Triest - Il gnûf president (governadôr) de Regjon Friûl Vignesie Julie, Renzo Tondo, al à bielzà cjapât possès des funzions e dal so ufizi di sorestanzie a Triest. Une elezion, la sô, che e je il risultât di une votazion che a pene za fa cualchi mês e semeave impussibil, o ben dome il sium di cualchi partesan afanôs. Invezit, scandais, esperts e ce a son stâts buzarâts ben e no mâl. La int e à volût voltâ la pagjine. E à volût provâ alc di diviers cun dut che il president denant, Riccardo Illy, nol ves fat propit dut ledrôs. Par esempli o scugnìn jessi almancul agrâts pe atenzion che al à vût pes minorancis di cheste Regjon, impegnantsi a fâ buinis lis leçs pe tutele des comunitâts slovene e furlane. Propit sun chest cont, ancje daûr di ce che al è stât declarât intant de campagne eletorâl, no pocjis preocupazions si stan palesant cu la cjapade dal tamon de Zonte regjonâl de bande de coalizion di centri-diestre. Si è fat juste apont testemoni di chest malstâ il dean dal autonomisim furlan, professôr Zuanfranc D’Aronco, che sul Messaggero Veneto di domenie 20 di Avrîl al à scrite une letare vierte al gnûf governadôr Renzo Tondo. Il test dal intervent, voltât par furlan de nestre redazion, lu publichìn culì sot vie. (red.)

Sâr president Tondo, i scrîf cheste letare vierte cence la presunzion che dentri vie lui al puedi cjatâ cualchi rie di fâ sô. E inmò cence la pretese di fevelâ a non di une part de int di cheste Regjon, considerât il fat che achì o rapresenti dome me stes, no garantît di nissun contrassegn di partît: e chest al è dabon masse pôc. Dome o vorès preâlu, se propit al coventàs, di no butâ intes urtiis - su lis alis di une vitorie eletorâl - precedents esperiencis sôs e di altris, lontanis e resintis.

    E lu prei purpûr di no volê fâ di proposit il contrari di ce che al à fat il so imediât predecessôr. Che al cjapi come esempli l’imperadôr Cesar August (vieri, ma simpri bon), che al ve cure di preseâ ce che al mertave di jessi preseât di cui che al jere muart al improvîs lassant libar il puest e di cambiâ ce che al coventave, ma no dut. E je vere che aromai o sin intun regjim bipolâr, cun previodibilis alternancis ae fin di ogni legjislature. Ancje cheste volte lis peraulis clâf di ognidun dai schiriaments politics a jerin “cambiâ” pal “gnûf”, fatis propiis fintremai di cui che al voleve cjapai la volte ai siei stes compagns di partît o aleâts. Cussì al è di scrupulâ che al puedi sucedi ancje fra cinc agns, cuant che la maiorance e sarà fate dai discontents e la minorance dai sodisfats. Si cambie par cambiâ: e je la plui grande consolazion che il biât eletôr si cjape daspò tantis delusions. La femine e je balarine, si sa (a ’nd è stâts esemplis ancje di resint), ma nancje l’om nol è dabon di mancul.

    Lui al jere restât deludût chê altre volte (2003) e vuê ur è tocjât a chei altris. Illy al à vût cûr di svuincâ fotografiis e declarazions dal sigûr intrigosis, volint evitâ ogni spetacul. No ducj dut câs. Fra i siei partesans, il vice al è stât cjapât di un gjornâl cuntun fâ di stâ in pense e il cjapiel neri flos sui vôi, che al à ripiât ae memorie (mutatis mutandis) une altre istantanie di un tâl no plui cun dople greche su lis maniis, ma in borghês, infondât inte Cicogne di Skorzeny sul Gran Sasso (1943).

    Se jo o fos al so puest (jo o soi jo e lui al è lui, ma al vignarà il gno moment: o soi inmò zovin), o starès ben atent a no butâ vie il frut e insiemit cu la aghe sporcje. E o scomenci dal furlan, che e je la nestre lenghe mari, e o crôt ancje la sô. Lui al è furlan, anzit cjargnel (cjargnel al vûl dî dôs voltis furlan), ma nol à dât di viodi di jessi ben disponût intai rivuarts de gnove leç sul furlan: forsit dome parcè che e je stade prudelade cun convinzion di Illy (lis resons particolârs no  nus interessin). Po ben che leç alì lui le à definide “un scartìn”: darest e je stade ancje “impugnade”, par aspiets di pôc cont, dal guvier di Rome: cheste e je biele, di centri-çampe, o sei dal stes colôr de maiorance lade in struc. Che al sinti cheste, sâr president. Lui par television al à declarât cuntun fâ disdegnât, sù par jù: “E sarès ben biele che jo o ves di fâmi insegnâ il furlan di un triestin”. Dacuardi. Ma che al sedi coerent. E che al dîsi ancje: “E sarès ben biele che jo o ves di fâmi insegnâ il furlan di chei di Rome”. Lui al è su chê poltrone par siervî i furlans, no par avilîju. I Comuns de interie regjon, purpûr cussì malementri imbastide, a àn domandât a maiorance assolude il furlan intes scuelis e intai ents publics. Lui, che al à fevelât a pitinton di “imposizions”, al sa impen pulît che la resinte norme non impon nuie di redenzie. Il servizi-ufierte dal furlan lenghe al va realizât, secont lis disposizions europeanis e lis leçs, sevi nazionâl che regjonâl. Cui che no lu vûl - un su dîs -, paron. Ma nol po gran dineâlu a chei altris nûf.

    Cemût che al viôt, sâr president, mi fermi suntun argoment. Ma a ’nd è altris che a stan a cûr a ben plui di un su dîs. Par esempli lis  grandis oparis, come la ancje masse laudonade TAV che e savoltarès di plante fûr la Basse Furlanie, cuant che al sarès cetant plui judiziôs potenziâ lis feradis che bielzà a esistin (baste slargjâlis).

    Si sparagnarès di sdrumâ cjasis, di disseparâ paîs, di fiscâ la campagne. E ducj chescj montafins cence che il Friûl, condanât a une servitût di passaç, nol puedi tirâ fûr il minim vantaç, jessint la Tav al servizi dome di Vignesie e di Triest. In subordin il resint apel di Gherghetta, president provinciâl dal Friûl di Jevât, pal Coredôr diret fra Gurize e Lubiane, dilunc il Vipac, sparagnant chilometris di tunel  sot vie dal Cjars, isal par lui di lassâ pierdi? 

    Altre grande opare (cualchidun al à dite che grandis oparis al vûl grancj afârs) l’eletrodot cu la Austrie,  su lis entimis a disin: cussì la Cjargne (la sô Cjargne), fintremai a vuê bandonade, e vignarà disfigurade, cul fin di puartâ energjie in Friûl par po vendile inalgò. No tiri fûr il cantin de autostrade Cjargne-Cjadovri (la sô Cjargne), che nissun nol vûl mancul i industriâi di ca e di là de Maurie, biel che pe statâl, che si po slargjâ e indreçâ cence grancj problemis, a esistin progjets che a polsin di daspò mai intai cassetins.

    Inmò: lis cassis di espansion sul Tiliment, tra San Denêl e Osôf, consideradis, di specialiscj universitaris di grande innomine e di cualificâts difensôrs dal ambient come une matetât cuintri nature: chestis cassis lis metaraial almancul, viodût che lis à vudis in ereditât, su pal salâr?

    Sâr president, o speri che al cjapi chest gno intervent par chel che al è: une tabaiade cul cûr viert; clamâlu discors mi pararès di pratindi dabon masse. Un so lontan predecessôr, che politichementri al pendave de sô stesse bande, al ve la benvolence di menzonâ cualchi rie di un gno scrit, scuasit che a fossin peraulis storichis, intant dal so discors programatic (1993). Mi ingloreai cussì tant che lis fantasiavi bielzà pituradis a caratars grandons sui cjasâi di mieze Furlanie. No tornarai a colâ inte vuate di chê ilusion, subitementri disfantade al lancurôs disveâsi. Ma che al crodi, compatriot furlan: lui, finît che al varà di leimi, al zirarà la pagjine riduçant; ma cualchi cjosse istès forsit i restarà “in fonts de anime”. Al è miei no creâ masse discontents: il “gnûf pal cambiament” lu spiete dal infalibil ca di cinc agns. Che no nus fâsi lutâ in chê volte par un president triestin. (Zuanfranc D’Aronco)