Vençon - E nas te nestre Regjon une gnove rieste di publicazions ch'a sierviràn par riscuviergi lis radîs e lis specificitâts de Patrie dal Friûl, e ch'a saran un preseôs instrument di consultazion par ricostruî la storie locâl. Si trate de golaine "Statuti comunali della Patria del Friuli" realizade de Forum Editrice Universitarie Udinês, prudelade de Provincie  di Udin e coordenade dal dr. Marco Cavina, docent alì da l'Universitât dai studis di Udin.

    Di resìnt al è stât presentât te Cjase de Cumune di Vençon il prin volum de ricolte, dediât justeapont a la viere citadele fuarteçade ch'e je stade la puarte dulà che si scugnive passâ par jentrâ in Furlanie de bande di tramontane. I antîcs statûts cumunâi no son dome la risultive juridiche plui significant  par rivâ a comprendi lis societâts di antighe instituzion ma a forin ancje, par almancul cincent agns, un simbul privilegjât dulà che lis comunitâts locâls grandis e piçulis si ricognossevin e a cjapavin cussience dal lôr esisti.

    Si trate in sumis di fonts essenziâls, testemoneancis di alte  autonomie e di autodeterminazion che parâtri a risultavin dispès dificilis di cjatâ fûr pai studiôs e par ducj chei ch'a vulin ricercjâ a fons te cognossince dal Friûl. Vè parcè che la Pronvicie di Udin 'e à intindût promovi cheste golaine, ch'e viodarà la publicazion dai antîcs statûts cumunâi de Patrie dal Friûl, inricjint cussì cun preseôs tescj, dispès mai publicâts denant trat, il contest dai studis sul nestri teritori. Nol po’ infats jessi avignî cence la consapevulece des radîs di dulà che si svilupe l'arbul-comunitât.

    Il statût di Vençon al jere metût adun di 240 cjapitui, e al veve il compit di regolâ la vite publiche fasìnt riferiment, par esempli, ai delìts cuintri la religjon e l'integritât fisiche des personis, ai dazi e 'es tassis, a la cundizion dal forest e a  chê des feminis, ai pignoraments e 'es sucessions. La "potestas statuendi" a Vençon e jere stade ricognossude dai patriarcjis viers la mitât dal diesim-tierç secul. Cheste citadele dilunc la Ete di Mieç e fo simpri un centri cetant impuartant, cun tune popolazion, a la mitât dal Cincent di 1648 abitants. Prime feut dal Patriarcjât di Acuilee, Vençon tal 1420 (come il rest de Furlanie) al è colât sot la dominazion de Republiche di Vignesie.

    La ricolte statutarie, cemût ch'al displee il dotôr Cavani te jentrade da l'opare, e varès di jessi stade metude jù tal tart '300 e riformade, daspò l'ocupazion di Vignesie, dal Consei dai Cuarante il 30 di avost dal 1425: e cussì e restâ in vôre fintremai al 1797. Il statût al è stât parâtri riscrìt tal 1568 in italian volgâr o miei in toscan, par man dal vençonàs Lenart Pozzi che lu dedià ai sorestants de citadele. E 'e je propit cheste l'edizion ch'e compâr tal libri. 

Vè cualchi esempli (voltât par furlan) : "Se cualchidun, cussì forest come vicin, al darà a cualchidun un patàf  su la muse cu la man vierte, ch'al sedi cjastiât cu la pene di cuatri liris" , opûr "Che nissun nol vebi di butâ aghe fûr dai balcons e i cunfins di cjase sô o su la place o su la  strade publiche, in pene di solts cuatri". O, inmò, "Che nissun al gjavi clas de Vençonasse in ûs  pes dibisugnis di fornâs, sot la pene di solts vincj par ognidune volte".    

          Cavina al sotlinie cemût che in Friûl il fenomin statutari si sedi svilupât tra il '300 e il '400, in contescj urbans che no cuistàrin mai chê autonomie pulitiche propie di âtris realtâts da l'Italie di 'Sore. Lis piçulis patriis comunitariis a cjapavin dentri tai propis statûts l'orgoj pe propie specificitât, ma e palesavin dutun in chel, un vîf sens di apartignince a une patrie plui slargjade, la Patrie dal Friûl. Ancje par chescj aspiets il statût, plui di ogni âtre font storiche, al rapresente tal inmaginari, l'anime profonde e sclete di une tiere.  (von zercläre)

Ta cheste pagjine risiervade 'es recensions dai libris in marilenghe o tratìn cheste volte de ricolte di poesiis "Aghe Risultive" scritis di une autore che no je furlane, ossei Francesca de' Manzoni Boschini. E sclarìs justeapont la nestre poete te jentrade da l'opare: "No soi furlane, e no son furlans i miei genitôrs, ni i miei vons; o sìnt dutcâs ta l'anime la lenghe, la storie di une int che mi è cjare, ch'o ai vût l'ocasion di jentrâ in rapuart tai agns plui formatîfs e significants de vite e che, in part, a coincidin cu la dure esperience de vuere. A Glemone o ài inmò bogns amîs (tancj, magari cussì no tal simitieri). Di plusôrs agns mi mancjin lis ocasions di fevelâ furlan, cundutachel no ài mai dismetût d'interessâmi de culture, de vite, de Patrie dal Friûl". Di chestis pôcjis riis o crodìn che si rivi ancje a capî che Francesca de' Manzoni Boschini e je stade une insegnant, cun tune lungje cariere davuelte ancje tai paîs de nestre mont. De sô biografie o vignìn a savê inmò ch'e je  laureade in letaris e che in dì di vuê i vîf a Verone. Un âtri aspiet interessant al rivuarde la grafie furlane ch'e à doprât : chê dal vocabolari e de gramadie dal glotolig Zorç Faggin. Juste il professôr Faggin sul cont di cheste autore e di cheste opare nus sotlineave il fat cetant interessant che nome tal Cincent si po’ cjatâ un câs pareli di chest : chel dal poete e prosadôr vinizian Zuan Batiste Donât.

    A une prime leture di chestis poesiis si à l'impression di une armoniositât dai viers zontade a une indeclinabil musicalitât, pa l'originâl genialitât des inmaginis ch'a rìvin a  creâ te nestre ment, pal sens dal realisim che ju travane. Ancje la sutîl maluserie ch'o cjatìn no rimande dutcâs a un inconsolât pesimisim colegât a la concezion de vite, ma a une sufierte dolcece ch'e olse simpri a metisi in discussion te malcujetece di une ricercje dibot mistiche:

Cemûd varessio jo podût/ - cumò aghe risultive -/ cul cûr scjafojât di spinis/ e burlaçs neris tal orizont,/ cemûd varessio mai podût olmâ/ un sclip, sepûr piçul, di poesie?/ Risultive di aghe frescje,/ reful sarodin a consolâ il cûr,/ binidizion de inzalide taviele./ Al è savôr di miluçs ingranâts/ picjâts in verdis ramis lizeris;/ o spere sflandorose di soreli/ ch'a slungje la sô lûs tra cîl e tiere."   

      Si sint ancje ta chestis poesiis une fuarte nostalgie da l'autore pe tiere furlane , tiere ch'e rive a cuistâ aspiets dibot magics tai slargjâts clarôrs da l'inviêr. Tal ricognossi i odôrs dal fum, de polente e lis sensazions di un frêt lusorôs, a tratis trasparint: tal ricognossi lis inflessions de lenghe, lis sôs vocâls viertis, lis sôs sibilants ch'a sfiorin il sens secret, inesprimibil, clupît in dut chest mont: "Cuanche si fevele in fraterne/ e si sintisi dutune,/ il cûr al è dut invuluçât/ tal meracul de amicizie./ Al è come a podê gjoldi/ tes seris d'Unviêr e di buere,/ scrufujât sot la nape,/ oris di pâs e di misteri."       

    Inmaginis puris, dolcis, serenis si compagnin a une lenghe ancje jê pure e delicade che nus fâs sintî la bielece des cjossis e la crevulece dai sintiments. Chest mac di poesiis di Francesca de' Manzoni Boschini nus comuniche sintiments diviers e aspiets ch'a fàsin part dal nestri jessi plui instrinsic. E je poesie di vite, di amôr e da l'anime la sô: "La lune a filave, a filave,/ e un vêl di smavid lusôr/ sul blu perlât de gnot/ al displeave. E il so magheç/ stralusint al bušave/ il neri misteri dal mond."

    Al reste inmò di dî che la ricolte e je stade publicade da l'editrice "Blu di Prussia" di Plasence e che il rigjavât de sô vendite al vignarà dut distinât  a jutori dai fruts malâts di Aids.