Originis: Tai prins secui daspò che la regjon des Alps e jere stade cuistade dal imperi roman, la popolazion originarie e scomençà a doprâ il latin popolâr, chel fevelât dai soldâts e dai marcjadants romans, e lu stramudà un pôc a la volte tun latin ch'al veve des carateristichis particolârs. I fatôrs ch'a àn concorût a la formazion de gnove lenghe a fòrin:

a) I mudaments fonetics di olme "retiche".

b) La conservazion di une part dal lessic dal lengaç originari.

c) L'influs des lenghis cunfinants a tramontane e a misdì.

 Il ladin (clamât ancje retoromanç) e je aduncje une lenghe neolatine o romanze, sûr dal francês, dal provenzâl, dal catalan, dal italian, e v.i.

Si àn elements par sustignî che par vieri e sedi esistude une slargjade fasse unitarie di lenghe ladine, cunfinant a tramontane cu la Donau, a bonât cul Pas dal San Gotârt, e a jevât cu lis citâts di Triest e di Mugle.

 Ai timps des cussì clamadis invasions barbarichis, cuanche i alemans e i bavars a vignìrin jù viers misdì e i slâfs a vignìrin indenant di jevât, l'aree lenghistiche ladine e scomençà a strengisi, ancje parvie che la popolazion e vignì in part cuistade a la lenghe e 'es usancis dai invasôrs. La continuitât lenghistiche tra i ladins des Dolomitis e chei dal Grison  e vignì cussì interote. Inmò, tal secul XV la republiche di Vignesie e cuistà il Friûl e il Cjadovri. Insin di chê volte un coni lenghistic venit al jentrà aduncje a fons dilunc la val de Plâf, finint par disseparâ i ladins des Dolomitis ancje di chei dal Friûl.
 

Il ladin standard e il progèt SPELL

(renzo balzan)

(da "Ladins dal Friûl" n.10 Utubar 2002)

               

Santa Maria Val Müstair /Sante Marie in Val Munistîr (Cjanton dal Grison - CH) - Ai 24 e 25 di avost stât a S. Maria in Val Müstair, tal Cjanton svuizar dal Grison, si è davuelte une cunvigne par memoreâ i vincj agns ch'e je jentrade uficialmentri in vôre la lenghe romance standard, ossei la lenghe normalizade clamade, par convenzion, "Rumantsch Grischun", un passaç fondamentâl par podê puartâ il ladin-romanç tes scuelis, tes publichis instituzions, tai media. La cunvigne e jere stade naturalmentri organizade par cure de Lia Rumantscha, la plui impuartante instituzion culturâl ladine-romance, rapresentade dal so president Jost Falett e dal diretôr Gion A. Derungs. Presints ancje Rest Martin Cabalzar, dal zorâl in lenghe ladine "La Quotidiana" e Bernard Cathomas diretôr de Radio e Television Rumancia RtvR. Tant che ospits dal Sud-Tirôl a jerin invezit rivâts Leander Moroder e Bruno Senoner, diretôr e vice-president dal Insitut Cultural Ladin "Micurà de Rü", il colaboradôr dal progèt SPELL pe nornalizazion de lenghe ladine dolomitane, Matthias Stuflesser e la poete e colaboradore de Rai ladine Ruth Bernardi. Presint ancje, tant che ospit d'onôr, Veronica Schmid-Bruppacher, vedue dal dr. Heinrich Schmid ch'al à puartât indenant il proget di normalizazion dal rumantsch grischun.

   
 La storie dal Rumantsch Grischun (lenghe leterarie unitarie dal Grison) e cjape la dade tai agns Trente, cuanche un zovin di non Heirich Schmid, sfueant une copie di riviste par professôrs di scuele , al restâ cjapât di un articul sul retoromanç. In chest articul a vignivin presentadis lis diviersis variants dal ladin-grison. Di chê dade il retoromanç e lis sôs diviersitâts a cuistàrin l'atenzion di chest zovin glotolig nassût a Zurì.

    I prins tentatîfs di Schmid indreçâts a cjatâ la fate di chest berdei lenghistic, a van indaûr ai prins agns Setante. Nissune richieste, nissune incarghe a vevin saborât chestis provis, chescj tentatîfs lenghistics, cussì dut al lè a finîle tun cassetin. Ma a la fin dal 1981 il dr. Bernard Cathomas, secretari de Lia Rumantscha, al lè a bati a la puarte di Schmid, par informâsi su lis pussibilitâts di rivâ a meti adun une lenghe retoromance unitarie. Cetancj incuintris cun operadôrs economics e dal setôrs publicitari a vevin dât di viodi a Cathomas ch'al esisteve un fuart interes a podê rivâ ai Retoromançs doprant la lôr lenghe. Dutcâs l'alternative e jere palês: un sôl retoromanç opûr nissun retoromanç.

    No si po’ dabon dî che il dr. Heinrich Schmid al vebi realizât, te dade di sîs setemanis, ce che di secui in cà no si jere rivâts a imbastî: une lenghe leterarie cumun, di doprâ in maniere vualive e acetade tai ambients retoromançs plui conservadôrs (naturalmentri sul plan leterari e culturâl). Epûr dut al sucedè propite ta cheste dade di timp sul scomençâ dal 1982. Chest lenghist, che a traviers i siei studis al veve cuistade une complete cognossince dal problem, al elaborà 25 regulis e concets di meti in pratiche par rivâ a l'unificazion. Il concet plui impuartant al fo chel di confrontâ il patrimoni lessicâl di formis e di espressions dai tre grups principâi, il Sursilvan, il Surmiran e il Vallader. Ce che in ducj al jere compagn al fo adotât. Chest al vâl par un tierç abondant des formis. Pe majôr part de formis restants si operà secont un principi democratic majoritari: cuanche peraulis e espressions in dôs des tre feveladis a jerin compagnis, a cuistavin une validitât determinant. Secont il plui sclet ûs svuizar chescj "Criteris pe formazion di une lenghe leterarie retoromance unificade par dut il Grison" a fòrin sometûts al judizi plui slargjât. La gnove strategie e jere evident: nissune imposizion, ma ben invezit sgambis di ideis tra filoligs e instituzions competentis. "La decision sul acèt o sul refût dai sengui ponts - come ancje sul intîr progèt - e va cjapade, a la fin, dai Retoromançs stès", cussì al declarà Heinrich Schmid tal mês di març dal 1982.

    Po al sucedè ce che, in veretât, nissun si spietave: l'idee e funzionà. La publicitât in curt si siervì di cheste lenghe, ch'e jere nassude a taulin e che, a la prove dai fats, e palesà une vitalitât sorprindìnt. A forin realizâts tescj pe consultazion pratiche, bancjis e sigurazions a publicarìn tescj informatîfs che senò a saressin stâts scrits par todesc. Inmò in curt a vignìrin prontâts une gramadie e un vocabolari, e dilunc il 1985 al è vignût fûr un test fondamentâl di circje 700 pagjinis sul Rumantsch Grischun. In sumis la scomesse di Heinrich Schmid e de Lia Rumantscha e jere stade adimplen vinçude, e vuê plui che mai chest passaç fondamentâl de realtât lenghistiche dal Grison al sta palesant dute la sô impuartance e la sô utilitât pratiche.                                                                                                  
                                                                                                                            (renzo balzan)

                                                                         (da "Ladins dal Friûl" n.11 Novembar 2002

San Martin de Tor/St. Martin in Thurn (Bz) - Zà fa cualchi mês al è stât editât il  gnûf "Dizionar dl Ladin Standard", realizât par cure dal SPELL (Siervizi de Planificazion e Elaborazion dal Lengaç Ladin), de Ladinie Dolomitane. A àn zontât il lôr prudêl e la colaborazion l'Union Generela di Ladins dles Dolomites, l'Istitut Cultural Ladin "Majon di Fascegn" di Vich di Fasse, l'Istitut Ladin "Micurà de Rü" di San Martin de Tor e l'Istitut Pedagogich Ladin di Bulsàn.

    Il teme dal lengaç ladin unificât, cognossût tant che "ladin standard" o ladin dolomitan, ossei di dutis lis Vals ladins che si cjàtin in tune atôr dal Grop dal Sèla, al à cjapât aromai une pusizion centrâl tes discussions pulitichis e culturâls de Ladinie. Articui tai media (zornâi, radio e televisions) ladins e no ladins e tes publicazions sientifichis, cjapadis di posizion di personalitâts culturâls e comunicâts di organizazions a dan di viodi che il ladin scrit unificât nol è plui un argument risiervât a pôs specialiscj, ma al sta justeapont interessant un numar simpri plui slargjât di personis e di istancis diviersis. Cundifat la standardizazion e ven dibatude cun grande passion, e nol podarès jessi difarent parvie che l'iniziative de normalizazion lenghistiche e va a tocjâ diretamentri lis resons socio-culturâls e esistenziâls de persone, la maniere di sintîsi e di identificâsi, di jessi e di proponisi te societât. Cierts a viodin tal procès di standardizazion un instrument valent par difindi il propi patrimoni culturâl da l'invadence e dal pericul di sotanance tai rivuarts des grandis lenghis daprûf, valadì il todesc e l'italian. Âtris impen, plui tradizionaliscj, lu calcolin une menace tai rivuarts des singulis varietâts locâls, e a imprometin che la lenghe normalizade no la dopraràn mai. Cheste ultime situazion e je sore il dut presìnt in Val Gardene.
 

    Al è di crodi che i contrascj e i dibatiments sun chest proposit a laràn dilunc inmò par une buine dade, ma aromai un pas fondamentâl al è stât fat: prin cu la publicazion de "Gramatica dl Ladin Standard" (GLD), e cumò cu la buride fûr dal "Dizionar dl Ladin Standard" (DLS). No sarà chê normalizade une lenghe amade a nivel di int (popolâr), ma util, pratiche, unificant. Une lenghe adate a dâ dutcâs rispuestis adeguadis a une societât ch'e vûl incressi come ch'e je chê ladine-dolomitane.

    Tes discussion sul cont dal ladin standard a vegnin dispès fatis chestis obiezions: un lengaç scrit unitari, a ce siervial par une comunitât piçule come chê ladine des Dolomitis? Ce divignî varâno lis diviersis varietâts locâls de lenghe ladine-dolomitane?  Par dâ une rispueste a chestis domandis bisugne lâ a scrutinâ lis declazions di principi cjapadis dentri te Convezion SPELL 2000/2001:  "Si varà di operâ pe elaborazion, l'infuartiment e la promozion dal Ladin Standard tant che fin primari e fondamentâl de pulitiche culturâl ladine ch'e cjale al divignî. E inmò, il Ladin standard al varà di proponisi come lemgaç unitari de comunicazion scrite primarie (scuele, publiche ministrazion, media), ma ta chel istès timp al varà di convivi cu lis diviersis varietâts locâls che a restìn valentis tal ûs leterari, sore il dut par chel che s'inten l'espresion poetiche e la leteradure popolâr".

    Ma cemût èse nassude e madressude cheste lenghe standard : da un confront di ideis, propuestis e soluzions tra il referent dal progèt, il glotolig svuizar professôr Heinrich Schmid e i rapresentants des instituzions culturâls ladinis, secont concèts di teorie lenghistiche e di necessitâts sozio-culturâls. Il principi fondamentâl de normalizazion al è restât dutcâs leât al concèt de realtât lenghistiche, puartant cussì a sielzi lis soluzions plui frecuentis e rapresentativis tra i cinc idioms principâi cjapâts in considerazion: Badie-Mareo, Gardene, Fasse, Fodom e Anpezö. In pratiche si è doprât il scheme di lavôr metût in vôre pe standardizazion dal Rumantsch Grischun, te Ladinie svuizare.

    Al merte inmò memoreât che pe realizazion dal "Dizionar dl Ladin Standard", l'opare di coordenament le à davuelte Erwin Valentini e chê di redazion Mathias Stuflesser. Dal comitât di redazion a àn impen fat part: Fabio Chiocchetti, Nadia Chiocchetti e Daria Valentin. Cun lor a àn colaborât: Rut Bernardi, Alessandra Illing, Sergio Masarei, Ulrike Mairhofer Kostner, Gudrun Mussner, Simonetta Pancheri Moroder, Veronika Pedevilla, Daniela Rason, Leo Senoner, Carlo Suani, Nadia Valeruz  e Paul Videsott.