Numar  dal mês

LETARIS  DE  FURLANIE
I furlans e i gjornâi

TAI PRÂTS DE CULTURE DE TIERE LADINE :
Tras - forum culturel : dîs agns di presince

TAI  PRÂTS  DE  CULTURE  FURLANE
Coròt pe leteradure ladine dal Friûl

   
O vorès che un politolig o un sociolig o un psicolig o un psicanalist (e mi fermi) di dipleassin parcè che ciertis personis a son puartadis - al contrâr di ce che si varès di spietâsi - a lâ daûr cun tun fâ sotan, 'es sieltis personâls e interpersonâls, dai oltrans impen che dai lôr di famee, dai forescj impen che dai paisans, dai stranis impen che di chei de propie etnie. No mi riferìs 'es personis mancul dotadis e mancul preparadis: si sa che, timp o tart, a van dulà che je mene il vint. Al è palês dal rest che la cussì clamade opinion publiche  e je metude adun di pôs di lôr, come ch'a son istès pôs chei ch'a movin lis flotis de int.

    Ju istruments adats a son tes lôr mans, e i moderns mass media a moltiplichin po l'efiet cun pregression geometriche. La storie e je fate di une minorance, si lu sa. Chei ch'a rìvin a lâ indenant tal ben o tal mâl si mòvin di protagoniscj, juste cemût ch'a fâsin i prins tenôrs tes oparis lirichis, ch'a àn justeapont la corâl che ur va daûr parie cui figurants. Ma vignìn a nô, valadì a un discors plui particulâr e concret.

    O stenti a capî parcè i compuartaments vûts iniment denant trat a rìvin a palesâsi come tipics di une cierte part, ossei la part de intelighenzie nostrane.

    Cierts rapresentants, magari ancje innomenâts, di cheste fradae sociâl vulintîr a rinunziin a sintîsi furlans, a vê cussience (no dîs orgoi) di fâ part di une tradizion specifiche e di une propie culture (no dîs etnie). E chest intant ch'a son pronts, atrats dal diviers e dal gnûf, a considerâ cun atenzion e rispiet ogni cualsisei âtre tradizion culturâl, parcè che - lôr a proclamin: vè la clâf di volte - si sìntin "citadins dal marimont".

    Parcè, mi domandi, cheste int vadie in brûd di violis par dut ce ch'al è lontan e che s'impâr grant e desiderabil? Parcè rìvie a rineâ e a  voltâ lis spalis a chê che Rasim di Volveson al clamave "la patrie mê" ch'e je "logade tra la mont e il mâr", centade de bande di bonât de "Levince come perpetue risultive" (e a jevât dal Timâf cun misteriôse mont: ma cheste dal Timâf e je une mê licence poetiche). Parcè dut ce ch'al è nestri al ven considerât dai tarts imitadôrs di madame Bovary cualchi cjosse di sclagn e di pôc valôr? A fâsin dibot tenarece. Si sa  che la jerbe di cui ch'al loghe di là de nestre spaltade e je simpri plui verde, e che i snob a son simpri stâts e simpri a saran. Ma cheste "nonchalanche" fûr dal vade par  dut chel ch'al è achì di nô, pes nestris cjossis, pe nestre nature, pai nestris paîs e sitâts, pes nestris radîs al vûl dî, mi semee, prime di dut une rinunzie a se stes, a ce che si dovarès jessi e no si è.

    Naturalmentri a indetâ  chest compuartament e  pêse la presince simpri plui cressint, sore il dut tai centris gruês, di int vignadice. Cussì (o voi inmò plui a fons tal particulâr), l'amirazion par dut ce ch'al è diviers de nestre culture e nas ancje dal sbisiôr di lâ fûr di cjase, di lassâ il borc de propie nassince considerât ordenari, di podê tirâsi sù parsore de gramece dal prossim e di lâ idealmentri a fâ part di centis plui slargjadis e plui apajants sot ducj i aspiets. Al è juste dibant ocupâsi di poesie popolâr, al sentenziave chel tâl che s'intardave a lei dome Dante. In sumis "cupio dissolvi". E intant che chescj malpazients "parvenus" a cròdin di no jessi plui provinciâi, parvie ch'a van fûr anime e cuarp de provincie dulà ch'a son nassûts, ossei de lôr tiere mari, e si tòrnin justeapont a batiâ citadins dal marimont, no s'incuargin invezit di jessi apolids valadì cence une patrie. A son vadè provinciâi denant daûr. Guai a cui ch'al pant la sô divignince. Al semee che il fastidi primari di cheste int (ch'e à rinunziât par simpri ae propie identitât) al sedi nome chel di dismenteâ e di fâ dismenteâ a chei daprûf e a chei lontans lis lôr radîs. In pulitiche i nestris amîs a àn in stomeeç i problems locâi. Al semee che dome cui ch'al diven di di là dal flum al sepi fâ il menadôr, simpri che no o savedin dâsi la pueste dai volonterôs sotans.

    Volêso propit i nons? Se no i nons, i toponims. Parcè che a Pordenon citât (in provincie la realtât e je divierse) e a Gurize (iden come denant) si à miôr cjalâ, massime de bande di cui che in chest moment al conte alc, plui a bonât o plui a jevât  impen che a Udin, che purpûr e je il capolûc di chê cumun "regjon naturâl" cemût che la clamà cun tune induvinade intuizion Pacific Valussi? Parcè cierts si sintino  unmond apajâts tal siervî Triest, lôr furlans, invezit che il Friûl?  Parcè si ajal miôr jessi guviernâts di âtris, invezit che autoguviernâsi? Forsit parcè che de parintât furlane nol è di fâ cui sa ce afidament? Parcè che si è stâts ufindûts cui tal 1923,  cui tal 1963? Parcè che a Udin, logade tal mieç di une regjon vive e vivarôse ( mentri di âtris bandis si tire indenant a sun di repeçs) no si vûl daj la sodisfazion? O parcè che si pò cjatâ la fate di metisi d'acuardi, sore il dut su lis cjossis materiâls, plui facilmentri e diretamentri cun cui che, contentant vuê Pordenon e doman Gurize al indebilìs Udin ossei il Friûl?

    Un personaç di di là dal Tajament al à declarât di resint che: "Lis batais su la furlanetât no interessin gran". E un âtri personaç di di là dal Judri: "No si ricognossìn tal Friûl storic, ch'al rapresente une trate di storie negative dal nestri passât" (sic). Ce si puedial dî? La rispueste ai politoligs o ai socioligs o ai psicoligs o ai psicanaliscj.           (Zuanfranc D'Aronco)

(test tirât fûr dal "Messaggero Veneto" dai 8 dicembar 2004 e voltât par cure de redazion)

DAI  FATS  E  DE  CULTURE DES  TIERIS  LADINIS