Dieç di Tumieç - A vegnin indenant teribii, spade, arc, forcje alçâts, a subissin i misars cuarps cui çocui dai lôr cjavai, lassant daûr di lôr maseriis e neulis di polvar.

    A semein pardabon che a vebin di movisi cuntun impit cence slaifs i cuatri cavalîrs de Apocalìs che Albrecht Durer al realizà tal 1498 intune rieste di cuindis incisions “Apocalypsis in figuris”, interpretant cussì la spetacolâr vision dal libri profetic scrit dal apuestul Zuan.

    Chê vude iniment denant trat e je dome di une des tantis preseosis oparis di autôrs europeans che a son esponudis   dai 28 di avrîl stât, e fintremai ai 30 di setembar cu ven, inte mostre “Apocalìs. La ultime rivelazion”, organizade inmò dal Comitât San Florean, alì de Cjase des Esposizions di Dieç di Tumieç e che aduncje si propon cetant spetacolâr, pal teme ma ancje pai tancj cjâfs di opare, divignints di dute la Europe e ancje de Americhe, di grancj autôrs come Guido Reni, El Greco, Salvador Dalì, Giorgio De Chirico.

    Ducj artiscj atrats dal malibiâmint di un test che, si ben cun dute la sô complessitât, al po dî cetant al om dal dì di vuê. Vadì che al è un test che, intune ete di indifarence come la nestre nus sabore a cjapâ plene cussience de nestre vite, fasintnus capî cemût che une esistence plene no puedi no jessi colegade al impegn sot ducj i aspiets. Vadì che i organizadôrs a àn sielzût chest teme parcè che la Apocalìs al è in fonts il libri de Sperance e il libri che al sosten tal timp de Prove, un test che al oblee i crodints a lei il davuelzisi de Storie come un trionf di Diu.

    Dal rest Apocalìs - che par grêc al vûl dî juste apont rivelazion - e je une vision grandiose e dramatiche, scrite sul finî dal I secul in forme di lungje letare e, a trats, di dialic liturgjic. Chest al è sucedût su la isule di Parhmos, tal Mâr Egjeu, dulà che, secont lis  testemoneancis si cjatave in esili l'apuestul Zuan, che propite alì al ricevè lis rivelazions che a sigjilin la Bibie. Il messaç afidât a Zuan al è in definitive la rivelazion, a partî de muart e de resurezion di Crist, dal sens de storie umane. No, aduncje, anunzii de fin impreteribil pe  trate de umanitât, ma ben invezit Apocalìs come libri che al sabore la sperance.

Tematichis partant che a puedin jessi letis  inte lôr atualitât, tornant a meti in contat la nestre gjenerazion cui grancj tescj de storie culturâl e spirituâl dal Ocident, e proponint dutun in chel il leam fondamentâl che al esist tra cristianisim e Europe.

Cemût che al à vût mût di sclarî pre Alessio Geretti, curadôr sientific de mostre, ancje par cheste edizion de grande rassegne di Dieç si son rivâts a otignî in afidament “prestits impegnatîfs”. Cussì tra lis oparis plui preseosis o cjatìn une piture su sede di Guido Reni, che nus mostre San Micjêl che al cope Satane (1626), divignint de glesie di S. Marie Imaculade di Rome, la Imaculade concezion e la “Asuncion de la Virgen” di El Greco (divignints il prin des Asturiis e chel altri di Madrid).

    E po iconis russis, come la innomenade “Salvadôr in tron” de scuele di Novgorod. Lis oparis plui antighis a son vieris dal secul IV, come “la Grote de Virgjine”, esempli di oresinerie bizantine, in cristal, divignint dal Tesaur di San Marc a Vignesie. No dome. Chest an - e cheste e je une novitât - la esposizion e à volût tocjâ purpûr il Nûf cent, forsit propit par sotliniâ la atualitât dal teme tratât. Ve alore lis vincj e dôs litografiis “Apocalìs” di Giorgio de Chirico o “L'Hostie” di Salvator Dalì.

    La grande mostre, organizade cemût che si à vût iniment denant trat dal Comitât di San Florean, che al à za vût mût di fâsi preseâ pe organizazion di grancj events espositîfs come “Floriano”, “Mysterium” e “Martino” e sarà purpûr la ocasion par proponi altris acjadiments culturâi impuartants pal pinsîr e pal spirt, simpri sul teme ispiradôr dal ultin libri de Scriture.

    Par esempli tra il 8, 9 e 10 di jugn cu ven si varan dai moments pardabon di grant interès. Vinars 8 si varà l'incuintri cul arcivescul di Praghe, cardinâl Miloslav Vlk, che al vignarà a Dieç a contâ la sô esperience dal secul vincjesim e lis dinamichis “apocalitichis” che lu àn viodût testemoni.

    Inte sore sere di sabide 9 si varà il spetacul teatrâl Kavanàh di Moni Ovadia, dulà che a vignaran memoreadis lis tragjediis de storie e de Shoa e lis domandis apocalitichis di chei che a crodin, e di chei che a cirin inmò il troi de presince di Diu.

    Domenie 10, tal daspò misdì, si varà impen une cunvigne sul Cjant sacri popolâr, cu la partecipazion di dutis lis cjantoriis dal Friûl che a àn mantignût memorie dal repertori liturgjic, trasmetût a vôs par secui e inmò cjantât di ciertis comunitâts. Ae fin de cunvigne, il cardinâl Albert Vanhoye, innomenât biblist, al tignarà sù i Gjespui cjantâts secont la viere tradizion dieçane.

    Di memoreâ e je ancje la cunvigne che si davuelzarà inte sore sere dai 11 di lui, cu la presince dal filosof e scritôr Umberto Galimberti, autôr dal libri “Il tramonto dell'Occidente”, dal rabin roman Benedetto Carucci Viterbi e dal biblist furlan bonsignôr Rinaldo Fabris, che si confrontaran sul teme de Apocalìs, de storie e de sperance, dal pont di viste des diviersis prospetivis dal mont laic, ebraic e cristian. (von zercläre)