Al è vignût fûr za fa cualchi mês il libri “Usancis e Cronichis de Patrie dal Friûl”, di Renzo Balzan, stampât par cure dal editôr Chiandetti di Reane. Si trate di une racolte di tradizions popolârs e di vieris cronichis dal Friûl, che l’autôr al à disponût secont un ordin che al va daûr al davuelzisi dal an e aduncje al intercalâ des stagjons. O sei si scomence cul lis tradizions di Pifanie e si rive insom cun chês dal timp di Nadâl. La impostazion e il stîl de scriture a son chei dal saç gjornalistic.

    Renzo Balzan, che al firme i siei scrits ancje pseudonim di Edelweiß, al è nassût a Felet di Tavagnà tal 1943. Dal 1966 in ca al vîf a Tierç di Tumieç, in Cjargne. Gjornalist publicist dal 1983, e scritôr, al firme la riviste “Gnovis Pagjinis Furlanis”, publicade de Union Scritôrs Furlans, e il nestri periodic-mensîl “Ladins dal Friûl”. Al à inmò colaborât cui sfueis furlans “La Patrie dal Friûl”, “La Vita Cattolica”, “Il Friuli”, “In Uaite”, “Int Furlane”, “Asout Geats” e “L’Alto Adige” di Bolzan/Bozen. Di plusôrs agns in ca al sta colaborant cu “l’Agenda Friulana” publicade dal editôr Chiandetti. Dal 2000 in ca al sta curant la trasmission di culture e informazion in lenghe furlane “CuintriCjargne”, che e va in onde su TeleAltoBût di Paluce. Dal an academic 1999/2000 al ten sù il cors di “Lenghe e Leterature Ladine Furlane” de Universitât de Tierce Etât de Cjargne, e al cure la publicazion dai “Cuaders di Culture Cjargnele”, editâts de stesse UTE. Fintremai a vuê al à publicât par furlan tredis libris e vinçût i premis leteraris “San Simon” di Codroip, “Friûl” di Radio Onde Furlane, “Cortina“ (in lenghe ladine), “Glemone: îr, vuê e doman” di Glemone e “Le Pigne” di Scluse.

    Un an dilunc fûr, di Pifanie a Nadâl, de nêf de vierte ae nêf dal unvier chestis pagjinis a van, cjariadis di uman e di poesie, a sgarfâ tal font platât, a rompi il cidinôr di vôs pierdudis, a vierzi lis pletis di un timp restât imbramît di revocs, jenfri lis pieris di cjasis vieris, flât antîc fer sun chel fîl lizêr che al côr inmò di von in nevôt, li li par crevâsi cuntune soflade, leam e musiche che a tegnin adun storie di îr e tradizions che si son conservadis fintremai a vuê, par meracul, par cui che al crôt.

    L’autôr al bute il clap inte aghe nete dai secui indaûr de Furlanie e il cori dai cerclis al fâs trimâ il spieli di planuris e cuei, di valadis e di pichis des monts intun alc di misteriôs, tra vite e muart, vite se si vûl, muart se no si vûl.

    Renzo Balzan, scritôr e gjornalist, al lee passât e avignî cul sens inmagant di chel pierdisi di umanitât che nol da pâs se no lassant cuietâ la anime tal sfuei blanc che al divente libri no dome, ma ancje memorie, document. Chestis pagjinis su la Patrie dai furlans, su lis sôs liendis, sui siei personaçs, a son gnove e no ultime testemoneance dal impegn, de dibisugne di ricreâ une flabe che e va smavint di lusôr e inneantsi inte fumate dal imens misteri dal passât, pierdintsi par trois rivâts ai ultins volts, dulà che si vierç il frêt clap dal materialisim moderni, sedi pragmatisim di vite sedi marcjât di dut, consumisim che al sbelee tal anime. No lassâ murî al è impegn dal scritôr e dal volê ben. Un impegn che al va par stradis che no si sa, cu la fuarce dal amôr, cu la braure de onestât inteletuâl. In sumis une testemoneance di prose scrite in ponte di pene, par capî, par fâsi capî; un jessi pal passât e tal presint.

    Pagjinis e contis e pinsîrs si zontin e si messedin, ma l'argoment al è simpri un: cheste tiere, dulà che si fuarts e dispès di bessôi, dulà che intes montagnis si ingrumin liendis antighis e gnovis, nassudis par biel contâ e par induvinâ l'avignî intai rituâi de sperance, inte preiere, di Belen a Crist. La storie e va plui lontan dal timp.

    Chest mac preziôs di tradizions e di vieris cronichis e pinsîrs che Renzo Balzan nus regale, leant la glagn de sapience dai vons lontans e vierzint il paîs vert e primigeni de Furlanie cun nostalgjie e cun cussience storiche, al à il mert di impiâ no dome un plui viert orizont de nestre leterature ma ancje chel di puartâ buine aghe tal poç dal lessic furlan cuntun biel scrivi, sclet e origjinâl, di grande dignitât. Inmò, di chest libri al ven fûr un orizont di storie e di convivence etniche tra furlans, slovens e todescs dal Friûl, che no si dismentee. Une rispueste di caratar, e ancje di culture e di lenghe, purpûr inte sô umiltât, che e domande rispiet par chê diviersitât di liendis e di anime, par chê identitât che e ven di lontan e si ingrope cu la nestre e e va finîle là che Diu e i oms a podaran salvâle pal biel vivi, difarents e unîts. (c.m.)

 La schede: R. Balzan, Usancis e Cronichis de Patrie dal Friûl (Suplement al n.12/2006 di “Ladins dal Friûl”), Ed. Chiandetti, Reane 2006, pp. 158