A Stupìze, ai 21 di dicembar stât, la stangje di len blancje e rosse poiade sore doi cavalets in chê che e jere la tiere di nissun e je colade in mancul di vincj minûts daspò de miezegnot: e je stade seade dai sindics di Pulfar e Cjaurêt. Cussì la Furlanie e je deventade la crosere de gnove Europe, tra un svintulâ di bandieris e denant une fole di circje doi mil di lôr, che a scriulavin di gjonde e a batevin lis mans.

    Il vieri confin tra Furlanie e Slovenie (il confin di Tito si diseve une volte n.d.r.) al è stât finalmentri scancelât sot i voi complasûts dal president de Regjon, Riccardo Illy, e dal ministri dal Forest sloven Dimitri Rupel, che si son strenzûts a lunc la man, biel che la lune tal cîl stelât e i fûcs di artifizi a inluminavin la gnot lambre e frede.

    Ce che al è sucedût a Stupìze al è sucedût purpûr dilunc dute la viere spaltade di Tarvis a Monfalcon. Fiestis e cerimoniis si son cussì davueltis da Raibl a Ucee, de mont Cjanine a Puint Vitorio, da Robediscjis a Polave e Solarje, e po dilunc i Cuei e il Lusinç fintremai a Gurize. Un vieri sium al jere deventât finalmentri realtât.

    Dut câs chest storic acjadiment nol à interessât dome il Friûl e la Slovenie. Da Helsinki a La Valletta, dal Baltic al Mediterani, dal Portugal aes puartis de Russie, dai 21 di dicembar stât no coventin plui passepuarts e cjartis di identitât par movisi in Europe, e lis lungjis codis aes frontieris a saran dome un ricuart pai gnûfs Paîs de Union Europeane, o sei Estonie, Ongjarie, Letonie, Lituanie, Polonie, Slovenie, Slovachie, Republiche Ceche e Malte, jentrâts juste apont a fâ part de aree di Schengen che e cjape dentri vuê 24 Paîs e cuatri cent milions di citadins che a podaran liberementri spostâsi, cun ricjadudis si scrupule positivis par chel che al inten lis ativitâts economichis, massime chês turistichis e comerciâls.

    Traviersâ vuê il confin tra Furlanie e Slovenie al è come passâ de provincie di Udin a chê di Gurize, nancje no si incuarzi. Ma intai ultins cent agns no je stade dabon cussì. Scuintris nazionalistic, vueris, rivincitis e svindics che a àn puartât muart e soferencis nissun no ju dismentee.  Come che nissun nol dismentee il lâ indenant e indaûr dai confins, cu la int che gambiave bandiere e nazionalitât “par amôr o par fuarce”. Lis dôs vueris grandis scombatudis fra chestis monts e fra chescj boscs a son stadis dabon tragjichis. A àn seondât prepotencis e assis che nissun nol po dismenteâ. Dome la culture e la int e je stade buine di cjatâ la fate a slambraments cussì dolorôs. E di chest o scugnin jessi cetant agrâts a personaçs come Celso Macor, Luigi e Sergio Tavano, Ervino Pocar, Franzil de Gironcoli, Marijan Brecelj, Hans Kitzmüller, Guido Maghet e Ivan Trinko.

     La “rivoluzion ledrose” inviade tal 1989 cu la colade dal mûr di Berlin e rivarà finalmentri a rompi la glace. Di alì al cjaparà ancje la dade il procès di disintegrazion de ex Jugoslavie. Tal 1991 la Slovenie e podarà declarâ la sô bramade indipendence e ancje sul confin di jevât de Furlanie lis cjossis, finalmentri, a scomencin a lâ cetant miôr. Un altri pas significant al rivarà il prin di mai dal 2004 cuant che Lubiane e jentre a plen titul inte cente de Union Europeane. In fin ai 21 di dicembar stât al è rivât il tant spietât prin dì cence confin. Une dade ricercjade, volude. Une puarte vierte par un avignî si spere ric di prospetivis, dut câs inmò di costruî. Ma il doman, pe prime volte, al è intes mans di cui che al vîf in chestis tieris. Cence un confin tra jenfri.

    In sumis, cemût che al à vût ocasion di pandi ancje il vescul di Udin bons. Pieri Brollo, “la colade dai confins e je la ocasion buine par tornâ a scuvierzi lis lidrîs comuns, che a van insot intai prins secui de nestre Glesie di Aquilee. In chest sens nus jude ancje la celebrazion dal an dal sant vescul Cromazi. Cheste cuistade fradaie tra lis ints e i popui di chestis tieris e cjate un leam purpûr inte fede, cemût che al è testemoneât dai piligrinaçs comuns di furlans, todescs e slovens ai santuaris dal Lusari, di Madone di Mont e de Mont Sante”.

    Significants purpûr lis peraulis dal retôr de Universitât dal Friûl, Furio Honsell, che intant di une cunvigne inmaneade a Udin par frontâ lis prospetivis di svilup dai rapuart tra Furlanie e Slovenie, al à ricuardât cemût che la idee dal incuintri e jere stade prudelade di numerôs inteletuâi furlans, convints che la colade dal confin viers la Slovenie al è un acjadiment epocâl pal Friûl, plui inmò de adesion ae Union Europeane tal 2004. Vadì che dispès si dismenteisi che la provincie di Udin e à la trate plui lungje di confin cu la Slovenie, oltri che une salde tradizion di bogns rapuarts. Chest, dut câs, al riscje di restâ un confin “dismenteât”: biel che il slargjament di Schengen al ven vivût come une straordenarie oportunitât massime par Triest, la provincie di Udin e riscje di no jessisi fate cjatâ pronte al apontament, che invezit al po deventâ une cetant impuartante ocasion par cjatâ gnovis iniziativis e gnûfs slancs.

    Juste apont culturalmentri la Furlanie e je la uniche regjon europeane dulà che a convivin lis trê grandis gjarnaziis dal vieri continent: latine (ladins-furlans e talians), slave e todescje. Une realtât multilinguiste e pluriculturâl cussì fuartementri inlidrisade di jessi rivade a conservâsi insin a vê, purpûr in presince di plusôrs tentatîfs di assimilazion. Un patrimoni finalmentri ricognossût ancje de bande dal Stât e fondant il Statût di autonomie speciâl dal Friûl-Vignesie Julie. (renzo balzan)