Tumieç - Sabide stade, 19 di Avrîl, alì de librarie "La Corte del Libro" di Tumieç, si è davuelte la presentazion dal libri "Venezia Giulia: la regione inventata". Presints i curadôrs Roberta Michieli e Giuliano Zelco, oltri a doi co-autôrs, o sei Carli Pup e Donât Toffoli che a àn tratât dai temis frontâts di cheste interessant publicazion, in chescj timps plui che mai momentôs. La presentazion e jere stade organizade par cure de Union Scritôrs Furlans, e propite il dean de Union, Renzo Balzan, al à introdusût la cunvigne cuntun intervent che o publichìn culì sot vie

Buine sere a ducj e ben vignûts a chest incuintri, a cheste presentazion di un libri che si ben che nol è dut scrit par furlan al interesse cetant il Friûl e il so avignî. O presentin juste apont “Venezia Giulia: la regione inventata”, curât di Roberta Michieli e di Giuliano Zelco, publicât de editrice Kappa Vu di Alessandra Kersevan, cun contribûts de stesse Kersevan, di Giorgio Banchig, di Sandri Carrozzo, di Adrian Cescje, di Licio De Clara, di Carli Pup, di Pietro Purini, di Sandi Volk e di Donât Toffoli.

    Cheste vicende des regjons inventadis e je pluitost curiose e si ripet dispès. No dome la Venezia Giulia e je une regjon inventade, ma ancje l’Alto Adige e je une regjon inventade, parcè che di simpri chês tieris a jerin stadis clamadis Sud Tirôl, “Tirolo Meridionale”, par talian. Ma restant chenti ancje l’Alto Friuli e je une regjon, une entitât teritoriâl, inventade. Cuant mai la Cjargne, la Val Cjanâl e il Cjanâl dal Fier sono stadis tieris “Altofriulane”. Cheste pantumine di inventâ regjons cence nissun rispiet pe storie e je avonde curiose. Ma forsit nancje tant parcè che chestis cjossis no nassin mai par un câs, daûr al è simpri un calcul, une smire, un interès. Giorgio Ferigo sun chest cont al è veve ideis avonde precisis, e cuant che fevelant e saltave fûr la peraule “Alto Friuli”, al gambiave la espression de muse, che lui al jere un storic si passionât, ma puntiliôs e cetant documentât.

    A ogni bon cont il libri che o presentin culì usgnot al fronte un probleme reâl: difat in face a une regjon inventade, la Vignesie Julie, o vin une regjon vere, storiche, viele di almancul mil agns che e riscje di sei scancelade, glotude, normalizade. O feveli naturalmentri dal nestri Friûl. Un disaran i curadôrs e i autôrs cemût che a un ciert pont e je nassude cheste idee di inventâ la regjon Vignesie Julie, parturide dal iredentisim e dal nazionalisim talian che al voleve a ducj i coscj slargjâ i confins de patrie taliane viers soreli jevât, ancje in tieris dulà talians no’nd jere gran. La conseguence logjiche plui imediade di cheste matetât e je stade la prime vuere mondiâl. Un conflit che in chestis tieris al è stât une tragjedie grandone, un drame infinît, piês di cent taramots. Dramis e  tragjediis che po a àn preparât, e inviât, i dramis e lis  tragjediis inmò plui grandis de seconde vuere mondiâl.

    Pierdude, malementri, la seconde vuere mondiâl, vuere di agression vergognose  viers tieris e popolazions che a domandavin dome di jessi lassadis in pâs, pensait dome ae matetât de campagne di Russie, cualchidun al à pensât pulît di salvâ la barache de retoriche nazionaliste recuperant la naine de regjon inventade, che dut câs  e comprendeve aromai dome la citât di Triest. Inalore e je partide la seconde “fase” de operazion Venezia Giulia, o sei slargjâ e ingrandî la citât-regjon, cirint di zontai dongje Monfalcon, Gurize, Grau e fintremai Cervignan. Une tierce fase e proviôt inmò che il Friûl al sparissi e che la regjon interie che o vin cumò si clami juste apont Vignesie Julie, e vonde. Cussì invezit di slargjâsi viers jevât (orient), secont il progjet origjinari, la regjon inventade si sta slargjant viers bonât (ocident). Il prin pas al è stât fat, co cence che dibot nissun no si acuarzi al è stât gjavât vie il tratin che al divideve il Friûl de Vignesie Julie inte dizion de forme uficiâl, il rest al rivarà in curt.

    Altris aspiet di cheste politiche, furbe, di sfurlanizazion a pro de julianizazion e je la oposizion a dut ce chel al po valorizâ il Friûl, de lenghe ae Universitât, de impostazion dai media, cun Rai Triest in prime file, ae burocrazie regjonâl, e fintremai ae politiche agricule. Pensait al câs curiôs de “mela dop Julia”, cuant che ducj a san che des bandis di Triest nol cres un mêl nancje par scomesse, e la produzion dai mei si le à dome tal Friûl di mieç e disore, e in Cjargne. Gianfranco D’Aronco al use a dî che o sin daûr a deventâ la braide de citât di San Just, e secont me al è cetant dongje de veretât.

    Jo o soi il president de Union dai Scritôrs Furlans, e partant o scugni dî alc su la culture e su la lenghe dal Friûl. La nestre lenghe e je dal sigûr un dai mieçs plui valents par oponisi a chescj progjets cuintri furlans. E rapresente il riferiment plui salt e sigûr ae nestre identitât, ae nestre storie aes nestris tradizions. La cuintri prove che a pensâ mâl si fâs pecjât ma che si va dongje de veretât, la vin vude cu la acanide oposizion che i sorestants triestins, di diestre e ancje di çampe, a àn metût in vore intai rivuarts de gnove leç regjonâl pe tutele e valorizazion de lenghe de culture furlanis, tant al è vêr che le àn fate impugnâ denant de Cort Costituzionâl. Stes discors pe Universitât di Udin, che a cirin in ogni maniere di contrastâ, cumò ancje cul cjaval di Troie de Fondazion Regjonâl, un mecanisim dal sigûr mortâl pal nestri ateneu, un dai plui prestigjôs e atîfs de Italie, e juste par chest cjastiât cul sot-finanziament.           

    In conclusion o crôt che chest al sedi il libri just par tignî vîf il dibatiment, par tignî alte la vuaite, par sveâ la nestre int e par judâle a capî e interpretâ une storie che i libris di storie no contin, o pûr a stravuelzin. Cirìn di impegnâsi ducj parcè che il Friûl nol vebi di jessi glotût de “Regjon inventade”, o ben che nol vebi di deventâ une “Regjon dineade”.