaderno Romanzo” (Cjasarse 1947; tornât a stampâ in P.P. Pasolini, “L'Academiuta friulana e le sue riviste”, par cure di Nico Naldini, Neri Pozza, Vicence 1994) un preseabil “Fiore di poeti catalani” (pp.10-32). Si trate di une piçule ma penze antologjie, indulà che ducj i tescj par Catalan a son compagnâts di versions talianis in prose. In rivuart ae sielte des poesiis e ae curte note storiche sore la lenghe e la leterature catalanis, Pasolini al podè vê il jutori dal professôr catalan Carles Cardò, che al insegnave in chê volte inte universitât catoliche di Friburg in Svuizare.

    La poesie catalane moderne e je avonde cognossude in Italie, la nazion che e pò svantâsi  di un biel trop di catalaniscj di sgrimie. Ricjis antologjiis talianis di liriche catalane dal Vot e dal Nûfcent lis àn dadis dongje C. Giardini (1950), L.B. e J.R. Wilcock (1962), G. Tavani (1968) e G.E. Sansone (1979). Cundut achel, plusôr poesiis che Faggin al voltât e metût dentri in chest libri, doprant la sô grafie, no jerin mai stadis voltadis in lenghe taliane. Lis lirichis a son opare di Jacint Verdaguer (1845/1902), Joan Maragall (1860/1911), Guerau De Liost (1878/1933), Carles Riba (1893/1959) e Salvador Espriu (1913/1985).

    Ve achì une des poesiis di Jacint Verdaguer, predi e poete catalan dal Votcent,  titulade “ ’L è un libri il gno cûr…”: ’L è un libri il gno cûr/ cun pàginis d'aur;/ in dutis lis pàginis/ peraulis d'amôr:/ la mistiche pene/ lis scrîv dal Signôr./ ’L è un'arpe il gno cûr,/ d'arint i cantìns;/ ju točhe l'amôr,/ lui sôl a' ju sint;/ ce danzis tas dolcis,/ incolmis di ben!/ ’L è un agnul il cûr/ sbandît ta la int;/ co a čhantin il Glorie,/ al gem e al rispuind/ subìt ch'al calume/ i amôrs di lassù.

La schede: . Ğ Faggin (traduzion par cure), Flôr di poets catalans, Ed. Clape Culturâl Acuilee, Udin 2006, pp. 45