Ducj si lu sa che la storie, come che e ven spiegade intes scuelis, e à plui parintât cu la “educazion nazionâl” che no cu la veretât. A son i parons dal vapôr che a stabilissin ce che al va contât e ce che al va tasût: baste pensâ a Napoleon e al nestri gloriôs “menadôr”. E ogni volte che la buere politiche e mude direzion, a scugnin mudâle ancje i libris di storie: la veretât e à tantis musis che si vûl se si sa parâle ator daûr l'aiar che al sofle e metile al siervizi de politiche!

    I scuelârs di chestis anadis lu viodin e lu san. E je une sole robe che no mude, la plui ridicule e antisociâl di dutis: il spirt nazionalistic che al cîr di dâ dintindi a ognidun che il so paîs e la sô int a son i prins, i plui grancj i plui brâfs dal mont. Pai francês la France e je il braç di Diu: “Gesta Dei per Francos”; pai todescs il gjermanic al è “l'Herrenvolk”, il popul paron dal mont; pai talians e je veretât santissime il “Primato morale e civile degli italiani”. E Diu nus vuardi a no crodi! Cui che nol crôt a chestis robis, nol pò jessi pront a fâsi sbudjelâ pe patrie: e chest al impuarte plui di dut a ogni guvier!

    Cuintri di chest stupit malcostum e salte fûr, ogni tant, une vôs invelegnôse che e sgnache in muse ae storie uficiâl juste chês robis che la storie uficiâl e cîr simpri di tignî taponadis. Par cont di noaltris al baste vê iniment “La lotta politica in Italia” di A. Oriani, fanatic e fassist denant de ore, ma a so mût cuintriconformist; “Il fantasma liberale” di G. Colamarino; e ultime e plui furiose di dutis, la “Antistoria d'Italia” dal triestin F.

Cusin. Nol è di dî che in chescj libris si puedi cjatâ un vanzeli, o une obietivitât di meti la man sul fûc: a fuarce di volê lâ cuintri il conformisim uficiâl, a colin intun conformisim contrari. Ma un grum di veretâts coragjôsis si cjatilis e, se no altri, si à la sodisfazion di viodi almancul cualchidun a petâ cul picon intor di une costruzion impastade di luianiis.

La storie dal Friûl, par fortune, intes scuelis no si insegnile: cui sa ce mignestre che e vignarès fûr! Ma, o pôc o trop, sui sfueis, intai discors, in cualchi libri, si tirile in bal: nancje dîlu, in sens nazionalistic. Veretâts dogmatichis fondamentâls: 1) la grandece e la civiltât dal Friûl e fo opare di Rome; 2) la salvece dal Friûl cuintri la barbarie todescje e fo merit di Vignesie; 3) la plui grande brame e fortune dal Friûl e fo chê di jessi unît ae Italie. Rome, Vignesie e l'Italie a forin chês che nus puartarin ogni ben: onôr, glorie, civiltât, prosperitât, potence e vie indenant. Conclusion: noaltris o scugnin jessi lis “sentinelis” impavidis de Romanitât, de Venezianitât, de Talianitât cuintri i lôr tradizionâi aversaris; e fâsi copâ.

    E se o provassin a fâ un fregul di cuintristorie dal Friûl, lassant di bande dutis lis sflocjis e i prejudizis, e contant ancje chês robis che ai “parons” no vadin masse a scuare? No par cjoli di man lis armis aes “sentinelis”, ma parcè che e je ore che ognidun fasi ce che al crôt so dovê cuntune cussience plui drete e positive e no par efiet di bufulis propagandistichis.

(josef marchet) “Jentrade ae Cuintristorie dal Friûl” 

Dutis lis panzis plenis cuintri l'ordenament regjononâl

     O vin dit e tornât a dî un grum di voltis che l'ordenament regjonâl stabilît inte Cjarte Costituzionâl al è juste une buzarade, une cjastronade che, impì di risolvi lis cuistions, lis imberdearà di plui, cence tocjâ nancje la ponte di un dêt la madrachesse burocratiche.

    Ma cumò, a viodi cun ce grinte che tornin a sbilfâ ducj in cunvigne, liberai, monarchics, fassiscj, e int massepassude di ogni sete, cuintri l'atuazion di chel disgraziât articul de Costituzion, nus ven il scrupul che alc di bon al puedi puartâ. Si tratarà di cagneris, ma se almancul un fregul di risultât, un pôc di rispîr, un sgrisul di benefizi nol fos in viste, no si sintarès cun tant bordel a sunâ lis trombetis dal Risorgiment, e i tambûrs de sacratissime unitât: co si dismôf chê musiche lì, al è di zurâ che a cualchidun i dûl il tacuin, o che i trime la mangjadorie.E alore cui sa che no si vebi, salacôr, di ricrodisi, sul cont di cheste “pape di lin”?… (j.m. - Patrie dal Friûl - 1950)

Il scritôr in lenghe taliane, rafinât, al cambie aduncje, in poesie, regjistri linguistic. Inalore il furlan di Elio Bartolini al corispuint, o crodin, dome ae dibisugne che lui al sintive fuart di dialogâ cun ce che al jere restât dal mont contadin, di doprâ chest istrument linguistic par riproponi in se il revoc, fat poesie, di peraule cetant concrete, di un mont aromai ridusût dome a olme o dome a memorie di insuazâ e meti a confront cuntun svilup biel avuâl omologant.

    A son considerazions di letôr lis nestris, e come tâls sogjetivis e contestabilis, ma une volte di plui prudeladis de leture-rileture di : “Cansonetutis” (Udin / 1980); “Cansonetutis e altris cansonetutis” (Codroip / 1981); “Poesiis protestantis” (Milan / 1982); “Cansonetutis tiersis” (Codroip / 1982); “Amour e dîs di vore” (Vignesie / 1985); “Come colours” (Florence / 1992); “Cansonetutis” (Vignesie / 1999); “Poesiis” (Basandiele di Cjampfuarmit / 2006).

    A conclusion des riflessions che nus divegnin tal rilei lis rimis di Bartolini, ve che nus cole il voli propit su la poesie “Vivi e murî”: l'uniche ciertece e je chê dal vivi ingropât a strent cul murî. Bartolini nus al fâs intindi cun imagjinis une vore espressivis: “In t'un polsâ, avuâl/ ma no content/ la sô false remission/ tant che di fen pletis d'une stagjon/ restadis/ in spiete de forcjade che a li’disfi/ cussì il nestri vivi/ e jù pe trombe al sarà dome un sbrunt/ il nestri murî”. Dal toblât de vite ae vicende universâl che in fin nus fasarà lâ jù, dentri la tiere de “grande lontanance”, intun sium eterni cence sium.

    O tornin a ripetisi: Bartolini al è stât dal sigûr un tra i plui grant tra i scritôrs furlans; dut câs no il plui popolâr e chest al jere inevitabil par vie che il so confrontâsi cul mont nol jere mai stât sempliç, ma cetant complès. Bartolini al veve la sensibilitât dal filolic, la sience dal storic, il gust dal contâ critic e ironic. Inmò, al à contribuît, in maniere significant, ae rinassite de poesie furlane tal timp dal daspò taramot, parie cun Giacomini, Pitane, Valentinis, Siro Angeli e Lenart Zanier: “E sempiterno chel cjantâ ’ne danse/ d'amour e di dolour/ come di mâr sot ajar onde/ come in cîl di viarte nûl:/ cussì il vivi davuârzisi al varès/ ’ne lûs ’ne vôs un non/ ancje un suspirâ, un vaî parfin/ la veretât a pàndi”.