CRONICHIS DI CHENTI
 

Tumieç - Se in Cjargne tu protestis tu sês cuintri il progrès, cuintri l'ocupazion, cuintri il svilup. Peraulis chestis che no divegnin de bocje dal cavalîr Dree Pittini, come che ducj si sarès puartâts a pensâ, ma di cierts personaçs de çampe nostrane, come Renzo Petris (lei l'articul “Un patto sociale” vignût fûr sul Messaggero Veneto dai 17 di avost stât) e dal professôr D'Avoglio, simpri sul Messaggero in plui di un intervent. Fat chest che al da di viodi il fastidi di cierts diessins viers lis sacrosantis protestis de int de Cjargne.

    Aduncje al sarès il câs di fâ cualchi considerazion su proponût “pat di sociâl" vût iniment di Petris. Un pat si lu fâs tra parts che a sedin al impâr o scuasit. Chel stipulât tra une part fuarte e chê altre debule si clame “pat leonin”, espression propie de dutrine juridiche. Leonin, in fats, al è il pat tra il leon e la gazele. Po ben, in Cjargne di “pats sociâi” che si son po daspò palesâts leonins indi vìn viodûts tancj, ducj lâts a finîle cu la gazele gafade dal leon. La liste e je lungje: de Sade, al oleodot transalpin, aes diviersis versions dal “progjet montagne”, aes gnovis peresons di Tumieç che - a zuravin i visitors ministeriâi e i ascars locâi - non varessin mai inclostrât “detignûts speciâi”, e che invezit cumò a son, al fat che a nestris comuns e je stade gjavade ancje la gjestion des aghis, tai ultins timps fintremai chê di bevi dai acuedots, ae distruzion de agriculture, ae colade de ocupazion, al degrât dal teritori. E si podarès lâ dilunc inmò par une setemane cun cheste sorte di rosari.

    Di   front   al   atac   che   la  Cjargne  e  sta    cumò  paidint su plui fronts (eletrodot Würmlach-Somplât, gjave di Raviei, ocupazion e vie dilunc) e ae prepotence dal podê regjonâl, si à fintremai la pretese che la popolazion locâl no vebi di protestâ, ma di stâ buine, buine e di gloti. Par chel che al inten lis propuestis no i spiete ae int tirâlis fûr, ma aes istituzions, metintsi in sintonie cu la volontât de popolazion. Se no, ce cjosse stano a fâ lis istituzions! Ce cjosse stano a fâ i rapresentants locâi intes istituzions! Ce cjosse stano a fâ in Regjon i conseîrs de Cjargne! Stano de bande dal leon o de bande de gazele? Sono i rapresentants de Cjargne in Regjon o i rapresentants de Regjon ( e dai lôr partîts) in Cjargne? Cui difindial la Cjargne?

    Il “pat sociâl” al pò jessi verementri tâl dome inte misure dulà che la Cjargne e je part contraent a plen titul cuntun fuart podê di rapresentance istituzionâl e politiche dal propi teritori, de propie diviersitât, dai propis valôrs, dai propis interès. Rapresentance istituzionâl che, magari cussì no, i è stade dineade de Regjon, che - indipendentementri dal colôr politic de zonte - e va dilunc a mantignî il podê di spese e di condizionament politic (e eletorâl) in cjâf ai assessôrs e ancje ai conseîrs.

    E, inalore, e fâs ben la Cjargne a protestâ, a no pleâ il cjâf rassegnade denant a une situazion che no promet nuie di bon, aes sieltis sbaliadis e aes prepotencis de Regjon e dai siei rapresentants. E fâs   ben la Cjargne - gazele lizere, svuelte e biele - a cori, a cori e inmò a cori, no dome par scjampâ ae dintidure dal leon, ma par obleâlu a cori ancje lui.                                           (franceschin barazzutti)

DOCUMENTS
 

    Ce fasaraial il Princip, o sei il Podê, in cont dal eletrodot in Cjargne? Che jo o sepi, i gjornâi a àn scomençât a ocupâsi dal progjetât eletrodot Würmlach-Somplât inte vierte passade. E di chê volte a’nd è stade une sglavinade di ferbintis condanis de bande dai diret interessâts, vâl a dî de popolazion rapresentade dai Comuns e dai sindics, dai Comitâts, de Comunitât di Mont, dai operadôrs turistics, dai Coltivadôrs, dal Wwf, di Legheambient, dal Cai e de Provincie di Udin: ducj intune. (Cualchidun al domandarà: e i partîts? A sono juste apont partîts, o sei assents).

    I cjargnei a son clâr e net contraris al eletrodot a alte tension, parcè che si sta progjetant di violentâ impreteribilmentri la Val de Bût (Cjanâl di San Pieri), aes spalis e su la piel di cui che alì al loghe. Fassis disboscadis, entimis altis 60 metris, savoltament dal ambient naturâl e agricul, degrât di monuments e des storichis Plêfs: chestis lis prospetivis. Il dut parcè che dôs gruessis industriis dal Glemonàs (Ferieris Nord e Fantoni), che a àn promovût l'iniziative, a tiraressin fûr dai vantaçs, comprant inte daprûf Carintie energjie a coscj sbassâts. In vê di dâ di une tâl dissipazion, che e comprometarès lis za limitadis fonts di redit, agriculture e turisim (par no fevelâ dai presumûts dams ae salût, divignints dal incuinament eletromagnetic), i cjargnei dal Cjanâl di San Pieri si viodin svintulâ di une bande impromissions (di lavôr temporani par operaris), e di chê altre menacis (lis industriis a podaressin sierâ la lôr ativitât). In sumis un pocje di carote e un pôc di baston.

    Bielzà sul scomençâ de polemiche il president de Regjon, cundut governadôr Riccardo Illy, al veve imprometût di scoltâ i sindics e chês altris rapresentancis dal teritori, par ridusi i dams. No sai ce che di dut chest al  pò sei vignût fûr. Il fat al è che, al contint il cavalîr dal lavôr Dree Pittini, Illy al è cun lui e cun so cusin, l'inzegnîr Zuan Fantoni: “La Regjon e je cun nô, ancje il president Illy nus al à confermât plui voltis”. Cussì i tecnics a àn bielzà scomençât, di scuindon, a meti jù pichets ca e là, tacant di Cjavaç e presumint lis pussibilis tratis ( ma al è za partît un espost ae Procure de republiche di Tumieç). Al è impussibil riferî intai limits di un articul lis simpri plui cressints vôs di contrarietât aes gnovis piramidis di açâr. Al bastarà dâ une voglade ai titui dai gjornâi: “No fuart e slargjât al eletrodot”, “No ae corse ai eletrodots”, “No si pò dâ in afidament la propie politiche a impresis privadis”, “Un sproposetât impat ambientâl che nol covente”, “La Cjargne no vûl jessi une tiere di concuiste”, “No ai progjets calâts dal alt”, “No di siet Comuns e de Provincie”, “No esistin dome lis industriis”. E vie di chest pas. No vorès che la Bût e deventàs doman dome un ricuart.

    Il dì di San Martin (ai 11 di novembar stât n.d.r.), daspò une “conference dai servizis” alì dal Ministeri des infrastruturis di Rome, rivade insom cuntun nuie di fat, e je vignude une sclete declarazion dal assessôr regjonâl Lodovico Sonego: “La maiôr competitivitât che Fantoni e Pittini a otignaressin graziis ae energjie eletriche che e diven dal Austrie e puartarès daurman dai vantaçs sevi sul lavôr dipendent sevi sul indot, rapresentât soredut des ditis artesanis. La Regjon e cjale cun favôr al gnûf eletrodot”. Dutun in chel Sonego al palesave il pussibil pericul di delocalizazion des dôs “grandis industriis”, biel che, realizant il progjet, si vierzarès invezit une pussibilitât di ocupazion par 900 operaris. In fin, ce che plui al è impuartant: “il sparagn in monede su la brucje. Par Pittini la realizazion dal eletrodot si tradusarès intun vantaç competitîf di 11 milions e 700 euros ad an; par Fantoni il vantaç al sarès impen di pôc plui di 3 milions di euros”. Nol à sclarît l'assessôr (di çampe) se la monede e larès almancul in part, diretementri o indiretementri, ancje ai operaris.

    Daspò la prospetive dai vantaçs, la prevision dai disvantaçs. Pittini: “Cence eletrodot la mê aziende e larès al mancul. O soi un imprenditôr, non un benefatôr”. Stes discors par Fantoni: il sparagn sul energjie “nus permetarà di mantignî almancul i puescj di lavôr che o vìn cumò”. Cence meti in cont che ator des dôs aziendis a son ativis “centenârs di piçulis impresis, che se no a saressin obleadis a ridimensionâsi”. In sumis: o mangjâ chest paston, o saltâ chel barcon. Prontis, lis piçulis impresis a metisi intune par dâ sù parie une ciulade di dolôr, esprimintsi cun frasis elocuentis come: “baste a ciert ecologjisim”, “moviments cualuncuiscj”, “ambientalisim fanatic”, “isterisim coletîf”. No àn zontât: “nô o larin dilunc istès pe nestre strade”.

    Dut câs daspò tantis protestis e daspò mês di spiete, cualchi cjosse si môf. Intant a son partidis di Triest letaris di vualivament, a sindics e predis. Po si è davuelt un incuintri-scuintri a Trasâgas, cul assessôr vût iniment e i rapresentants des zonis interessadis. Al pararès che, di bande di cui che al comande, si puedi rivâ a un ripensament. Ilusions. Ae fin - di front ai interès particolârs di cualchi miâr di cjargnei (!) al cjaparà la volte “l'interès gjenerâl” rivendicât di Sonego: simpri che al sedi agradît ae societât Alpe Adria Energjie, proponint l'eletrodot. L'ufierte di metri dentri doi esperts tal comitât tecnic (un pe Regjon e chel altri pai ents locâi) al varà il valôr di une onte. Po e scomençarà la manovre de ponte.  Une grande, storiche, manifestazion di proteste parcè che la Cjargne no vegni inmò une volte penalizade si è davuelte a Tumieç, ai 15 di dicembar stât: plui di mîl di lôr cun a cjâf il Vescul Brollo. Dutun in chel a Triest (tant la Cjargne e je in Friûl) dut al va indenant, come simpri, cu la tatiche e no cu la strategjie. Al mancje, ma viôt ce cumbinazion, un plan energjietic regjonâl. Viodûts i clârs di lune, o scugnìn domandâsi cumò: ce fasaraial il Princip? Laraial daûr dal Machiavelli, che al laudave il Borgia par vie che al jere dispietât? A Triest e je usance a dî: “Coi bezzi se fa tutto”.   (zuanfranc  d'aronco)