Graziadio Isaia Ascoli: la teorie de ladinitât

Graziadio Isaia Ascoli, un tra i plui innomenâts glotoligs europeans, al è nassût a Gurize,  ai 16 di luj dal 1829. Fi di un abenât paron di carteris e filandis, s'instruì a cjase sô cun mestris e precetôrs ch'a vignivin in famee. Cundifat i siei, ch'a jerin ebreus, no j fasèrin frecuentâ lis scuelis publichis, nancje chê logade te sinagoghe di Gurize.

    Chei di famee a praticavin la religjon dai paris, e lui istès, almancul di zovin, la praticà cun cunvinzion: chest j fasè imparâ pulît l'ebraic e l'aramaic. Inmò la citât dal Lusinç e jere un piçul mont poliglòt, dulà che, dongje dal furlan si sintive fevelâ purpûr l'italian, il sloven e il todesc, ch'al  vignive insegnât tes scuelis. E esisteve aduncje une clime che predelave il confront lenghistic che l'inclinazion a la glotologie dal Ascoli daurman e savê preseâ. Siei prins conseîrs sun chest cont a fòrin l'ebreu Samuêl D. Luzzatto, l'abât gurizan Cociangic, orientalist e slavist, e l'abât di Dignan Jacum Pirona, autôr dal prin "Vocabolari Furlan". A cheste opare justeapont l'Ascoli, ch'al veve apene disesiet agns, al dedià il so prin saç di contignût lenghistic.

    Il so prin lavôr zovanîl jessût a Udin de stamparie di Vendrame, tal 1846, al jere dediât, cemût che si à vût iniment denant trat, a l'abât Pirona. Al jere un scandaj storic-filologic"Sull'idioma friulano e sulla sua affinità con la lingua valaca", ossei cun tune des feveladis rumenis che, par jessi di çoc latin, no podeve no presentâ cualchi someance cu la lenghe de Furlanie.

    Passade la stagjon zovanîl, l'Ascoli al lè indenant in maniere curiente tai siei studis glotologics. Al scuviergè par esempli dai gruês fâi tal "Saggio sui dialetti gallo-italici", publicât tal 1853 da Bernardino Biondelli. Simpri ta chel timp al vè l'ocasion di podê lei in stampon la innomenade "Vergleichende Grammatik des Sanskrit, Zend, Grlechischen, Lateinischen, Gotischen und Deutschen" (Gramatiche comparade des lenghis sancrite, zende, greche, latine, gotiche e todescje; Berlin, 1833-'57). Cheste opare e viergeve al studiôs un orizont glotologic cence slaifs. Cun chest gnûf predêl l'Ascoli si metè a ricercjâ sul çoc lenghistic cumun a chestis lenghis ario-europeanis e al grop  semitic.

    Tal 1854 al scomençà la publicazion, sot forme di fassicui periodics, dai "Studi orientali e linguistici", che si stampavin a Gurize ma che a jessevin a Milan. In dut a vignìrin fûr tre volums. Chestis publicazions a metèrin l'Ascoli in rapuart dirèt cui majôrs glotoligs todescs de Germanie, come Kuhn, Fleischer e Rödiger, che lu invidàrin a colaborâ tai lôr periodics. Tal 1861 al va a Milan dulà che il professôr Terenzi Mamiani al veve instituît par lui la gnove catidre di glotologie e lenghis orientâls, che po, su consei dal istès Ascoli si clamà di "Storie comparade des lenghis classichis e neolatinis".

  Tal 1873 l'Ascoli al vè la grande sodisfazion di fondâ une riviste italiane di glotologie, che podès jessi a parêli cun chês che bielzà si editavin in Germanie, France, Anglie e Svuizare. Cheste e fo "l'Archivio Glottologico Italiano" , che tal prin volum anuâl (dal 1873) al cjapà dentri ju innomenâts "Saggi ladini". Al è chest un lavôr di particolâr interès pai Furlans, parcè che si cjate esponude dute la fonetiche de nestre marilenghe e predelade cun clarece la tese de sô autonomie lenghistiche, tal sistem neolatin, e chê de unitât originarie des feveladis alpinis fra lis sorgìnts de Rain (Cjanton dal Grison) e la Furlanie di Jevât.

    L'idee di une tâl unitât, bielzà sustignude agns denant dal Adelung e proponude cun plui clarece dal Schneller, e vignì confermade dal Ascoli cun dute la sô competence, in maniere cussì ferbinte e documentade che par dibot mieç secul e vignì acetade cence discussions di sorte da ducj i lenghiscj. Po i nazionalisim a puartàrin a des divisions, ma inmò vuê i "Saggi ladini" a van dilunc a matignî  la lôr valence.

    Daûr dai prins "Saggi" ch'a cjapavin dentri la fonetiche comparade dai tre grops idiomatics che l'Ascoli al clame in maniere generiche "ladini" (grisonês, dolomitan e furlan), e veve di vignî l'esposizion, simpri comparade, de morfologie: ma chest, come âtris lavôrs dal inlustri gurizan, no rivarìn insomp.

    Tal 1896 al lassà la catride, continuant dutcâs l'ativitât di studiôs e di curadôr des sôs publicazions. Al murì ai 21 di zenâr dal 1907, lassant tra i siei arlêfs une valent generazion di lenghiscj.

    Achîl Tellini al è nassût a Udin ai 25 di fevrâr dal 1866. La famee Tellini e veve la sô divignince di Palme e il "Telìn" che si lei tun document dal secont Sietcent, al podarès divignî di "tele" marcanzie comprade e vendude dai Telins.

    Achîl, zovin vivarôs e inteligjent dal mont culturâl di Udin, a 22 agns al cuistà, a plens vôts, la lauree in Siencis naturâls a l'Universitât di Torìn. Al jere atràt sore il dut des grandis citâts che j semeavin adatis par puartâ indenant i siei studis. Al rivà par chest a Rome e 'e fo propite cheste citât a ufrij la pussibilitât di scomençâ la cariere di sienziât lavorant alì da l'Universitât come asistent a la catride di geologie.

    Di geologie e di ricercjis geologichis s'interessarà par plusôrs agns, e tal 1894 al tornarà in Friûl par cuistâ la catidre di Siencis Naturâls dal Institût Tecnic di Udin. E scomençà cussì une dade di lavôr cetant pusitive, ricje di risultâts e di sodisfazions. Intant i siei interès si jerin slargjâts: al studià lis aghis, i taramots, lis grotis, la flore e la faune de nestre Regjon. I risultâts di chestis ricercjis si ju cjate testemoneâts tune rieste di articui publicâts su la riviste "In Alto", de Societât Alpine Furlane.

    Tal 1904 al fermà cheste sô ativitât che j veve zovât cetancj ricognossiments, al bandonà l'insegnament e al fasè donazion de sô ricje biblioteche sientifiche a la republiche di San Marìn.

    Om curiôs di ogni cjamp de cognossince, al indreçà i siei gnûfs studis viers la filologie e la leteradure ladine, predelât dal so amôr pal Friûl e de gnove passion pal studi des lenghis e sore il dut di une lenghe universâl, l'esperant. Di chest lengaç al diventà un ferbint sustignôr. Dal esperant al fasè une reson de sô vite, tant che al rivà a cuistâ l'incarghe di rapresentant da l'Associazion esperantiste universâl di Bologne, e al burì fûr plusôrs publicazions, oltri a une gramatiche e sintassi di esperant. Tal 1935 al rivà a publicâ finremai une gramatiche cun vocabolari di esperant pai ladins dal Friûl: "Leskikona komparo inter lingvoj Esperanta Kaj Friula - Gramatiche vucabolari ed esercizis di lenghe internacional Esperanto pa-i Ladins Furlàns".

    Diventât un passionât glotolic, al dedià il propi ingegn, vivarôs e curiôs, a valorizâ lis cognossincis de lenghe furlane e de storie de sô Patrie, ricostruinle, cetant che plui al podeve, su la fonde dai ricuarts e des esperiencis dal popul, oltri che su scrits di âtris e su documents publicâts e inedits, saborât dal desideri di fâ cognossi il "tesaur" di culture de sô tiere e i oms che j vevin dât innomine. Al è aduncje il sintiment de furlanetât ch'al môf il Tellini te sô opare di recupar di testemoneancis di une culture che va pierdinsi.  Dutcâs e je l'identitât ladine (che si è metude adun e po infuartide sot i Patriarcjis) la gruesse spine tal cûr di Tellini: viodi ricognossude la dignitât di lenghe al furlan, adotâ une bandere ladine, ristaurâ il Patriarcjât di Acuilee al è il grant sium dal scontrôs e ferbint "folclorist", cemût che j plâs fâsi clamâ.

     Al vorès la bandere ladine di colôr celest, blanc e vert e, in chei colôrs al viôt in maniere poetiche la simbologie dal paesaç de Ladinie: il celest al mostre il colôr dal cîl: il blanc al rapresente lis cimis ricuvierts di nêf, il vert al riprodûs il colôr dai boscs di peç e dai prâts.

    L'atenzion dal Tellini passionât cultôr di ûs u custums de Patrie s'indreçave a  paîs, cjasis vieris,  toponomastiche, boscs, prâts, e cjamps . In ogni sît e paîs che al traviersave si fermave a fevelâ cu la int e a cjapâ su informazions su nons, sorenons, denominazions di lûcs e ogni sorte di viers,   di  vilotis e di cjants popolârs. Al jere persuadût che daspò la conseguence de Vuere Grande si varès vût di ricostruî une "regjon furlane unide" dulà che si podeve sperâ di tornâ a risurî il spirt originari de Patrie dal Friûl, dome se si fos stâts bogns di disberdeâsi de santolance dal guviêr italian dal pont di viste economic e culturâl.

    Inmò, tal so impit passionât al antecipà i timps: al predelà la fondazion di une Universitât pai Ladins , che vès vût la sô sede a Udin. Al batè su la dibisugne di racuei e studiâ ogni document de culture, e, sore il dut de leteradure popolâr furlane. Al sotlineà l'oblig morâl di mantignî vive la lenghe ladine, slargjant la sô cognossince, a traviers publicazions di pueste, dal patrimoni leterari regjonâl e, insiemit, conservant l'ûs dal furlans ta l'informazion  di ogni dì, sui zornâi. E propite par chest al fonde il sfuei "La Patrje Ladine".
Achîl Tellini al mûr a Udin il prin di utubar dal 1938. A  lui bisugne jessi agrâts par vê antecipât lis batais furlanistis, e sore il dut par vê saborât l'idee che il Friûl al fâs part de cumun Patrie Ladine, grande dal Grison svuizar a la Ladinie dolomitane, e dal Cumieli a la nestre Furlanie.

Josef Marchèt : il furlan e la cuestion ladine

    Fintremai viers la mitât dal secul passât (il diesim-novesim) nissun nol frontà cun clarece il problem dai rapuarts fra il nestri lengaç e i dialets italians. I forescj che capitavin in Friûl a sotlineavin sore il dut ch'al jere dificil rivâ a capî la fevelade locâl o, al plui, a rimarcavin lis sôs someancis cul francês e il spagnûl; i nostrans, fasìnt cont unicamentri su la situazion geografiche de Regjon, a suponevin che il furlan al fasès part in cualchi mût dal disavuâl e comples sistem dai dialets italians o ch'al fos un indefinibil messèt di plusôrs lenghis.

    Cul comparî de sience glotologiche tal secul passât, l'atenzion dai studiôs e fo riclamade dai particolârs aspiets des feveladis alpinis (grisonês, retic o ladin e furlan). Bielzà l'Adelung e po cun plui clarece Cristian Schneller a vevin predelade l'ipotese di une cumun divignince e di un stret leam frs chestis feveladis, des sorgìnts de Rain a l'Adriatic.

    E jere dome une ipotese: ma l'innomenât glotolig gurizan Graziadio Isaia Ascoli, cui siei preseôs "Saggi Ladini" la confuartà di dute la sô autoritât e competence e al semeà risolvi in maniere definitive in chel sens il problem. L'Ascoli al metè in rilêf un bon numar di carateristichis fonetichis cumuns ai tre grops dialetâi alpins - grisonês (o romanç), retic (o dolomitan) e furlan - e al dè la colpe des fraturis che cumò a dividin chest larc sistem, di lui clamât justeapont ladin, a une plui resinte vignude jù dal todesc fra i Grisons e la Rezie, e a une vignude in sù dal venit  fra la Rezie e il Friûl. 

    Cuintri cheste tese si pronunziarìn plui indenant il Salvioni par resons plui che âtri sentimentâls, e Carlo Battisti. Chest ultin, ch'al è un dai plui valent sustignidôrs dal gnûf orientament romanistic, la geografie lenghistiche, al opon a la tese dal Ascoli une fuarte obiezion prejudiziâl: te storie no s'incuintre mai une ete dulà che lis tre zonis ladinis dal dì di vuê a vebin vût contats o avualitât di condizions o di vicendis etnichis e pulitichis, valentis a displeâ une comunance di condizions lenghistichis; e al rive in somp cul considerâ lis feveladis alpinis come formis aretradis e conservativis dai dialets italians fevelâts tes zonis dacîs de planure padane. Cussì il grisonês al sarès un lombard restât indaûr, il dolomitan e il furlan a son fasis in ritart dal venit, ch'al à cun chescj lengaçs fuartis someancis.

    Di ce che si à mutivât denant trat, sul cont de genesi dal furlan, al è facil dedusi une pussibil rispueste a chestis obiezions. Lassant "sub judice" la tese da l'unitât ladine, sostignude da l'Ascoli, ma dificilmentri acetabil al stât presìnt des risultancis etnologichis e storichis, l'indipendence dal furlan dai sistems dialetâi italians 'e po’ jessi riclamade da l'esistence di une particolâr latinitât acuilejês; lis originariis someancis dal furlan cul venit si puèdin displeâ cul fat che ancje il venit al diven de latinitât acuilejês; ma mentri il Friûl al à svilupât cheste forme di latinitât al difûr di ogni contàt italian e secont lis propiis premessis lenghistichis, il venit al à deviât par efiet di influencis centri-italianis, unevore intensis a scomençâ de ete langobarde, e si è stramudât in dialet di stamp italian-centrâl, conservant cundutachel cualchi olme de antighe divignince acuilejês. Che po la latinitât acuilejês, puartànt lis sôs inflencis purpûr su la formazion de latinitât noriche e danubiane, e vebi in maniere indirete une cualchi paternitât ancje su lis feveladis retiche e grisonêse, e je cjosse che no po’ jessi escludude, ma che dutcâs e domande âtris provis par sei dimostrade.

    Cemût ch'a sei, il furlan, in confront cui dialets venits, al presente in dì di vuê carateristichis generâls pluiprest contrastants che indipendents, pûr in presince di cualchi rare someance sore il dut lessicâl; nì un tant al po’ sei conferît  a une majôr conservativitât o aretratece de Regjon (il Friûl, tiere di significant passaç fra l'Italie e l'Europe di Jevât, no je mai stade une Regjon sierade in se stesse o isolade),tant che pluiprest a une divierse evoluzion che, dilunc i secui, 'e à rimarcadis impen che smavidis lis difarencis originariis.

(Da : Josef Marchèt, Lineamenti di grammatica friulana, Udin, Arts Grafichis Furlanis, 1953)

I Retormançs vuê: Grison, Dolomitis, Friûl

(di Celso Macor)

A traviers une lungje interviste a la sô int, tresinte opinions, pôris, sperancis, liendis di vite e di custum des vals, Werner Catrina al à ricolt tun libri la realtât culturâl, lenghistiche e umane dai Retoromançs svuizars. Il libri, in prionte, al propon un panorame dai Ladins des Dolomitis, cun tun zonte-saç di Josef Richebuono, e dai Furlans cun tune puntiljôse ricercje di Agnul M. Pittana.

    Il criteri sielzût par unî chescj tre piçui popui tal grop retoromanç e inmò chel dal unitât ladine teorizade da l'Ascoli e vuê bandonade, de cuâl il stes autôr de postfazion dal libri, Luîs Heilmann, al semee cjapâ lis distancis sclarìnt di acetâ il ragrupament proponût dal titul parvie ch'a vegnin tratadis cuestion "sore il dut sincronichis". Pai autôrs ,invezit, "lis lenghis dal grop retoromanç a vègnin a cjatâsi, te rieste dai idioms neolatins, in tune posizion intermedie tra il sistem lenghistic italoromanç (l'italian e i siei dialets) e chel celtic-romanç (ch'al cjape dentri il francês, il franc-provenzâl e l'ocitan); ma al è plui dongje al secont". Lis tre feveladis, simpri secont i autôrs, a àn cuistât elements celtics e germanics; ma, mentri il retoromanç dal Grison al à paidît influencis germanichis ancje te sintassi, il lessic furlan al conten ancje apuarts slovens.

    "I Retoromançs vuê" al ripropon e al azorne e tradûs un saç publicât denant trat di Werner Catrina, "Die Reätoromanen zwischen Resignation uns Aufbruch" cu la zonte dai doi contribûts di Richebuono e Pittana, justeapont. Si pant in dutis lis pagjinis dal libri la cumun preocupazion di chescj tre popui di dispierdisi tes lenghis fuartis, di viodi lâ al mancul lis lôr identitâts. Pûr in situazions diviersis, cumun e je dutcâs la ricercje  di stradis di salvece. Lis pôris dal Grison svuizar e je fintremai chê di un ecès di ricognossiment e di simpatie che no fâsin lâ al mancul, pe cuarte lenghe nazionâl svuizare, il pericul di germanizazion, anzit a rìndin l'identitât romance simpri plui lontane, simpri plui un fat di folclôr (une sorte di parc nazionâl lenghistic, di "Disneyland alpine" al scrîf Catrina). E esit sì une consapevulece de dibisugne di salvâ la culture, une acetazion generâl dal slogan "Ni Talians ni Tudais-chs, Rumantsch vulains restar!" (Né italians, né todescs, romançs o vulìn restâ!), ma i cincuanteun mîl (nancje l'un par cent de interie popolazion svuizare) ch'a vivin tes vals dal Grison e sparniçâts in dut il paîs a stan lant al mancul a ogni gnûf censiment. Alore sì, il Stât al à di movisi a sostegn e pupîl; sì lis instituzions, ma plui di dut a àn di fâlu i Retoromançs stes cun sieltis responsabilis. 

    La stesse protezion de lenghe de bande des instituzions le àn i Ladins dolomitans de provincie autonime di Bolsàn (todesc Bozen), mentri cetant plui esponût a l'assimilazion a son i Ladins de provincie di Belun. Il patrimoni lenghistic ladin al sta cundutachel  cognossìnt un moment d'incressite a traviers une ative presince di instituzions culturâls e dai media, a traviers une pûr no bastant partecipazion a la scuele e al tornâ al ûs de marilenghe te liturgie in cualchi val (Badie).

    Ancje l'unificazion (standardizazion) de grafie e semee vê puartât un gnûf predêl.

    Agnul Pittana te sô lungje, atente e passionade rileture de situazion furlane dal dì di vuê al scrutine fats e problems de storie e in particolâr di chescj ultins agns. Il furlan al à pôc mancul di sîscent mîl di lôr che lu fevelin ma and'è ancje un fuart frazionament in dialets ch'a van di Cjasarse a Gurize, di Acuilee a Tumieç. L'etnie furlane no à cjatât che sclagns ricognossiments te Constituzion (che no le à iniment) e nissune tutele cun ducj i agns ch'al conte chest problem. Cuanche la tutele e rivarà, se rivarà (la tutele e je in fin rivade tal 1999 a traviers la leç 482/99 n.d.r.), e cjatarà une situazion di slidrisament sociâl e culturâl cence rimiedi.

    La culture furlane dutcâs e mostre i segns di une rinassince; ju inteletuâi, i leterâts a puàrtin indenant une lote vivarôse, ch'e à tornât a cuistâ vivôr in tiermins dramatics daspò il taramot dal 1976, ch'e rint significant ancje la produzion di libris (35/40 libris furlans a d'an). And'è cualchi tentatîf di fâ jentrâ il furlan te scuele, si son metudis sù tes Universitâts de Regjon dôs catidris di lenghe e leteradure furlane, i cumuns e semein sensibii a la toponomastiche furlane, cualchi segnâl al diven ancje de Glesie. Ma a resistin lis dificultâts dai furlans di lei e scrivi te lôr lenghe e and'è une pierdite lente ma impreteribil di identitât ch'e lasse masse furlans passîfs cun dut ch'a sostegnin di vê la consapevulece de responsabilitât de conservazion dal patrimoni spirituâl e lenghistic vût in ereditât dai paris.

    In conclusion, un libri informatîf sui Retoromançs ma ancje un libri ch'al dibat i lôr problems. Al scrîf il Catrina che tal 1950 une dosene di personis sun tune isule irlandese e fevelave inmò la lenghe celtiche "manx". Tal 1967 and'jere restadis dome dôs. I Retoromançs a àn pôre che la lôr lenghe a la fin e vebi il stès distin de lenghe "manx".

    Heilmann te postfazion al sosten la pueste di une planificazion lenghistiche che slargji un standard scrit e fevelât par rindi plui facil l'instruzion scuelastiche, e l'ûs de stesse lenghe tai media. E je une logiche che tancj a predelin ancje pal furlan e che, secont l'opinion di cui ch'al scîf, e lasse ancje tantis esitancis: par une dificultât di acuisizion di une lenghe divierse di chê familiâr, pe mancjance des risultivis ch'a inricjissin lis feveladis locâls, coloridis e plenis di risorsis lessicâls e idiomatichis.  Si domandarès inmò une sfuarçadure tecniche al poete, al scritôr periferic ch'al cjante inspirazion te sô fevelade, tai siei propis ricuarts. Heilmann si dîs sigûr che l'acetazion di cheste "lenghe cumun" programade "pa l'ûs aministratîf, la scuele, i media e v.i." no si tradusarà  tun piricul pe sorevivence e la civiltât des lenghis leterariis romancis", pericul che invezit al semee proviodi un âtri autôr, Jean Jacques Furer, tun libri dal 1987.

L'articul al è stât tirâ fûr da "Nuova Iniziativa Isontina" - n°95 Dicembar 1990. Inmò il test originâl par italian al è stât voltât di R. Balzan .

(di Carlo Tagliavini)

    Cul non di "ladin"si definìs un grop di varietâts neolatinis avonde avuâls fra di lôr, feveladis dilunc l'arc alpin, des sorgìnts dal Rain e fintremai a l'Adriatic. Il non ladin, ch'al diven da latinus (latin), nol jere doprât, par definî la fevelade locâl, dome che di une part da l'Engjadine e de Val Badie, ma tirât fûr tal 1832 par indicâ il complès di chestis feveladis da J. Th. Haller, e al è stât podaspò, par cussì dî, consacrât dal   ûs ch'al fasè il majôr lenghist italian, G. I. Ascoli, e al è aromai comunementri doprât in Italie: i todescs e i francês a definissìn invezit cheste unitât lenghistiche cul non, no discognossût nancje achì di nô, di "reto-romanç".

    Il ladin si divît in tre sezions (ocidentâl, centrâl e orientâl) ch'a son disseparadis une di chê âtre da infiltrazions di âtris lengaçs (todesc fra l'ocidentâl e la centrâl, venit fra la centrâl e l'orientâl). La sezion ocidentâl e cjape dentri il rumanç (rumantsch, dal averbi latin romanice) dal Cjanton dal Grison te Svuizare, fevelât te Soreselve, Sotselve e Engjadine; il pont plui orientâl di cheste sezion al è formât vuê de Val Munistîr, ch'e rive fintremai sotvie dal Stelvio, ma in timps no masse vielons al veve di jessi presìnt ancje te Val Venoste, ch'e à vût une germanizazion lenghistiche avonde resinte. Il rumanç, testemoneât te sô forme scrite plui antighe tun document dal secul diesim-secont, al scomençà a vê une leteradure nome tal Cincent, cuanche la Riforme luterane e cjapà pît tal Cjanton dal Grison e 'e fasè dissepui ancje par slargjâ la sô presince a traviers libris di glesie te lenghe dal popul. Dome di pôs agns in cà dutcâs (dal 1937) il rumanç al è stât ricognossût come lenghe nazionâl de Confederazion svuizare (al cuart puest, daspò il todesc, il francês e il talian).

    La sezion centrâl e je metude adun di chel ch'o podìn clamâ "ladin dolomitan", parvie ch'al è fevelât te zone des Dolomitis atesinis e belumatis tune rieste di vals, scuasit a forme di rais di ruede, ch'e à il so centri atôrvie de Marmolada e dal grup dal Sella. Si trate de Val Badie e Marêb (val dal flum Gàder, che  si bute te Rienze), de Val Gardene (val dal riul Gardene, che si bute tal Isarc), e de Val di Fasse (alt cors dal riul Avisio, che si bute tal Àdis te regjon Trentin-Tirôl di Misdì, e di âtris tre vals in provincie di Belun (Luvinâl-lunc, alt cors dal riul Cordevole; Anpezo, alt cors dal riul Boite; Cumieli, alt cors de Plâf e dal so afluent Pàdola). I cunfins dal ladin dolomitan a son nets dome cuanche il ladin s'incuintre cul todesc, mentri a diventin unevore incierts cuanche s'incrose cun dialets di stamp italian. Cussì, par esempli, l'alt fassan al è inmò adimplen ladin; Moena 'e à cetantis carateristichis ch'a ricuardin il ladin, ma ben pôcjis a son lis olmis ladinis dilunc la Val di Fiemme, dulà che aromai al à cjapât la volte il stamp dialetâl trentin. Cortina D'impeç 'e à un dialet ch'al conserve inmò un bon numar di carateristichis ladinis, e chestis no disparissìn a colp, ma si disfantin biel planc dilunc il cors dal Boite. Ladin al è siguramentri il dialet di Luvinâl-lunc (Fodòm), e un grop ben conservât di ladinitât al è inmò il Cumieli, mentri dilunc la val de Plâf al è vignût indenant aromai di secui in cà, partìnt de planure, il venit; ma su la çampe de Plâf une isule lenghistiche ladine centrâl e je la fevelade di Nert, te val dal Vajont.

    A orient dal Cumieli, daspò l'isule todescje di Sapade (Pladen), e scomence la sezion orientâl ch'e cjape dentri l'intîr Friûl. La val dal Dean, riul che si bute tal Tajament, nus puarte in Cjargne, dulà che si fevelin dialets furlans di stamp arcaic. Viers tramontane il domini lenghistic furlan al à par cunfin lis cimis des Alps, cun insignificantis presincis todescjis (Tamau/Tischlbong, Sauris/Zahre) e plui consistentis  slovenis (val di Resie, part disore de val de Tôr, val dal Nadison, alt Lusinç e contôrs di Tarvis); viers misdì, il cunfin cul venit al veve, si po’ scrupulâ, di corispuindi, tai timps passâts, al cors de Livence; ma fra la Livence e il Tajament il venit al è rivât a vignî indenant unevore in teritori furlan. Viers jevât il furlan si slargjave une volte fintremai a Triest e Mugle; sul scomençâ dal secul diesim-novesim il vieri "tergestin" a base furlane ( si clame cussì par disferenziâlu dal "triestin" vignût daspò, cun cetantis plui influencis venitis) al jere inmò vitâl. Un venit arcaic si fevele a Grau e un, un pôc mancul arcaic, ma simpri cetant interessant (il cussì clamât bisiac), tai contôrs di Monfalcon. In Friûl i tescj scrits te fevelade ladine a scomencin a comparî bielzà tal Dusinte e la poesie d'art furlane si la cjate tal Cincent. Dongje a une magnifiche leteradure popolâr (a bastaressin a clasificâle fra lis miôrs da l'Italie lis bielis vilotis, componiments poetics che, in tune cuartine, nus dan un intîr cuadri), il Friûl al à vût poets di grant valôr e, ce ch'al interesse di plui, al à ancje vuê un moviment lenghistic e leterari vivarôs, che si cjate in tune atôrvie a la "Societât filologjìche furlane" di Udin e a âtris  clapis culturâls.

    Al è dificil contâ in pôcjis riis lis carateristichis cumuns al ladin tes sôs tre sezions; si fermarìn a un pôcjis des plui palês, sore il dut in confront ai dialets italians da l'Italie di 'Sore. Prime di dut la sonservazion di -s finâl, sevi tai plurâi sevi te congiunzion verbâl (par esempli, rumanç: il bab, "il pari", plurâl ils babs; la mumma, la "mari", plurâl las  mummas; gardenês. mur, "mûr", plurâl mures; cësa "cjase", plurâl cëses;  furlan, plurâl furlans; cjase, plurâl cjasis e v.i., e po rumanç ti eis, gardenês, tu ies, furlan tu ses, e v.i.). aduncje, simpri tal cjamp de fonetiche, la conservazion di l tai nes latins cl, gl, bl, fl, e v.i., pae esempli, rumanç clav, glatsch flur, gardenês tlè, dlacia, flëur; furlan clâf, glace, flôr (latin clave(m), glacia, flore(m); il passaç di  c denant a a in sun palatâl: par esempli, rumanç tgaun (lei ciaun). gardenês e furlan cjan: ancje il lessic e la morfologie a presentin, in dutis tre lis sezions, cetantis avualitâts.

(Notis tiradis fûr de riviste "Oggi", Milan, 1960 - Traduzion par ladin-furlan par cure de redazion di "Ladins dal Friûl")

(di Romano Broggini)

    Lis regjons, che jo o crôt disseparadis, che vuê o clamìn "Ladinis" - e l'ûs dal tiermin in chest sens al è avonde resìnt (no plui di un secul) - si mètin in tune in tre grops plui o mancul avuâi: chel grisonês (romanç e ladin), chel dolomitan e chel furlan. Lôr non àn mai vude une unitât pulitiche a sé stant che, ancje par un timp avonde curt, lis disferenzias come "nazion", e al è fintremai in forsit ch'a vebin vût, purpûr par une curte trate, une unitât religjôse o culturâl.

    Su l'unitât etiche tantis voltis sotlineade tal non di une presumude "gens alpine", chel pôc ch'o savìn sul scomençâ de ete storiche, valadì la concuiste romane des tribùs alpinis tal 7 d. di Crist,  nus puarte pluitost a constatâ un frazionament, spieli di une situazion complesse e no dal sigûr originarie.

    Fale pai specialiscj ch'a san dedusi ciertecis ancje da elements avonde scjars, la situazion si pant avonde imberdeade e avonde divierse dilunc lis Alps, sul cont dal profîl des originis des popolazions alpinis: Venits, Insubris, Ligurs, Celtics, Etruscs a semein vê influençât in formis e timps diviers chestis popolazions e forsit in cualchidune si son insedadis in maniere significant.

    E valarà aduncje la pene di rifleti un marilamp su chest problem e frontâ l'interogatîf se cheste sorte di unitât che in forme palês o sotlinein, fevelant di "regjons ladinis", no divegni sore il dut da une situazion lenghistiche particolâr che vuê si propon tant che il spieli di une passade unitât, cun elements che dutcâs, te lôr massime part,  vuê no rivìn inmò a meti a fûc.

    Afirmâ che par vieri lis monts a univin, invezit che disseparâ, nol baste a leâ l'alte val dal Rain al Lusinç.

    Al sta di fat  che "l'aree ladine" cemût che la batià l'Ascoli passe zà fa cent agns, e esist: che da l'alte val dal Rain, a l'alte val dal Inn, 'es monts de alte val dal Adis, 'es vals ch'a van jù viers l'Adriatic oltri la Livence, si feveli une lenghe che diven dal latin cun elements cumuns ch'o mètin te cente che cjape dentri lis diviersis lenghis romanzis al è un dât di fat acetât : come ch'al è acetât il fat che chestis feveladis a dan di viodi une "fase" unevore arcaiche des alterazions dal latin rispiet a chês presumudis in âtris zonis, de Rumenie al Portugal, ven a stâj la viere aree dal imperi. Infats clamâsi ladins, romançs o furlans al vûl dî afirmâ une fedeltât a cualchi cjosse che, forsite, no esist plui, e ch'e je in piricul di disparî: al vûl dî afirmâ, par contrast, che chestis popolazions si ricognossin inmò latinis, romanis o che ricognossin la propie capitâl regjonâl in Cividât (FORUM JULII).

    Chest evidentementri al è impensabil tal moment che l'Imperi roman, te ete augustee e in chê di Traiano, al puartà i siei cunfins al Rain e a la Donau, cuanche chestis regjons a fasin part des divisions imperiâls, ossei l'Italie, lis dôs Reziis, la Vindelicie e forsit il Noric. Ametìn pûr che si vebi vût une estension de aree "ladine"  plui slargjade di chê dal dì di vuê, cemût che si po’ rigjavâ dai nons di lûc, cheste dutcâs non po’ lâ fûr de cente di chestis regjons imperiâls dulà ch'al veve un sens afirmâsi come latins o romans.

    Inmò cuatri secui plui tart, cuanche a scomençàrin i regns "romans-barbarics" cun Odoacre (476), il cunfin dal regn al cjape dentri la Rezie e al scjalvalcje il colm des Alps. E la situazion no mudà al timp dai Ostrogots. Al è dome al moment de riconcuiste bizantine, ven a stâj tai prins trent'agns dal '500, che il teritori "roman" si fermà sotvie des Alps. Anzit, propite in conseguence di une pulitiche fondade su lis jentradis fiscâls (tassis), il cunfin "vêr" si creà atôrvie dai centris daziaris, logâts a misdì des Alps: Susa, Ivrea, Domodossola, Bellinzona, Chiavenna, la regjon di Trent, chê di Glemone, chê di Cividât e di Gurize. Cu la ete bizantine, purpûr curte pe Val Padane, si creà une corone di centris daziaris a misdì des Alps, par solit dulà che lis vals si viergevin a la planure o ben dulà che lis vals s'incuntravin. Chescj borgs  a rapresentavin i ponts di difese a tramontane de Val Padane.

    La riconcuiste bizantine, daspò la tremede vuere greche-gotiche, e fo veramentri considerade une riprese de romanitât. No dome a traviers l'opare legeslative di Guistinian ma ancje tes formis esteriôrs.

    Cussì nol è dabon un câs che cuanche Carli il Grant al distinà la sô sede a Acuisgrane, volìnt in cheste maniere segnâ la continuitât cu la romanitât, al costruì la capele palatine sul model no des basilichis romanis ma sun chel de glesie di S. Vitâl a Ravene, leade al ricuart di Giustinian.

    Dal rest daspò apene uns vincj agns la organizazion bizantine ta l'Italie di 'Sore e vignì subissade da l'invasion langobarde. Ma lis gnovis struturis si fondàrin sun chês presints denant trat cussì lis altis vals alpinis a restàrin fûr da l'influence langobarde, almancul tal in prin e i vieris dazis bizantins a diventàrin sîts fuarteçâts di difese langobarde.

    O crôt che nome in chest moment chês regjons a podessìn svantâ la propie"latinitât" o la propie "romanitât" in contrast cu la planure padane e cul Nord dulà che il dirìt al jere considerât te cente personâl o di clan e i dominadôrs a vivevin secont lis usancis e lis leçs langobardis e germanichis.

    Lis altis vals a mantignìrin chest privileç di fevelâ une sorte di latin cuintri chês formis "lombardis" (tal sens di padanis) che in âtris sîts a jerin daûr a diventâ cumuns.

    Ducj a san che i grancj elements di resistence dal latin de alte ete di mieç, valadì fintremai al X secul, a son tre: la glesie, la scuele e la curie (ossei il tribunâl).

    Tes zonis ladinis siguramentri l'element di fonde al fo la glesie te sô struture organizade, ven a stâj la diocesi.

    Cheste istesse diocesi e jere nassude, tai moments plui intrigôs dal V e VI secul, come une organizazion a pâreli , ma in cierts câs j cjapave fintremai la volte, da l'organizazion romane. No par nuje il non di diocesi al recupare une division aministrative romane de ete di Dioclezian.

    Cuanche la struture civîl o militâr e ven a mancjâ il vescul al cuiste dispès une funzion sostitutive. Nì al mancje il câs di un guviernadôr roman ch'al divente lui stès vescul (S. Abrôs).

    O crôt che il câs dal vescuvât di Cuere (Chur / Coira - CURIA RAETORUM) al sedi avûal a chel di tantis âtris sedis vescuvîls. Dal rest tal 614 il vescul Vitôr al semee cjapâ sù in tune lis funzions di majorent civîl e religjôs de citât. Se po o pensìn che la citât plui menaçàde des invasions barbarichis ch'a divignivin dal jevât e fo Acuilee, ch'e à une sede vescuvîl  fintremai dal '200, un secul denant di S. Ambrôs, e che tal 432 e ven disdrumade (stralozant la sede a Grau  tal 485) mentri plui indenant si creàrin dôs sedis, une a Grau e chê âtre a Cormòns, (po a Cividât e a Udin), si comprìnt cemût che, 'es dôs estremitâts da l'aree ladine, o cjatìn dôs sedis vescuvîls innomenadis e centris di vite e di culture: justeapont Cuere e Udin. Si à vude dutcâs une dade di timp che lis dôs sedis a fòrin cetant leadis tra di lôr e al fo al timp dal cussì clamât "sisme dai Tre Cjapitui", scomençât propite te clime bizantine.

    No mi semee un câs che Acuilee e Cuere s'incuintrin cun âtris regjons alpinis e prealpinis sul plan religjôs tal sest secul, cuanche la fedeltât a une idee di Rome e semee discjadi. Ch'al sedi chest il moment de unitât sumiade? I studis sul cult antîc des zonis alpinis, valadì denant de Riforme, no son lâts indenant cui sa cetant.

    I majôrs lenghiscj zà a àn vualmât te storie religjôse dal arc alpin un element di fonde de storie lenghistiche. S'o vessìn di sotlineâ un element unitari des "regjons ladinis" o crôt ch'o podaressìn cjatâlu tal svilup religjôs dal sest al diesim secul, cuanche chê grande ete scure (scure parvie che no savìn fâ lûs cun ferâi adeguâts) che si è solits clamâ Ete di Mieç, e butave lis fondis pe grande rinassince dal XI secul.

    Che po sevi il Friûl sevi il Grison o il vescuvât di Trent o chel di Bressanon si cjatassin leâts a Vignesie, e che Vignesie - dute impegnade sul mâr - e garantìs un ciert pluralisim su lis tieris fermis  che veve daursi, o e tratàs cui majorents grisons o cu lis popolazions de alte val dal Adis cun tun particulâr interès, no fasè che continuâ une atighe pratiche di colaborazion e di amistât, no definide da specifics compatâts pulitics, ma divignint da antighis fedeltâts e a cumuns esigjencis di vite.

Test tirât fûr da "Ladins", publicazion a cure dal Fogolâr furlan dal Tessin-Locarno (Svuizare / 1980), e voltât par furlan par cure di R. Balzan .

   
 Luigi Heilmann e il ladin di Fascia e Moena

   Di resìnt (ai 12 di luj 2003) la comunitât ladine de Val di Fascia 'e à dediade la Sale Multimediâl dal locâl "Museu Ladin" al innomemât glotolig, dr. Luigi Heilman, ch'al à  spindude la sô vite al studi e a la valorizazion de lenghe e de culture dai ladins, sore il dut par chel che s'inten la realtât de Val di Fascia e Moena.

    Luigi Heilmann al nas a Portalbera in provincie di Pavie tal 1911. Al frecuente il Gimnasi alì dal Seminari Vescuvîl di Pavie, inscrivinsi podaspò a la facoltât di Letaris e Filusufie.

    Tal 1937 al puarte a tiermin i studis academics specializansi in studis orientalistics. Apene cjapade la lauree il professôr Ballini j propon al neulaureât un puest come asistent volontari alì da l'Universitât Catoliche di Milan. Intant al vinç il concors par lâ a insegnâ tes scuelis Superiôrs, che lu puarte in diviersis citâts italianis: Varês, Pavie, Rome. Al torne a Bologne tal 1943, dulà che parie dal insegnament al davuelç l'ativitât di assistent volontari alì da l'Universitât, su prudêl dal prof. Bottiglioni, titolâr de catidre di Glotologie. Al è juste in chest timp che i siei interès s'indrècin viers i studis lenghistics e dialetologics ch'a disferenziaràn plui indenant la produzion sientifiche di Heilmann.

    Fintremai dai agns '30 tes dadis di vacance al frecuente Moena, dulà ch'al cognòs la ladine Marcella Grandi, ch'al maridarà tal 1938. Dilunc chestis presincis in Trentin, che si ripetaràn dibot ogni an par dute la sô vite, s'infuartissìn i siei interès sientifics pe fevelade locâl che si zontin a l'atacament profont ai lûcs e a la int de Val.

    Tal 1955 al vinç il concors pe catidre di Glotologie e al divente professôr docent a Cagliari. Tal stès an al publiche il so lavôr fondamentâl "La fevelade di Moena tai siei rapuarts cun Fiemme e Fasse". Saç fonetic dulà che pe prime volte in Italie al met in vôre i moderns instruments dal struturalisim pa l'analise dialetologiche. Par chescj merts tal 1956 al ven fat citadin onorari dal Cumun di Moena.

    Tal 1957 j ven assegnade la catidre di Glotologie alì de Facoltât di Lenghis e Filusufie da l'Universitât di Bologne, dulà che dal 1957 al 1977 al regè l'incarghe di diretôr dal Institût di Glotologie.

    Il so insegnament al rive a cjapâ la volte a no pôcjis resistencis tradizionalistis, granciis sore il dut al so spirt critic e daviert a la sperimentazion che lu sapontin tal valutâ lis gnovis curìnts de lenghistiche, dal struturalisim a la gramadie generative-strasformazionâl e a la lenghistiche dal test, passant a traviers la lenghistiche matematiche e la gnove retoriche. Cussì tal 1966 al fonde e al dirêç a Bologne il "Centri Interfacoltât di Lenghistiche Teoriche Aplicade" e tal stes an al divente President dal Institût Psico-pedagogic pa l'educazion de Regjon Emilie.

    Tal 1975 al è nomenât President de Comission Culturâl dal Institût Cultural Ladin "Majon de Fascegn", rezint par plui di dîs agns l'incarghe di dean di cheste gnove instituzion, un impegn puartât indenant cun ferbince e generositât. In cheste vieste al fonde e al dirêç la riviste "Mondo Ladino", ch'e à zovât cetant a slargjâ lis cognossincis sientifichis sul cont des tematichis ladinis.

    Tal numar X (1986) de stesse riviste, par iniziative de redazion e dal consei di aministrazion dal Institût ladin, e ven publicade une ricolte di "Studis Ladins" a l'ocasion dai siei 75 agns. Mentri tal 1988, "Mondo Ladino" e publiche - daspò che Luigi Heilmann al jere vignût a mancjâ - un dai siei ultins contribûts su la tematiche ladine: "Individui, etnie, stât. A proposit di planificazion lenghistiche te comunitât ladine dolomitane. Considerazions di "ecologie di lengaç". Chestis considerazions, ch'a daviergin tal cjamp dai studis ladins une gnove perspetive di ricercje e di riflession, a puèdin jessi consideradis il so "testament spirituâl".

    Luigi Heilmann al mûr, daspò une curte malatie, a Bologne ai 9 di utubar dal 1988.

(da "Ladins dal Friûl" - n.9 Setembar 2003)

   
 Lis plui antighis testemoneancis
 de lenghe ladine in Friûl   

L'isule  ladine  dal  Friûl
(di Zuanfranc D'Aronco)