San Martin de Tor/St.Martin in Thurn (Bz) - Chest an, 2002, l'Istitut Cultural Ladin "Micurà du Rü" di San Martin de Tor in Val Badie al à festezât i 25 agns de sô ativitât. L'Institût al è stât fondât justeapont tal 1977, sore il dut par mert dal dr. Lois Craffonara, e al cjape il non di Micurà de Rü, sorenon di Nicolò Bacher (1789/1847), un predi nassût a San Ciascian in Val Badie, che oltri ai siei dovês di predi al nudrive ancje un marcade passion pe lenghe mari, il ladin. Tal 1833 al scrivè par prin une gramadie ladine dal titul "Versuch einer deutsch-ladinischen Sprachlehre". La particularitât di chest lavôr e diven da l'impostazion e de vision da l'autôr, disprivade di ogni spirt conservatîf e pensade par rivâ a l'elaborazion di un lengaç adat 'es dibisugnis dai timps. Cundifat l'idee di fonde di Nicolò Bacher e jere chê di elaborâ une lenghe di scriture e di leture unificade par ducj i ladins des Dolomitis. In sumis un om di rilêf pe culture e pe leteradure de realtât ladine-dolomitane

    Par chel che s'inten lis finalitâts e lis ativitâts dal Institût, al merte memoreât che tal so statût si met in evidence  ch'al opare "par pupilâ e promovi la lenghe, la culture, la specificitât etniche  e la storie ladine". Al fin di otignî chescj risultâts a l'Institût a son stâts dâts chescj compits principâi: "Studis sientifics de lenghe, de storie e de culture dai ladins des Dolomitis ,ancje metìnt in vôre formis di colaborazion cun universitâts nazionâls e forestis, cun institûts avuâi e ents culturâi".

    Sore il dut l'impegn al è sifignificant in cjamp lenghistic. La lenghe ladine e veve bisugne di une elaborazion lessicâl, ch'e cjapàs dentri i setôrs tecnics come p.e. la lenghe aministrative, ma ancje aspiets de vite dal dì di vuê, impegn ch'al ven curât cun tune particolâr atenzion dal Institût di San Martin de Tor. Dutun in chel si è purpûr impegnâts ta l'elaborazion di vocabolaris ch'a dedin rispeustis 'es gnovis richiestis in at, valadì tes versions todescje/gardenese; gardenese/todescje e italiane. Dut il materiâl lessicâl ricolt al è stât metût dentri tal computêr e si po’ facilmentri consultâlu. Al è Interessant ancje di sotlineâ che daspò une lungje fase di elaborazion e di ricercje tal 1998 al è stât dât 'es stampis un Atlant lenghistic-etnografic dai ladins des Dolomitis (ALD). Chest progèt al è stât elaborât sot la direzion dal prof. dr. Hans Goebl e al propon un cuadri detajât sul cont de situazion lenghistiche che si slargje dal Grison svuizar a la Furlanie.

    Inmò simpri l'Institût al à dade la sô adesion e colaborazion al progèt di planificazion lenghistiche "Spell", sostignût purpûr da l'Istitut Ladin "Majon de Fascegn", di Vich di Fasse, e da  "l'Union generela di Ladins dla Dolomites". Progèt a son timp inviât dal Istitut Pedagogic Ladin e dal prof. H. Schmid, di Zurì, che cui "Lineaments pa l'elaborazion di une scriture unificade dai ladins des Dolomitis", al à butât lis fondis di chest fondamentâl progèt.

    Di rilêf ancje l'azion davuelte sul cont de tutele de culture , da l'art, dai cjants ladins e dal prudêl di ducj ju instruments ch'a puedin zovâ al mantigniment dal ladin scrit e fevelât a traviers i media, lis publicazions, lis manifestazions culturâls e i cors di formazion. Dilunc i siei 25 agns di ativitât il "Micurà de Rü" al curât la publicazion di oltri 130 publicazions, ch'a cjapin dentri arguments sicu la publicistiche par fruts fintremai a tratazions di caratar sientific sul cont de Ladine Dolomitane; si proponin tematichis leadis a la storie, lenghe, leteradure, art, musiche, culture popolâr e v.i.; di segnalâ sun chest cont la "Pitla storia di Ladins" e il periodic sientific a cadence anuâl "Ladinia". Fondamentâl ancje l'instituzion di une biblioteche specializade, che met adun une significant ricolte di libris in lenghe ladine o libris scrits in âtris lenghis ch'a tratin aspiet e tematichis de Ladinie. Dongje di chestis tematichis si àn purpûr sezions cun publicazion par ladin-furlan e par ladin-rumantsch, come ancje tes lenghis daprûf sicu todesc, italian e sloven, oltri a libris di lenghistiche e di culture generâl ch'a trati des comunitâts lenghistichis minoritariis dal arc alpin.

    Al reste in fin di segnalâ che l'Institût Ladin de Val Badie, vuê direzût dal dr. Leander Moroder, al promôf contats dirèts cui ladins de Svuizare e de Furlanie, sevi di caratar personâl che ancje instituzionâl.