Dibot za fa dîs agns, il numar di Otubar dal nestri sfuei (n°10 Otubar 2001) al publicave un editoriâl cun chest titul: "Oris 8.48 dai 11 di Setembar: il montafin su New York". Il toc sot vie al tacave cussì: "Il Doi mil al à stât une vore pôc a palesâsi. Sot vie lis dôs Tors Zimulis (Twin Towers) di New York, colpidis e sdrumadis ai 11 di Setembar stât, il mont si è sveât a l'improvise come se al ves brusât inte vampe di un marilamp la felicitât di mieç secul di pâs".

     Il prin di Mai stât, cuntun colp di man ardôs, un pugn di militârs americans a son plombâts ae improvise tal ricet pakistan dulà che al jere scuindût cui che al jere considerât l'ispiradôr de azion teroristiche des Twin Towers, o sei Osama Bin Laden, e lu àn copât. "Justizie e je stade fate, - al à comentât il president american Barack Obama - i trê mil muart di chel afront a son stât vendicâts".

    In veretât di Osama Bin Laden indi vevin fat il contignidôr di dutis lis nestris angossi divignudis di chel tragjic 11 di Setembar di za fa dîs agns. Un sac scûr dulà meti dentri, tal scatûr des nestris ansiis, la pôre di un destin che nus sbrissave vie, consegnât intes mans di une altre culture, di un pinsîr, di un fanatisim che o sintivin "altri" rispiet aes nestris societâts dal Ocident, laichis, consumistis, prontis a sorâ ogni forme religjositât professade cun coerence, se no cun ostinazion fanatiche. Cussì lui, Bin Laden, al fo subite definît il Princip de Scuretât, il Seic dal Diaul, la incarnazion dal mâl assolût. Tal mont dal gnûf mileni,  di Osama si creà la icone dal impussibil tornâ indaûr ae Ete di Mieç, idee e proposits che a cuistavin crodibilitât estetiche dal so mût di jessi, di proponisi, une figure asetiche cuntune muse sutile e insuazade di une barbe di antîc profete.

    Osama Bin Laden al è stât l'Islam de nestre contemporaneitât. O vevin vût prime di lui, a partî dai agns '50, lis vueris dal Medi Orient, ma a jerin stadis vueris dulà che l'aspiet religjôs al jere stât metût in secont plan dal nazionalisim laic de lote palestinese; e se ancje la rivoluzion khomeiniste, ae fin dai agns '70, nus veve puartât indaûr tal timp, il mantiel neri dal Grant Aytollah nus jere parût purpûr margjinâl tal grant fervôr mercantîl dal univiers musulman.

    L'atentât aes Twin Towers dai 11 di Setembar dal 2001 - atentât dal cuâl Bin Laden al fasè propie publichementri la paternitât - al ve doi efiets sconvolzintti sul cors de storie dal nestri timp comun. Il prin al fo chel di fâ sdrumâ, cu lis dôs tors, lis dôs jonis de identitât americane: la invulnerabilitât dal sisteme e la identificazion nazionâl cul jessi une potence superiôr in dut, sul plan economic e inmò di plui sun chel militâr. Il secont al fo chel di saborâ il Risorziment islamic, ma  in formis tragjichis, scûris, che si intorteavin intune sorte di spirâl dulà che e lave a pierdisi, fint a disparî, la ricjece de civiltât arabiche.

    Cu lis sôs 5 feminis, cui siei 26 fiis, cu lis sôs predicjis consegnadis in maniere paradossâl aes gnovis tecnologjiis eletronichis dai videoclips, e dai audiomessaçs, ma infondadis dentri un sisteme di pinsîr arcaic, fanatic, imobil dentri il timp, cu la sô stesse figure simboliche dal refût di ogni contaminazion cu la modernitât e cul Ocident "cristian", Bin Laden al creave tal imagjinari angossât di chê dôs Tors paradis in maseriis la interpretazion dal autentic musulman, nemì, aversari, rindût a batisi fint insom, fint ae muart. La muart puartade ai simbui dal Ocident cristian e colonialist, o ancje la muart suicide inte distruzion dut câs dal nimì.

    Nassût tal 1957 intune ricje famee saudite, al veve studiât Economie, po Inzegnerie civîl par podê lavorâ inte ativitât de edilizie infrastruturâl dal so potent clan, il Saudi Binladin Group. Po impen al vignì cjapât de leture wahabite dal Islam cemût che e vignive praticade a Riad, tal ream di Ibn Saud. Cussì al deventà l'interprete plui restîf di une ortodossie cetant orgoiose. Sostignût di chestis convinzions al le a combati inte vuere dai mujahedin afghans cuintri la invasion "dai infedêi" rus sovietics, davuelzin la funzion impuartant di finanziadôr dai trafics di armis che a coventavin par lâ indenant a batisi.

    E jere po vignude la indignazion pe presince americane intes tieris dai Lûcs Sacris dal Profete dilunc la seconde Vuere dal Golf, chê dal 1991, che Osama al considerà come une profanazion, e par chest al rompè ogni rapuart cui maiorents di Riad, considerâts aromai dai sotan, vendûts ai interès di Wahsinton, tant di condanâ la monarchie saudide cuntune fatwa che la judicave come infam e mertevul di muart par man dai fedêi di Allah.

    La sô trate e jere cussì aromai segnade, inte ambiziose assunzion de funzion di emîr, une leadership che e varès po puartât ae creazion de rêt teroristiche di al Qaeda, ai atentâts cuintri americans di Dar es Salam e Nairobi, il lâ a scuindisi tra i talebans in Afganistan, in fin la vuere sante al Satane american e lis Twin Towers.

    La sôs muart, il prin di Mai stât, no cancele gran i misteris che a àn compagnât la sô vuere totâl al Ocident cristian, che par rispueste e reazion e à creat chê altre vuere totâl, chê di Bush al terorisim, che tancj dams e à puartât al Ocident che pursì al voleve difindi. Cun lui si è sindilade dut câs la icone dal Islam tetri, fanatic, intolerant; viodarìn se la icone e à  puartât tal tombâl dal timp ancje l'Islam che al à creât.     (renzo balzan)